AJUMTALÁB 40
¿Jantʼiniʼ i éjtowal ku kʼwajiy tʼokat tin tamét a Dios?
Ki tsalpay jantʼoj in tʼajál jun i mamaláb abal kin abaʼ in tsakámil tʼokat ti escuela. In tʼajál ti kwéntaj abal ka kʼalej achímadh ani tʼokat in toltómil. Antsanáʼ, an tsakam u kʼwajíl lubach ani u tejwamél abal u kʼanidháb kʼal in tátajchik. A Jehová pel i Tátaj ani kom tu kʼanidhál, in léʼ abal ki koʼoy tʼokat i iniktal ani i ejatal. Max ku kʼwajiy tʼokat, neʼets ki atsʼaʼ más kulbél ani neʼets ka puwénchat a Jehová.
1. ¿Jantʼiniʼ i éjtowal ki koʼoy tʼokat i iniktal?
A Jehová tu uchál: «Kit xeʼtsin tʼokat» (1 Pedro 1:16). Abal ku kʼwajiy tʼokat tin tamét a Dios, kwaʼal ki koʼoy tʼokat i iniktal ani i ejatal. Jaxtám i tsápnachal ki wejkʼaʼ i kʼimáʼ, ku achin, ki koʼoy tʼokat i toltómil ani an carro. Jayej, u tólmix abal ka tʼokdháj an atáj juʼtáj tu támkunal abal ki kʼakʼnaʼ a Jehová. Max etsʼey ku xeʼtsin tʼokat, neʼets ki tʼajaʼ abal kʼeʼat kin puwénchij a Jehová (2 Corintios 6:3, 4).
2. ¿Jantʼoj tam tʼajbiláb axi kidháb kwaʼal ki jilaʼ abal ku kʼwajiy tʼokat?
An Biblia tu uchál axéʼ xi kaw: «Ku etsʼey xeʼtsin tʼokat, yab ku tsʼílkʼonchat kʼal jawaʼ kidháb i iniktal ani i ejatal» (2 Corintios 7:1). Jaxtám i tsápnanchal yab ki tʼajaʼ jantʼoj axi kin ódhnaʼ i iniktal ani i tsalápil. I léʼ ki kulbédhaʼ a Jehová, jaxtám i tsápnanchal ki pojkaʼ jawaʼ in éjtowal tu ku ódhnanchij i tsalápil (Salmo 104:34). Jayej, i tsápnanchal abal yab ki eyendhaʼ i kidháb kaw (ka ajiy Colosenses 3:8).
¿Jantʼoj in éjtowal tu ku lúklinchij i iniktal ani i ejatal? Waʼats yan jantʼoj axi in éjtowal tu ku lúklinchij i iniktal. Jaxtam yab u jutsʼul, yab i eyendhál i drogas ani yab i watʼkʼanchal kʼal an ilál axi i utsʼál. Jayej, yab i alkʼidh eyendhál i ilál axi yab i yéjenchal. Antsanáʼ i beletnál i ejatal ani i tejwamedhál abal i kʼakʼnál kom a Jehová tu pidhaʼ i ejatal. Kʼeʼat jantʼoj axi i tsápnanchal yab ki tʼajaʼ abal ku kʼwajiy tʼokat, játs yab ki metʼaʼ i pornografía ani yab ku ubatʼin kʼal i iniktal (Salmo 119:37; Efesios 5:5). Walám waʼats jantʼoj axi kʼibat a atsʼál ka jilaʼ ka tʼajaʼ, pero a Jehová neʼets ti tólmiy (ka ajiy Isaías 41:13).
ABAL KA EXÓBNAʼ MÁS
Ki tsuʼuw jantʼiniʼ in puwénchal a Jehová, ki koʼoy tʼokat i iniktal ani ki jilaʼ ki tʼajaʼ i kidháb tʼajbiláb.
3. I puwénchal a Jehová max ki koʼoy tʼokat i iniktal
Tam i ajiyal an abatnaxtaláb axi a Jehová in pidhaʼ an israelitas, i tʼajál ti kwéntaj abal Jajáʼ in pidhál yan in exbádh ku kʼwajiy tʼokat. Ka ajiychik Éxodo 19:10 ani 30:17-19 ani ka tsálpaychik kʼal axéʼ:
-
¿Jantʼiniʼ u tejwamél al axéʼ xi versículos abal a Jehová in kulbetnál ki koʼoy tʼokat i iniktal?
-
¿Jantʼoj neʼets tu ku tólmiy abal etsʼey ku xeʼtsin tʼokat?
Neʼets kin yéjenchij ki lej tsápnanchij abal ku kʼwajiy tʼokat. Juʼtámakits ku kʼwajiy i éjtowal ku kʼwajiy tʼokat, bélits max u tumínladh o u tsʼejwantal. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
Max an atiklábchik kin tsuʼuw abal u xeʼtsinal tʼokat, ¿walám más kin léʼnaʼ tu ku otsʼowiy? ¿Jaleʼ?
4. Ka jilaʼ i kidháb tʼajbiláb
A Jehová in éjtowal ti tólmiy abal ka jilaʼ tit jutsʼul.
Max tatáʼ it jutsʼúl o max a eyendhál i drogas, walám a exlál abal pel jantʼoj axi lej kʼibat ka jilaʼ. Jantʼoj axi neʼets ti lej tólmiy játs ka tsalpay, jantʼiniʼ ti kʼwajat ti ódhnanchal a ejatal. Ka ajiychik Mateo 22:37-39 ani ka tʼilaʼchik jantʼiniʼ an drogas in éjtowal tu ku owmédhaʼ...
-
... kʼal a Jehová.
-
... kʼal i yanél ani kʼal kʼeʼat i atikláb.
Ka tsalpay jantʼoj a éjtowal ka tʼajaʼ abal ka jilaʼ jun i kidháb tʼajbiláb. a Ka tsuʼuwchik an VIDEO.
Ka ajiychik Filipenses 4:13 ani ka tsálpaychik kʼal axéʼ:
-
¿A tsálpayal abal an oláb, an exobintaláb kʼal an Biblia ani an tamkuntaláb, neʼets kin tólmiy jun i atikláb abal kin jilaʼ jun i kidháb tʼajbiláb? ¿Jaleʼ a tsálpayal antsanáʼ?
5. Ka tsápnanchij ka jilaʼ i kidháb tʼajbiláb ani i kidháb tsalap
Ka ajiychik Colosenses 3:5 ani ka tsálpaychik kʼal axéʼ:
-
¿Jaleʼ i exlál abal a Jehová yab in kulbetnál ki tsuʼuw i pornografía, ki ábnaʼ i mensajes axi kidháb, nibal ku ubatʼin kʼal i iniktal?
-
¿Walám tekedh abal a Jehová tu ku konchij abal ku xeʼtsin tʼokat? ¿Jaleʼ?
Ka exóbnaʼ jantʼoj a éjtowal ka tʼajaʼ abal ka ataʼ an kidháb tsalap. Ka tsuʼuwchik an VIDEO.
A Jesús in eyendhaʼ jun i tʼiplab abal tu ku exóbchij jantʼoj i éjtowal ki tʼajaʼ max i léʼ ku kʼwajiy tʼokat. Ka ajiychik Mateo 5:29, 30 ani ka tsálpaychik kʼal axéʼ:
-
Jawaʼ in léʼak kin uluw a Jesús tejéʼ, játs abal yab kwaʼal ki jilaʼ tu ku ataʼ an kidháb tʼajbiláb. ¿Jantʼoj kwaʼal ki tʼajaʼ abal yab tu ku ataʼ an tsalap axi kidháb? b
Max i kʼwajatits a tsápnanchal ka jilaʼ axéʼ xi kidháb tʼajbiláb, a éjtowal ka lej belaʼ abal a Jehová u lej kulbél kʼal an tsapláb axi a tʼajál. Ka ajiychik Salmo 103:13, 14 ani ka tsálpaychik kʼal axéʼ:
-
Max it kʼwajat a tsápnanchal ka jilaʼ jun i kidháb tʼajbiláb, ¿walám in éjtowal ti tólmiy axéʼ xi versículos? ¿Jaleʼ?
Yab ka walbaʼ ta baʼ max kit wichʼkʼon ka tʼajaʼ jun i kidháb tʼajbiláb
Walám ki tsalpay, «Yabáts neʼets ku tsápnanchij, yab u éjtowal ku jilaʼ». Pero ki tsalpay kʼal axéʼ. Max jun i atikláb axi u ubatʼ ti adhíl ka ijkan, yab in léʼ kin uluw abal in kʼibaʼits o abal kwaʼal kin tujuw ti ít. Jayej, max tatáʼ it wichʼkʼonének kʼal jun i kidháb tʼajbiláb, yab in léʼ kin uluw abal yabáts neʼets ka ejtow ka jilaʼ. Yab ka tsalpay abal yab exbadh an tsapláb axi a tʼajámal. Tam jun kʼwajat in tsápnanchal kin jilaʼ jun i kidháb tʼajbiláb, neʼets ka ukʼpin yaníl. ¡Yab ka walbaʼ ta baʼ! A Jehová neʼets ti tólmiy abal ka jilaʼ jun i kidháb tʼajbiláb.
JAWAʼ TALCHIK IN TSÁLPAYAL: «Yab u éjtowal ku jilaʼ ku tʼajaʼ».
-
¿Jawaʼ tam texto axi ti Biblia neʼets ka eyendhaʼ abal kin exbay, abal kʼal a Jehová neʼets ka tólmiyat?
JAWAʼ I EXOBNÁMAL
Neʼets ki kulbédhaʼ a Jehová max ki koʼoy tʼokat i iniktal, i ejatal ani i tsalápil.
Ki tʼilaʼ jawaʼ i exóbnaʼ
-
¿Jaleʼ ti lej exbadh ku kʼwajiy tʼokat?
-
¿Jantʼoj kwaʼal ki tʼajaʼ abal ki koʼoy tʼokat i iniktal?
-
¿Jantʼoj kwaʼal ki tʼajaʼ abal ki koʼoy tʼokat i ejatal ani i tsalápil?
KA EXÓBNAʼ JANTʼOJ ÍT
Bélits max yab i lej kwaʼal i tumín, ¿jantʼoj i éjtowal ki tʼajaʼ abal ku kʼwajiy tʼokat?
Ka ajiy jantʼoj a éjtowal ka tʼajaʼ abal ka jilaʼ tit jutsʼul.
«Jawaʼ a éjtowal ka tʼajaʼ abal ka jilaʼ tit jutsʼul» (¡Despertad!, mayo de 2010)
Ka exlaʼ jantʼoj u watʼel kʼal jitaʼchik in tsuʼtal i pornografía.
«¿Walám tu ódhnanchal i ejatal an pornografía?» (La Atalaya, 1 de agosto de 2013)
Ka exlaʼ jantʼoj in tʼajaʼ jun i inik abal kin jilaʼ kin tsuʼuw i pornografía.
«U lej tsápnanchij ma tu ejtow ku jilaʼ» (La Atalaya, núm. 4 2016)
a Ban pejach «Ka exóbnaʼ jantʼoj ít», neʼets ka elaʼ jun i pejach axi in bij: «Jawaʼ a éjtowal ka tʼajaʼ abal ka jilaʼ tit jutsʼul», tanáʼ waʼats i tólmixtaláb abal jun i atikláb kin jilaʼ ti jutsʼul.
b Abal ka exlaʼ jantʼoj in éjtowal kin tʼajaʼ jun i atikláb, abal kin jilaʼ kin ubatʼnaʼ in iniktal, ka ajiy an capítulo 25 in kʼál an libro Lo que los jóvenes preguntan. Respuestas prácticas (volumen 1), axi in bij «¿Neʼets ku ejtow ku jilaʼ ku ubatʼnaʼ u iniktal?».
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
