ƐLĀ Ō NWU ƆMƐ 40
Ɛgɛnyá Nɛ Alɔ Géē Le Yeŋee Ipeyi Ku Ɔwɔico A?
Leyi má ɔ ka ɛ́nɛ́ éyi nōo lɛ ihɔtu yɔ i tu ɔyi nu nɛ̄ŋcɛ́ tu kóō gā inɔkpa. Ó gē ceyitikwu gwa ɔyi a iyē klla gē lɛ ili ō yeŋee wu iyē. Ɛnyā géē ya ku ɔyi a kóō lɔfu iyē ku ācɛ ɔhá kéē klla má ɔ ka ɛ́nɛ́ mla adā nu gē teyi tu ɔ. Ɛgɛ nɛ adā mla ɛ́nɛ́ dɔka ku ayi uwa kéē le yeŋee a, Adā alɔ Ujehofa dɔka ku alɔ lɛ ɔkpiye ku alɔ tu yeŋee, kwu ɛlá ō gbo, ɛlā ō ka mla uce ō ya ku alɔ. Ɔdaŋ ku alɔ le yeŋee, alɔ géē lɛ itene klla géē bi owoofu gē lɛ Ujehofa.
1. Ɛgɛnyá nɛ alɔ géē lɛ iyi alɔ tu yeŋee a?
Ujehofa da alɔ kahinii: “Aá lɛ iyī aá yá tīihɔ.” (1 Upíta 1:16) Ō le tiihɔ a lɛ ō ya mla ɔkpiye ku alɔ ō le tu yeŋee mla uce ō ya ku alɔ. Alɔ géē le iyi alɔ tu yeŋee ɔdaŋ ku alɔ gē gwiiye ojigogo, gē lɛ ili ku alɔ, ɔlɛ alɔ mla ɔdā ō kwinya ku alɔ tu yeŋee. Alɔ klla lɔfu je otabɔ ō lɛ Agbla Ku Ajɔɔcɛ ku alɔ tu yeŋee duu. Ɔdaŋ ku alɔ lɛ iyi alɔ tu yeŋee, alɔ géē bi owoofu gē lɛ Ujehofa.—2 Ācɛ Ukɔ́rīnti 6:3, 4.
2. O ya ɛɛ ku alɔ lɛ iyi alɔ tu yeŋee a, ɛdɔ uce ō ya nyá nɛ alɔ i cika ō ya ŋ ma?
Ubáyíbu da alɔ, “ká alɔ lɛ aɔ́dā nēe ī yá kú ɔkpíyē mɛ́mla odo kú alɔ kéē blínyī ā kpó bónū.” (2 Ācɛ Ukɔ́rīnti 7:1) Ɛnyā cɛ lɛ alɔ gē ceyitikwu habɔ ɔdā duuma nōo géē biya ɔkpiye amāŋ ɛlá ō gbo ku alɔ. Ɛlá ō gbo ku alɔ cika ō ya ku ɔtu kóō he Ujehofa, ohigbu ɛnyā alɔ gē ceyitikwu lɔɔlɔhi ō ta ɛlá ō gbo nōó lɔhi ŋ. (Aíjē Kú Ɛ̄gbā 104:34) Alɔ klla gē ceyitikwu ku alɔ kɛla olɔhi ŋma okonu.—Jé Ācɛ Ukólōsi 3:8.
Ɔdā ɔhá nyá gáā ya ku alɔ lɛ iyē amāŋ uce ō ya ku alɔ tu yeŋee a? Ó lɛ aɔdā ōhī nōo lɔfu biya iyē ku alɔ. Ohigbu ɛnyā, alɔ i gē bi aodee bɛɛka itaba, bɛtɛl nɔtu, mla aɛcí obɔbi le yuklɔ ŋ. Ɔdaŋ ku alɔ i gē bi aɔdā nōo ba nyā le yuklɔ ŋ, alɔ géē lɔfu iyē klla géē mafu ka ɛhi ku oyeeyi a jɛ alɔ eyī. Alɔ klla gē ceyitikwu ku alɔ le yeŋee ipu uce ō ya ku alɔ ŋma lɛ ō habɔ uce obɔbi ō lɛ abɔ ya iyē bɛɛka a yɔ i ce ikpo iyi uwɔ a mla ō má aifoto amāŋ uvidio ku ācɛ ō tohɛɛwa. (Aíjē Kú Ɛ̄gbā 119:37; Ācɛ Ɛ́fēsɔsi 5:5) Ō habɔ auce ō ya ɛgɛnyā i gē tɔɔtɛ ŋ, amáŋ Ujehofa géē ta alɔ abɔ ku alɔ habɔ uwa ta.—Jé Ayisáya 41:13.
JÉ GƆBU
Nwu ɛgɛ nɛ alɔ gē bi owoofu gē lɛ Ujehofa eko duuma nɛ alɔ lɛ iyi alɔ tu yeŋee, ku a klla má ɛgɛ nɛ alɔ géē habɔ aɔdā nōó lɔhi ŋ ma ta.
3. Ō lɛ ɔkpiye ku alɔ tu yeŋee gē bi owoofu gē lɛ Ujehofa
Eko duuma nɛ alɔ jé íne nɛ Ujehofa je lɛ éwo ku Isrɛlu ikee a, alɔ géē má ɛgɛ nōó cɛgbá lɛ Ujehofa ku ācɛ ɔlɛ nu kéē lɛ iyi uwa tu yeŋee a. Jé Oōyɛbɛ̄ɛcɛ 19:10 mla 30:17-19, cɛɛ ku aa kɔka lɛyikwu aɔka nōo ba nyā:
-
Ɔdi nɛ aɔgba nyā mafu lɛyikwu ɛgɛ nɛ Ujehofa gē leyi má ō lɛ iyi ɔcɛ tu yeŋee a?
-
Ɔdi nɛ a géē ya ojigogo o ya ɛɛ ku a lɛ iyi uwɔ tu yeŋee a?
Ō lɛ iyi ɔcɛ tu yeŋee wɛ ɔdā nōo gē je eko mla ō ceyitikwu. Amáŋ, alɔ lɔfu lɛ iyi alɔ tu yeŋee ɛga duuma nɛ alɔ lā gla. Ɔdaŋ ku alɔ kóō wɛ ɔcɛ ō lɛ ije amāŋ ɔcɛ ō gbɛha naana, alɔ lɔfu lɛ iyi alɔ tu yeŋee gla. Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
Ɔdiya nɛ ācɛ nɛ alɔ gē tɔɔna lɛ uwa a géē lɛ ojilima ce Ujehofa fiyɛ eko néē má ka aodee ku alɔ le yeŋee a?
4. Kwu abɔ i ci auce obɔbi ō ya
Ujehofa lɔfu ta alɔ abɔ lɛ abɔ ci uce obɔbi ō ya
Ɔdaŋ ku a gē gwa itaba amāŋ bi ɛcí le yuklɔ ɔwɛ obɔbi, a géē jé ɛgɛ nōó lɔnɔ lɛ ō habɔ auce ɔɔma ta. Ɔdi gáā tabɔ a? Leyi yɛ ɛgɛ nɛ auce ō ya a lɛ abɔ kwu uwɔ a. Jé Umátiyu 22:37-39, cɛɛ ku aa kɔka lɛyikwu ɛgɛ nɛ itaba ō gwa amāŋ ō bi ɛcí le yuklɔ ɔwɛ nōó lɔhi ŋ gē . . .
-
lɛ abɔ kwu ɛma ku ɔcɛ mla Ujehofa a.
-
lɛ abɔ kwu ācɛ apɔlɛ mla ācɛ ɔhá nōo yɛ jila ɔ ta a.
Ya ōmiya ō kwu abɔ i ci uce obɔbi ō ya éyi duudu. a Lɛ UVIDIO nyā mafu.
Jé Ācɛ Ufílipāyi 4:13, cɛɛ ku aa kɔka lɛyikwu ɔka nyā:
-
Ɛgɛnyá nɛ ɔkɔ ō gba ojigogo, oklɔcɛ ku Ubáyíbu mla ō gā ōjila ku ujɔ gē je ɔfu iyē lɛ ɔcɛ ō kwu abɔ i ci uce obɔbi ō ya a?
5. Nuunu tu ɛlá ō gbo mla auce obɔbi ō ya
Jé Ācɛ Ukólōsi 3:5, cɛɛ ku aa kɔka lɛyikwu aɔka nōo ba nyā:
-
Ɛgɛnyá nɛ ō má uvidio amāŋ ifoto ku ācɛ ō tohɛɛɛwa wɛ ɔdobɔbi ipeyi ku Ujehofa a? Ɛgɛnyá nɛ ō tu umeseji ku ikpo ɔnyā ō ce amāŋ aja ō gbo mla ō tu ifoto amāŋ uvidio ō tohɛɛwa ku uwɔ fu ɔcɛ ɔhá wɛ ɔdobɔbi ipeyi ku Ujehofa a? Ɛgɛnyá nɛ ō lɛ abɔ ya iye bɛɛka ɔcɛ yɔ i ce ikpo iyi nu a wɛ ɔdobɔbi ipeyi ku Ujehofa a?
-
A gbɛla kóō cika jɛ ku Ujehofa kóō leyice ku alɔ le yeŋee ipu uce ō ya ku alɔ? Ɔdiya a?
Má ɛgɛ nɛ a géē nuunu tu ɛlá ō gbo obɔbi a. Lɛ UVIDIO nyā mafu.
Ujisɔsi bi aciije éyi le mafu ku cika ō le tutu ō ya odee eko okpaakpa nōó cɛgbá a, o ya ɛɛ ku alɔ yɔ yeŋee ipu uce ō ya ku alɔ. Je Umátiyu 5:29, 30, cɛɛ ku aa kɔka lɛyikwu ɔka nyā:
-
Ujisɔsi i yɔ i ka ku alɔ cika ō ya ɔkpiye alɔ agbe ŋ, amáŋ ó yɔ i ka ku alɔ cika ō ya odee. Ɔdā ijeeyi nyá nɛ ɔcɛ cika ō ya o ya ɛɛ kóō habɔ ɛlá ō gbo obɔbi ta a? b
Ɔdaŋ ku a yɔ i nuunu ō lɛ ɛlá ō gbo obɔbi yale, oceyitikwu ku uwɔ jɛ Ujehofa eyī. Jé Aíjē Kú Ɛ̄gbā 103:13, 14, cɛɛ ku aa kɔka lɛyikwu ɔka nyā:
-
Ɔdaŋ ku a yɔ i nya mla uce obɔbi éyi, ɛgɛnyá nɛ ɛga ku Ubáyíbu nyā ta uwɔ ɔtu kwu ɔtu ku a gɔbu ipu unu ku uwɔ a?
Ɛ̄jɛ̄ kóō hii jɛ uwɔ ŋ!
Ó tɔɔtɛ ku ɔcɛ kóō gbɛla ka, ‘N le gwonu ɛ, ó lɛ a n lɛ abɔ ci unu nɛ um yɔ i nu a duu.’ Amáŋ, gbɛla lɛyikwu ɛlā nyā ɛ: Ohigbu ku ɔcɛ ō kwiinya lɛ ikpo tu ajɛ gáā gwonu a, ɔɔma i wɛ ka ɔcɛ ō kwinya i gáā yale gla gɛ ŋ amāŋ ɔɔma i wɛ kóō géē nyɔ gáā gbɔɔ inya a ŋma ajɛ ɛyipɛ ŋ. Ɔwɛ ekpo ɔɔma duu, ɔdaŋ ku a gáā gwonu ipu unu nɛ a yɔ i nu ō lɛ abɔ ci uce obɔbi ō ya naana, ɔɔma i wɛ ku á gáā yale gla ŋ nɛɛ ŋ. Ɔtu ku uwɔ kē lɔfu ya uwɔ ɔwɛ olɔhi lɛyikwu ɛgɛ nɛ a ceyitikwu gáā kwu ɛ ma. Ō gwonu ipu unu nɛ a yɔ i nu a wɛ ɔdā nōo ya da ɔcɛ duuma gla. Ɛ̄jɛ̄ kóō hii jɛ uwɔ ŋ! Mla otabɔ ku Ujehofa, a lɔfu lɛ abɔ ci uce obɔbi ō ya.
ĀCƐ ŌHĪ GĒ KA: “Ó le jɛ um iyē ɛ. Ń lɛ abɔ ci ɔ gla ŋ.”
-
Ɛga ku Ubáyíbu nyá nɛ a lɔfu bi le mafu lɛ ɔcɛ a kóō lɔfu lɛ abɔ ci uce obɔbi ɔɔma mla otabɔ ku Ujehofa a?
ƆDI NƐ A NWU A?
Alɔ gē ya ɔdā nōo he Ujehofa ɔtu ŋma lɛ ō lɛ ɔkpiye ku alɔ, ɛlá ō gbo ku alɔ mla uce ō ya ku alɔ tu yeŋee.
Aɔka ō tu alɔ ɛlá kwu ɔdā nɛ alɔ nwu
-
Ɔdiya nōó cɛgbá nɛɛnɛhi ō yɔ yeŋee a?
-
Ɛgɛnyá nɛ a géē lɛ ɔkpiye ku uwɔ tu yeŋee a?
-
Ɛgɛnyá nɛ a géē lɛ ɛlá ō gbo mla uce ō ya ku uwɔ tu yeŋee a?
JILA ƐLĀ NYĀ MÁ TŌŌTƆ̄Ɔ̄
Ɔdaŋ ku a kóō lɛ ije ŋ naana, aɔdā ōhī nyá nɛ a lɔfu ya o ya ɛɛ ku a lɛ iyi uwɔ tu yeŋee a?
Jila ɔwɛ ōhī má nɛ a lɔfu yɛce o ya ɛɛ ku a lɛ abɔ ci itaba ō gwa.
Leyi yɛ ɛgɛ nɛ ifoto amāŋ uvidio ku ācɛ ō tohɛɛwa gē lɛ abɔ kwu ɔcɛ iyē a.
“Pornography—Harmless or Toxic?” (The Watchtower, August 1, 2013)
Nwu ɛgɛ nɛ adā éyi lɛ abɔ ci ifoto mla uvidio ku ācɛ ō tohɛɛwa ō ma a.
“I Failed Many Times Before I Succeeded” (The Watchtower No. 4 2016)
a Jila ɔkpá nōo ka u “How to Quit Smoking” nōo yɔ aya ku Jila Ɛlā Nyā Má Tōōtɔ̄ɔ̄ ipu ɛlā ō nwu nyā, ku a má aɔwɛ nɛ a géē yɛce o ya ɛɛ ku a lɛ abɔ ci aɔdobɔbi nōo le jɛ uwɔ iyē ɛ ma.
b O ya ɛɛ ku a habɔ uce obɔbi ō lɛ abɔ ya iye bɛɛka a yɔ i ce ikpo iyi uwɔ a, má “How Can I Conquer the Habit of Masturbation?” ipu ɔkpá ku Questions Young People Ask—Answers That Work, Volume 1, ɛyi 25.
