Nuhnkuh ke sie ninac suc kahsruh in ahkolah tuhlihk mukul srihsrihk se nahtuhl in som nuhke lutlut ac. El ac liye lah tuhlihk se nahtuhl inge yihlac ac nuknuk lal uh in los ac nwacsnwacs. Ma inge kahsruh pac tuh tuhlihk nahtuhl in tiac eis mas. Ma inge ahkkahlwemye lah pahpah ac ninac kiyacl karuhnguhnuhl wo. Ke inkacnek oacpacna, Jeova el luhngse pac kuht in nwacsnwacs ke mahno ac oacyacpac ke ohiyen moul lasr uh. Ke kuht nwacsnwacs uh, kuht sifacna eis ma wo kac ac kuht sang kaksak nuh sin Jeova.

1. Kuht kuh in nwacsnwacs fuhkah ke mahnosr?

Jeova el fahk nuh sesr: “Kowos in muhtahl.” (1 Peter 1:16) Tuh kuht in muhtahl, kuht enenuh in nwacsnwacs ke mahno ac ke ohiyen moul lasr. Kuht kuh in nwacsnwacs ke mahno kuht fin yihyih lwen nuhkewa, ac kuht oruh nuknuk, lohm, ac sitosah okoacsr in los ac nwacsnwacs. Kuht oacyacpac kuh in kahsruh in ahknwacsnwacsye Kingdom Hall lasr uh. Ke kuht nwacsnwacs ke mahno, kuht sang kaksak nuh sin Jeova.​—2 Corinth 6:3, 4.

2. Tuh kuht in nwacsnwacs, orekma fuhkah kuht enenuh in fahsr liki?

Bible uh kwacfe kuht in “sifacna ahknwacsnwacsye kuht liki ma nuhkewa suc ac ahkfohkfohkye mahnosr kuh nguhnasr.” (2 Corinth 7:1) Pwacnacng, kuht kwacfeacng in fahsr liki kuhtwena orekma ma kuh in ahkfohkfohkye mahnosr kuh nuhnak lasr. Ma kuht nuhnkuh uh enenuh in mwe ahkinsewowoye nuh sin Jeova, pwacnacng kuht oruh ke kuhiyacsr kewa in sislah nuhnak koluk. (Psalm 19:14) Kuht oacyacpac taran in tiac orekmakihn kahskahs koluk ac kahs kuhpahtol.​—Riti Colossae 3:8.

Meac pac ma kuh in oruh kuht in nwacsnwacs ke mahno ac ke ohiyen moul lasr? Oasr kuhtuh ma ma kuh in ahkfohkfohkye mahnosr. Ke ma inge, kuht tiac orekmakihn tobacco, paip, chew betel nut, ac kuht ac fahsr liki orekmakihnyen ono koluk. Kuht fin oruh ma inge, mahnosr ac fah fokoko ac kuht ahkkahlwemye suhnak nuhke moul lasr ma God el acse nuh sesr. Kuht kwacfeacng pac in moulkihn ohiyen moul nwacsnwacs ke kuht fahsr liki orekma fohkfohk oacna masturbation a ac tiac pac liye petsac ac mwe rit fohkfohk. (Psalm 119:37; Ephesus 5:5) Tiac fihsracsr in lain orekma inge, tuhsruhktuh Jeova el ac fah kahsre kuht.​—Riti Isaiah 41:13.

 AHKYOHKYE LUTLUT LOM

3. Nwacsnwacs ke mahno ahkfuhlwactye Jeova

Ke kuht etwaclah masap luhn Jeova nuh sin mwet Israel in pacl meet ah, kuht kuh in kahlwem ke nuhnak lal ke ohiyen nwacsnwacs. Riti Exodus 19:10 ac 30:17-19, ac tohkohyang sramsramkihn kihsen siyuck inge:

• Meac fuhs inge ahkkahlwemye ke nuhnak luhn Jeova ke ohiyen nwacsnwacs?

• Meac kom kuh in oruh tuh kom in nwacsnwacs pacl nuhkewa?

Enenweyuck pacl ac kwacfeacng yohk tuh in nwacsnwacs ke mahno. Tuhsruhktuh, kuht kuh in oruh ma inge finne kuht muhta oyac, kuh kuht finne mwet kahsruhp kuh suhkahsruhp. Liye VIDEO se, ac tohkohyang sramsramkihn kihsen siyuck se inge.

• Ke pacl ma nuknuk lasr ac ma lasr uh los ac nwacsnwacs, ma inge kahsruh fuhkah ke orekma in fahkwack ac luti lasr uh?

4. Tui in oruh ohiyac koluk

Kom fin sismohk kuh orekmakihn ono koluk, kom etuh lah tiac fihsracsr in tui ke ohiyac ingacn. Meac kuh in kahsre kom? Nuhnkuh ke fahko koluk ma ac tuhkuh kac. Riti Matthew 22:37-39, ac tohkohyang sramsramkihn lah fuhkah sismohk kuh orekmakihn ono ke inkacnek sesuwohs kuh in ahkkulukye . . .

• fototo luhn sie mwet nuh sin Jeova.

• sucu luhn mwet se ac mwet sahyac uh.

Oraclah oakwuck in tui liki ohiyac koluk inge. b Liye VIDEO se.

Riti Philippi 4:13, BMK, ac tohkohyang sramsramkihn kihsen siyuck se inge:

• Puhruhe, lutlut Bible, ac wi ke miting pacl nuhkewa kuh in kahsruh fuhkah in sislah ohiyac koluk?

 5. Lain nuhnak ac orekma koluk

Riti Colossae 3:5, ac tohkohyang sramsramkihn kihsen siyuck inge:

• Efuh kuh orekma in liye petsac ac mwe rit fohkfohk, sexting c ac masturbation, arlac fohkfohk ye muhtuhn Jeova?

• Kom nuhnkuh muh kuht kuh in nwacsnwacs ke ohiyen moul lasr oacna ma Jeova el luhngse kuht in oruh? Efuh?

Liye lah fuhkah in lain nuhnak koluk uh. Liye VIDEO se.

Jesus el orekmakihn sie mwe puhpuhlyuck in ahkkahlwemye lah kuht enenuh in suhlahklahk oraclah mwe ahksuwohs tuh kuht in sruokyacna ohiyen moul nwacsnwacs. Riti Matthew 5:29, 30, ac tohkohyang sramsramkihn kihsen siyuck se inge:

• Jesus el tiacna fahk muh kuht enenuh in ahkngalye kuht sifacna, tuhsruhktuh el fahk muh kuht enenuh in oruh mwe ahksuwohs. Meac mwet se el enenuh in sa na oruh tuh in eislah nuhnak fohkfohk uh? d

Kom fin kwacfeacng in lain nuhnak fohkfohk, Jeova el ahksacohkye kwacfeacng lom inge. Riti Psalm 103:13, 14, ac tohkohyang sramsramkihn kihsen siyuck se inge:

• Fin oasr orekma fohkfohk kom luhngse in sislah, fuhs inge kuh in kahsre kom fuhkah tuh kom in tahfwelah na in lain ohiyac inge?

 MA KUHT LOTWELAH

Kuht kuh in oruh Jeova elan engan kuht fin nwacsnwacs ke mahnosr, nuhnak ac ke ohiyen moul lasr uh.

Kalweni

• Efuh kuh yohk srihpac kuht in nwacsnwacs?

• Meac kuht kuh in oruh tuh kuht in nwacsnwacs ke mahno?

• Kom ac karihngihn fuhkah nuhnak ac ohiyac lom in nwacsnwacs pacl nuhkewa?