TIMOKO 40
Bwe tulendi bêla ba verela ha meso ma Nzambi?
Banza’eti nguri yita kubika mwana’andi mu kwenda ku lukolo. Taluzuri tala ti yebele mpe binkuti biandi bia tsema biena. Musamu wo mbo wukengerela tikolela tiandi mpe mbo wusongela ti bibuti biandi yandi bitomo kipaka. Mpila mosi mpe, Tata’eto dia luzolo, Yehova, zololo ti tabâ na bunkete peleko ba verela—mu tinsuni na mu ndiatulu. Bu tubâka ba verela ndandu tubakaka mpe Yehova tukembelaka.
1. Bwe tulendi bêla ba verela mu tinsuni?
Yehova tu têlele: “Lufweti bâ ba santu.” (1 Piere 1:16, NWT) Mu bâ ba santu tufweti bâ ba verela mu tinsuni na mu ndiatulu. Tulendi bâ ba verela mu tinsuni bu tuvulu yebelaka mpe bu tusaka ti binkuti bieto, nzo’eto, na kaminio’eto biabâ bia tsema mpe na bunkete. Tulendi bakisaka mpe mu sa bunkete ku Nzo ya Nsambululu. Tamana bâ ba verela mu tinsuni mbo tukembela Yehova.—2 Bisi-Korente 6:3, 4.
2. Mu bâ ba verela ntia nsalulu tufweti losa?
Bibila ditulombele mu “titsemesa mu miamiansoni mibebesaka nitu na mpeve.” (2 Bisi-Korente 7:1, NWT) Buna, ngolo tusaka mu dioka bima bilendi bebesa nitu’eto na mbanzulu zeto. Mabanza meto mafweti tâ Yehova nsayi, buna ngolo tusaka mu losa mabanza ma mbi. (Mikunga 104:34) Ngolo mpe tusaka mu bâ na nzonzolo ya verela.—Tanga Bisi-Kolose 3:8.
Nti bilendi sa ti talembo bâ ba verela mu tinsuni na mu ndiatulu? Bima bie kô bilendi bebesa nitu’eto. Buna, ka tusarilaka bima ko ntiana fumu, diamba na bima biakaka bia ngolo. Bu tulosaka bio, tikolela tia mbote ti bâka neto, mpe buzitu tusongelaka mu bungu dia luzingu. Ngolo tusaka mu bâ ba verela mu ndiatulu, bu tutelamanaka nsalulu za mvindu ntiana sakasaka tikento peleko tibakala na mu talaka porno. (Mikunga 119:37; Bisi-Efeze 5:5) Wulendi bâ musamu wa mpasi mu bika, kâ Yehova lendi tu bakisa.—Tanga Izaya 41:13.
YIKA NDILU
Longoka mu bungu dia nti tukembelaka Yehova bu tubâka ba verela, mpe mona bwe tulendi nungina nsalulu za mvindu.
3. Bunkete bwa tinsuni Yehova bukembesaka
Bu tutanga misiku mia Yehova kwe kanda dia Israele, mbo tulongokaka ti musamu wa mfunu wena ti kanda diandi diabâ na bunkete. Tangeno Ndukulu 19:10 na 30:17-19, mpe zonzeleno biyuvu ebi:
-
Bwe verse zi zita songela mabanza ma Yehova mu bunkete bwa tinsuni?
-
Ntia nsalulu za mbote zikubakisa mu tatamana mu bâ na bunkete bwa tinsuni?
Bunkete ntangu na ngolo budingaka. Kâ tulendi bâ na bunkete kuma ni kuma ku tubêlaka, ni tubâ mputu peleko mvwama. Taleno VIDEO, mpe zonzeleno tiyuvu tita landa.
-
Bwe bunkete bwa bima bieto buzangurilaka tisalu tieto tia samuna?
4. Nunga nsalulu za mbi
Yehova lendi ku bakisa mu nunga nsalulu ni nsalulu ya mbi
Tala ti fumu nwaka peleko bima bia ngolo, lendi zaba mu bungu dia nti we mpasi mu nunga nsalulu zo. Nti bilendi ku bakisa? Tala bwe nsalulu zo zikusobeselaka. Tangeno Matie 22:37-39, mpe zonzeleno bwe fumu na bima bia ngolo bisobeselaka . . .
-
tindiku tia muntu na Yehova.
-
kanda dia muntu na bantu bakaka.
Kubama mu nunga nsalulu ya mbi. a Taleno VIDEO.
Tangeno Bisi-Filipe 4:13, mpe zonzeleno tiyuvu eti:
-
Bwe lusambulu, ndongokolo ya Bibila na tukutakanu bilendi bakisa muntu mu lenda mu nunga nsalulu ya mbi?
5. Telamana mabanza na nsalulu za mvindu
Tangeno Bisi-Kolose 3:5, mpe zonzeleno biyuvu ebi:
-
Bwe tuzabiri ti porno, sexto, na sakasaka tikento peleko tibakala, mvindu yena ha meso ma Yehova?
-
Ngano wa delakana wena ti Yehova katulomba tabâ ba verela mu ndiatulu? Mu bungu dia nti?
Zaba bwe telamana mbanzulu za mvindu. Taleno VIDEO.
Yezu wasarila tifwani mu songela ti tufweti sarilaka ngolo mu bâka ba verela mu ndiatulu. Tangeno Matie 5:29, 30, mpe zonzeleno tiyuvu eti:
-
Ni bu sa ti Yezu kata tu lombaka ko ti tatimwisa mpasi mu nitu, yandi songele ti tufweti sa tima. Ntia ngolo muntu wufweti sarila mu losa mabanza ma mvindu? b
Tala ti mabanza ma mbi nwanaka na mo, ngolo zi sarila ntalu zena kwe Yehova. Tangeno Mikunga 103:13, 14, mpe zonzeleno tiyuvu eti:
-
Tala ti nsalulu ya mbi nwanaka na yo, bwe verse yo yilendi ku tindisila mu tatamana mu nwana?
Kubikandi!
Lendi banza ti: ‘Ndembane, ndendi bika kwani.’ Kâ banza’eti: Muntu wudiokaka ntînu wamana bwa, ka wuzololo tâ ko ti lembane ntînu, mpe ka lendi’â kavutu karilaka ko. Mpila mosi mpe, wamana bwa ka wuzololo tâ ko ti lembane mu telamana nsalulu ya mbi. Musamu wo ka wuta zimbakasa ngolo zazansoni zi weka sarila ko. Wamana bwa ka wena musamu wa nkatika wa mpasi ko—lendi kwizi nunga. Kubikandi! Na lubakusu lwa Yehova lendi nunga nsalulu ya mbi.
TALA TI BAKUTÊLE: “Nayika ngamba. Ka ndendi’â na bika ko.”
-
Ntia verse lendi sarila mu songela kwe muntu ti na lubakusu lwa Yehova lendi bika nsalulu ya mbi?
MU BUKUFI
Yehova tutâka nsayi bu tubâka na nitu, mabanza na ndiatulu ya verela.
Biyuvu bia mbambukulu
-
Mu bungu dia nti we mfunu mu bâ ba verela?
-
Bwe tulendi bêla ba verela mu tinsuni?
-
Bwe tulendi bêla ba verela mu mabanza na mu ndiatulu?
ZABA BIAKAKA
Ntia bima bia fioti fioti tulendi sa mu bâ ba verela mu tinsuni ni bu sa ti ka twena na mbongo zazingi ko?
Dzukula misamu mi lendi yirika mu bika fumu.
Taluzula nsobolo zi nataka porno.
“Porno—ya mbi peleko kâni?” (Nzo ya Zangama ya Munkengi, 1er août 2013)
Dzukula bwe bakala dimosi dianungina tifu tia talaka porno.
“Mbala zazingi nalembana ntete nanunga” (Nzo ya Zangama ya Munkengi, No. 4 2016)
a Mutu-diambu wa “Bwe lendi bikila fumu,” wa mu lweka lwa Zaba biakaka mu timoko ti, wubanguri ntia bitini tulendi landa mu nunga nsalulu ya mbi.
b Mu baka lubakusu lwa nunga nsalulu ya sakasaka tikento peleko tibakala, tala mutu-diambu wa “Bwe ndendi nungina nsalulu ya sakasaka tikento peleko tibakala?” mu buku dia Les jeunes s’intérrogent—Réponses pratiques, Volume 1, timoko 25.
