40 NU GÈ NÒ
Mósĩ́ Deè Ní Eé Láá Di Õ̀òa Kèsĩ́ Bàrì E?
Dòòmà dẽe ló kà ea vulè a nvín ea gé kpóògèe dee ló kọbé à kil tọọ̀ kpá. À ólò bilée múú vaá nvèèe õ̀òa dẽè kọ̀là ló. Níí ólò naa kọ á ié válá ló vaá naa kọọ̀ dõòna gbò á nyimá kọọ̀ a tẹ̀ nè a kà gé palàge ẹ̀b nú ea kilíé ló. Mm̀ tẽ̀ènè sĩ́deèá, Jìhóvà ea dú bẹẹ Tẹ̀ ea vulèi gbĩ́ kọ é di õ̀òa—mm̀ nom̀ kpá ló nè mm̀ láb. Tṍó e di õ̀òa, à ólò dọ̀ bélè nèi vaá nvèèe ka ló.
1. Mósĩ́ deè ní eé láá di õ̀òa mm̀ bẹẹ nom̀ kpá ló é?
Jìhóvà kọ́ nèi kọọ̀: “Tõoníí káí.” (1 Pítà 1:16) Ge di káí lóá bel nyòòmà ge di õ̀òa mm̀ nom̀ kpá ló nè mm̀ láb. Èé láá di õ̀òa mm̀ nom̀ kpá ló tṍó e ólòó bìlà múú vaá ẹẹlẹ̀ bẹẹ kọ̀là ló, õ̀ònà ló bẹẹ be, nè bẹẹ faà. Èé láá nvèè bá õ̀ònà nàgé ló Kíndòm Họ́ọ̀l. È nveè ka ló Jìhóvà tṍó e kilsĩ́ gè õ̀òa ló.—2 Kọ́rìnt 6:3, 4.
2. Kọbé è láá di õ̀òa, mókà gbò láb ní eé kpoolà lóó lọl ló é?
Kpá Káí síèi kpóó ló kọ é “tõó dùm ea õoà vaá è aa ló kọ̀láá kà nú ea é gbó dĩ́ ló bẹẹ nom̀ kpá ló àbèè bẹẹ ból nyíe.” (2 Kọ́rìnt 7:1) Níí tõó dọ̀ kọọ̀ èé kpoolà lóó lọl ló kọ̀láá kà nú ea é láá kyọ̀ bẹẹ nom̀ kpá ló nè bẹẹ bug. Gbò nú e bugì togó boo á dú nú ea é léémá Jìhóvà. Vóà naa, èé piigà ge kìn pọ́lọ́ bug togó. (Psalm 104:34) Èé piigà nàgé boo gè òòà aa ló gè ló gbò bel e náa bọ́ló.—Bugi Kọ́lọsì 3:8.
Dõòna kà éé ní ea é láá naa kọ é di õ̀òa mm̀ nom̀ kpá ló àbèè mm̀ lábvẹ́? À íe sìgà nú ea é láá kyọ̀ bẹẹ nom̀ kpá ló. Vóà naa, à bọ́ló kọ é òòà aa ló gè ṍ sĩi, ge taa betel nut àbèè pàsãà coca, nè ge ṍ pọ́lọ́ biè àbèè ge ṍ biè boo bá e bè náa bọ́ló. Beè ooà aa ló gbò nuí, èé íe válá ló vaá zogè kọọ̀ è nveè ka ló dùm e Bàrì néi. Èé láá dì nàgé õ̀òa mm̀ láb tṍó e òòà aa ló gbò dùm e náa õoà, dì belí kele-kele sĩ́deè ge saagẹ bá ló o ketõ̀ò págbálà àbèè pábia nè ge ẹ̀bgì kóló-kóló kètẽ́ nen. (Psalm 119:37; Ẹ́fẹsọ̀s 5:5) Àé láá tàvàlà ge òòà aa ló gbò lábví, sõò Jìhóvà é láá nvèè bá nèi kọ é naa vó.—Bugi Àìzáíà 41:13.
KPÁÁ NÓ BỌ̀Ọ̀VẸ̀
Nyimá nú ea náa vaá ge õ̀òa ló à nvèè ka ló Jìhóvà nè bé eo é láá òòà aa ló gbò láb e bè náa õoà naa.
3. Ge õ̀òa ló ólò nvèè ka ló Jìhóvà
Èé láá nyimá bé e Jìhóvà ẹb gè õ̀òa ló naa tení dú ló gè bugi togó boo log ea beè nè pá Ízràẹ̀l. Bugi Ẹ́xọdọ̀s 19:10 nè 30:17-19, vaá ò gbóó aalai gbò bíbví:
-
Éé ní e gbò dọ̀ Kpá Káíí tẹ́lẹ bàlà kẽ ea kil ló bé e Jìhóvà ẹb gè õ̀òa ló naa ẽ́?
-
Éé ní eo é láá olòó naa kọbé ò kilsĩ́ gè õ̀òa ló é?
À ólò bĩiná tṍó nè sìà kpóó ló kọbé è láá di õ̀òa. Sõò èé láá naa vó gbẹá kọ̀láá kiẽ́e e ólò tõo, kọbèè è dúù méné àbèè è dúù tãa. Bìlà VÍDIÒÍ, vaá ò gbóó aalai bíb ea nyoone.
-
Mósĩ́ deè ní e gè õ̀ònà ló gbò nú e íè ólò nvèè ka ló bẹẹ sìtóm kọ̀ kpẹ̀a ẹ́?
4. Òòà aa ló pọ́lọ́ láb
Jìhóvà é láá nvèè bá nèi kọ é bé èlbá pọ́lọ́ láb
Be ò ólò ṍ sĩi àbèè ge ṍ pọ́lọ́ biè, òó láá nyimá bé ea tavàlà ge òòà aa ló pọ́lọ́ láb naa. Éé ní ea é láá nvèè bá ẹ́? Bugi togó boo nú e lábví ni náa ní ló. Bugi Máátìù 22:37-39, vaá ò gbóó bugi togó boo bé e beè nen ṍ sĩi àbèè pọ́lọ́ biè ólò tọá ló . . .
-
gbaa ló ea íe kilma ló Jìhóvà naa.
-
pá a tọ nè gbò e bà dṹùnàe naa.
Noo gè òòà aa ló enè íb pọ́lọ́ láb. a Bìlà VÍDIÒÍ.
Bugi Fílipaì 4:13, vaá ò gbóó aalai nakà bíbví:
-
Mósĩ́ deè ní e gè olòó tã̀àgã ló Bàrì, ge nó Kpá Káí, nè ge sí nònù é láá naa kọọ̀ nen á ié kpóó gè òòà aa ló pọ́lọ́ lábvẹ́?
5. Bé èlbá gbò bug togó nè láb e bè náa õoà
Bugi Kọ́lọsì 3:5, vaá ò gbóó aalai gbò bíbví:
-
Éé ní ea náa vaá è nyimá kọọ̀ ge ẹ̀b kóló-kóló kètẽ́ nen, ge lẹ̀ẹ̀là gbò nú ea nveè sãa kúm kúnàgã̀ tenmá boo fóòn àbèè kòmpútà má nen, nè gè saagẹ bá ló o ketõ̀ò págbálà àbèè pábia bẽ́émá Jìhóvà ẹ?
-
É kọ ò bulà kọọ̀ nyìmànù di m gè kọọ̀ Jìhóvà gbĩ́ kọ é di õ̀òa mm̀ bẹẹ láb? Ló éé?
Nyimá bé eo é láá bé èlbá gè bugi togó boo gbò nú e bè náa õoà naa. Bìlà VÍDIÒÍ.
Jíízọ̀s beè tú bel dòòle ló loomá bel ea zógè kọọ̀ èé íè ge beeláfùl ge di õ̀òa mm̀ bẹẹ láb. Bugi Máátìù 5:29, 30, vaá ò gbóó aalai nakà bíbví:
-
Náa kal ló béè kọọ̀ Jíízọ̀s náa géè kọ é nvèè kom ló bẹẹ bá, à géè kọ é naa nú ea bọ́ló gè naa. Gbò éé ní e nen é náa kọbé à láá bé èlbá bug togó e bè náa õoà ẽ? b
Be ò gé piigà ge bé èlbá gbò bug e bè náa õoà, nyimá kọọ̀ Jìhóvà nveè ka ló o pììgà. Bugi Psalm 103:13, 14, vaá ò gbóó aalai nakà bíbví:
-
Be ò gé piìga boo ge aa ló dùm e bè náa õoà, mósĩ́ deè ní e dọ̀ Kpá Káíí síè ni kpóó ló kọ ó kilsĩ́ gè naa vó é?
Lóó ni á gá ọọ!
Àé láá valí gè bugi togó kọọ̀, ‘Ním̀ láà naa, vóà naa ním é kilná sĩ́.’ Sõò, ni bugi togó boo níí: Ge kọọ̀ nen ea gé téélá tee dọ, náa tõó dọ̀ kọ náa é láá teelá ná èlbá àbèè kọọ̀ àé kpáá teelá lọl dààà togó. Mm̀ tẽ̀ènè sĩ́deèá, be à íe tṍó e nóo náà leevè, náa tõó dọ̀ kọọ̀ nóo é láá bé èlbá pọ́lọ́ láb. Vaá náa tõó nágé dọ̀ kọọ̀ nóo gé piigà. À íe tṍó e née ólò láá naa leevè—níà nú ea ólò naaá bã̀àna tṍó e nen gé piigà ẹ. Boo béè vó, lóó ni á gá ọọ! Òó láá òòà aa ló pọ́lọ́ dùm tení dú ló nvèè bá ea aa bá Jìhóvà.
SÌGÀ GBÒ KỌ́Ọ̀: “Dùmí a dém ló m. Ním é láá àà na ló.”
-
Mókà dọ̀ Kpá Káí ní eo é láá bugi nè va gè zogè kọọ̀ Jìhóvà é láá nvèè bá nè va kọ bàá òòà aa ló pọ́lọ́ lábvẹ́?
NÚ E NI NÓ
Èé láá naa kọọ̀ nyíè Jìhóvà á ẹẹ tení dú ló gè naa kọọ̀ bẹẹ nom̀ kpá ló, bùlà, nè bẹẹ láb á di õ̀òa.
Ge Òòa Boo
-
Éé ní ea náa vaá à bọ́ló kọ é di õ̀òa ẽ́?
-
Mósĩ́ deè ní eé láá di õ̀òa mm̀ nom̀ kpá ló é?
-
Mósĩ́ deè ní eo é láá di õ̀òa mm̀ o bug nè o lábvẹ́?
KPÁÁ GBĨ́ TẼ́ LÓ
Gbò éé ní eo é láá naa kọbé ò dí õ̀òa mm̀ nom̀ kpá ló kọbèè nóo íè gã́bug kpègè e?
Nu Eo É Náa Kọbé Ò Íe Válá Ló Vaá Õ̀òa Ló—Sĩ́deè Ge Logá Bá (3:01)
Nyimá gbò nú eo é láá naa kọbé nóo ónà sĩi.
Nyimá gbò nú ea ólò sìlà aa mm̀ ge ẹ̀b kóló-kóló kètẽ́ nen.
“Pornography—Harmless or Toxic?” (Kpá Tọ Kùdẽe Ló, August 1, 2013)
Nyimá bé e ene kà gbálà beè láá bé èlbá dùm ge olòó ẹb kóló-kóló kètẽ́ nen naa.
“I Failed Many Times Before I Succeeded” (Kpá Tọ Kùdẽe Ló No. 4 2016)
a Togó bel ea kọ́ọ̀, “How to Quit Smoking” ea di kè kẽè Kpáá Gbĩ́ Tẽ́ Ló mm̀ nakà nu gè nòí, baatẽ́ gbò nú eo é naa kọbé ò láá òòà aa ló lábví.
b Kọbé ò láá bé èlbá dùm ge saagẹ bá ló o ketõ̀ò págbálà àbèè pábia, ẹ̀b togó bel ea kọ́ọ̀, “How Can I Conquer the Habit of Masturbation?” mm̀ Questions Young People Ask—Answers That Work, Volume 1, 25 togó.
