Fwanyikizhai nsemi wamukazhi ubena kovwa mwananji wamulume kuba’mba aye ku sukulu! Wamovwa bulongo ne kumuvwika bivwalo byawama kabiji byatooka. Kuba bino kulengela mwana kwikala na butuntulu bwa mubiji bwawama. Kabiji kikalengela bantu kuyuka’mba bansemi banji bata bingi muchima mwanabo. Kyo kimotu, Shetu aye Yehoba ukeba’mba twikalenga ba butooto ku mubiji, mu bintu byo tulangulukapo, mu byo twamba ne mu bintu byo tuba. Inge twaikala ba butooto tumwenamo bintu byawama atweba bene ne kuleta munema kwi Yehoba.

1. Twafwainwa kwikala byepi ba butooto ku mubiji?

Yehoba witubuula’mba: “Mwafwainwa kwikala bazhila.” (1 Petelo 1:16) Pa kuba’mba twikale bazhila, twafwainwa kwikala na byubilo byawama ne kwikala ba butooto ku mubiji. Twikala ba butooto ku mubiji inge ketowe kimye kyonse, kuchapa bivwalo byetu, kulama bulongo nzubo yetu ne motoka kwikala wa kipaale mukachi ne pangye. Kabiji twafwainwa kwingilangako mwingilo wa kuwamisha pa Nzubo yetu ya Bufumu. Inge twaikala ba butooto, tuleta munema kwi Yehoba.—2 Kolinda 6:3, 4.

2. Ñanyi byubilo byo twafwainwa kuchinuzhuka pa kuba’mba twikale ba butooto?

Baibolo witukambizha’mba: “Twitokeshe ku bubipisho bonse bwa mubiji ne bwa mupashi.” (2 Kolinda 7:1) Onkao mambo, twafwainwa kwibikako bingi kuchinuzhuka kuba bintu byakonsha konauna mubiji ne milanguluko yetu. Bintu byo tulangulukapo byafwainwa kutokeshanga Yehoba ku muchima. Kuba bino kuketukwasha kubula kulangulukanga pa bintu byatama. (Masalamo 104:34) Kabiji twafwainwa kwibikako kwikala na ñambilo yawama.—Tangai Kolose 3:8.

Ñanyi bintu byakonsha kwitulengela kubula kwikala ba butooto ku mubiji nangwa mu milanguluko? Bintu bimo byakonsha konauna mibiji yetu. Onkao mambo, twafwainwa kuchinuzhuka bintu nabiji kupeepa fwanka, kupeepa sunko, kupeepa bizhima ne kwingijishanga muchi kutama. Inge twachinuzhuka bino bintu, tukekala na butuntulu bwa mubiji bwawama ne kumwesha’mba twanemeka bumi bwetu. Kabiji twafwainwa kuchinuzhuka byubilo bya bunya bya kwisuka ne kutamba bintu bilengela muntu kwikala na kilaka kya kwilaala. (Masalamo 119:37; Efisesa 5:5) Kechi kyapeela kusankilapo bukiji bino byubilo ne, pano bino Yehoba wakonsha kwitukwasha kwibishinda.—Tangai Isaya 41:13.

 FUNJILAIPO BIKWABO

3. Kwikala ba butooto ku mubiji kupana munema kwi Yehoba

Inge twatanga mizhilo ya Yehoba yo apeele bena Isalela, kusakwitukwasha kuyuka Yehoba byo omvwa ku muchima inge bantu banji baikala ba butooto. Tangai Kulupuka 19:10 ne 30:17-19, ne kwisamba ano mepuzho:

• Bino byepelo byamwesha’mba Yehoba umona byepi butooto?

• Ñanyi bintu byo mwafwainwa kuba kimye kyonse pa kuba’mba mutwajijile kwikala ba butooto ku mubiji?

Kikebewa kwibikako pa kuba’mba muntu ekale wa butooto. Pano bino, twafwainwa kwikala na butooto konse ko twikala nangwa twanonka nangwa twibayanji. Tambai VIDYO, ne kwisamba buno bwipuzho.

• Nanchi kulama bulongo bintu byetu kwikala bya butooto kutumbijika byepi mwingilo wetu wa kusapwila?

4. Lekai byubilo byatama

Inge kya kuba mupeepa fwanka nangwa mwingijisha muchi kutama, mwayuka byo kyakatazha kuleka bino bintu. Ñanyi kintu kyafwainwa kwimukwasha kuleka? Patanshi yukai bino byubilo byo bibena kwimulengela kwikala. Tangai Mateo 22:37-39, ne kwisamba ene mambo kupeepa fwanka nangwa kwingijisha muchi kutama o kwafwainwa konauna . . .

• bulunda bwa muntu ne Yehoba.

• bulunda bwanji na kisemi ne bantu bakwabo.

Nembai mutanchi wa kulondela wafwainwa kwimukwasha kuleka byubilo byatama. a Tambai VIDYO.

Tangai Filipai 4:13, ne kwisamba buno bwipuzho:

• Kulomba kwi Lesa, kutanga Baibolo ne kupwila kimye kyonse kwafwainwa kukwasha byepi muntu kuleka byubilo byatama?

 5. Lekai kulangulukanga pa bintu byatama ne byubilo bincha

Tangai Kolose 3:5, ne kwisamba ano mepuzho:

• Twayuka byepi kuba’mba kutamba bya mulekese, kwitumina pa mafoni nangwa pa kompyuta byambo bilengela kilaka kya kwilaala ne kwisuka ke bintu bya bunya kwi Yehoba?

• Nanchi mwalanguluka’mba twakonsha kwikala bazhila mu byubilo byetu byonkatu Yehoba byo etukambizha kwikala nyi? Mambo ka o mwakumbwila byobyo?

Kebai bishinka byafwainwa kwimukwasha kuleka kulangulukanga pa bintu byatama. Tambai VIDYO.

Yesu waingijishe kishimpi kumwesha’mba kikebewa kwibikako kuchinuzhuka kuba byatama. Tangai Mateo 5:29, 30, ne kwisamba buno bwipuzho:

• Yesu kechi walumbulwilenga’mba twafwainwa kwikozha ne. Pakuba watazhizhe mu kuba’mba twafwainwa kumonapo jishinda ja kulekelamo kuba bintu byatama. Ñanyi kintu kyakonsha kuba muntu pa kuba’mba achinuzhuke kwikala na milanguluko yatama?

Yehoba utemwa bingi byo mwibikako kushinda byubilo byatama. Tangai Masalamo 103:13, 14, ne kwisamba buno bwipuzho:

• Inge kimukatazha bingi kuleka byubilo byatama, akino kinembelo kibena kwimutundaika byepi bya kwibishinda?

 ÑANYI BISHINKA BYO MWAFUNDA?

Tutokesha Yehoba ku muchima inge ke tulame mibiji yetu, milanlguluko yetu kwikala ya butooto ne kwikala na byubilo byawama.

Mepuzho a kupitulukamo

• Mambo ka o kyawamina kwikala ba butooto?

• Mwakonsha kwikala byepi ba butooto ku mubiji?

• Mwakonsha kuba byepi pa kuba’mba mwikale na milanguluko ne byubilo byawama?