CIIYO 40
Mbweenga Twaba Basalalite Pameenso Akwe Lesa
Amuyeeye ayi mushali mwanakashi atoocafwa mwanaakwe musankwa ngwasuni abuumbi kulibambila kuya kucikolo. Washinisha kwaamba ayi mwanaakwe wasamba alimwi wamufwalika ashakufwala shibotu. Ici inga capa kwaamba ayi mwaana abe abuumi bubotu, alimwi bantu boonse inga babona ayi bashali balamulama kabotu. Ubu mbocibete akuli Ishiwesu shilusuno, Yehova, alisuni kwaamba ayi tube bantu babuuya alimwi basalalite mushintu nshetuyeeya, nshetwaamba, alimwi anshotucita. Kucita boobo kulatucafwa sobeene alimwi akuleta bulemu kuli Yehova.
1. Ino inga twacita buyani kwaamba ayi tube babuuya?
Yehova alatulwiita ayi: “Mulyeelete kuba basalalite.” (1 Pita 1:16) Kuba basalalite cilaamba kuba babuuya alimwi basalalite mushintu nshetuyeeya, nshetwaamba, alimwi anshetucita. Inga twaba babuuya kwiinda mukusamba lyoonse, kucapa shakufwala shesu, alimwi akulama kabotu maanda motukala kwiilikaawo ashintu shoonse nshetusebensesha. Alimwi inga katulama kabotu Maanda a Bwaami nkotubunganina. Kucita boobo kulaakupa kwaamba ayi bantu balemeke Yehova.—2 Bene Kolinto 6:3, 4.
2. Ino nshiinshi nshotweelete kuleya kwaamba ayi tube basalalite?
Baibo ilatuyuminisha ayi “atulisalashe kushintu shoonse shibisha mibili amyoyo yesu.” (2 Bene Kolinto 7:1) Aboobo tulyeelete kweelesha cankusu kuleya cili coonse ceenga cabisha mibili amiyeeyo yesu. Tulyeelete kunooyeeya shintu shisangalasha Yehova, aboobo tulacita nsheenga twacikonsha kwaamba ayi tukake miyeeyo itabete kabotu. (Kulumbaisha 104:34) Alimwi tuleelesha kuba amyaambo ibotu.—Amubelenge Bene Kolose 3:8.
Ino nshiinshi shimwi sheenga shatupa kutaba babuuya lwakumubili alimwi amumibo? Kuli shintu shimwi sheenga shabisha mibili yesu. Aboobo tulaleya shintu mbuli kufweba fwaka, kutafuna shisepo shiitwa ayi betel nut na matewu acisamu ciitwa ayi coca, alimwi akusebensesha misamu ikola. Kucita boobo kulapa kwaamba ayi tube abuumi bubotu akulemeka cipo ca buumi. Cimwi ceenga catucafwa kuba basalalite nkuleya cilabo cibiibi ca kulisekanya kubusankwa na kubwanakashi alimwi akweebela shintu shileta miyeeyo yakoonana. (Kulumbaisha 119:37; Bene Efeso 5:5) Kwalo, teshi cuubu kukoma shilabo ishi shitabete kabotu, nacibi boobo, Yehova inga watucafwa kwaamba ayi tucikoonshe.—Amubelenge Isaya 41:13.
AMWIIYILEWO ASHIMWI
Amwiiye kuba bantu babuuya mbokulemeka Yehova, alimwi ansheenga mwaciita kwaamba ayi mukome kucita shintu Yehova nshaapatite.
3. Kuba babuuya kulaleta bulemu kuli Yehova
Inga twanyumfwisha Yehova mbwaabona makani akuba babuuya na twabona milawo njaakapa bene Isilaeli muciindi cakale kale. Amubelenge Kulonga 19:10 alimwi a 30:17-19, akubandika miipusho iyi:
-
Ino mavesi aya atondesha buyani ayi Yehova alisuni ayi basebenshi bakwe banooba bantu babuuya?
-
Ino nshiinshi nsheenga mwaciita kwaamba ayi mutolelele kuba babuuya?
Kuba babuuya kulayandika ciindi akusebensa cankusu. Nacibi boobo, inga twacikonsha nabi tube bakandu na babile, alimwi tacicite mulandu akumusena nkotukala. Amweebele VIDYO, akubandika mwiipusho utokonkelaawo.
-
Ino nceebonshi bantu mbotushimikila inga balemeka Yehova kwiindaawo na babona mbotulama kabotu shintu nshetusebensesha?
4. Amucileeke shilabo shitabete kabotu
Yehova inga watucafwa kukoma cilabo cili coonse citabete kabotu
Na mulafweba nabi kusebensesha misamu ikola, mpashi mulishi mbocibete ciyumu kucileka cilabo ico. Ano ino nciinshi ceenga camucafwa? Amuyeeye sheenga shacitika na mwatolelela acilabo ico. Amubelenge Mateyo 22:37-39, akubandika kufweba fwaka na kusebensesha misamu ikola mbweenga . . .
-
kwanyonyoola bushicibusa bwa muntu a Yehova.
-
kwanyonyoola bushicibusa bwa muntu amukwashi wakwe alimwi abantu bamwi.
Amuyeeye nsheenga mwaciita kwaamba ayi mucileeke cilabo citabete kabotu. a Amweebele VIDYO.
Amubelenge Bene Filipi 4:13, akubandika mwiipusho uyu:
-
Ino kupaila lyoonse, kwiiya Baibo, alimwi akucanika kumabungano inga kwamucafwa buyani muntu kucikonsha kukoma cilabo cibiibi?
5. Amuleye shilabo akuyeeya pashintu shibiibi
Amubelenge Bene Kolose 3:5, akubandika miipusho iyi:
-
Ino tulishi buyani ayi Yehova alipatite kweebela shintu shileta miyeeyo yakoonana, kutumishanya maswi, mavidyo, na shikope shileta miyeeyo yakoonana pafooni, alimwi akulisekanya kubusankwa na kubwanakashi?
-
Sa mutoobona ayi inga twacikonsha kuleya mibo itabete kabotu kweelana a Yehova mbwaasuni? Ino nceebonshi?
Amubone nsheenga mwaciita kwaamba ayi muleye kuyeeya pashintu shibiibi. Amweebele VIDYO.
Yesu wakaamba cikoshanyo citucafwa kushiba nsheenga twaciita kwaamba ayi tutanooyeeya pashintu shibiibi. Amubelenge Mateyo 5:29, 30, akubandika mwiipusho uyu:
-
Nabi kwaamba ayi Yesu taakalinga kusansulula ayi tulyeelete kulicisa, wakalinga kusansulula ayi tulyeelete kucitawo comwi. Ino nciinshi muntu ncaeelete kucita kwaamba ayi aleye kuyeeya pashintu shibiibi?
Na mutokwelesha cankusu kukoma miyeeyo itabete kabotu, Yehova alanyumfwa kabotu kweelesha kwanu. Amubelenge Kulumbaisha 103:13, 14, akubandika mwiipusho uyu:
-
Ino lilembo ili inga lyamucafwa buyani kutaboolela mwisule na mutokwelesha cankusu kucileka cilabo cimwi citabete kabotu?
Mutabooleli mwisule na mwaboshawo cilabo citabete kabotu ncomusuni kucileka!
Ncuubu kutalika kuyeeya ayi, ‘Ndaalilwa, aboobo inga cabota akucilekabo kweelesha.’ Amuyeeye paceeci: Na muntu utoocica mulubilo lwakupiingana walisuntula akuwa, tacaambi ayi camana walusa, alimwi ici tacaambi ayi alyeelete kuboolela kwisule kwaamba ayi atalike alimwi. Aboobo na muntu wabooshawo alimwi cilabo cibiibi ncaasuni kucileka tacaambi ayi camana teshi akacilekewo sobwe. Alyeelete kukondwa ceebo cakweelesha nkwatokweelesha mukwiinga teshi cintu ceenga catolabo bushiku bomwi. Aboobo amwebo tamweelete kuboolela mwisule na kuli cilabo ncomusuni kucileka, Yehova inga wamucafwa.
BANTU BAMWI BALAAMBA AYI: “Ndakashibila. Inga nshicilekiiwo.”
-
Ino ndilembo nshi ndyeenga mwasebensesha kwaamba ayi mucafwe muntu kushiba kwaamba ayi Yehova inga wamucafwa kucileka cilabo citabete kabotu?
CITEENTE CINENE
Tulasangalasha Yehova na twatolelela kuba basalalite mumiyeeyo, lwakumubili alimwi amumibo.
Kwiindulukaamo
-
Ino nceebonshi kuba basalalite ncintu ciyandika abuumbi?
-
Ino inga mwacita buyani kwaamba ayi mube babuuya?
-
Ino inga mwacita buyani kwaamba ayi mutolelele kuba amiyeeyo alimwi amibo isalalite?
AMULANGWETEEWO ASHIMWI
Ino nshiinshi nsheenga mwaciita kwaamba ayi mutolelele kuba babuuya nabi muli bakandu?
Amwiiye nsheenga mwaciita kwaamba ayi mucileeke kufweba.
Amubone mapensho esa ceebo cakweebela shintu shileta miyeeyo yakoonana.
Amubone shakacafwa musankwa umwi kucileka cilabo cakweebela shintu shileta miyeeyo yakoonana.
“Ndakaalilwa Mankanda Aanji Kaantana Kucileka” (Njashi Yamulindilishi No. 4 2016)
a Mutwi utokwaamba ayi “Mbweenga Mwacileka Kufweba,” utoocanika palubasu lwa “Amulangweteewo Ashimwi” muciiyo ici, utoosansulula nsheenga mwaciita kwaamba ayi mucileeke cilabo cakufweba.
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
