Imajiné roun manman ki ka préparé so ti garson pou i alé lékòl. I ka véyé pou wè si timoun-an byen lavé so kò, si so lenj pròp é pa chifonnen. A roun bon bagaj pou lasanté timoun-an é sa ka montré ròt-ya ki so papa ké so manman ka pran swen di li. Menm fason roun papa ké roun manman lé yé pitit pròp, nou Papa Jéova lé ki nou kò pròp. I lé osi nou rété pròp annan fason nou ka pansé, palé ké aji. Si nou ka rété pròp, a roun bon bagaj pou nou é sa ka bay Jéova lònò.

1. Kouman nou pouvé sa roun moun ki pròp ?

Jéova ka di nou : « Zòt divèt sen » (1 Pierre 1:16). Pou nou sen, nou divèt pròp annan fason nou ka viv é annan fason nou ka pansé, palé ké aji osi. Roun moun ki pròp annan fason i ka viv ka benyen touléjou, ka lavé ké ranjé so lenj, so kaz ké so loto. Chak moun pouvé idé osi pou nétwayé sal di Rwayonm-an. Lò nou ka rété pròp, nou ka bay Jéova lònò (2 Corinthiens 6:3, 4).

2. Ki mové labitid nou pa divèt gen pou rété pròp ?

Sa Labib-a ka di klè kou dlo ròch : « Annou lavé nou kò di tousa ki ka sali nou lachè ké nou lèspri » (2 Corinthiens 7:1). Sa lé di ki nou ké fè éfòr pou protéjé nou kò di tout bagaj ki pouvé malmennen nou kò ouben gaté fason nou ka pansé-a. Nou lé Jéova kontan lò i ka wè sa nou ka pansé, a pou sa nou ka fè tousa nou pouvé pou jité tout mové lidé ki annan nou tèt (Psaume 104:34). Nou divèt panga osi pou pyès paròl malpròp pa soti di nou bouch (li Colossiens 3:8).

Kisa ki pouvé sali nou kò ké nou lèspri ? I gen bagaj ki danjéré pou nou kò, kou fimen ouben pran ladròg. A pou sa, nou pa divèt fè sa bagaj-ya. Roun moun ki pa ka fimen é ki pa ka pran ladròg, gen roun pi bon lasanté é i ka montré i gen rèspè pou lavi-a ki sa roun bèl kado. Nou ké rété pròp annan domenn moral si nou ka briga kont labitid ki malpròp. Parèkzanp nou ké briga kont labitid malpròp kou sa yé ka aplé « masturbation » a ouben gadé pòrnografi, sa lé di liv, zimaj ouben vidéyo malpròp (gadé nòt-a) (Psaume 119:37 ; Éphésiens 5:5). Sa pa toujou fasil tounen nou do bay sa labitid malpròp-ya, mé Jéova pouvé idé nou fè sa (li Isaïe 41:13).

 ANNOU FOUYÉ ANNAN LABIB-A

3. Lò nou pròp sa ka bay Jéova lònò

Lò nou ka li lalwa Jéova bay pou nasyon Israyèl-a, nou ka anprann ki sa vréman enpòrtan pou li ki so pèp rété pròp. Li Exode 19:10 ké 30:17-19, épi kozé asou sa késyon-yan :

• Kisa sa vèrsé-ya ka anprann nou asou sa Jéova ka pansé asou zafè rété pròp ?

• Ki bon labitid pouvé idé ou rété pròp ?

Nou divèt pran tan é fè éfòr pou rété pròp. Ki nou rich, ki nou maléré ouben kèlkanswa koté nou ka rété-a, nou tout pouvé fè sa. Gadé VIDÉYO-a, épi kozé asou sa késyon-an :

• Poukisa moun-yan ké gen plis rèspè pou Jéova si, lò nou ka préché, nou bagaj pròp ?

4. Arété nèt ké labitid malpròp

Si ou ka fimen ouben si ou ka pran ladròg, ou savé ki sa rèd pou arété ké sa mové labitid-ya. Kisa ki pouvé idé ou ? Réfléchi asou konsékans sa mové labitid-ya gen annan ou lavi. Li Matthieu 22:37-39, épi kozé asou sa késyon-yan : Si roun moun ka fimen ouben ka pran ladròg, ki konsékans i gen asou...

• so lanmityé ké Jéova ?

• so fanmi ké moun ki ka rété òbò li ?

Kalkilé sa to ké fè pou arété ké roun mové labitid b (gadé nòt-a). Gadé VIDÉYO-a.

Li Philippiens 4:13, épi kozé asou sa késyon-an :

• Kouman lapriyè, étidyé Labib-a ké réinyon-yan pouvé bay roun moun plis fòrs pou i arété ké roun mové labitid ?

 5. Kouman briga kont lidé ké labitid malpròp

Li Colossiens 3:5, épi kozé asou sa késyon-yan :

• Kouman nou savé ki pòrnografi, « sexting » c ké « masturbation » a bagaj ki malpròp pou Jéova ? (gadé nòt 1).

• Ès ou ka pansé ki sa posib rété pròp kou Jéova lé annan domenn moral ? Poukisa ou ka pansé sa ?

Kouman briga kont lidé ki malpròp ? Gadé VIDÉYO-a.

Jézi itilizé roun èkzanp pou montré ki nou divèt byen désidé fè sa ki fo pou rété pròp annan domenn moral. Li Matthieu 5:29, 30, épi kozé asou sa késyon-an :

• Jézi pa té lé di ki nou divèt fè nou kò mal, mé ki nou divèt aji. Ki bagaj roun moun divèt byen désidé fè pou pyès lidé malpròp pa vini annan so tèt d ? (gadé nòt 2).

Si ou ka briga kont lidé malpròp, pa bliyé ki tout éfòr ou ka fè gen valò pou Jéova. Li Psaume 103:13, 14, épi kozé asou sa késyon-an :

• Si sa rèd pou ou briga kont labitid malpròp, kouman sa vèrsé-ya pouvé ankourajé ou kontinyé briga ?

 SA NOU WÈ

Nou ka fè Jéova plézi lò nou kò pròp, mé osi lò sa nou ka pansé ké sa nou ka fè pròp.

Kisa ou anprann

• Poukisa sa enpòrtan rété pròp annan tout bagaj ?

• Kouman ou pouvé rété pròp annan fason ou ka viv ?

• Kouman ou pouvé rété pròp annan sa ou ka fè ké sa ou ka pansé ?