DILONGI 40
Yinki mutindu beto lenda vuanda ya kuvedila na meso ya Nzambi?
Yindula mama mosi ya nzola yina kena kubongisa muana na yandi ya bakala samu yandi kuenda na kalasi. Yandi meyobisa yandi mpe yandi mevuatisa yandi bilele ya mbote mpe ya bunkete. Yau nde ketanina mavimpi na yandi mpe kemonisa ti bibuti na yandi kekipeke yandi mbote. Mutindu mosi, Tata na beto ya nzola, Yehova, zola beto vuanda ya kuvedila—na nzutu mpe na bikadulu. Ntangu beto kele ya kuvedila, yakenatina beto mambote mpe yakepesa yandi lokumu.
1. Yinki mutindu beto lenda vuanda ya kuvedila na nzutu?
Yehova mezabisa beto: ‘Beno fueti vuanda nlongo.’ (1 Piere 1:16) Kuvuanda nlongo zola monisa kuvuanda ya kuvedila na nzutu mpe na bikadulu. Beto lenda vuanda ya kuvedila na nzutu na kuyobilaka mbala na mbala mpe na kusukulaka bilele, kutanina yinzo mpe bantomabilu na beto bunkete. Beto lenda diaka tula mbala na mbala bunkete na Yinzo ya Kimfumu. Ntangu beto kele ya kuvedila na nzutu, beto kepesa Yehova lokumu.—2 Bakorinto 6:3, 4.
2. Samu na kuvuanda ya kuvedila, yinki bikadulu beto fueti manga?
Biblia melomba ‘beto katula na nzutu na beto mvindu nionso ya kinsuni mpe ya mpeve.’ (2 Bakorinto 7:1) Na yau, beto fueti sala ngolo beto tina mambu nionso yina lenda bebisa nzutu to mabanza na beto. Makanisi na beto fueti sepedisa Yehova, mpe beto fueti sala ngolo samu na kukatula makanisi ya yimbi. (Nkunga 104:34) Beto fueti sala diaka ngolo ya kusadila ntubulu ya mbote.—Tanga Bakolosai 3:8.
Yinki diambu yankaka lenda sala ti beto bika vuanda ya kuvedila na nzutu mpe na bikadulu na beto? Bima yankaka yina bantu kekunuaka lenda bebisa nzutu. Na yau, beto kemangaka bima lokola nsunga, mbuma ya betele, matiti ya coca, mpe badrogi yina munganga pesila beto ve yinsua. Ntangu beto kena kumanga bima yango, beto kevuanda na mavimpi ya mbote mpe beto kemonisa ti beto kena kuzitisa dikabu ya luzingu. Beto kesala ngolo samu beto tatamana kuvuanda ya kuvedila na kunuanisaka bikadulu lokola kusimbasimba binama ya kubutila to kutala pornografi. (Nkunga 119:37; Baefezo 5:5) Yau lenda vuanda mpasi samu na kubika bikadulu yango, kasi Yehova lenda sadisa beto na kununga yau.—Tanga Yezaya 41:13.
KOTA NA MPINDA
Tala mutindu kuvuanda ya kuvedila na nzutu kepesaka Yehova lokumu mpe mutindu beto lenda nunga bikadulu ya yimbi.
3. Kuvuanda ya kuvedila na nzutu kepesaka Yehova lokumu
Beto lenda bakusa mutindu Yehova ketadilaka bunkete na kutadilaka bansiku yandi pesaka na Yisaele ya ntama. Tanga Kubasika 19:10 mpe 30:17-19, mpe na manima tadila biuvu yayi:
-
Yinki baverse yango kena kumonisa na diambu metadila mutindu Yehova ketadilaka kuvuanda ya kuvedila na nzutu?
-
Yinki bikadulu ya mbote kesadisa nge nge tatamana kuvuanda ya kuvedila na nzutu?
Kuvuanda ya kuvedila na nzutu kebakaka ntangu mpe yakelombaka kusala bangolo. Kasi beto lenda nunga kusala yau, yavuanda yinki kisika beto kevuandaka to yavuanda beto kele bamvuama to bamputu. Tula VIDEO, mpe na manima tadila kiuvu yayi melanda.
-
Yinki mutindu kutanina bima na beto bunkete kepesaka valere na kisalu na beto ya kusamuna?
4. Nunga bikadulu ya yimbi
Yehova lenda sadisa nge nge nunga konso kikadulu ya yimbi
Kana nge kekunuaka nsunga to badrogi samu na kulutisa ntangu, yalenda vuanda mpasi samu na kubika bikadulu yango. Yinki lenda sadisa nge? Tadila mutindu bikadulu kevuandaka na bupusi na zulu na nge. Tanga Matayo 22:37-39, mpe na manima tadila mutindu kunua nsunga to nsadulu ya yimbi ya drogi lenda sala . . .
-
na nguizani ya muntu na Yehova.
-
na bantu ya dibuta na yandi mpe bayina kele pene na yandi.
Sala programe samu na kununga kikadulu mosi ya yimbi. a Tula VIDEO.
Tanga Bafilipi 4:13, mpe na manima tadila kiuvu yayi:
-
Yinki mutindu kifu ya kusambila, kutanga Biblia mpe kukuenda na balukutakanu lenda pesa ngolo na muntu samu na kubika bikadulu ya yimbi?
5. Nuanisa makanisi mpe bisalu ya yimbi
Tanga Bakolosai 3:5, mpe na manima tadila biuvu yayi:
-
Yinki mutindu beto mezabila ti pornografi, kutinda bamesaje ya mambu ya nsoni, mpe kusimbasimba binama ya kubutila kele bikadulu ya yimbi na meso ya Yehova?
-
Nge mekanisa ti yakele mbote samu na Yehova na kulomba beto beto vuanda ya kuvedila na bikadulu? Samu na yinki?
Sosa kuzaba mutindu ya kunuanisa mabanza ya yimbi. Tula VIDEO.
Yesu sadilaka kifuani mosi samu na kumonisa ti beto fueti baka banzengolo ya ngolo samu na kubikana ya kuvedila na bikadulu na beto. Tanga Matayo 5:29, 30, mpe na manima tadila kiuvu yayi:
-
Atako Yesu lombaka beto ve beto kukisala mpasi na nzutu, yandi monisaka ti beto fueti sala ngolo. Yinki diambu ya mfunu muntu lenda sala samu na kumanga makanisi ya yimbi? b
Kana nge kena kunuana samu na kununga makanisi ya yimbi, Yehova kesepela na bangolo yina nge kena kusala. Tanga Nkunga 103:13, 14, mpe na manima tadila kiuvu yayi:
-
Kana nge kena kunuanisa bikadulu ya yimbi, yinki mutindu verse yayi mekindisa nge samu nge tatamana kunuana?
Tatamana kunuana!
Yalenda vuanda pete kutuba, ‘Munu nunga ve, na yau munu melemba kunuana.’ Kasi kanisa na diambu yayi: Kana muntu kena kusala bansaka ya kuzawula mekubua, yazola monisa ve ti yandi mepola mvimba samu na kurse, kasi yandi lenda bandila diaka kurse. Mutindu mosi mpe, mua bulembu zola tuba ve ti nge kenunga diaka ve kunuanisa bikadulu ya yimbi. Yazola monisa mpe ve ti bangolo nge mesala kele mfunu ve. Kubua lenda salama—kutu yakele diambu yina kena kumonisa ti nge kele na nzila ya kubeluka. Tatamana kunuana! Na lusadusu ya Yehova, nge lenda nunga bikadulu ya yimbi.
BANTU YANKAKA METUBA: “Munu mekukipesaka na kikadulu yango. Munu kekoka ve kubika.”
-
Yinki verse nge lenda sadila samu na kumonisa muntu yango ti na lusadusu ya Yehova yandi lenda nunga bikadulu ya yimbi?
BUNKUFI
Beto kesepedisaka Yehova kana beto mebikana ya kuvedila na nzutu, na mabanza, mpe na bikadulu na beto.
Mvutukulu
-
Samu na yinki yakele mfunu kuvuanda ya kuvedila?
-
Yinki mutindu nge lenda vuanda ya kuvedila na nzutu?
-
Yinki mutindu nge lenda tanina makanisi mpe bikadulu na nge ya kuvedila?
SOSA
Yinki mambu ya fioti nge lenda sala samu na kuvuanda ya kuvedila na nzutu atako nge kele na mbongo mingi ve?
Mona mambu ya mfunu yina nge lenda sala samu nge lemba kunua nsunga.
Tadila mambu yina pornografi lenda bimisa.
“Pornografi—Ezali lisano mpamba to pwazɔ?” (Linɔ́ngi ya Mosɛnzɛli ya 1 Août 2013)
Mona mutindu muntu mosi nungaka kukatuka na kinanga ya pornografi.
“Ezalaki Mpasi Natika Bomoi Na Ngai Ya Kala” (Linɔ́ngi ya Mosɛnzɛli No. 4 2016)
a “Ndenge ya kotika likaya,” yina kele na kitini “Sosa” ya dilongi yayi nde kena kusasila na mutindu ya mbote mambu ya kusala samu na kubika diambu yina kekumisaka bantu bananga.
b Samu na kununga kikadulu ya kusimbasimba binama ya kubutila samu yapesa kiese, tala disolo “Ndenge ya kotika kosakana na binama ya kobotela” na mukanda Mituna Oyo Bilenge batunaka—Biyano oyo ebongi, Volimi 1, mokapo 25.
