Tingk bout wan mada we a get ar bwai pikni redi fi ga’a skuul. Shi mek shuor se im bied an im kluoz kliin an luk gud pan im. Dis elp im fi no siki-siki, an it a-go mek piipl si se im mada an faada a tek kier a im. A siem so fi wi Faada Jeuova waahn wi fi kliin tu. Im waahn wi tek kier a wi main, an wi badi, an ada tingz. Wen wi kip wiself kliin, it du wi gud an it big op Jeuova.

1. Ou wi kyan kip wi badi an ada tingz kliin?

Jeuova tel wi se: “Unu fi tan kliin.” (1 Piita 1:16) Ef wi waahn fi kliin iina Jeuova yai, wi afi wach di sitn dem we wi a tingk bout an wa wi a du. An wi afi tek kier a wi badi an mek shuor se wi kip ada tingz we wi uon kliin tu. Wi tek kier a wiself wen wi bied aafn an mek shuor se wi kluoz, wi yaad, an wi kyaar an dem ting de aalwiez kliin. Bot a no onggl dat, wi afi mek shuor se wi Kindom Aal kliin tu. Wen wi du dis, it big op Jeuova.​—2 Korintiyan 6:3, 4.

2. Ef wi a-go kliin iina Gad yai, wa a som a di sitn dem we wi no fi du?

Di Baibl mek wi nuo se wi fi “stie faar fram sin an kip wi badi an wi spirit kliin.” (2 Korintiyan 7:1) A dat mek wi stie faar fram eniting we a-go mash op wi badi ar wi main. Jeuova fi aarait wid di sitn dem we wi a tingk bout, so wi fi chrai aad fi mek shuor se wi naa tingk bout tingz we Jeuova se rang. (Saam 104:34) An wi fi chrai aad fi taak bout wa gud.​—Riid Koloshan 3:8.

Som tingz we kyan mash op wi badi ar mek wi tingk laik ou Jeuova no waahn wi fi tingk a laik fi sumuok tubako an tek kuok, ar fi tek pil an jogz an dem ting de jos kaa wi waahn enjai wiself. Wen wi no du dem sitn ya, it mek wi badi aati an wi shuo se wi lov di laif we Gad gi wi. Wi kip wi main kliin wen wi no wach ar luk pan notn we av niekid piipl, ar piipl we a av seks, laik bluu muuvi an dem sitn de. An yu no fi fiil op fiil op yuself niida fi fiil laik se yu a av seks. (Saam 119:37; Ifiijan 5:5) It mait-a aad somtaim fi tap du dem sitn ya, bot Jeuova kyan elp wi fi tap.​—Riid Aizaiya 41:13.

 LORN SOM MUO

3. It big op Jeuova wen wi kip wi badi an ada tingz roun wi kliin

Wi kyan nuo wa it miin fi bi kliin tu Jeuova wen wi luk pan wa im did tel im piipl dem iina Izrel fi du. Riid Eksidos 19:10 an 30:17-19, an den wi a-go taak bout dem kwestiyan ya:

• Ou dem vors ya mek wi si ou Jeuova fiil wen wi kip wiself kliin?

• Wa an wa yu kyan du fi kip yu badi an ada tingz kliin?

Yu afi wok aad fi kip yuself an ada tingz kliin. Bot yu kyan du dis no mata wich paat yu liv ar ef yu rich ar yu puor. Plie di VIDIYO, an den wi a-go taak bout di neks kwestiyan.

• Kaa wi a kip wi tingz dem kliin, ou it kyan mek piipl rispek di priichin wok we wi a du?

4. Wa kyan elp wi fi tap du bad sitn?

Ef yu sumuok ar tek jogz fi enjai yuself, yu mait-a fain out se a no sitn iizi fi tap du. Bot wa kyan elp yu? Tingk bout wa dem sitn ya kyan du tu yu. Riid Matyu 22:37-39, an den wi a-go taak bout ou wen sumadi yuuz tubako ar tek jogz, wa it kyan du tu . . .

• dem an Jeuova.

• dem fambili an ada piipl we de roun dem.

Plan wa yu a-go du fi tap du sitn bad we yu aalwiez a du. a Plie di VIDIYO.

Riid Filipiyan 4:13, an den wi a-go taak bout da kwestiyan ya:

• Ou wen sumadi set wan taim fi prie, fi stodi di Baibl, an ga’a miitn, dat kyan elp im fi tap du di bad sitn dem we im fain it aad fi tap du?

 5. Wok aad fi tap tingk bout aal kain-a naasinis an fi tap du di sitn dem we Jeuova no waahn yu du

Riid Koloshan 3:5, an den wi a-go taak bout dem kwestiyan ya:

• Ou wi nuo se Jeuova no waahn wi luk pan notn we av niekid piipl, piipl we a av seks laik iina bluu muuvi an dem sitn de, an im no waahn yu fi a fiil op fiil op yuself fi fiil laik se yu a av seks, an im no waahn yu fi sen niekid picha ar vidiyo, ar teks we a taak bout seks tu nobadi?

• Yu tingk it fier fi Jeuova waahn wi kip we fram aal a dem sitn ya? An wa mek yu tingk so?

Wok aad fi tap tingk bout aal kain-a naasinis. Plie di VIDIYO.

Jiizas mek wi nuo wa fi du fi mek shuor se notn no tap wi fram du wa Jeuova waahn wi fi du. Riid Matyu 5:29, 30, an den wi a-go taak bout da kwestiyan ya:

• Jiizas neva did a se wi fi chap aaf piis a wi badi, bot im did a se wi fi du sitn bout di prablem. Wa sumadi kyan du fi mek shuor se im naa tingk bout di naasi sitn dem we Jeuova no waahn im fi a tingk bout? b

Ef yu a chrai aad fi tap tingk bout di naasi sitn dem we Jeuova no waahn yu tingk bout, Jeuova lov fi si se yu a chrai. Riid Saam 103:13, 14, an den wi a-go taak bout da kwestiyan ya:

• Ef yu a fain it aad fi tap du sitn bad, ou da skripcha ya kyan elp yu fi no tap chrai?

 DIS A WA YU FI MEMBA

Wi mek Jeuova api wen wi kip wi badi an wi main kliin an wen wi du di sitn dem we im waahn wi fi du.

Wa yu did lorn iina da lesn ya?

• Wa mek it impuotant fi kip wiself kliin?

• Wa yu kyan du fi kip yu badi an di tingz dem roun yu kliin?

• Wa kyan elp yu fi no tingk bout di naasi sitn dem we Jeuova no waahn yu fi tingk bout, an ou yu kyan mek shuor se yu a du wa im waahn yu fi du?