TOLUMỌYE 40
Omịnị Tebara Kị Mịẹ Dẹkị Ọkpọnanaowei Tọrụ A Yalịyalịtimi Mịnị A O?
Kẹnị yin-araụ anị tọbọụ tọlọmọ sukulu a mú dọụ mịnị bara iroro dii. Amịnị beni akị tọbọụ birimọ bá ebi aru akị ụ tụamị. Bei yemi, dọọn pebi tọbọụ kẹrịgha fa má daụ mọ yin mọ ụ kekere mịnị bara kị gbaa kịmịotu pịrị mịnị. Bịsẹ kpekẹnị bara kị, wó Daụ, Jehovah dọụ emi bara mị—wó angọ mọ, má wó iroro mịnị yebo mọ yalịyalịtimi. Wó yalịyalịtimi daba, omịnị bolouịmbẹlẹ nana bá tokoni akị Jehovah pịrị mịnị.
1. Omịnị tebara ka kị wó angọ mịẹ yalị a paa emi a o?
Jehovah gbaa mị: “Ị́mịnị yalịyalịtimi.” (1 Peter 1:16) Yalịyalị gbaa daba, wó angọ mọ wó inyenrinbụọ mọ kị gbele emi. Omịnị ifiemọsẹ benibiri, wó inyenrin mịnị yọbo tọlọmọ, wó tụayemọ pọụ bá wó yọụ mịnị yebosẹ kụọ dá akị agbẹị bara wẹrị. Angọtụa Kingdom Hall kpọ tọlọmọ. Wó angọmọ yalịyalị emi ifiesẹ, Jehovah bolouịmbẹlẹ mịnị.—2 Corinthians 6:3, 4.
2. Te yeama kị ị́ mịẹ yalịyalị a paa emi a o?
Bible gbaa kịmịsẹ pịrị mị “Mẹnị-anga má tẹmẹ-anga ghọ ị́ mịẹ yalịyalịgha fa yesẹ mịẹ kụmọ.” (2 Corinthians 7:1) Anị duonị, omịnị wó angọ mọ, wó iroroye mọ seimọmụ yesẹ, daatịẹmọ. Pebi dá iné iroro yebo Ọkpọnanaowei mọ kẹnịsụọmọ, angọtụa sei iroroye kẹrịtịẹmọ. (Psalm 104:34) Ebibara wó ẹrẹ paamọ mịnị egberimọ kpọ diitụa.—Colossians 3:8 goo.
Mọkpọ teye kị baratụa wó pịrị wẹrị yalịyalịtimi mịnị a o? Zụa yeama wó angọ seimọ a paa emi. Gbaamaba, sigarate bou, igbo bou, wuru bou kẹrị, efiyen tụa má agbẹịgha tuo pomuama fị. Omịnị laa bei yebo a barasin daba, zụa dọọn-ama wó laagha fa, bá omịnị ụndụ diidụbamọ wẹrị emi bara kị mịẹdịa mịnị. Omịnị patuu-foto dii kụmọ, má angọ sọọnlọ ye kpọ daatịẹmọ. (Psalm 119:37; Ephesians 5:5) Bei yebo a barasinmụ yọmị kala fịrịgha, bịsẹ bara kị paa kpọ, Jehovah baratụa ị́ pịrị wẹrị a dẹịnmọ mịnị.—Isaiah 41:13 goo.
EBIBARA TUUDỌỤ
Angọ yalị daba, Jehovah mịẹ pọwẹị mịnị tuu diitụa bá baratụa ị́ pịrị sei inyenrinbụọ daatịẹmọ mụ ye dọụ ẹrị.
3. Angọ yalịyalịtimi daba tokoni akị Jehovah pịrị mịnị
Jehovah gbaa Israel-otu pịrị oloko dii daba, omịnị nimi amọ Jehovah ụ karị mịnị kịmịmọ angọmọ yalịtimi kị dọụ emi. Exodus 19:10 má 30:17-19 goo dá, bei biibịbịmọ kẹrị ẹrẹtei:
-
Bei goo yọ dii daba, Jehovah tebara ka kị wó angọ yalịyalị yọ diimọ wẹrị emi a o?
-
Te ebi inyenrinbụọ-ama kị wó angọ mịẹ yalịyalịtimi a paa emi a o?
Ifiemọsẹ angọ akị yalịyalị bara wẹrị emi yọmị, kala fịrịgha. Bịsẹ bara kị paa kpọ, omịnị laa yalịyalịtimi a paa emi. VIDIO farị dá, bei biibịbị kẹrị ẹrẹtei.
-
Wó angọ, wó akpa bá wó akị egberigbaa mịnị funbo yalịyalị emisẹ, tebara ka kị Jehovah mọ egberi fịrị mọ gbele mịnị a o?
4. Sei inyenrinbụọ-ama daatịẹmọ
Jehovah baratụa ị́ pịrị wẹrị sei inyenrinbụọ dẹịnmọ mịnị
Ị́mịnị sigarate bou mịnị aba, tịẹmọ mịnị fịrị mị kala fịrịgha. Teeki baratụa ị́ pịrị mịnị a o? Bei sei inyenrinbụọ mị akị iné angọ mịẹ dẹ bara kẹrị iroro. Matthew 22:37-39 goo dá, sigarate mọ bá zịnị bou agbẹịgha yebo akị wó mịẹ mịnị seibo kẹrị ẹrẹtei . . .
-
Ị́ mọ Jehovah mọ ikie bị.
-
iné warịbolou-otu má iné nimi wẹrị emi kịmịama.
Sei inyenrinbụọ dẹịnmọmụ bara tọnpẹlẹ. a VIDIO farị.
Philippians 4:13 goo dá, bei biibịbị kẹrị ẹrẹtei:
-
Ifiemọsẹ Bible tolumọ, tẹẹbịbị mịẹ bá yetolumọyọ a mú mịnị yọmị tebara ka kị baratụa ị́ pịrị wẹrị sei inyenrinbụọ dẹịnmọ mịnị a o?
5. Sei inyenrinbụọ mọ bá sei iroroyeama mọ daatịẹmọ
Colossians 3:5 goo dá, bei biibịbịmọ kẹrị ẹrẹtei:
-
Omịnị tebara kị mịẹtimi patuu-foto dii, anịghakpọ bei fotobo fịrịmọ kịmịama yarị bá angọ sọọnlọ inyenrinbụọ kpọ Jehovah dịsẹgha bara nimi ma o?
-
Jehovah ụ dịsẹgha yebo gbaa wó pịrị mịnị yọbị kịrịị emi? Tetuu a?
Laa sei iroroye daatịẹmọmụ bara dii. VIDIO farị.
Omịnị gbinipẹlẹ dẹkị laa yalịyalị inyenrinbụọ nana. Jesus bịsẹ tọnmọdịaye pịrị mị. Matthew 5:29, 30 goo dá, bei biibịbị kẹrị ẹrẹtei:
-
Omịnị yalịyalịtimi mụ duonị, omịnị angọ ụyamọ bara Jesus mọ gbaagha. Anịa wo gbaa mịnị bara bị, omịnị ye mịẹ agbẹị emi. Omịnị tebara ka kị angọtụa sei iroroyeama daatịẹmọ mịnị a o? b
Bei tịẹkiri mị, ị́mịnị sei iroroyeama daatịẹmọ dọụ mịnị aba, Jehovah mịẹ pọwẹị-mịnị. Psalm 103:13, 14 goo dá, bei biibịbị kẹrị ẹrẹtei:
-
Ị́mịnị bei tịẹkiri mị sei inyenrinbụọ daatịẹmọ dọụ mịnị aba, bei Bible yọmị tebara ka kị baratụa ị́ pịrị mịnị a o?
Malafakụmọ ị́ mịnị laa dẹịnmọ mịnị!
Ị́mịnị gbaa a paa emi, ‘Ịmịnị bá laa bei inyenrinbụọ deigha fa.’ Wó ifie dọlọ akị baịn mịnị kịmị diitụa, baịntimi korodẹ duonị omịnị bá bọlọụ baịnmọ a paagha fa? Anịghakpọ omịnị kịrị waị koro baịn mịnị a o? Bịsẹ kpekẹnị bara mị, ị́mịnị tịẹkiri tịẹkiri laa bei sei inyenrinbụọ kọn siingha duonị, ị́ laa benebene kọn siingha fa bara tọn kụmọ. Angọ duo sei inyenrin kọn siin fịrị bị bọụbọụgha—biin kịmịama dọlọ dọlọ kị mịẹtimi laa kọn siin mịnị. Anị duonị angọtụa! Jehovah tẹẹ dá baratụapịrịye bii, Jehovah baratụa ị́ pịrị wẹrị laa sei inyenrinbụọ kọn siin mịnị.
ZỤA KỊMỊAMA GBAA MỊNỊ: “Bei inyenrinbụọ ine asịịn duosụọ dẹ duonị, ịmịnị laa barasingha fa.”
-
Te Bible yọ kị ị́mịnị mọ akị baratụa ụ pịrị a paa emi a o?
KỊLỌỌBARA
Omịnị wó iroroye, wó angọ bá wó inyenrinbụọbo mịẹ yalịyalị mịnị ifiesẹ Jehovah bolouịmbẹlẹ mịnị.
Waị diitụa
-
Tetuu kị duonị omịnị yalịyalịtimimụ yọbị yelaa emi a o?
-
Omịnị tebara ka kị wó angọmọ mịẹ yalịyalị mịnị a o?
-
Ị́mịnị tebara ka kị iné inyenrinbụọ mọ bá iné iroroyebo mọ mịẹ yalịyalị mịnị a o?
DIITỤA
Ị́mịnị sịlị nana biinmọgha kị gbaa kpọ teeki baratụa ị́ pịrị wẹrị laa yalịyalịtimi mịnị a o?
Baratụa ị́ pịrị wẹrị ye-bou ghọ barasinmụ yeama dọụ ẹrị.
Patuu-foto dii sei emi bara dọụ ẹrị.
“Pornography —Harmless or Toxic?” (The Watchtower, August 1, 2013)
Kẹnị kịmị wo patuu-foto dii inyenrinbụọ tịẹmọ bara dọụ ẹrị.
“I Failed Many Times Before I Succeeded” (The Watchtower No. 4 2016)
a Diitụa anga bọọ, “How to Quit Smoking,” egberitịbị bị baratụa ị́ pịrị wẹrị sigarate bou dịsẹ dẹịnmọ mịnị bara ẹrị mịnị.
b Baratụa ị́ pịrị angọ sọọnlọ inyenrinbụọ daatịẹmọ mịnị ye dii “How Can I Conquer the Habit of Masturbation?” Questions Young People Ask—Answers That Work, Volume 1, chapter 25 bọọ emi.
