Kpibe lugbo iye ufẹdọ ka ki amọla ñwu ọma-wñ ki alo t’iskul. I ach’alu du ki neke che ki gw’ọla ñwu ọma-wñ k’ukpo-wñ ki fẹ ki la jẹ li. Ọma lẹ an’añọla ẹgbiti, e-lẹ la adu tejugede kaki ata kp’iye-wñ ad’eju t’ọma ma nyọnyọ. Abalẹ gẹ, Jihofa, ata ufẹdọ wa atene k’a chẹ fẹ eju kpai ẹñwu k’a kpibe oji-wñ, ẹñwu k’a che manyu ẹñwu k’a ka. Ichẹñwu k’a chẹ fẹ, a jile kwefu-wñ a la ad’ojima ñwu Jihofa.

1. Abu a neke chẹ fẹ efu añọla wa kpai amẹñwu k’a nẹ?

Jihofa ka ñwu wa kakini: “Amẹ ki ch’abo kiafọ.” (1 Pita 1:16) Efọ che kakini onẹ ki chẹ fẹ efu ibe ki akpẹ, amẹñwu ki ache kpai ẹñwu ki aka. A neke chẹ fẹ efu añọla wa ichẹñwu k’a gw’ọla iko duu, k’a gw’ukpo wa, k’a añw’unyi wa che iko t’iko, k’a la na d’eju t’amẹñwu ulẹ k’a nẹ. A ñọ neke ch’atẹko efu ukọlọ eñw’unyi ujeju wa che kpai amọmaye ki bọ. A d’ojima ñwu Jihofa ichẹñwu k’a chẹ fẹ efu amẹñwu k’a ka-i.—2 Kọrint 6:3, 4.

2. Amẹñwu dukpẹ k’a ra bọ tẹ ichẹñwu k’a tene k’a chẹ fẹ?

Baibul d’ibe ñwu wa “k’a fẹ b’ẹkpabiẹ ọrẹla kp’e-afu duu tẹ.” (2 Kọrint 7:1) Todulẹ, a chẹñwu du k’a neke che k’a ra b’ẹñwu duu ki neke kp’añọla wa kpai ibe efu wa biẹ. Ibe k’a kpẹ dukpẹ ki na jẹñwu ẹdọ Jihofa bọ. Todulẹ, a ch’alu du k’a neke che k’a ra b’ẹñwu ki neke jẹñwu wa kpibe ẹbiẹnẹ tẹ. (Eli Ekọ D’Ọjọ 104:34) A ñọ ch’alu du k’a neke che k’a na kọla ọmẹmẹlẹ iko duu.—Gba Abo Kọlọse 3:8.

Ẹñwu chẹñwu omunẹ ki neke che wa iwa efu añọla wa, ọna k’a kpibe, ẹñwu k’a ka manyu ẹñwu k’a che? I n’amẹñwu ki neke d’ihianyi ñwu añọla wa abẹki ekp’uwa ọla biẹ. Todulẹ, a ra b’ẹñwu ki neke d’akanya ñwu ọla wa tẹ dabu ochiga eñmọ, igbo eñmọ, ataba eñmọ abẹki ed’ogwu chekwu lọna ki ma ch’eju-wñ n. Ichẹñwu k’a ra b’amẹñwu-i tẹ a n’añọla ọmẹmẹlẹ, a la adu ña kaki ele iñmi k’Ọjọ du ñwu wa che w’uwa eju. Ọna omunẹ k’a fẹ ch’echẹñwu du k’a neke che k’a we g’ifoto abẹki ifimu ẹnẹ ki t’agofo kpai k’a we na d’ọwọ kwuru ẹñwu ọma ẹnẹkẹlẹ wa abẹki ẹñwu ọma onobulẹ wa ki rinyọ mọ wa. (Eli Ekọ D’Ọjọ 119:37; Ẹfẹsus 5:5) I neke gbiti ñwu wa k’a legwu efu amakanya-i du, ama Jihofa neke ch’atẹko wa k’a legwu efu-wñ du.—Gba Aizaya 41:13.

 N’UMA NYỌGBA

3. Ichẹñwu k’a chẹ fẹ efu añọla wa kpai amẹñwu k’a nẹ i ad’ojima ñwu Jihofa

Ichẹñwu k’a gb’ọhiala lugbo ọda ki Jihofa du ñwu abo Israẹl, a kọchẹ ọna k’efẹ chẹñwu ogbogaga ñwu Jihofa. Gba Akwodufu 19:10 kpai 30:17-19, ubilẹ mẹ ch’oluka oji am’ene-i:

• Ẹñwu am’ọgba Baibul-i ka lugbo ọna k’efẹ añọla dẹ eju Jihofa?

• Ẹñwu ẹ neke na che todu k’ẹ chẹ fẹ efu wẹ iko duu?

I agb’iko kpai ukpahiu k’onẹ ki neke fẹ iko duu. Ama, a neke ch’e-lẹ ugbo duu k’a dẹ dagba k’a ch’anana abẹki ẹnẹ ale. G’IFIDIO-i, ubilẹ mẹ ch’oluka oji ene-i.

• Ẹñwu ajẹñwu abo k’a j’uchẹñyọ ru ki d’ojima ñwu Jihofa ichẹñwu ku ma li kaki amẹñwu wa chẹ fẹ?

4. F’amuche ẹbiẹnẹ du

Ichẹñwu k’ẹ ñm’ọchiga abẹki ẹ d’ogwu chekwu lọna ki ma ch’eju-wñ n kwobi, ẹ neke ma ọna ki gbiti kade k’onẹ ki legwu efu amẹñwu-i du. Ẹñwu neke ch’atẹko wẹ? Kpibe oji am’akanya ki neke du ñwẹ. Gba Matiu 22:37-39, ubilẹ mẹ ch’oluka oji ọna k’ochiga eñmọ, igbo eñmọ, ataba eñmọ kpai ed’ogwu chekwu lọna ki ma ch’eju-wñ n neke . . .

• kp’ade onẹ kpai Jihofa biẹ.

• d’ihianyi ñwu onẹ kpai abo akwọra unyi-wñ manyu abomunẹ ku ma d’ogbegbele-wñ.

Mọla k’ẹ ch’amẹñwu ki neke jẹñwu ẹ k’ẹ f’uche ẹbiẹnẹ du. a G’IFIDIO-i.

Gba Abo Filipai 4:13, ubilẹ mẹ ch’oluka oji ene-i:

• Abu ech’adua iko duu kpai ukọchẹ Baibul eche manyu ew’ujeju abudọ neke d’ukpahiu ñwu onẹ ki neke f’uche ẹbiẹnẹ du?

 5. Chalu du k’ẹ neke che k’ẹ f’ibe ẹbiẹnẹ kpai am’uche ẹbiẹnẹ du

Gba Abo Kọlọse 3:5, ubilẹ mẹ ch’oluka oji am’ene-i:

• Ẹñwu jẹñwu wa ma kaki eg’ifoto abẹki ifimu ẹnẹ ki t’agofo kpai ed’ọla lugbo udachi ẹnẹkẹle kp’onobulẹ kpuchẹ r’onẹ oji fonu abẹki kọmputa, manyu onẹ ed’ọwọ kwuru ẹñwu ọma ẹnẹkẹlẹ-wñ kp’ẹñwu ọma onobulẹ-wñ ki rinyọ mọ chẹñwu ẹbiẹnẹ eju Jihofa?

• Ẹ neju kaki a neke fẹ ef’uche wa ọna ki Jihofa atene? Ẹñwu chi k’ẹ kabalẹ?

G’ẹñwu k’ẹ neke che k’ẹ we kpibe oji ẹñwu ẹbiẹnẹ. G’IFIDIO-i.

Jisọs d’ujiwe ña kakini otila i che ka chẹñwu ki dukpẹ k’a che k’a neke chẹ fẹ ef’uche wa. Gba Matiu 5:29, 30, ubilẹ mẹ ch’oluka oji ene-i:

• I che kakini Jisọs aka ñwu wa k’a ch’ọla wa agbe n. Ama, Jisọs aka ñwu wa kaki i n’ẹñwu ki dukpẹ k’a che. Ẹñwu chẹñwu ogbogaga ka k’onẹ neke che ki we na kpibe ẹbiẹnẹ? b

Ichẹñwu k’ẹ ja k’ẹ f’ibe ẹbiẹnẹ du, ma k’uja wẹ che wu Jihofa eju nyọnyọ. Gba Eli Ekọ D’Ọjọ 103:13, 14, ubilẹ mẹ ch’oluka oji ene-i:

• Abu ọgba Baibul-i neke d’ugbẹdọ ñwẹ ichẹñwu k’ẹ ja kp’uche ẹbiẹnẹ?

 ẸY’ỌLA UKỌ-I

A jẹñwu ẹdọ Jihofa bọ ichẹñwu k’a jẹñwu añọla wa, ibe k’a kpẹ kpai uche wa ki chẹ fẹ.

Ẹñwu ẹ kọchẹ?

• Ẹñwu chi ki chẹñwu ogbogaga k’a chẹ fẹ?

• Abu ẹ neke fẹ efu añọla wẹ kpai amẹñwu du k’ẹ nẹ?

• Abu ẹ neke fẹ efu ibe wẹ kpai uche wẹ?