Iangoa te tina ae tatangira ae katauraoa natina te mwaane nakon te reirei. E taraia raoi bwa e na tebotebo ao a na taraaraoi oneana ma n itiaki. E teimatoa marurungin te teei n te aro aei, ao e oti naba iai bwa a rangi n tabeakinna ana karo. N aron naba anne, e tangirira Tamara ae tatangira ae Iehova bwa ti na itiaki n rabwatara ao n aroaroni maiura. Ngkana ti itiaki, ti na boni kakabwaiaaki iai ao ni karinea naba Iehova.

1. Ti na kangaa n itiaki n rabwatara?

E taku Iehova: “Kam na tabu.” (1 Betero 1:​16, kabwarabwara mai nano) E irekereke te tabu ma itiakin rabwatara ao aroaroni maiura. Ti kona ni kaitiakii rabwatara n arora n tetebotebo ao ni kaitiakii oneara, mwengara, ao ara kaa. Ti kona naba ni buoka kaitiakan ara Tabo n Taromauri. Ti karekea neboan Iehova man arora ni kateimatoa itiakira n te itera n rabwata.​—2 I-Korinto 6:​3, 4.

2. Baikara aroaro aika ti na rarawa nako iai bwa ti aonga n itiaki?

E kaungaira te Baibara bwa ti na “kaitiakira mani kamwaraan nako te rabwata ma te nano.” (2 I-Korinto 7:1) E nanonaki n aei bwa ti riai ni kakorakoraira ni kararoai baika kona ni karuanikaia rabwatara ao ara iango. E riai ni kukurei Iehova ni baika ti iaiangoi, ngaia are ti kabanea ara konaa ni kanakoi iango aika a aki riai. (Taian Areru 104:34) Ti kakorakoraira naba ni kamanena te taetae ae itiaki.​—Wareka I-Korote 3:8.

Baikara riki bwaai aika kona ni kabarekaa rabwatara ao aroaroni maiura? Iai bwaai tabeua aika kona ni kabarekaa rabwatara. Ngaia are ti rarawa nakoni bwaai n aron te baakee, te betel nut ke baan te coca, ao kamanenaan taian drug. Ngkana ti kararoai baikai, ti na marurung riki ao ti kaota naba karinean te bwaintangira ae te maiu. Ti kakorakoraira naba ni kaitiakii aroaroni maiura man arora n rarawa nakon aroaro aika kammaira n aroni kumekumean am bwai ni kakariki ao matakuakinan te bwaitingako. (Taian Areru 119:37; I-Ebeto 5:5) E kona ni kangaanga te tokanikai i aon aroaro aikai ma e kona ni buokira Iehova.​—Wareka Itaia 41:13.

 REIAKINA AE BATI RIKI

3. E neboaki Iehova n itiakin rabwatara

Ti kona n ataa ana iango Iehova ibukin te itiaki ngkana ti nenera ana tua nakoia tibun Iteraera rimoa. Wareka Te Otinako 19:10 ao 30:​17-19, ao maroroakin titiraki aikai:

• Tera ana iango Iehova ibukini kaitiakan rabwatara, ae oti ni kiibu aikai?

• Baikara aroaro aika raraoi aika a na buoka kateimatoaan itiakin rabwatam?

E kainnanoa te tai ae bati ao te kakorakora kateimatoaan itiakin rabwatara. Ma ti kona ni karaoia n aki ongeia bwa ti maeka ia ke tao ti kaubwai ke ni maiu ni kainnano. Kaota te TAAMNEI, ao maroroakina te titiraki aei.

• E na kangaa ni karineaki ara mwakuri n uarongorongo man arora ni kateimatoai itiakin ao taraaraoin ara bwai?

4. Katoki aroaro aika bubuaka

Ngkana ko momoko ke ni kakamanenai taian drug, ko bae n ataia ae e kangaanga katokani baikai. Tera ae kona n ibuobuoki? Iaiangoa aron rotakim iai. Wareka Mataio 22:​37-39, ao maroroakina aron te baakee ke kamanenaan taian drug n rota . . .

• ana iraorao te aomata ma Iehova.

• ana utu te aomata ao tabeman riki.

Motinnanoia bwa ko na katoka te aroaro ae buakaka. a Kaota te TAAMNEI.

Wareka I-Biribi 4:​13, ao maroroakina te titiraki aei:

• E na kangaa te babaire ibukin te tataro, te reirei n te Baibara, ao kaakaeani bobotaki ni buoka temanna bwa e na tokanikai i aon te aroaro ae buakaka?

 5. Buakani iango ao mwakuri aika aki itiaki

Wareka I-Korote 3:​5, ao maroroakin titiraki aikai:

• Ti kangaa n ataia bwa a aki itiaki i matan Iehova matakuakinan te bwaitingako, kanakoan rongorongo ke taamnei aika kammaira n te tareboon, ao kumekumean am bwai ni kakariki?

• N am iango, iai riain Iehova ni kantaningaia bwa a na itiaki aroaroni maiura? Bukin tera?

Nora arora ni buakani iango aika bubuaka. Kaota te TAAMNEI.

E kamanena Iesu te kaikonaki, ni kaota iai riaira ni kakorakoraira ni kateimatoa itiakin aroaroni maiura. Wareka Mataio 5:​29, 30, ao maroroakina te titiraki aei:

• E aki nanonna Iesu bwa ti nang boni kaikoaka rabwatara ma e nanonna ae ti riai ni mwakuria. Tera ae e riai ni kakorakoraa ni karaoia te aomata ibukini kanakoan iango aika buakaka? b

Ngkana ko buakani iango aika bubuaka, e kukurei Iehova n am kakorakora. Wareka Taian Areru 103:​13, 14, ao maroroakina te titiraki aei:

• Ngkana ko kabokorakora ma te aroaro ae buakaka, e kangaa ni kaungako te kibu aei bwa ko na teimatoa ni buakanna?

 KAKIMOTOTOANA

Ti kakukureia Iehova ngkana ti kateimatoa itiakin rabwatara, ara iango, ao aroaroni maiura.

Kauring

• E aera bwa e rangi ni kakawaki te itiaki?

• Ko na kangaa ni kateimatoa itiakin rabwatam?

• Ko na kangaa ni kateimatoa itiakin am iango ao aroaroni maium?