ZASEŊƆ 40
To Wan Eŋɛ La Wani Ana Filam Naayinɛ Nɛŋan?
Makɛ bisɛ ti ma n maaseni a bia ti a keŋɛ sukuu. A sɔ bia la mɛ ge dekɛ lɔɣɔrɔ n ani filam yɛ en. Wana wa basɛ ti bia la tara la imma’asum ge basɛ ti nɛreba baŋɛ ti a dɔɣereba biseri en mɛ soŋa soŋa. Bala mea nɔɔ ti to Sɔ Yehowa me nɔŋɛ tɔ ge bɔta ti to ana filam to inganɛ la to sareŋɔ poan. To san ana filam, la soŋeri to mɛ ge tara na’asegɔ bɔ’ɔra Naayinɛ.
1. To wan eŋɛ la wani ta’an ana filam inganɛ poan?
Yehowa yele to ti: “Ya dela ya ana zilam.” (1 Peter 1:16) Zilam bɔŋa pa’alɛ la to inganɛ la to sareŋɔ poan n wan ana filam. To wan ta’an ana filam to inganɛ poan to san sɔɔra daarewoo ge bisera ti to lɔɣɔrɔ, la to yire la to loore ti ba ana filam. To me ta’an laɣum soŋɛ maalɛ to Na’am Pu’usegɔ Deo la ti la ana filam. To san ana filam inganɛ poan la tari la na’asegɔ bɔ’ɔra Yehowa.—2 Korint 6:3, 4.
2. To san bɔta ti to ana filam, yele ani n nari ti to basɛ ba itigɔ?
Baabule la yele to ti, to “duuse ya dɛɣerɔ woo n sa’ani inganɛ la vo’osum la.” (2 Korint 7:1) Bala la, to tiregeri mɛ ti to basɛ sɛla za’a n wan sa’am to iŋa bii to puti’irɛ. To puti’irɛ woo nari ti la pee la Yehowa puurɛ bala la to tiregeri mɛ ti to zaɣesɛ putɛse’a n ka nari. (Yooma 104:34) To me tiregeri mɛ ti to basɛ ti to yetɔɣum ana filam.—Kaalɛ Kolose 3:8.
Bem n ta’an le basɛ ti to inganɛ poan bii to sareŋɔ poan tara dɛɣerɔ? Dia basɛba sa’ani iŋa la mɛ. Bala zuo to ka diti taba, to ka oberi betel nut bii coca leaves, to me ka nyuuri tiim woo n yirigiri nɛreba iŋa. To san basɛ yele ana wa to wan tara imma’asum ge me eŋɛ pa’alɛ ti to tari gilema bɔ’ɔra vom la ti to tara la. To me tiregeri mɛ ti to sareŋɔ ana filam doose la to n kan ita dɛɣerɔ tuuma wuu to waasena to iŋa nyɛta ga’aregɔ nyɛlum la yalum fɔɔra bisega. (Yooma 119:37; Epesus 5:5) La nɔɔ kpe’em mɛ ti to ta’an basɛ yele ana wa ge Yehowa ta’an soŋɛ tɔ ti to basɛ ba.—Kaalɛ Isaiah 41:13.
VIISƐ PA’ASƐ
Geele bisɛ, ho san ana filam la tari na’asegɔ se’em bɔ’ɔra Yehowa ge bisɛ ho wan eŋɛ se’em ta’an basɛ dɛɣerɔ tuuma.
3. Inganɛ poan filam bɔŋa na’aseri la Yehowa
To ta’an baŋɛ Yehowa n geele filam bɔŋa se’em to san bisɛ eŋa n yuun dekɛ a nɔya bo daami Israel tiŋa la. Kaalɛ Yɛhega 19:10 la 30:17-19 ge nyaa sɔsɛ sokere ana wa:
-
Kaalegɔ zɛ’ɛsi wa pa’ali ti Yehowa geele inganɛ poan filam bɔŋa la wani?
-
Bem halesoma n wan soŋɛ hɔ ti ho ana filam inganɛ poan?
La nari ti to tiregera ge nyɛta nɛŋa ta’an ana filam inganɛ poan. To me ta’an eŋɛ bala la ka pakɛ la to kɛ̃’ɛri zɛ’an la to tari laɣehɔ bii to ka tari. Ŋmɛ VIDIYO la ge nyaa sɔsɛ sokere wa:
-
Sore kani poan ti to biseri to lɔɣɔrɔ ti la ana filam la, ta’an basɛ ti nɛreba tara gilema bɔ’ɔra to na’am mɔɔlegɔ tuuma la?
4. Zabɛ nyaŋɛ halebe’ero
Yehowa ta’an soŋɛ tɔ ti to zabɛ nyaŋɛ halebe’o woo
Ho san nyuura taba bii ho vole la tiyooro, ho wan mina la kpe’em se’em ti ho zabɛ nyaŋɛ hala wa. Beni n wan ta’an soŋɛ hɔ? Geele bisɛ halebe’o la n daani ho se’em. Kaalɛ Matu 22:37-39 ge nyaa sɔsɛ baŋɛ taba nyua bii tiyooro vɔlega n sa’ani . . .
-
nɛra la Yehowa zɔtɔ nyɔka se’em.
-
nɛra deodoma la sɛba n lɛm en bɔŋa se’em.
Maasum ta’an zabɛ nyaŋɛ halebe’o. a Ŋmɛ VIDIYO la.
Kaalɛ Filipi 4:13 ge nyaa sɔsɛ sokere wa:
-
Sore kani poan ti ho san zusa saŋa woo, zamesa Baabule la ge kena tansugere zamesegɔ ta’an bo ho paŋa ti ho zabɛ nyaŋɛ halebe’o?
5. Zabɛ nyaŋɛ putɛbe’ero la tuunbe’ero
Kaalɛ Kolose 3:5 ge nyaa sɔsɛ sokere ana wa:
-
To eŋɛ la wani baŋɛ ti yalum fɔɔra bisega, hon tɛɣeseri ga’aregɔ poan yɛla bɔ’ɔra nɛra la iŋa waaseŋɔ n bo’ori ga’aregɔ poan nyɛlum dela dɛɣerɔ bunɔ Yehowa zɛ’an?
-
Hon ti’isɛ ti yɛm boi bim la Yehowa n boti to ana filam to sareŋɔ poan la? Bem zuo?
Viisɛ baŋɛ ho wan ta’an eŋɛ se’em zabɛ nyaŋɛ putɛbe’ero. Ŋmɛ VIDIYO la.
Yezu yuun makɛ pa’alɛ ti la nari ti to tiregɛ la to paŋa za’a ge ta’an ana filam to sareŋɔ poan. Kaalɛ Matu 5:29, 30 ge nyaa sɔsɛ sokere wa:
-
Daɣɛ ti Yezu yuun boti a pa’alɛ to ti to pɔɣelum to iŋa wa ge a yuun boti a yeti la nari ti to eŋɛ la sɛla. Nɛra wan ta’an tiregɛ la wani ta’an basɛ putɛbe’ero? b
Ho san tiregera mɛ ti ho zabɛ nyaŋɛ putɛbe’ero, Yehowa n boti se’em n bala. Kaalɛ Yooma 103:13, 14 ge nyaa sɔsɛ sokere wa:
-
Ho san ziɣera ti ho basɛ putɛbe’ero, Baabule gulesegɔ kuna wa wan ta’an kpemese ho giila la wani ho zaberɛ la poan?
Ho san le lui la ka pa’alɛ ti ho koŋe mɛ!
La ta’an dɛna naana ti ho ti’isɛ ti ‘mam koŋe mɛ bala la n yi kɔ’ɔn basɛ ge vo’ose.’ Gee ti’isɛ yele wa bisɛ: Zɔta n pirɛ lui ka pa’alɛ ti a koŋe zɔa la mɛ bii a le malum lebe ta pɔsɛ zɔ. Ho san le pɔsɛ tuna ho halebe’ero la ka pa’alɛ ti ho zabɛ koŋe mɛ n bala. La me ka pa’alɛ ti hon eŋɛ ania paɛ se’em beene la za’a basɛ la yoo. Ho san le lui la daɣɛ yelesaanɛ, la za’a pa’alɛ la hon mɔɔri se’em ti ho nyaŋɛ yele la. Da gɛ̃ basɛ! Yehowa wan soŋɛ hɔ ti ho zabɛ nyaŋɛ halebe’ero la.
NƐREBA BASƐBA YETI: “La ele mam mɛ. Ma kan ta’an basɛ.”
-
Baabule gulesegɔ kuni ti ho wan ta’an dekɛ pa’alɛ nɛra la, ti a baŋɛ ti Yehowa ta’an soŋɛ en ti a basɛ halebe’o la?
YELEKPINE
To ni basɛ ti Yehowa puurɛ pee mɛ to san basɛ ti to iŋa, to puti’irɛ la to sareŋɔ ana filam.
Tiisegɔ Sokere
-
Beni n sɔi ti la ba’ɛ dɛna ninmɔ’ɔrɛ ti to ana filam?
-
Ho wan eŋɛ la wani ta’an ana filam inganɛ poan?
-
Ho wan eŋɛ la wani ta’an basɛ ti ho puti’irɛ la ho sareŋɔ ana filam?
Ɛ BISƐ
Bem yɛla ase’a n nari ti ho ita ti la soŋɛ hɔ ti ho ta’an ana filam inganɛ poan ho san puɣum nasera?
Zamesɛ baŋɛ sarɔtɔ toseto ti ho wan ta’an doose basɛ taba nyua.
Viisɛ baŋɛ yalum fɔɔra bisega n tari daaŋɔ se’em.
“Yalumfɔɔra Tari Daaŋɔ Bii La Ka Tari?” (The Watchtower, August 1, 2013)
Bisɛ buraa ayima n tiregɛ basɛ yalumfɔɔra bisega se’em.
“Mam Koŋe La Sugumnɔɔrɛ Zo’e Zo’e Ge Nyaa Ta Nyaŋɛ” (The Watchtower No. 4 2016)
a “Hon Wan Eŋɛ Se’em Ta’an Basɛ Taba Nyua,” n boi “Ɛ Bisɛ” bɔberɛ la zaseŋɔ wa poan n pa’ali hon wan doose sarɔtɔ seto poan ta’an zaɣesɛ halebe’ero.
b Ho san bɔta ti ho nyɛ soŋerɛ ge nyaŋɛ iŋa waaseŋɔ n bo’ori ga’aregɔ poan nyɛlum, kaalɛ “Ho Wan Eŋɛ La Wani Ta’an Nyaŋɛ Iŋa Waaseŋɔ N Bo’ori Ga’aregɔ Poan Nyɛlum Halɛ La?” n boi Sokese’a Ti Bunbilipaalesi Sɔkera La Lebesego Se’a N Soŋeri Ba, Gɔŋɔ 1, a zuo 25.
Ho Me Ta'an Bɔta Yele Ana
SOKESE’A TI NƐREBA SƆKERA
Bem Baabule Zamesegɔ N Bala Ti Yehowa Sɛɛradoma Ita La Nɛreba?
Hon la Yehowa Sɛɛradoma san zamesa Baabule la, ho ta’an tara homea Baabule la kaala, zamesegɔ la poan. Ho ta’an yele ho yire nɛreba za’a la ho zɔdoma ti ba laɣum kelese zamesegɔ la.
