LEKSION 40
Paano Kita Mangin Matinlo sa Panulok sang Dios?
Imadyina ang mapinalanggaon nga iloy nga nagahanda sang iya bata antes magkadto sa eskwelahan. Ginasigurado niya nga nakapaligo ini kag matinlo kag mahipid ang bayo. Nagabulig ini nga mangin maayo ang panglawas sang bata kag nagapakita man ini nga ginaatipan gid sia sang iya mga ginikanan. Gusto man sang aton mapinalanggaon nga Amay nga si Jehova, nga mangin matinlo kita sa pisikal kag moral. Kon matinlo kita, maayo gid ang epekto sini sa aton kag mapadunggan naton si Jehova.
1. Paano kita mangin matinlo sa pisikal?
Nagsiling si Jehova sa aton: “Dapat mangin balaan kamo.” (1 Pedro 1:16) Para mangin balaan, dapat matinlo kita sa pisikal kag moral. Para mangin matinlo kita sa pisikal dapat pirme kita maligo, kag dapat pirme matinlo kag mahipid ang aton mga bayo, balay, kag salakyan. Makabulig man kita sa pagpaninlo sang aton Kingdom Hall. Kon matinlo kita sa pisikal, mapadunggan naton si Jehova.—2 Corinto 6:3, 4.
2. Para mangin matinlo, ano ang mga dapat naton likawan?
Ang Biblia nagsiling nga “tinluan naton ang aton kaugalingon sa tanan nga nagapahigko sang lawas kag tagipusuon.” (2 Corinto 7:1) Gani, dapat naton likawan ang bisan ano nga makahigko sa aton lawas ukon hunahuna. Ang aton panghunahuna dapat makapalipay kay Jehova, gani tinguhaan gid naton nga indi magpamensar sing mahigko. (Salmo 104:34) Ginatinguhaan man naton nga maayo ang aton ginahambal.—Basaha ang Colosas 3:8.
Ano pa ang makapahigko sa aton sa pisikal ukon moral? May pila ka butang nga makahigko ukon makahalit sang aton lawas. Gani wala kita nagapanigarilyo, nagamama, kag nagadroga. Kon ginalikawan naton ini, mangin maayo ang aton panglawas kag ginapabaloran naton ang regalo nga kabuhi. Ginatinguhaan man naton nga mangin matinlo sa moral kon ginalikawan naton ang pornograpiya kag ang masturbasyon. (Salmo 119:37; Efeso 5:5) Indi mahapos nga untatan ini nga mga bisyo, pero buligan ka ni Jehova.—Basaha ang Isaias 41:13.
USISAA PA GID
Usisaon naton kon paano ang aton katinlo sa pisikal nagapadungog kay Jehova, kag kon paano mauntatan ang mahigko nga mga buhat kag bisyo.
3. Ang pisikal nga katinlo nagapadungog kay Jehova
Mahibaluan naton ang pagtamod ni Jehova sa katinlo kon usisaon naton ang iya mga sugo sa Israel sang una. Basaha ang Exodo 19:10 kag 30:17-19, dayon binagbinaga ini nga mga pamangkot:
-
Base sa sini nga mga bersikulo, ano ang pagtamod ni Jehova sa pisikal nga katinlo?
-
Ano ang pirme mo himuon para padayon ka nga mangin matinlo sa pisikal?
Para mangin matinlo sa pisikal, kinahanglan sing tion kag panikasog. Pero mahimo naton ini diin man kita nagaistar ukon imol man kita ukon manggaranon. Tan-awa ang VIDEO, dayon binagbinaga ang masunod nga pamangkot.
-
Ngaa mas respetuhon sang mga tawo ang aton mensahe kon mahipid kag matinlo ang aton mga gamit sa pagbantala?
4. Untati ang malain nga mga bisyo
Buligan kita ni Jehova nga mauntatan ang malain nga bisyo
Kon nagapanigarilyo ka ukon nagadroga, kabalo ka gid kon daw ano kabudlay untatan ini nga bisyo. Ano ang makabulig sa imo? Pamensara kon ano ang epekto sang bisyo sa imo. Basaha ang Mateo 22:37-39, dayon binagbinaga kon ano ang epekto sa isa sang iya pagpanigarilyo ukon pagdroga sa . . .
-
iya pagpakig-abyan kay Jehova.
-
iya pamilya kag sa iban.
Maghimo sing plano kon paano mauntatan ang malain nga bisyo. a Tan-awa ang VIDEO.
Basaha ang Filipos 4:13, dayon binagbinaga ini nga pamangkot:
-
Paano ang regular nga pangamuyo, pagtuon sa Biblia, kag pagtambong sa mga miting makabulig sa isa nga mauntatan ang iya malain nga bisyo?
5. Likawi ang mahigko nga panghunahuna kag mga buhat
Basaha ang Colosas 3:5, dayon binagbinaga ini nga mga pamangkot:
-
Ngaa makasiling kita nga ang pornograpiya, sexting, kag masturbasyon mahigko sa panulok ni Jehova?
-
Sa banta mo, husto bala si Jehova nga dapat mangin matinlo kita sa moral? Ngaa?
Tan-awa kon paano malikawan ang mahigko nga panghunahuna. Tan-awa ang VIDEO.
Nagsugid si Jesus sang ilustrasyon para ipakita nga dapat determinado kita nga mangin matinlo sa moral. Basaha ang Mateo 5:29, 30, dayon binagbinaga ini nga pamangkot:
-
Indi buot silingon ni Jesus nga halitan naton ang aton kaugalingon, kundi ginpakita niya nga may dapat kita himuon. Ano ang dapat himuon sang isa para malikawan niya ang mahigko nga panghunahuna? b
Kon nagatinguha ka gid nga likawan ang mahigko nga panghunahuna, ginapabaloran gid ina ni Jehova. Basaha ang Salmo 103:13, 14, dayon binagbinaga ini nga pamangkot:
-
Kon nabudlayan ka nga untatan ang malain nga bisyo, paano ini nga mga bersikulo makabulig sa imo nga indi mangampo?
Indi mangampo!
Basi magsiling ka, ‘Nauntatan ko na, nagbalik gihapon, sigehon ko na lang ni.’ Pero pamensara ini: Kon nasandad kag natumba ang isa ka runner, indi buot silingon pierde na sia, ukon dapat sia magbalik sa umpisa. Gani kon nagbalik ka sa imo bisyo, indi buot silingon nga indi mo na gid ini mauntatan. Indi man buot silingon nga wala na sing pulos ang imo ginhimo nga mga panikasog. Normal lang nga sa umpisa nagabalik ka sa imo bisyo. Pero indi ka dapat mangampo! Sa bulig ni Jehova, mauntatan mo ang malain nga bisyo.
KON MAGSILING ANG IBAN: “Adik na ’ko. Indi ko na ’ni mauntatan.”
-
Ano nga bersikulo ang ipabasa mo sa iya para ipakita nga sa bulig ni Jehova mauntatan niya ang malain nga bisyo?
SUMARYO
Mapalipay naton si Jehova kon ginatinguhaan naton nga mangin matinlo ang aton lawas, aton hunahuna, kag aton ginahimo.
Rebyu
-
Ngaa importante nga mangin matinlo?
-
Paano ka mangin matinlo sa pisikal?
-
Paano mangin matinlo ang imo panghunahuna kag ginahimo?
DUGANG NGA IMPORMASYON
Ano nga mga butang ang puede mo himuon para mangin matinlo sa pisikal bisan pa pigado ka?
Maayo nga Panglawas kag Katinlo—Pagpanghinaw sang Kamot (3:01)
Hibalua ang mga puede mo himuon para mauntatan ang pagpanigarilyo.
Hibalua ang epekto sang pornograpiya.
“Pornograpiya—Makahalalit Gid Bala?” (Ang Lalantawan, Agosto 1, 2013)
Hibalua kon paano nauntatan sang isa ka lalaki ang pagtan-aw sa pornograpiya.
“Madamo nga Kapaslawan, Antes ang Kadalag-an” (Ang Lalantawan Num. 4 2016)
a Ang artikulo nga “Paano Mauntatan ang Pagpanigarilyo?,” sa seksion nga Dugang nga Impormasyon sa sini nga leksion, nagapaathag sang mga puede himuon para mauntatan ang bisyo.
b Para mauntatan ang masturbasyon, basaha ang “How Can I Conquer the Habit of Masturbation?” sa libro nga Questions Young People Ask—Answers That Work, Volume 1, kapitulo 25.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
