Imajina un mai ta konpo se rapazinhu pa ba skóla. El ta djobe si dja el toma banhu i si se ropa sta linpu. Kel-li ta djuda kel mininu ten bon saúdi i ta mostra otus algen ma se mai ku se pai ta kuida di el dretu. Di mésmu manera, nos Pai, Jeová, krê pa nos korpu i kuzas ki nu ten sta linpu. Tanbê el krê pa nu ser linpu na kuzas ki nu ta pensa, ki nu ta fla i ki nu ta faze. Ser linpu é bon pa nos i ta poi otus algen ta pâpia ben di Jeová.

1. Kuzê ki nu pode faze pa nos korpu i kuzas ki nu ten sta linpu?

Jeová ta fla-nu: ‘Nhos ten ki ser santu’. (1 Pedro 1:16) Pa nu ser santu, nos korpu i kuzas ki nu ten debe sta linpu. Tanbê nu debe ser linpu na kuzas ki nu ta pensa, ki nu ta fla i ki nu ta faze. Pur isu nu debe toma banhu tudu dia, i mante nos ropa, nos kaza i nos karu linpu i organizadu. Tanbê nu pode djuda na linpa nos Salon di Reinu. Óras ki nu ta mante nos korpu i kuzas ki nu ten linpu, nu ta poi otus algen ta pâpia ben di Jeová. — 2 Coríntios 6:3, 4.

2. Pa nu ser linpu, ki ábitus nu debe ivita?

Bíblia ta fla-nu pa ‘nu linpa di tudu sujidadi di karni i di spritu’. (2 Coríntios 7:1) Kel-li krê fla ma nu ta sforsa pa ivita kalker kuza ki pode prujudika nos korpu ô nos menti. Nos pensamentus debe poi Jeová kontenti, pur isu nu ta faze nos midjór pa ivita pensamentus mariadu. (Salmo 104:34) Tanbê nu ta sforsa pa kes kuza ki nu ta fla ser linpu. — Lé Colossenses 3:8.

Kuzê más ki pode suja nos korpu i nos konportamentu? Ten alguns kuza ki pode prujudika nos korpu. Pur isu, nu ka debe fuma, txera tabaku, uza siré i nen uza dróga. Óras ki nu ta ivita kes kuza li, nu pode ten bon saúdi i nu ta mostra ma nu ta ruspeta vida. Tanbê nu ta sforsa pa ten konportamentu linpu, óras ki nu ta luta kóntra ábitus mariadu, sima masturbason i odja pornografia. (Salmo 119:37; Efésios 5:5) Pode ser difísil vense kes ábitu li, má Jeová pode djuda-nu. — Lé Isaías 41:13.

 SABE MÁS

3. Nu ta da Jeová ónra óras ki nos é linpu

Óras ki nu ta lé kes lei ki Jeová da nason di Israel, nu ta prende ma pa el é inportanti pa se povu ser linpu. Lé Êxodo 19:10 i 30:17-19, i dipôs pâpia sobri kes pergunta li:

• Di akordu ku kes versíklu li, kuzê ki Jeová ta pensa di linpéza?

• Kuzê ki bu pode faze pa djuda-u sta sénpri linpu?

Pa nu ser linpu ta iziji ténpu i sforsu. Má nu ta konsigi faze kel-li, ka ta nporta na undi ki nu ta mora ô si nos é riku ô póbri. Odja VÍDIU, i dipôs pâpia sobri kel pergunta li:

• Nu debe mante nos kuzas linpu i organizadu. Pamodi ki kel-li pode poi otus algen na pregason ta da ónra pa Jeová?

4. Vense ábitus mariadu

Si bu ta fuma ô bu ta uza dróga, talvês dja bu odja ma é difísil vense kes ábitu la. Kuzê ki pode djuda-u? Pensa na modi ki kes ábitu pode prujudika-u. Lé Mateus 22:37-39, i dipôs pâpia sobri modi ki fuma, txera tabaku ô uza dróga ta prujudika. . .

• amizadi ki un algen ten ku Jeová.

• família di un algen i otus ki ta sta djuntu ku el.

Faze un planu pa djuda-u vense un ábitu mariadu. a Odja VÍDIU.

Lé Filipenses 4:13, i dipôs pâpia sobri kel pergunta li:

• Modi ki faze orason, studa Bíblia i sisti runion sénpri ta da un algen forsa pa vense un ábitu mariadu?

 5. Luta kóntra pensamentus i ábitus mariadu

Lé Colossenses 3:5, i dipôs pâpia sobri kes pergunta li:

• Modi ki nu sabe ma pa Jeová pornografia, manda mensaji, fotus ô vídius sobri séksu, i masturbason é kuzas suju?

• Bu ta atxa ma Jeová ta iziji dimás óras ki el ta fla-nu pa nu ten un konportamentu linpu? Pamodi?

Odja modi ki bu pode luta kóntra pensamentus mariadu. Odja VÍDIU.

Jizus uza un ilustrason pa mostra ma nu meste sforsa pa nu mante nos konportamentu linpu. Lé Mateus 5:29, 30, i dipôs pâpia sobri kel pergunta li:

• Nbóra Jizus ka sta flaba pa nu prujudika nos kabésa, el mostra ma nu ten ki aji. Kuzê ki un algen debe sta disididu na faze pa ivita pensamentus mariadu? b

Si bu sta ta luta pa vense pensamentus mariadu, Jeová ta da valor pa sforsu ki bu ta faze. Lé Salmo 103:13, 14, i dipôs pâpia sobri kel pergunta li:

• Si bu sta ta luta pa vense un vísiu, modi ki kel testu li pode da-u forsa pa bu ka dizisti?

 REZUMU

Nu ta poi Jeová kontenti óras ki nu ta mante nos korpu, nos menti i nos konportamentu linpu.

Perguntas di rezumu

• Pamodi ki é inportanti ser linpu?

• Kuzê ki bu pode faze pa bu korpu i kuzas ki bu ten sta linpu?

• Modi ki bu pode mante bus pensamentu i konportamentu linpu?