CAWN DINGMI 40
Pathian Mithmuh Ah Zeitindah A Thiangmi Kan Si Khawh?
Dawtnak a ngeimi nu pakhat nih a fapa sianginn kai dingin timhcia a si nakhnga a timhtuah tiah na mitthlam ah cuanter hmanh. Ti a kholh i a thil kha a thian le thian lo a zohpiak. Mah nih a ngan a damter i midang zong nih a nu le a pa nih ṭha tein an zohkhenh ti kha an hngalh. Cu bantukin kan dawtmi kan Pa Jehovah nih pumsalei le ziazalei ah thiang tein um hna seh ti a kan duh ve. Thiang tein kan um tikah kanmah theng ṭhathnemhnak kan hmu i mah nih Pathian thang zong a ṭhatter.
1. Pumsalei ah zeitindah thiang tein kan um khawh?
Jehovah nih “nannih zong nan thian ve awk a si” tiah a kan ti. (1 Peter 1:16) Thiang tein um khawh awkah pumsalei he ziazalei he thiang tein kan um a hau. Hmaan tein ti kan i kholh, kan thilpuan, kan inn, kan mawṭaw le kan cycle pawl thiang tein kan chiah pengnak thawngin pumsalei ah thiang tein kan um kho. Cun Biakinn a thian nakhnga zong kan bawmh khawh hna. Pumsalei ah thiang tein kan um pengnak thawngin Jehovah thang kan ṭhatter.—2 Korin 6:3, 4.
2. Thiang tein um awkah zei ziaza hna dah kan hrial awk a si?
Baibal nih “pum siseh, thlarau siseh, a thurhnomhtertu paohpaoh kha i thenh u” tiah a kan forh. (2 Korin 7:1) A sullam cu kan pum le kan lungthin a thurhnomhtertu thil paohpaoh kha kan hrial a hau tinak a si. Kan ruahnak zong nih Jehovah lung kha a lawmhter awk a si. Cucaah aa tlak lomi ruahnak kha hloh awkah kan si khawh chungin kan i zuam. (Salm 19:14) Cun a thiangmi holh lawng chim peng ding zong in kan i zuam.—Kolose 3:8 rel.
Zeinihdah pumsalei asiloah lungthinlei ah a kan thurhnomhter khawh rih? Cheukhat thilri hna nih kan pum kha a thurhnomhter khawh. Cucaah khuhsi, kunza, khaini le ritnak sii hmangin nuamhnak tuah ti bantuk hna kha kan hrial. Mah thil hna kan hrialnak thawngin kan ngan a dam deuh i nunnak laksawng kan upat ti kan langhtermi zong a si. Cun mah tein di i riamternak le a thurhnawmmi hmanthlak zoh ti bantuk a ṭha lomi tuahsernak hna kan hrialnak thawng zongin ziazalei ah thiang tein um awkah kan i zuam. (Salm 119:37; Efesa 5:5) Cu bantuk ziaza hna doh cu a har kho men. Asinain cutin doh awkah Jehovah nih a kan bawmh khawh.—Isaiah 41:13 rel.
TAM DEUH IN HLATHLAI
Pumsalei ah thiang tein umnak nih Jehovah thang a ṭhatter ning kong le a ṭhalomi tuahsernak doh khawh ning kong kha hlathlai.
3. Pumsalei thiannak nih Jehovah thang a ṭhatter
Jehovah nih Israel miphun pawl a pekmi hna nawlbia kan rel tikah a miphun pawl nih thiang tein an ummi cu a caah zeitlukin dah a biapit ti kha kan hngalh. Exodus 19:10 le 30:17-19 rel law mah biahalnak hna hi i ruah u:
-
Mah Baibal caang nih pumsalei thiannak kong he aa tlaiin Jehovah hmuhnak kha zeitindah a langhter?
-
Zei a ṭhami ziaza nih dah pumsalei ah thiang tein um peng awkah aan bawmh lai?
Pumsalei thian awkah a caan le thazaang chuah a hau. Asinain khoika hmun ummi kan si ah, mirum asiloah misifak kan si hmanhah cutin kan tuah khawh ko. VIDEO kha piah, cun a tanglei biahalnak hi i ruah u.
-
Phung kan chimhmi hna nih kan thilri a thianmi an hmuh ahcun zeicah Jehovah kha an upat chin lai?
4. A ṭhalomi ziaza hna kha ngol
Jehovah nih zei bantuk a ṭhalomi ziaza paoh ngol awkah a kan bawmh khawht
Kuak a zumi asiloah nuamhnak caah ritnak sii a hmangmi na si ahcun mah a ṭhalomi ziaza ngol cu zeitlukin dah a har ti kha na hngalh ko lai. Zeinihdah aan bawmh khawh? Mah ziaza nih zeitlukin dah aan hnorsuan ti kha ruat. Matthai 22:37-39 rel law khuhsi asiloah ritnak sii hmannak nih mi a hnorsuan hna ning kong kha i ruah u . . .
-
mi pakhat le Jehovah an i hawikomhnak ah.
-
mi pakhat i a chungkhar le a pawngkam ah a ummi midang.
A ṭhalomi ziaza ngol khawh awkah timhtuahnak ngei. a VIDEO kha piah.
2 Korin 4:7 rel law mah biahalnak hi i ruah u:
-
Hmaan tein thlacamnak, Baibal hlathlainak le i pumhnak nih mi pakhat kha a ṭhalomi ziaza ngol awkah zeitindah thazaang a pek khawh?
5. A ṭhalomi ruahnak le tuahsernak hna kha do
Kolose 3:5 rel law mah biahalnak hna hi i ruah u:
-
A thurhnawmmi hmanthlak, sexting b le mah tein di i riamter cu Jehovah mithmuh ah a thiang lomi an si ti kha zeitindah kan hngalh khawh?
-
Jehovah nih kan sinin ziazalei ah thiang tein um awkah aa ruahchanmi cu aa tlak tiah na ruat maw? Zeicah?
A ṭhalomi ruahnak doh khawh ning kong kha hlathlai. VIDEO kha piah.
Ziazalei ah thiang tein um peng awkah biakhiahnak kan tuah a hau ti langhter awkah Jesuh nih tahchunhnak kha a hman. Matthai 5:29, 30 rel law mah biahalnak hi i ruah u:
-
Mah Baibal caang hi Jesuh nih kanmahle kanmah pumsalei ah harnak kan i pek awk a si a ti duhnak si loin kan tuahsernak in kan langhter a hau a ti duhnak a si. Mi pakhat nih a ṭhalomi ruahnak a hrial khawh nakhnga zei thil hna dah tuah dingin bia a khiah khawh? c
A ṭhalomi ruahnak ngol awkah naa zuam ahcun Jehovah nih naa zuamnak kha a sunsak. Salm 103:13, 14 rel law mah biahalnak hi i ruah u:
-
A ṭhalomi ziaza doh awkah aa zuammi na si ahcun doh peng awkah mah Baibal caang nih zeitindah thazaang aan pek?
A ṭhalomi thil a tuah ṭhan lengmangmi pakhat cu a sung tinak a si lo
‘Ka sungh caah ka lung a donghmi a si’ tiah ruah cu a fawi kho men. Asinain mah kong hi ruathmanh: Tlik aa zuammi pakhat cu aa tengh ca le a tluk caah a kawltung a phan ti lai lo i a tlik ṭhan awk a si ti lo tinak a si lo. Cu bantukin a ṭhalomi thil a tuah ṭhan lengmangmi pakhat zong a ṭhalomi ziaza dohnak ah na sung tinak a si lo. Mah nih na rak tuah cangmi ṭhanchonak vialte kha a hrawh dih tinak zong a si lo. A ṭhalomi thil tuah ṭhan lengmang cu a phung a si ko. Mah cu i zuam ṭhan khawhnak lam cheukhat a si ve. Cucaah na lung dong hlah. Jehovah bawmhnak thawngin a ṭhalomi ziaza kha na ngol khawh ko.
MI CHEUKHAT CHIMMI: “A ka leem cang i ka ngol kho ti lo.”
-
Mi pakhat sinah a ṭhalomi ziaza cu Jehovah bawmhnak thawngin ngol khawh a si ko ti kha hmuhsak awkah zei Baibal caang dah na hman khawh?
A TAWINAK
Kan pum, kan ruahnak le kan tuahsernak ah thiang tein kan um pengnak thawngin Jehovah lung kha kan lawmhter.
I Ruahṭi Ṭhannak
-
Thiang tein um peng cu zeicah a biapit tuk?
-
Pumsalei ah zeitindah thiang tein na um peng khawh?
-
Na ruahnak le na tuahsernak ah zeitindah thiang tein na um peng khawh?
HLATHLAI CHAP
Thilri tampi na ngeih lo hmanhah pumsalei ah thiang tein um awkah a sawhsawhte a simi zei thil hna dah na tuah khawh?
Kuakzuk na ngol khawh nakhnga zulhawktlakmi kehlan kong hna kha hlathlai.
“Kuakzuk Ngol Khawh Ning” (2010, May, I Hlau!)
A thurhnawmmi hmanthlak ruangah a chuakmi kong kha hlathlai.
“A Thurhnawmmi Hmanthlak Cu Ṭih A Nung Maw, A Nung Lo Dah?” (Vennak Innsang capar)
Pa pakhat a thurhnawmmi hmanthlak zohnak nih a leemmi a ngol khawh ning kong kha hlathlai.
“Voi Tampi Ka Sung Nain A Donghnak Ah Hlawhtlinnak Ka Hmu” (Vennak Innsang capar)
a Mah cawn dingmi chung i Hlathlai Chap timi tang ah a ummi “Kuakzuk Ngol Khawh Ning” timi cazin ah kuakzuk ngol khawh awkah zulhawktlakmi kehlan kong kha a fianter.
b Nupa sualnak kong fiang tein a langhtermi ca, hmanthlak asiloah video hna phone in i kuat kha sexting tiah an auh.
c Mah tein di i riamternak ziaza kha ngol awkah, “Mah Tein Di I Riamternak Ziaza Kha Zeitindah Ka Ngol Khawh?” Mino Pawl Biahalnak—Hmual Ngeimi Lehnak timi cauk, Uk 1nak, ṭhen 25 ah zoh.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
