ADZESUA 40
Yebesi Dɛn Ama Hɛnho Atsew Wɔ Nyankopɔn N’enyiwa Do?
Sɛ baatan bi ne ba kakraba robɔkɔ skuul a, oguar abofra no na ɔdze atar a ɔahor na n’enyi tsew kamakama hyɛ no. Iyi ma abofra no nya apɔwmudzen dabaa na ɔma nkorɔfo so hu dɛ n’awofo rohwɛ no yie. Dɛmara na hɛn Egya, Jehovah, so yɛ. Ɔdɔ hɛn paa, na ɔpɛ dɛ yedzi hɛnho nyi na hɛn nsusui, hɛn kasaa na hɛn ndzeyɛɛ so ho tsew. Sɛ yɛma hɛnho tsew a, ɔboa hɛnankasa na ɔhyɛ Jehovah so enyimnyam.
1. Yebesi dɛn edzi hɛnho nyi?
Jehovah aka akyerɛ hɛn dɛ: “Hom nyɛ krɔnkrɔn.” (1 Peter 1:16) Sɛ yɛbɛyɛ krɔnkrɔn a, ɔsɛ dɛ hɛn abrabɔ ho tsew na yedzi hɛnho nyi. Sɛ yɛtaa guar, yɛhor hɛn ntar, na yesiesie hɛn fie nye hɛn kaar ma ɔyɛ kamakama a, ɔkyerɛ dɛ yedzi hɛnho nyi. Yebotum so aboa ma woeesiesie hɛn Ahendzi Asa do. Sɛ yedzi hɛnho nyi a, yɛhyɛ Jehovah enyimnyam.—2 Corinthfo 6:3, 4.
2. Sɛ hɛnho bɛtsew a, ebɛn ndzeyɛɛ na ɔsɛ dɛ yɛtwe hɛnho fi ho?
Bible no tu hɛn fo dɛ “yɛnhohor hɛnho mfi honam nye sunsum mu fi nyina mu.” (2 Corinthfo 7:1) Iyi kyerɛ dɛ biribiara a obotum asɛɛ hɛn nyimpadua anaa hɛn adwen no, ɔsɛ dɛ yɛtwe hɛnho fi ho. Ɔsɛ dɛ ndzɛmba a yɛdwendwen ho no sɔ Jehovah n’enyi. Ntsi sɛ adwen bi a ɔnnyɛ papa ba hɛn tsir mu a, yɛbɔ mbɔdzen yi fi hɔ. (Ndwom 104:34) Afei so, ɔsɛ dɛ yɛma hɛn kasaa ho tsew.—Kenkan Colossaefo 3:8.
Ebɛnadze bio na obotum egu hɛn nyimpadua anaa hɛn abrabɔ ho fi? Towa anaa sigarɛt, asera (snuff), na ndubɔn yɛ ndzɛmba a otum sɛɛ hɛn nyimpadua no, ntsi ɔsɛ dɛ yɛtwe hɛnho fi ho. Sɛ yɛtwe hɛnho fi dɛm ndzɛmba no ho a, ɔma hɛn apɔwmudzen yɛ papa na ɔkyerɛ so dɛ yebu nkwa a Nyankopɔn dze akyɛ hɛn no. Afei so, sɛ hɛn abrabɔ ho bɛtsew a, ɔsɛ dɛ yɛtwe hɛnho fi ahobɔ a na ponografi ho. Dɛm ndzeyɛɛ yi ho nntsew. (Ndwom 119:37; Ephesusfo 5:5) Obotum ayɛ dzen ama obi dɛ obegyaa dɛm ndzeyɛɛ yi, naaso Jehovah botum aboa hɛn ma yaayɛ nsakyer.—Kenkan Isaiah 41:13.
PƐNSAPƐNSA MU KƆ EKYIR
Ma yɛnhwɛ siantsir a sɛ yedzi hɛnho nyi a ɔhyɛ Jehovah enyimnyam, nye kwan a yebotum afa do egyaa ndzeyɛɛ a no ho nntsew.
3. Sɛ yedzi hɛnho nyi a, ɔhyɛ Jehovah enyimnyam
Sɛ yɛkenkan mbra a Jehovah dze maa tsetse Israelman no a, ɔma yehu dɛ ahotsew ho hia Jehovah paa. Ma yɛnkenkan Exodus 19:10 na 30:17-19, na yensusu nsɛmbisa yi ho:
-
Sɛ ehwɛ kyerɛwnsɛm yi a, Jehovah tse nka dɛn wɔ ahotsew ho?
-
Sɛ ibotum edzi woho nyi a, ebɛnadze na ɔsɛ dɛ etaa yɛ?
Ɔgye ber na edwumadzen paa na ama yeetum edzi hɛnho nyi da biara. Naaso, ɔmmfa ho beebi a yɛtse anaa mbrɛ hɛn sikasɛm tse biara no, yebotum edzi hɛnho nyi ma wɔaayɛ yie. Ma yɛnhwɛ VIDEO yi, na yensusu asɛmbisa a odzi do no ho.
-
Sɛ yedzi hɛn ndzɛmba ho nyi a, ebɛnadze ntsi na ɔbɛma hɔn a yɛka asɛmpa no kyerɛ hɔn no ebu Jehovah kɛse?
4. Gyaa ndzeyɛbɔn
Jehovah botum aboa hɛn ma yaako etsia suban bɔn biara
Sɛ enom sigarɛt anaa ndubɔn a, ɔno bi a ebɛgye ato mu dɛ ɔnnda famu koraa dɛ obi begyaa dɛm ndzɛmba yi nom. Ebɛnadze na obotum aboa wo? Ɔwodze, susu ɔhaw a obotum akɛfa abrɛ wo no ho. Ma yɛnkenkan Matthew 22:37-39, na yɛnhwɛ dɛ sɛ obi nom towa anaa ndubɔn a, osi dɛn ka . . .
-
ɔno na Jehovah ntamu anyɛnkofa?
-
n’ebusua nye nkorɔfo a wɔbɛn no no?
Yɛ nhyehyɛɛ bi a edze bɔko etsia ndzeyɛbɔn. b Ma yɛnhwɛ VIDEO yi.
Ma yɛnkenkan Philippifo 4:13, na yensusu asɛmbisa yi ho:
-
Sɛ obi bɔ mpaa da biara, osua Bible no, na ɔkɔ asafo nhyiamu daa a, ebɛn kwan do na iyi botum aboa no ma oeegyaa ndzeyɛbɔn?
5. Ko tsia nsusui nye ndzeyɛɛ a no ho nntsew
Ma yɛnkenkan Colossaefo 3:5, na yensusu nsɛmbisa yi ho:
-
Yesi dɛn hu dɛ ponografi, ndwamansɛm a wɔdze fa fon anaa elɛktrɔnek efir do dze mona, nye ahobɔ yɛ ndzɛmba a no ho nntsew wɔ Jehovah n’enyiwa do?
-
Jehovah pɛ dɛ hɛn abrabɔ ho tsew. Ehwɛ a yebotum a? Ebɛnadze ntsi na ereka dɛm?
Ma yɛnhwɛ VIDEO yi, na ibohu kwan a ibotum afa do ako etsia nsusui a no ho nntsew.
Jesus yɛɛ mfatoho bi a ɔma yehu dɛ ɔsɛ dɛ yɛbɔ mbɔdzen paa ma hɛn abrabɔ ho tsew. Ma yɛnkenkan Matthew 5:29, 30, na yensusu asɛmbisa yi ho:
-
Nna ɔnnyɛ dza Jesus reka nye dɛ yendzi hɛnho dzɛm. Mbom no, nna ɔrema yeehu dɛ sɛ biribi nnkɔ yie a, ɔsɛ dɛ yɛyɛ ho biribi. Ebɛn mbɔdzen na ɔsɛ dɛ obi bɔ ama oeeyi nsusui bi a no ho nntsew no efi ne tsir mu? c
Sɛ ereyɛ dza ibotum biara dze ako etsia nsusui a no ho nntsew a, hu dɛ Jehovah n’enyi sɔ wo mbɔdzembɔ no paa. Ma yɛnkenkan Ndwom 103:13, 14, na yensusu asɛmbisa yi ho:
-
Sɛ ɔyɛ dzen ma wo dɛ ebɔko etsia ndzeyɛɛ bi a no ho nntsew a, ebɛn kwan do na kyerɛwsɛm yi hyɛ wo nkuran dɛ mma mmpa abaw?
Mma mmpa abaw!
Ɔnnyɛ dzen dɛ ibenya adwen dɛ, ‘Adze yi dze, murunntum nngyaa da, ntsi ma mempɛ me beebi ntsena.’ Naaso susu asɛm yi ho hwɛ: Sɛ mbirikatunyi bi bɔ famu a, ɔno nnkyerɛ dɛ ɔawe, anaadɛ ɔsɛ dɛ ɔsan kɛhyɛ mbirikatu no ase bio. Dɛmara so na ɔtse. Sɛ ɔwɔ mu ara na wo nsa si famu wɔ mbɔdzen a erobɔ dze egyaa ndzeyɛbɔn no mu a, ɔno nnkyerɛ dɛ wo wiadze nyina aba n’ewiei, na irunntum nngyaa. Dɛmara so na ɔnnkyerɛ dɛ mbɔdzen a edzi kan abɔ no nyinara so ahyew egu. Mfom dze, ɔwɔ nyimpa ho. Ntsi, mma mmpa abaw, mma mmfa ahwease nnyɛ nda! Jehovah bɔboa wo ma eedzi suban bɔn no do konyim.
BINOM KA DƐ: “Adze yi dze, wɔaka me hɔ. Murunntum nngyaa.”
-
Sɛ obi ka dɛm a, ebɛn kyerɛwsɛm na edze bɔboa no ma oeehu dɛ sɛ ɔpɛ dɛ ogyaa ndzeyɛbɔn bi a, Jehovah botum aboa no?
DZA ESUA
Sɛ yɛma hɛn nyimpadua, hɛn adwen, na hɛn ndzeyɛɛ ho tsew a, yɛma Jehovah n’enyiwa gye.
Mbobɔdo
-
Ebɛnadze ntsi na ohia paa dɛ yɛma hɛnho tsew?
-
Ibesi dɛn edzi woho nyi?
-
Ibesi dɛn ama wo nsusui na wo ndzeyɛɛ ho atsew da biara?
HWEHWƐ PII KA HO
Sɛ innyi sika mpo a, ebɛn ndzɛmba nketsenketse na ibotum ayɛ dze edzi woho nyi?
Kenkan asɛm yi, na ibohu afotu bi a sɛ idzi do a, ɔbɔboa wo ma eegyaa sigarɛtnom.
Kenkan asɛm yi, na ibohu ɔhaw a ɔwɔ ponografi mu.
“Ponografi—Aso Asɛm Biara Nnyi Ho Anaa Ɔyɛ Hu?” (Ɔweɔn-Aban, August 1, 2013)
Kenkan asɛm yi, na ibohu adze a ɔboaa owura bi ma ogyaa ponografi hwɛ.
“Mohwee Ase Mpɛn Pii, Naaso Midzii Konyim” (Ɔweɔn-Aban No. 4 2016)
a Sɛ wɔka ahobɔ a, dza ɔkyerɛ nye dɛ obi bɔgor n’ase anaa ne banyin ho ma noho asen.
b Sɛ sigarɛtnom aka wo hɔ a, kenkan asɛm a wɔato dzin “Mbrɛ Ibesi Egyaa Sigarɛtnom” no, na ɔbɔboa wo ma eehu ndzɛmba a ibotum ayɛ ama eegyaa sigarɛtnom. Ibohu dɛm asɛm yi wɔ Hwehwɛ Pii Ka Ho ɔfa hɔ wɔ adzesua yi mu.
c Kenkan asɛm a wɔato dzin “Mibesi Dɛn Egyaa Ahobɔ?” no, na ibohu dza obotum aboa wo ma eegyaa ahobɔ. Ibohu dɛm asɛm yi wɔ buukuu a wɔato dzin Nsɛm A Mbabun Bisa—Mbuae A Ɔbɔboa Hɔn, Ɔfa 1, tsir 25 no mu.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
