Ə́ kiliŋahiɛ lɔ longaalee ta ɓa yii aa non maayili ə gɛ yɛ li nakwəlitaa. Gaa pai mɛni kəlee kɛi ə gɛ non maa ə lɛɛ a ɉəɠɛɛ ə ma kɛ ŋɔ həɠəɠaa. Ə gɔlɔn yɛ ma non maa a lɛɛ a ɉəɠɛɛ, yili lɛlɛɛ ŋɔ kɔlɔipono mɛni ɓa. Nokolo tii maahəɠə mɛni a nɛ yɛ ma gaanua da ɉon a nɛlɛɛ. Bələi lɔ longaanua kaa la bɔ di lonnii maa ə lɛɛ a ɉəɠɛɛ, bələ lɔ ɓə Zehova kaa la bɔ gu kɛ la a gu ləŋɛɛ ə lɛɛ gu kiliŋahiɛ pələ ə kɛ a maahəɠɛɛ, gu túwɔ́ pələ ə ma kɛ gu hwaa pələ. Gwa kɛ a gu maahəɠɛɛ, guɔ kpinii gwa yili pulu mɛinɛɛɠaa hɔlɔɓo ə lɛɛ gwa Zehova laa tɛ.

1. Gwa pɛli kɛi ləi a gu ləŋɛɛ ?

Zehova kaa kɛi guɔ “ kaa kpɛli ma ka maa ə həɠə ” (Piɛrə dɔlɔɔ 1:16). Maahəɠəlaa hwilɛnŋaa gu túwɔ́ pələ ɓa ə lɛɛ gu kpini ɓa. Gwa kɛi gu waa kɛlɛ-kɛlɛ, gu wɔ həɠəɠaa maahəɠɛɛ, gu yəi bɛlɛn maahəɠɛɛ, gu wɔ hiɛhɛn maahəɠɛɛ, bələ ɓə gwa nɛ la guɔ ma gu ləŋɛɛ. Gwa pɛli nwɔnɔ gu kpɔnmaa tɛɛ gu wɔ ŋaakpɔn gɛ pɛlɛ la maahəɠə mɛni hu. Gwa lɛɛ a gu maahəɠɛɛ, gwa Zehova laa tɛ (Korɛntə veelɛ 6:3, 4).

2. Ə gɛ gu maa ə kɛ a ɉəɠɛɛ, túwɔ́ pələ ləkɛɛɠaa ɓə maanɛɛ gu nɛɛ laa ?

Biblə a gu liɛwoo kɛ yɛ ma “ ká gu gu kpɔwɔ kpinii maahəɠə, hɛn a nu kɔlɔ da nii kɔhɔɓo gəlee yəi ” (Korɛntə veelɛ 7:1). Yili ɓa gwa mɛni kəlee kɛ mɛniɠaa kpɔ a pɛli gu kɔlɔ maaliɓii awala kɛtii ə gu wɔ kiliŋahiɛ maaliɓi gu gəlee lɛɛ laa. Ə gɛ gu wɔ kiliŋahiɛɠaa wɛli ə too Zehova ɓa, maanɛɛ gu mɛni kəlee kɛ gu kiliŋahiɛ ɲɔnwɔɔɠaa lɛɛ laa (Maatɛnɛ 19:14). Gwa mɛni kəlee kɛ nwɔnɔ wooɲɔn lɔpee ta ho kulɔ gu la (Kolɔsə 3:8 ɓo).

Lə takpɛli ɓə nwɔnɔ a pɛli gu maaliɓii ? Hɛnŋaa taɠaa kaa laa da pɛli di gu kɔlɔ maaliɓi, yɛ pələi sikɛɛti da zalan gbala di kaa la. Yili ɓa maanɛɛ gu ho lɛɠɛ diɛ. Nui hwa sikɛɛti tɛ ə lɛɛ hwa zalan gbala tɛ, kɔlɔipono leelee a kɛ ɲəi. Ə lɛɛ a nɛ yɛ ma a yɛnɛɛ maawiɛ yai a Yálá ŋɔ mɛinɛɛ. Gwa gu yəi kulɔ maaliɓi túwɔ́ɠaa hu yɛ pələi nu kpɔwɔ yɔwɔn mɛni kaa da nu kpuwulu kaa mɛni kaa la, gwa lɛɛ nwɔnɔ a gu maahəɠɛɛ (Maatɛnɛ 119:37 ; Efɛsə 5:5). Gɛ laa a pɛli walai gu duwɔ pələɠaa tii lɛɛ laa, kəlaa Zehova a pɛli kpɔnmaa tɛɛ gu pɔ (Esai 41:13 ɓo).

 Ə́ WƆ MƐNIKƆLƆNŊAA TA PƐLƐ MA

3. Maahəɠəlaa a Zehova laa tɛ

Dɔnŋaa Zehova ə dɛɛ Israɛlə lonnii pɔ a gilihanhiɛ pələ lɛ yɛ hwilɛn na maahəɠəlaa ɓa. Lɛɛgbɔwɔ ɓa 19:10 da 30:17-19 ɓo, ə lɛɛ ka lono kɛ gɛɛmaalənŋaa ŋɛi mɛi :

• Vɛlisɛɛɠaa ŋɛi da Zehova kiliŋahiɛ pələ lɛ ləi yɛ hwilɛn na maahəɠəlaa ɓa ?

• Ə gɛ ə́ maa ə kɛ a ɉəɠɛɛ, mɛni ləikɛɛɠaa ɓə maanɛɛ ə kɛ ə́ yəi pɔ ?

Maanɛɛ gu gu hwaŋa həɠə kpɔ kɛnɛ da gu wɔ lowai guɔ pɛli lɛɛi a gu maahəɠɛɛ. Guɔ gu kɛ a yeehowolomun awala kɛtii hɛngɔunamun, ɓɛi lɔpee gu kaa laa, gwa pɛli gu kɛ a gu maahəɠɛɛ. VIDIO kaa, ə lɛɛ ka lono kɛ gɛɛmaalən ŋɛi mɛi.

• Gwa kɛ a gu maahəɠɛɛ, nuai gwa Yálá Lawoo laahəli diɛ, lə ɓə da mo ?

4. Gu tuwɔpələɲɔnŋaa lɛɛ laa

Akɛ ya sikɛɛti tɛ awala kɛtii zalan gbala, ə́ gɔlɔn yɛ́ ma gɛ laa ho nɛɛ li ə́ kpəla ma. Lə ɓə a pɛli kpɔnmaa tɛɛ ə́ pɔ ? Yii a pɛli kpɔnmaa tɛɛ ə́ pɔ ya ɓaa ə́i kiliŋahiɛ, pɔɔ yii duwɔpələɲɔn dii aa nɛɛ yɛ́. Matie 22:37-39 ɓo, ə lɛɛ ka lono kɛ gɛɛmaalənŋaa ŋɛi mɛi :

• Nu a kɛi sikɛɛti tɛ awala kɛtii zalan gbala, pɔɔ ləkɛɛ ɓə a pɛli nɛɛi yaa da Zehova di wɔ ɓəlannaa ɓa ?

• Pɔɔ ləkɛɛ ɓə a pɛli nɛɛi ɲəi bɛlɛn nua da gwɛlɛ nua diɛ ?

Ə gɛ yɛ́ pɛli tuwɔpələɲɔn nɛɛ laa, yili kɛ pələ hee gbaŋa. a VIDIO kaa.

Korɛntə veelɛ 4:7 ɓo, ə lɛɛ ka lono kɛ gɛɛmaalən ŋɛi mɛi :

• Nu a kɛi Yálá hwɛli kɛlɛ-kɛlɛ, yɛ Biblə kalan, yɛ li ŋaakpɔnŋaa diɛ yili a pɛli kpɔnmaa tɛɛ ləi bɔ ə kpəla tuwɔpələɲɔn gɛɛ ɓa ?

 5. Kɔ pɛlɛ tuwɔpələɲɔnŋaa diɛ da kiliŋahiɛ ɲɔnwɔɔɠaa

Kolɔsə 3:5 ɓo, ə lɛɛ ka lono kɛ gɛɛmaalənŋaa ŋɛi mɛi :

• Gu gɔlɔn nəi guɔ ma nu kpuwulu kaa mɛni, nu əi kpɔwɔ yɔwɔɔn awala-kɛtii ə hɛɓɛɠaa, fotoɠaa, vidioɠaa tɛɛ nuta ɓa yɛ hwilɛn na wɛlimɛni maa nɛŋɛn ɓa, yili kəlee kaa a maaliɓi mɛni Zehova ɲɛi mu ?

• Ə́ wɔ kili ɓa Zehova a kɛi kɛ guɔ gu kɛ a nua di túwɔ́ pələ maahəɠɛɛ, gaa a Yálá yii ŋɔ mɛni wala-walaa ? Lə mɛni ɓa ə kaa moi tii ?

Gaa yii ya pɛli gɛi ə́ yəi yɛ pɛli tɛɛi kiliŋahiɛɠaai di maaliɓiɛ diɛ. VIDIO kaa.

Yii maanɛɛ gu gɛ, ə gɛ gu lɛɛ a gu maahəɠɛɛ, Zesu ə nɛ kɔɔmaa ta hu. Matie 5:29, 30, NWT ɓo, ə lɛɛ ka lono kɛ gɛɛmaalən ŋɛi mɛi :

• Pələi ma Zesu ho kɛi kɛ la ma gwa pɛli gu mɛniɲɔn gɛ a gu kpɔɔ, ə nɛ a ɉu ponoɔɔ yɛ ma maanɛɛ gu mɛni ta kɛ a gu nwanai. Mɛni ləkɛɛ ɓə maanɛɛ nu ə gɛ kpɔ a nwanai yɛ pɛli kiliŋahiɛ ɲɔnwɔɔɠaa maakweai b ma ?

Akɛ ya kɛ tɔɔi a ə́ nwanai yii yaan ə́ kiliŋahiɛ ɲɔnwɔɔɠaa lɛɛ laa, kɛ a ə́ laana kpɔ a neelee yɛ́ ma Zehova a kɛ ə́ wɔ kólói tii kaai. Maatɛnɛ 103:13, 14 ɓo, ə lɛɛ ka lono kɛ gɛɛmaalən ŋɛi mɛi :

• Akɛ ya kɛ ə́ ɲaawalai yii yaan ə́ tuwɔpələɲɔn da lɛɛ laa, vɛlisɛɛɠaa ŋɛi da pɛli ə́ hwaŋalɔi ləi yii yaan ə́ lɛɛ lɔ góló lɛlɛɛ tii ɓa ?

 YII GU GALAN

Gwa kɛ bɔ gu wɛli ə too Zehova ɓa, maanɛɛ gu maa ə lɛɛ a ɉəɠɛɛ gu wɔ kiliŋahiɛɠaa hu, ə ma kɛ gu túwɔ́ pələɠaa hu.

Nɛɛ ə́ kili pɔ

• Lə mɛni ɓa mɛni wala-wala ɓaa gu kɛ a gu maahəɠɛɛ ?

• Gwa pɛli kɛi ləi a gu ləŋɛɛ ?

• Ya tɛɛ ləi ə́ wɔ kiliŋahiɛ da ə túwɔ́ pələ di maa ə lɛɛ a ɉəɠɛɛ ?