ANG ỌJẸ́JẸ 40
Ányị Ahị Tị́ ka Bwu La Cheri-cheri ị-Ịlahị nya Ohe?
Kụ irya nya ịnịna ọlẹ kọ juwa nwụla ọnyị nyamwụ nọ nya ube-ụpwụ wẹẹ. Ọ hyoo enyi cheri-cheri bala ọ-jẹ́ myị̀myị̀ nyori ang ịkụrụ-kụrụ nyamwụ la kẹm-kẹm bala ọ-la cheri-cheri. Ọọwa ka du ká ọnyị ọọwa ka la ịnyịrọ ogogo bala ọ-mẹjẹ angịkịla nyori adamwụ bala ịnamwụ anyị kpahị jwoo yẹẹyẹẹ. Ịnyịnyị-ịnyịnyị, iJihova tịtọ kahị ka la cheri-cheri u-ugbinyịrọ bala abwẹla nyahị. Ụka kahị la cheri-cheri, ahị kaa yé apyobwuna bala ọ-ya ogbo ha iJihova.
1. Ányị ahị tị́ ka bwu la cheri-cheri u-ugbinyịrọ?
IJihova byihi yẹkẹẹ: “Ánụ́-ụ la ịgọgọ.” (1 iPita 1:16) Nyọka la ịgọgọ, o-ri o-pyii kahị ka la cheri-cheri u-ugbinyịrọ bala abwẹla nyahị lẹ. Ahị ka mẹjẹ nyori ahị la cheri-cheri u-ugbinyịrọ bwula o-hyo enyi ụka myị́ ụka bala ọ-kpa ang ịkụrụ-kụrụ, ẹpwa, bala ang ọrụnyẹ nyahị kẹm-kẹm. Ịnyịnyị, ahị ka jẹ́-ẹ dụbwọ kpa Ube nya Ịpyị-Adịrahụ cheri-cheri. Bwula ọ-la cheri-cheri u-ugbinyịrọ, ahị kaa ya ihi ha iJihova.—2 Ala ịKọrịntị 6:3, 4.
2. Nyọka la cheri-cheri, ụma nya abwẹla iyina ahị tị́ ka cheji ba hi?
ỊBayịbụụ juhi ọhụ nyori ahị nyị “hụ́ ịlọhị cheri-cheri . . . bwu ẹpwụ nya ang myị́ ang ọlẹ kọ ka chị ugbinyịrọ nyahị ịrị lee ọ-chị olegu nyahị ịrị.” (2 Ala ịKọrịntị 7:1) Ọọwa ri, ahị ka maga nya ịlẹhị-ịlẹhị nyọka cheji ba hi ang myị́ ang ọlẹ kọ ka bịrị ugbinyịrọ nyahị lee irya ọkụkụ nyahị. Irya ọkụkụ nyahị chịla kọ ka kpụ iJihova ịpyọ, lẹ ahị ka cheji ba hi irya ọkụkụ ịlẹ kị pwoku ka. (Eje Ọnyịịla 104:34) Ịnyịnyị ahị ka maga ká ẹla oyaya nyahị ka ri ẹla ọnyịịla.—Wa Ala iKolosi 3:8.
Ịyẹ ọkịla à tị́ ka jẹ́-ẹ chị ugbinyịrọ lee abwẹla nyahị ịrị? Ang ịhyẹ juwa ịlẹ kị ka jẹ́-ẹ họ ugbinyịrọ nyahị ang ọtịpyọ. Lẹẹlẹ, ahị ka cheji ba hi ang lala ẹchụ ọnwànwa, ọtaba ọdada, etiji omilee-mile ụ-ụgbẹyị ọlẹ kọ pwoku ka bala ang ịkịla ụma ịlịịwẹ. Kori kahị cheji ba hi ang ịwẹ, ahị ka la ịnyịrọ ogogo bala ọ-mẹjẹ nyori ahị chị ihi ju āhị nya ọhịhị. Ịnyịnyị, ahị ka mẹjẹ nyori ahị la cheri-cheri a-abwẹla bwula ọ-maga nya ịlẹhị-ịlẹhị nyọka cheji ba hi abwẹla nya ọngịnyị ọ-họ ụya tọ ịlọmwụ bala arụrụ nya angịnyị i-ji lọhị-lọhị ọyẹyẹ. (Eje Ọnyịịla 119:37; Ala Efesọsị 5:5) Ọ ka lujwo nyọka hwabwọ hi ang ịwẹ, ma iJihova ka jẹ́-ẹ dahị ụbwọ nyọka họ ịnyị.—Wa Ayịsaya 41:13.
JẸ́ GỤ ỌỌWA
Jẹ́ ang u-uhye nya abwọlẹ ká ịlọhị ọ-kpa cheri-cheri kaa ya ihi ha iJihova bala abwọlẹ á ka bwu kụrụ abwẹla ịchịrị.
3. Ịlọhị ọ-kpa cheri-cheri kaa ya ihi ha iJihova
Ụka kahị kụ ẹhị yẹ ehile ịlẹ ká iJihova ya ha ala Isirẹlụ, ahị ka jẹ́ ang odudu ọlẹ kọ tịtọ ká angịnyị nyamwụ ka la cheri-cheri. Wa Ehe Ọkpụkpụ 19:10 bala 30:17-19, kanụ ya ẹla u-uhye nya ịtọ ẹla ịlẹ:
-
Ẹlịyẹ ịgba ịwẹ à tị́ mẹjẹ u-uhye nya abwọlẹ ká iJihova kaa yẹ ịlọhị ọ-kpa cheri-cheri?
-
Ịyẹ a tị́ ka họ ụka myị́ ụka nya ahụ ọ-ka jẹ́-ẹ kịnyaa la ocheri-cheri ọlala?
Ịlọhị ọ-kpa cheri-cheri kaa ye ụka bala o-ju aga ọmama ẹ-ẹpwụ. Ma ahị ka jẹ́-ẹ họ ịnyị ẹ-ẹga myị́ ẹga kahị ji, kori kahị la okpoko lee kori kahị la nwà ka wẹwẹ. Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Ányị ọ-kpa ang-abwọ ịlẹ kahị la kẹm-kẹm bala ocheri-cheri à tị́ ka jẹ́-ẹ chị ihi ju ẹrụ ọnyịịla ọ-kpa pyẹ nyahị?
4. Kụrụ abwẹla ịchịrị
IJihova ka jẹ́-ẹ dahị ụbwọ nyọka kụrụ abwẹla ọchịrị ọnyị myị́ ọnyị
Kori ká kaa nwà ẹchụ lee o-mile etiji ụ-ụgbẹyị ọlẹ kọ pwoku ka, à ka jẹ́ jaabwọ kọ kaa lujwo nyọka hwabwọ la ọ-họ ịnyị. Ịyẹ à tị́ ka dụbwọ? Kụ irya nya ang ọtịpyọ ọlẹ ká abwẹla ọwẹ kaa họng. Wa ịMatiyu 22:37-39, kanụ ya ẹla u-uhye nya abwọlẹ ká ẹchụ ọnwànwa lee etiji o-mile ụ-ụgbẹyị ọlẹ kọ pwoku ka kaa gu . . .
-
igu oriri nya ọngịnyị bala iJihova.
-
ugbiyegu nya ọngịnyị bala angịkịla ịlẹ kị ji balọọ.
Nwụlanọ nya abwọlẹ á ka bwu kụrụ abwẹla ịchịrị. a Yẹ IFIM ọwẹ.
Wa Ala iFilipayị 4:13, kanụ ya ẹla u-uhye nya ịtọ ẹla ọlẹ:
-
Ányị abwọ ọrịrị, ịBayịbụụ ọjẹ́jẹ bala ọjịra-jịra ọ-ka ụka myị́ ụka à tị́ ka jẹ́-ẹ ya ọngịrị ha ọngịnyị nyọka kụrụ abwẹla ịchịrị?
5. Ma uya ta irya bala abwẹla ịchịrị
Wa Ala iKolosi 3:5, kanụ ya ẹla u-uhye nya ịtọ ẹla ịlẹ:
-
Ányị ahị tị́ họ kahị jẹ́ nyori arụrụ nya angịnyị i-ji lọhị-lọhị ọyẹyẹ, ẹla nya ụya o-ya tawụle bwu ang-abwọ nya ichene, ifoto, bala ifim nya ụya ọ-ya du tawụlẹ, bala ọngịnyị ọ-họ ụya ta ịlọmwụ, nyị ri ang ịchịrị ị-ịlahị nya Ohe Oluhye?
-
À me irya kọ chịla nya iJihova ọ-ka tịtọ kahị ka la cheri-cheri? Ịyẹ tị́ du ká ya ịnyị?
Jẹ́ ang u-uhye nya abwọlẹ á ka bwu kụrụ irya ịtịpyọ. Yẹ IFIM ọwẹ.
IJisọsị chụ ẹla pwokwita nyọka mẹjẹ nyori ahị ka cheje nyọka họ ang myị́ ang ọlẹ kọ baba chajị kahị ka kịnyaa la ocheri-cheri ọlala. Wa ịMatiyu 18:8, kanụ ya ẹla u-uhye nya ịtọ ẹla ọlẹ:
-
IJisọsị-ị́ ya nyori ahị nyị họ ịlọhị ang ka, ma ọ wẹẹ ya nyori ahị nyị baba nyọka maga nya ịlẹhị-ịlẹhị. Ẹta ẹdịyẹ iyina ọngịnyị à tị́ ka jẹ́-ẹ hu nyọka cheji ba hi irya ọchịrị? b
Kori ká juwa ma uya nyọka kụrụ irya ọchịrị, aga ọmama nyang myị iJihova lẹhị. Wa Eje Ọnyịịla 103:13, 14, kanụ ya ẹla u-uhye nya ịto ẹla ọlẹ:
-
Kori ká juwa ma uya ta abwẹla ịchịrị, ányị ụpwụ ịgọgọ ọwẹ à tị́ jung ọhụ nyọka kịnyaa ẹ-ẹpwụ nya uya ọmama ọwẹ?
Abwọ a chịng pyẹpyẹ ka!
Ọ ka chịkpẹẹ nyọka kụ irya myị nyori, ‘M̀ mịleji lẹ, m ba kpẹẹ mẹ.’ Ma kụ irya nya ẹla ọlẹ wẹẹ: Chajị nyori ọngọ rụnyẹ chị ụchụ keji ụ-ụgbẹyị á mẹjẹ nyori ọ gba kpehe bwu ẹpwụ nya ụnyẹ ọrụrụ ọọwa lẹ, lee nyori ọ ka tịrẹkpẹ myịmyị kaka dọmwụ bwu ọmwụ ọdada ka. Ịnyịnyị-ịnyịnyị, ahụ ọ-chị mịleji ẹ-ẹpwụ nya uya ọmama nyang nyọka kụrụ abwẹla ịchịrị á mẹjẹ nyori à mịleji gbanggbang lẹ ka. Aga ọmama nyang á tị ri odudu ka ịnyịnyị. Ọng myị́ ọng wuu kaa chị mịleji. Lẹ abwọ a chịng pyẹpyẹ ka! Bwula ụbwọ ọdada nya iJihova, à ka kụrụ abwẹla ịchịrị myị́.
ANGỊHYẸ KAA YẸKẸẸ: “Ọ bam ahị lẹ, ḿ ka jẹ́-ẹ ba kaka.”
-
Ụpwụ ịgọgọ oyina a tị́ ka wa nyọka mẹjẹ ọngọọwa nyori bwula ụbwọ ọdada nya iJihova, ọ ka kụrụ abwẹla ịchịrị myị́?
ẸLỊYẸ A TỊ́ JẸ́?
Ahị kaa họ ẹla kpụ iJihova ịpyọ bwula ọ-la cheri-cheri ẹ-ẹpwụ nya ugbinyịrọ, irya ọkụkụ bala abwẹla nyahị.
Ẹlịyẹ A Tị́ Yụbwọ Chị?
-
Ịyẹ tị́ du kọ baba yẹẹyẹẹ nyọka la cheri-cheri?
-
Ányị a tị́ ka bwu la cheri-cheri u-ugbinyịrọ?
-
Ányị a tị́ ka bwu la cheri-cheri i-irya ọkụkụ bala abwẹla nyang?
JẸ́ ANG ỊLẸ DỌỌ U-UHYE
Ang ichiche-ichiche iyina a tị́ ka jẹ́-ẹ họ nyọka la cheri-cheri kori ká dọmwụ la ang gbu ka?
Jẹ́ ang u-uhye nya ẹta-ẹdịyẹ ịlẹ á ka hu nyọka hwabwọ hi ẹchụ ọnwànwa.
Kụ ẹhị yẹ ang ọlẹ ká arụrụ nya angịnyị i-ji lọhị-lọhị ọyẹyẹ kaa họ ọngịnyị.
“Arụrụ nya Angịnyị i-Ji Lọhị-lọhị Ọyẹyẹ Há Lee Ị Tị́ Tịpyọ?” (Ẹpwang ọ-Kụ Gbeji nya ahyẹẹnụ 1 nya Ọya Ọhaneku, 2013)
Jẹ́ ang u-uhye nya abwọlẹ ká ọlẹng ọhẹ jẹ́ bwu hwabwọ hi arụrụ nya angịnyị i-ji lọhị-lọhị ọyẹyẹ.
“M̀ Mịleji Ụka Lụmẹ-lụmẹ Ene Kam Jẹ́ Kụrụ Myị́” (Ẹpwang ọ-Kụ Gbeji No. 4 2016)
a Egbeju nya ẹla ọlẹ ko ri, “How to Quit Smoking,” ụpa nya Jẹ́ Ang Ịlẹ Dọọ u-Uhye, ọlẹpwụ nya ang ọjẹ́jẹ ọlẹ, ya ẹla rụ́ ang ịlẹ kahị ka jẹ́-ẹ họ nyọka kụrụ abwẹla ị-ba ọngịnyị ahị́.
b Nyọka yé ụbwọ ọdada u-uhye nya abwọlẹ á ka bwu kụrụ abwẹla nya ọngịnyị ọ-họ ụya tọ ịlọmwụ, yẹ “Ányị M Tị́ ka Bwu Kụrụ Abwẹla nya nya Ọngịnyị ọ-Họ Ụya Tọ Ịlọmwụ?” ụ-ụpwụ nya Questions Young People Ask—Answers That Work, Volume 1, egbeju 25.
