Éyòng nnyia a komesen mòn woé asu yi na a ke a zukulu, a bebe nge a ne mfuben ai biyié bié bise; amu a yem na, nala a vòli mòn na a bò mvòè mfaa ya minson. Éyòng mòngò a ne mfuben, nala a lere na bebondé boé ba nòng ndzug ai nyè. Éye fe Ésia waan ya yob a yangʼen na bi tòbò mfuben nala a nyòl ai a nsisim. Éyòng bi ne mfuben a nyòl ai a nsisim nala a vòli bia na bi tòbò mvòè mfaa ya minson ai mfaa ya nsisim, bi nga ve fe Yéhova duma.

1. Dzé ya tilen na a tòbò mfuben?

Yéhova a ve bia abéndé di na: “mia yeane bò mimfufub” (1 Pétrus 1:16). A tòbò mfufub a tilen na o tòbò mfuben a nyòl ai a nsisim. Ai a tòbò mfuben a nyòl a tilen na o waba, o bòt é biyié bi ne mfuben, o bò fe étòbega dzoé, metua woé, man afub woé ai biem bise bivòk mfuben. Mot ose a ne fe dzam vòli a bò mfuben abaa Édzoé, amu éyòng bi ne mfuben, nala a ve Yéhova duma (2 Kòrinti 6:3, 4).

2. Mefulu mefé wò yeane dzogè asu yi na o tòbò mfuben?

Bibel a dzo a sang na “mfubugen biabeben mfaa ya mvit ya nyòl ai a nsisim” (2 Kòrinti 7:1). Nala a tilen na bia yeane saala é dzom ése é ne bi bò ékòl obak mfaa ya nyòl, a nsisim ai akomoro. Asu yi na mintsogen miaan mi fû Yéhova a nnem, bia yeane ve évak ai ngul ése asu yi na bi tsiren a nlo waan é mam ma yeane ki (Salmen 104:34). Bia yeane fe bò okala ai é mam ma kui bia anyu (Langʼa Kolosi 3:8).

Mam mefé me ne bò na bi tòbò mvit? Biem bizing ane taa, nge banga bi ne abé abui. Bia yeane fò biè saala. É mot a nyu ki taa nge banga a ne mvoè mfaa ya minson aloro é nyò a bò dò, a lere fe na énying é ne éfaa é ne édima. A tòbò mfuben a nsisim a tilen fe na a saala mvit mam ya bisok ane a fig nsò woé (masturbation) ngeki mbòen o ne na mot a nòng fulu ya bebe pornographie (Salmen 119:37; Éfési 5:5). A seki ébugubu na bia dzogè mbòen mvit mam meté, ve bi ne dzam bi afiri na Yéhova a yi bi vòli (Langʼa Yésaya 41:13).

 TUENE FAG

3. Mfuben wa ve Yéhova duma

Memvéndé Yéhova a nga ve bòn be Israel ma lere akia ya a yen mfuben. Langʼa Exodus 19:10 ai 30:17-19, ai yalen minsili mi tsaa mi:

• Dzé bifus bi Bibel bi bia yegele bia é bebege akia ya Yéhova a yen mfuben?

• Dzé bia yeane bò asu yi na bi tòbò mfuben?

Bia yeane nòng abog ai a ve mengul asu yi na bi baala nyòl dzaan ai é biem bia belen ai biè mfuben. Bia bese bi ne kui na bia bò dò, afiangʼen bò na bi ne mebua ngeki é vom bi toa. Bebege VIDÉO, ai yalen a nsili hi:

• Nge bi ne mfuben, bi yem fe tak é biem bia belen ai biè, dzé é bot bia kat foé be ne dzam tsog?

4. Akia afé bi ne dzam dzogè mvit mimbòen

É mot a nòng taa nge banga a yem mbeng mbeng na é ne ayié ya kèène ai fulu té. Nge wò fe o tele akia étié té, tsogo akia ya mam meté me ne ndamen énying dzoé. Langʼa Matéus 22:37-39 ai yalen a nsili hi: Nge mot zing a nòng taa nge banga, akia afé dzam té a ne dzam ndegele . . .

• amvoé dié ai Yéhova.

• nda bot dzié ai é bot be toa nyè a ngòra.

Komesen akia ya wò yi lumen ai mbòen té a. Bebege VIDÉO.

Langʼa Filippi 4:13 ai yalen a nsili hi:

• Éyòng wò lumen ai mvit mam zing, akia afé ngogelen, ayègè Bibel ai bikoen bi ne wò vòli?

 5. Akia afé bi ne lumen ai é mam ma ve mintsogen ai mimbòen miaan mvit

Langʼa Kolosi 3:5 ai yalen minsili mi tsaa mi:

• Asu dzé bi ne dzo na pornographie, sexting, éfigili nsò (masturbation) bi ne é mam me ne mvit a mis me Yéhova?

• Éyòng Yéhova a dzo ai bia na bi tòbò mfuben mfaa ya nsisim, ye nala a tilen na a sili bia é dzam da lot bia nkong ngaa? Asu dzé?

O ne dzam lumen ai mvit mintsogen. Bebege VIDÉO.

Yésus a nga belen ai mvulna zing asu yi na a lere bia é dzom bi ne bò mbol yi na bi tòbò mfuben mfaa ya nsisim. Langʼa Matéus 5:29, 30 ai yalen a nsili hi:

• Yésus a mbe dzo ki na o bò wòmen é dzam a ne abé, ve na o ve mengul asu yi na o dzogè bebé mimbòen beté. Akia afé o ne ve mengul asu yi na o tsiren mvit mintsogen? b

Nge wò lumen ai mvit mintsogen, yem na, Yéhova a yen mengul mese wò ve. Langʼa Salmen 103:13, 14 ai yalen a nsili hi:

• Nge wò lumen ai mvit mimbòen mizing, akia afé bifus bi Bibel bi bi ne wò vòli na o ke ai melumen meté osu?

 OBALBAS

Éyòng bi ne mfuben mfaa ya nyòl ai mfaa ya nsisim, bia ve Yéhova duma.

Dzé bia baala

• Asu dzé a ne ai nfi na bi tòbò mfuben a nyòl ai a nsisim?

• Dzé ya tilen na a tòbò mfuben?

• Dzé ya tilen na a bi mintsogen ai akol dulu a ne mfuben?