UKPEPN̄KPỌ 40
Nso Idinam Nnyịn Isana ke Enyịn Abasi?
Kere ban̄a eka emi an̄wamde eyen yak etịm idem uka ufọkn̄wed. Enye oyokụt ete ke eyen oro eyere mmọn̄ onyụn̄ esịne ọfọn̄ emi asanade. Oro idiyakke eyen oro ọsọp ọdọn̄ọ, oyonyụn̄ owụt ke enye akama eyen oro ọfọn. Ukem ntre, edima Ete nnyịn Jehovah oyom nnyịn isana ke kpukpru usụn̄—enye oyom nnyịn isana idem, oyom esịt ye ekikere nnyịn asana, inyụn̄ iyomke nnyịn isitịn̄ m̀mê isinam se idehede ke enyịn esie. Edieke isanade, edidi ke ufọn nnyịn; oro oyonyụn̄ ada ubọn̄ ọsọk Jehovah.
1. Didie ke ikeme ndisana idem?
Jehovah ọdọhọ nnyịn ete: “Mbufo ẹnyene ndidi edisana.” (1 Peter 1:16) Ndidi edisana asan̄a n̄kpọ ye owo ndisana idem nnyụn̄ ndu uwem nte Abasi ọdọhọde. Edieke isiyerede mmọn̄, iyetde ọfọn̄ nnyịn asana, isinam ufọk ye n̄kpọisan̄ nnyịn asana, oro owụt ke imasana idem. Imekeme n̄ko nditiene nnam Ufọkmbono Obio Ubọn̄ asana. Edieke isanade idem, iyanam ẹnọ Jehovah ubọn̄.—2 Corinth 6:3, 4.
2. Nso ye nso ke ana inam man isana ke enyịn Abasi?
Bible ọdọhọ ete yak “iyet kpukpru se isabarede obụkidem ye spirit ifep ke idem nnyịn.” (2 Corinth 7:1) Ọwọrọ ana ikpeme idem ye n̄kpọ ekededi emi ekemede ndibiat nnyịn n̄kpọ ke idem m̀mê ndibiat nnyịn ibuot. Inyụn̄ inaha isitie ikere ndiọi n̄kpọ sia se Jehovah amade ke ana isikere. (Psalm 19:14) Ọfọn ikpeme idem n̄ko man ikûsutịn̄ ndiọi ikọ.—Kot Colossae 3:8.
Nso en̄wen ikeme ndinam nnyịn ikûsana idem m̀mê ikûsana ke enyịn Abasi? Enyene ndusụk n̄kpọ emi esibiatde owo n̄kpọ ke idem. Ntak oro anam nnyịn ikûsun̄wọn̄ke sika, ikọn̄ekpo, m̀mê n̄kpọ ntre. Nnyịn isinyụn̄ idaha ọkpọsọn̄ ibọk man ida ikop idem inem. Ndien emi anam mme n̄kpọ ntre ikemeke ndinọ nnyịn udọn̄ọ, onyụn̄ owụt n̄ko ke imama uwem emi Abasi ọnọde nnyịn. N̄kpọ en̄wen oro isinam man isana ke enyịn Abasi edi nditre ndifiọn̄ọ ndido idan̄ nnyịn n̄kop uyụhọ ye nditre ndise ndise idan̄. (Psalm 119:37; Ephesus 5:5) Imọdiọn̄ọ ke esisọn̄ owo nditre mme n̄kpọ emi, edi Jehovah ekeme ndin̄wam nnyịn.—Kot Isaiah 41:13.
SỊN IDEM KPEP
Se nte nnyịn ndisana idem ekemede ndinọ Jehovah ubọn̄ ye nte ikemede nditre n̄kpọ emi esinamde owo edehe ke enyịn Abasi.
3. Iyọnọ Jehovah ubọn̄ edieke isanade idem
Edieke itịmde ise ibet oro Jehovah ọkọnọde nditọ Israel eset, iyọdiọn̄ọ nte Jehovah adade usanaidem. Kot Exodus 19:10 ye 30:17-19, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso n̄kpọ ke itie Bible iba oro iwụt adan̄a nte Jehovah adade usanaidem?
-
Nso ye nso ke akpanam man asana idem kpukpru ini?
Owo isitiehe-tiehe ntre isana idem; esiyom ini, esinyụn̄ oyom isịn ukeme. Imekeme ndisana idem, inamke n̄kpọ m̀mê itie ewe ke idụn̄ m̀mê idi imọ m̀mê ubuene. Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
-
Nso ke ndisana idem ye nditịm n̄kpọ nnyịn n̄kama edinam mme owo ẹnen̄ede ẹnam ẹnọ Jehovah ke ini ikwọrọde inọ mmọ?
4. Tre se mîfọnke
Jehovah ekeme ndin̄wam nnyịn itre se mîfọnke
Ekpedi emesin̄wọn̄ sika m̀mê ada ọkpọsọn̄ ibọk man okop idem inem, ọmọdiọn̄ọ ke esisọn̄ nditre. Nso ikeme ndin̄wam fi etre? Kere se enye anamde fi. Kot Matthew 22:37-39, ekem ẹneme nte ọkpọsọn̄ ibọk, sika, m̀mê n̄kpọ ntre . . .
-
esinamde owo okûdi ufan Jehovah
-
esisuande ubon m̀mê esitiede mbon emi ẹkperede nnyịn
Biere se afo edinamde man etre se mîfọnke. a Se VIDIO emi.
Kot Philippi 4:13, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke akam, ndikpep Bible, ye ndisidụk mbono esop esin̄wam owo etre se mîfọnke?
5. Kûkere se mîfọnke, kûnyụn̄ unam se idehede
Kot Colossae 3:5, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso iwụt ke ndise ndise idan̄, ndinọ owo utọ ndise oro ke fon, ye ndifiọn̄ọ ndido idan̄ n̄kop uyụhọ ẹdehe ke enyịn Jehovah?
-
Ndi emekere ke ọfọn nte Jehovah ọdọhọde nnyịn ete idu edisana uwem? Nso inam ọdọhọ ntre?
Se se idin̄wamde nnyịn ikûsukere se mîfọnke. Se VIDIO emi.
Jesus ama ọnọ uwụtn̄kpọ emi owụtde ke ana isọsọp ikpọn̄ se mîdiyakke nnyịn isana ke enyịn Abasi. Kot Matthew 5:29, 30, ekem ẹbọrọ mbụme emi ẹnyụn̄ ẹneme ẹban̄a enye:
-
Ikọ Jesus ikọwọrọke ke ana ibiomo idem nnyịn ndo, edi ọkọwọrọ ke ana inam n̄kpọ. Nso ke owo ekeme ndinam man etre ndikere se mîfọnke? b
Edieke esịnde ukeme odomo nditre se mîfọnke, Jehovah okụt ukeme fo. Kot Psalm 103:13, 14, ekem ẹbọrọ mbụme emi ẹnyụn̄ ẹneme ẹban̄a enye:
-
Edieke ọsọn̄de fi nditre se mîfọnke, nso n̄kpọ ke itie Bible oro anam fi ebiere ndika iso ndomo nte ekekeme man etre mmọ?
Afo emekeme ndikan!
Afo emekeme ndikere ke imọ idikemeke nditre se mîfọnke. Edi ti ke owo ekpefehe mbuba anyan itọk ọkọduọ ke usụn̄, oro iwọrọke ke ẹkan enye ke mbuba oro, inyụn̄ iwọrọke ke enye edifiak ikọtọn̄ọ ke akpa. Ukem ntre, edieke ifiakde inam se idomode nditre, iwọrọke ke nnyịn idikemeke nditre tutu amama. Inyụn̄ iwọrọke ke ofụri se ikanamde atak. Ti ke se isiwakde nditịbe edi oro owo ama odomo nditre se mîfọnke. Kûkpa mba. Jehovah ayan̄wam fi etre se mîfọnke.
NDUSỤK OWO ẸSIDỌHỌ ẸTE: “N̄kpọ ama ekemehe mi emehe. Ndikemeke nditre.”
-
Ewe itie Bible ke akpada owụt utọ owo oro ke Jehovah ekeme ndin̄wam enye etre se mîfọnke?
SE IKPEPDE
Esinem Jehovah enye ama okụt nte nnyịn isanade idem, ikerede nti n̄kpọ, inyụn̄ inamde nti n̄kpọ.
Se M̀mê Emeti
-
Ntak emi enen̄erede ọfọn owo asana?
-
Nso ke akpanam man esisana idem?
-
Nso ke akpanam man esikere nti n̄kpọ onyụn̄ esidu uwem emi mîdeheke ke enyịn Abasi?
KPEP N̄KPỌ EN̄WEN
Ewe n̄kpri n̄kpri n̄kpọ ke akpanam man asana idem, ekpededi udịghe imọ owo?
Se se ekemede ndinam man etre sika ye mme n̄kpọ ntre.
Se se ndise idan̄ ekemede ndinam owo.
“Ndi Ndise Idan̄ Esinam Owo N̄kpọ?” (Enyọn̄-Ukpeme, August 1, 2013)
Se se ikan̄wamde ete kiet etre ndisise ndise idan̄.
“Ama Ada Ini Mbemiso N̄kemede Ndinam N̄kpọ Abasi” (Enyọn̄-Ukpeme No. 4 2016)
a Se ibuotikọ emi “Se Isin̄wamde Owo Etre Sika,” ke oyokụt nte owo akpanamde etre utọ n̄kpọ nte sika. Ibuotikọ oro odu ke Kpep N̄kpọ En̄wen, eke ukpepn̄kpọ enye emi.
b Okpoyom ndiọn̄ọ se idinamde fi okûsufiọn̄ọ ndido idan̄, se ibuotikọ emi “N̄kpanam Didie Ntre Ndisifiọn̄ọ Ndido Idan̄ N̄kop Uyụhọ?” ke n̄wed emi Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 1, ibuot 25.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
