EHONGWA 40
Matu yenene vi okurira ovakohoke komurungu wa Jehova?
Ripura na ina worusuvero ngu ma rongerisa okanatje ke okuyenda koskole. Eye u ke koha nokutara kutja ozombanda zako ozongohoke. Okutjita nao ku tjita kutja ke rire okaveruke, nu ku raisa ku varwe kutja ovanene vako ve ke suvera. Momuano otjingewo, Tate wetu worusuvero Jehova, u vanga kutja tu rire ovakohoke korutu, momeripura, momeritjindiro noviṋa mbi tu hungira. Indu tji tu ri ovakohoke, tu rietera oveni ouwa nu tu mu yozika.
1. Matu yenene vi okurira ovakohoke korutu?
Jehova u tja: “Rireye ovayapuke.” (1 Petrus 1:16) Okurira ovayapuke ku heya kutja matu sokurira ovakohoke korutu, nomuano mu tu ritjinda. Matu yenene okurira ovakohoke korutu, indu tji matu rikoho nokuṱiza ozombanda, ozonganda, novihauto vyetu oukohoke. Eṱe wina matu yenene okuvatera okukohorora Etuwo rOmerikotameneno. Tji tu ri ovakohoke korutu, tu eta ondjozikiro ku Jehova.—2 Ovakorinte 6:3, 4.
2. Ovikwaye mbi matu sokunakaura kutja tu rire ovakohoke?
Ombeibela i tu tunduuza kutja tu “rikohorore koviṋa avihe, mbi zunḓa orutu nomuinyo.” (2 Ovakorinte 7:1) Ku nao, tu nakaura otjiṋa ngamwa atjihe tji mape ya atji zunḓa orutu poo ouripura wetu. Omeripura wetu maye sokutjata ku Jehova, ku nao matu sokunakaura omeripura omavi. (Epsalme 104:34) Nu wina tu kondja kutja atu ha ungurisa eraka ehazendu.—Lesa Ovakolose 3:8.
Ovikwaye vyarwe mbi mape ya avi tjiti kutja atu ha rire ovakohoke morutu na mongaro yomeritjindiro? Pe noviṋa tjiva mbi mape ya avi zunḓa orutu rwetu. Ku nao, katu sokuungurisa oviṋa tjimuna omakaya, oseni poo ovipurukise vyarwe. Tji twa tjiti nao, tu rira ovaveruke nu tu raisa ondengero kotjiyandjewa tjomuinyo. Eṱe wina tu kondja okurira ovakohoke momeritjindiro, mokukondja okunakaura oviṋa tjimuna okurinyandisa oviṋepo vyourumendu novyoukazendu nondando yokukovisa ozonḓuma zorukatuko, poo okutarera oviperendero vyakamuzu. (Epsalme 119:37; Ovaefese 5:5) Mape ya a rire ouzeu okuisa okutjita oviṋa mbyo, posi ya Jehova ma yenene okutuvatera.—Lesa Jesaja 41:13.
KONḒONONA OUKOTO
Rihonga kutja ongwaye tji tu yozika Jehova indu tji tu ri ovakohoke korutu, nokutja matu yenene vi okuisa ozongaro zombonḓi.
3. Okurira ovakohoke korutu ku yozika Jehova
Indu tji matu lese omatwako Jehova nga yandjere kOvaisrael, tu rihonga kutja ongwaye tje ri ounanḓengu kovakarere ve okurira ovakohoke. Lesa Eksodus 19:10 no 30:17-19, nu okuzambo hungirira komapuriro nga:
-
Omatjangwa nga maye raisa ye ohunga nomuano Jehova me vara oukohoke worutu?
-
Ovikwaye mbi mo yenene okutjita aruhe kutja u rire omukohoke korutu?
Okurira omukohoke korutu ku kambura oruveze nozongondjero. Posi ya matu yenene okutjita nao, kainatja kutja twa tura pi poo kutja oweṱe ovatumbe poo ovasyona. Nyanda OKAVIDIO, nu okuzambo hungirira kepuriro ndi mari kongorere mba.
-
Ongwaye ovandu mbu tu zuvarisa ko tji ve raisa ondengero tjinene ku Jehova, indu tji va munu kutja oviṋa vyetu ovikohoke?
4. Nakaura ozongaro ozombi
Jehova ma yenene okutuvatera okunakaura ongaro ngamwa aihe ombi
Indu tji u pepa omakaya poo tji u ungurisa ovipurukise, ove mape ya o munu kutja ouzeu okuvyesa. Ovikwaye mbi mavi yenene okukuvatera? Tara komuano ongaro ndjo mu i ṱuna kove. Lesa Mateus 22:37-39, nu okuzambo hungirira komuano omakaya poo ovipurukise mu vi ṱuna . . .
-
koupanga woye ku na Jehova.
-
keṱunḓu roye novandu varwe.
Paha omuano wokunakaura ongaro ombi ndjo. a Nyanda OKAVIDIO.
Lesa Ovafilipi 4:13, nu okuzambo hungirira kepuriro ndi:
-
Omomuano uṋe okukumba, okukara nomakonḓononeno wOmbeibela, nokuyenda kozombongarero zombongo aruhe, mu mavi yenene okukuvatera okunakaura ongaro ombi?
5. Rwisa omeripura novitjitwa ovivi
Lesa Ovakolose 3:5, nu okuzambo hungirira komapuriro nga:
-
Matu tjiwa vi kutja oviperendero vyakamuzu, okuhindasana oviṋa vyomatuka mouyendjezewa, nokurinyandisa oviṋepo vyourumendu poo vyoukazendu nondando yokukovisa ozonḓuma zorukatuko, oviṋa ovivi komurungu wa Jehova?
-
Mo munu kutja onawa ku Jehova okuundjira ko ku eṱe okurira ovakohoke momeritjindiro? Omena raye?
Tara komuano mu matu yenene okurwisa omeripura omahakohoke. Nyanda OKAVIDIO.
Jesus wa ungurisa otjihorera okuraisa kutja matu sokurimanena okurira ovakohoke momeritjindiro. Lesa Mateus 5:29, 30, nu okuzambo hungirira kepuriro ndi:
-
Jesus kaa hee kutja matu sokurihihamisa oveni kotutu, posi ya aa hee kutja matu sokutoora omukambo. Ovikwaye omundu mbi ma yenene okutjita okunakaura omeripura omavi? b
Indu tji u kondja okurwisa omeripura omavi, Jehova u vara ozongondjero zoye nḓo tjinene. Lesa Epsalme 103:13, 14, nu okuzambo hungirira kepuriro ndi:
-
Indu tji u kondja okuisa ongaro ombi, etjangwa ndo mari ku tunduuza vi okukayenda komurungu okunakaura ongaro ndjo?
O yumbu ohama
Mape ya a rire oupupu okuripura kutja, ‘Ami mba putara, opuwo me ṱokuyumba ohama.’ Posi ya ripura notjiṋa hi: Nandarire kutja omutupuke wotjikara wa putara nu au, ihi katji hee kutja wa pandjara motjikara nu kaku hee kutja ma sokuuta rukwao okuza komautiro. Momuano otjingewo, indu tji wa putara ngunda amo kondjo okupoka kongaro ombi, kaku hee kutja ko nokuyenena okunakaura ongaro ombi ndjo. Nu wina kaku hee kutja ozongondjero nḓu wa tjita nga ku nai za ri omungandjo. Atuhe tu putara, ku nao o yumbu ohama. Nombatero ya Jehova, mo yenene okunakaura ongaro ombi ndjo.
OVANDU TJIVA VE TJA: “Ami mba iririra. Ouzeu okuvyesa.”
-
Etjangwa riṋe ndi mo yenene okuraisira omundu ngo, kutja Jehova ma yenene okumuvatera okuisa ongaro ombi ndjo?
OKUYARUKIRA PO OUSUPI
Eṱe tu yorokisa Jehova indu tji twa ṱiza orutu, ouripura, nomeritjindiro wetu oukohoke.
Okurizemburukisa
-
Ongwaye tje ri ounanḓengu tjinene okurira ovakohoke?
-
Mo yenene vi okurira omukohoke korutu?
-
Omomuano uṋe mu mo yenene okutjita kutja omeripura nomeritjindiro woye ye rire omakohoke?
RIHONGA OVINGI
Oviṋa viṋe ovipupu mbi mo yenene okutjita kutja u rire omukohoke korutu, nandarire kutja ko noviṋa ovingi?
Oviṋa mbi mo yenene okutjita kutja u ise okupepa omakaya.
Konḓonona omuano oviperendero vyakamuzu mu vi ṱuna komundu.
“Hapo oviperendero vyakamuzu ovinaumba poo kavinaumba?” (Oruhungu, 1 ku Auguste, 2013)
Tara komuano omurumendu umwe ma isa okutarera oviperendero vyakamuzu.
“Ami mba putara povikando ovingi ngunda e hi ya toṋa” (Oruhungu No. 4 2016)
a Orupa ndwi “Omuano wokuisa omakaya,” ndu ri kehi yorupa ndwi Rihonga ovingi mehongwa ndi, maru kahurura oviṋa omundu mbi ma yenene okutjita okuisa otjiṋa ho.
b Kutja u nakaure ongaro yokurinyandisa oviṋepo vyourumendu poo vyoukazendu nondando yokukovisa ozonḓuma zorukatuko, tara korupa ndwi “Me yenene vi okunakaura ongaro yokurinyandisa oviṋepo vyourumendu poo vyoukazendu?” membo ndi Omapuriro omitanda ngu ve pura—Omaziriro okuza mOmbeibela, Embo 1, ekondwa 25.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
