ບົດທີ 40
ເຮົາຈະເປັນຄົນສະອາດສຳລັບພະເຈົ້າໄດ້ແນວໃດ?
ຂໍໃຫ້ນຶກພາບແມ່ທີ່ຮັກລູກກຳລັງກຽມໂຕໃຫ້ລູກຊາຍໄປໂຮງຮຽນ. ລາວໃຫ້ລູກອາບນ້ຳແລະໃສ່ເຄື່ອງນຸ່ງທີ່ສະອາດຮຽບຮ້ອຍ. ການເຮັດແບບນີ້ເຮັດໃຫ້ລູກມີສຸຂະພາບດີ ແລະເຮັດໃຫ້ຄົນອື່ນເຫັນວ່າພໍ່ແມ່ເບິ່ງແຍງລູກຢ່າງດີ ພະເຢໂຫວາພໍ່ທີ່ຮັກເຮົາກໍຢາກໃຫ້ເຮົາເປັນຄົນສະອາດທັງດ້ານຮ່າງກາຍ ຄວາມຄິດ ຄຳເວົ້າ ແລະການກະທຳນຳ. ຖ້າເຮົາເປັນຄົນສະອາດ ໂຕເຮົາເອງຈະໄດ້ຮັບປະໂຫຍດ ແລະເຮົາກໍຈະເຮັດໃຫ້ພະເຢໂຫວາໄດ້ຮັບກຽດນຳ.
1. ເຮັດແນວໃດເຮົາຈຶ່ງຈະເປັນຄົນສະອາດທາງດ້ານຮ່າງກາຍ?
ພະເຢໂຫວາບອກເຮົາວ່າ: “ພວກເຈົ້າຕ້ອງເປັນຄົນບໍລິສຸດ.” (1 ເປໂຕ 1:16) ການເປັນຄົນບໍລິສຸດກ່ຽວຂ້ອງກັບຄວາມສະອາດທາງດ້ານສິນລະທຳແລະທາງດ້ານຮ່າງກາຍ. ເພື່ອຈະເປັນຄົນສະອາດທາງດ້ານຮ່າງກາຍ ເຮົາຕ້ອງອາບນ້ຳເປັນປະຈຳ ເບິ່ງແຍງເຄື່ອງນຸ່ງ ເຮືອນ ແລະລົດໃຫ້ສະອາດຮຽບຮ້ອຍຢູ່ສະເໝີ. ນອກຈາກນັ້ນ ເຮົາຍັງຊ່ວຍເຮັດຄວາມສະອາດຫໍປະຊຸມໄດ້ນຳ. ຖ້າເຮົາເປັນຄົນສະອາດ ເຮົາກໍຈະເຮັດໃຫ້ພະເຢໂຫວາໄດ້ຮັບກຽດ.—2 ໂກຣິນໂທ 6:3, 4
2. ເພື່ອຈະເປັນຄົນສະອາດ ເຮົາຕ້ອງຫຼີກລ່ຽງຫຍັງແດ່?
ຄຳພີໄບເບິນບອກໃຫ້ເຮົາ “ຊຳລະຕົວໃຫ້ສະອາດຈາກທຸກສິ່ງທີ່ເຮັດໃຫ້ຮ່າງກາຍແລະຈິດໃຈເປິເປື້ອນ.” (2 ໂກຣິນໂທ 7:1) ເພື່ອຈະເຮັດໃຫ້ພະເຢໂຫວາພໍໃຈ ເຮົາຕ້ອງຫຼີກລ່ຽງອັນໃດກໍຕາມທີ່ສົ່ງຜົນເສຍຕໍ່ຮ່າງກາຍແລະຄວາມຄິດຂອງເຮົາ. ເຮົາຈະບໍ່ປ່ອຍໃຫ້ໂຕເອງຄິດເລື່ອງທີ່ບໍ່ເໝາະສົມ. (ຄຳເພງ 104:34) ແລະເຮົາຈະບໍ່ໃຊ້ຄຳເວົ້າທີ່ບໍ່ດີແລະບໍ່ເໝາະສົມນຳ.—ອ່ານໂກໂລຊາຍ 3:8
ມີຫຍັງອີກທີ່ອາດເຮັດໃຫ້ເຮົາບໍ່ສະອາດທັງດ້ານຮ່າງກາຍແລະດ້ານສິນລະທຳ? ເຮົາຕ້ອງຫຼີກລ່ຽງການໃຊ້ຢາຫຼືສານຕ່າງໆທີ່ເຮັດໃຫ້ຮ່າງກາຍເຮົາບໍ່ສະອາດ. ເຊັ່ນ ການສູບຢາ ການຄ້ຽວໝາກ ການໃຊ້ຢາເສບຕິດ ແລະການໃຊ້ຢາບາງຢ່າງໃນທາງທີ່ຜິດ. ຖ້າເຮົາຫຼີກລ່ຽງສິ່ງເຫຼົ່ານັ້ນ ກໍສະແດງວ່າເຮົາເຫັນຄ່າຊີວິດທີ່ເປັນຂອງຂວັນຈາກພະເຈົ້າ ແລະສຸຂະພາບຂອງເຮົາກໍຈະດີຂຶ້ນນຳ. ນອກຈາກນັ້ນ ເຮົາຈະພະຍາຍາມເປັນຄົນສະອາດດ້ານສິນລະທຳໂດຍຫຼີກລ່ຽງການກະທຳບາງຢ່າງ ເຊັ່ນ ການສະໜອງຄວາມຕ້ອງການທາງເພດດ້ວຍໂຕເອງຫຼືການເບິ່ງສື່ລາມົກ. (ຄຳເພງ 119:37; ເອເຟໂຊ 5:5) ອາດບໍ່ແມ່ນເລື່ອງງ່າຍທີ່ຈະເຊົານິດໄສເຫຼົ່ານັ້ນ ແຕ່ພະເຢໂຫວາຊ່ວຍເຮົາໄດ້ແນ່ນອນ.—ອ່ານເອຊາອີ 41:13
ຮຽນຮູ້ຫຼາຍຂຶ້ນ
ເປັນຫຍັງຄວາມສະອາດທາງດ້ານຮ່າງກາຍຈຶ່ງເຮັດໃຫ້ພະເຢໂຫວາໄດ້ຮັບກຽດ ແລະເຮົາຈະເຊົາການກະທຳທີ່ບໍ່ສະອາດໄດ້ແນວໃດ.
3. ຄວາມສະອາດດ້ານຮ່າງກາຍເຮັດໃຫ້ພະເຢໂຫວາໄດ້ຮັບກຽດ
ເມື່ອເຮົາໄດ້ອ່ານກົດໝາຍທີ່ພະເຢໂຫວາໃຫ້ກັບຊາດອິດສະຣາເອນໃນສະໄໝກ່ອນ ເຮົາກໍຈະໄດ້ເຂົ້າໃຈວ່າເປັນເລື່ອງສຳຄັນທີ່ປະຊາຊົນຂອງເພິ່ນຈະເປັນຄົນສະອາດ. ອ່ານອົບພະຍົບ 19:10 ແລະ 30:17-19 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຈາກຂໍ້ຄຳພີທີ່ອ່ານໄປ ພະເຢໂຫວາເບິ່ງເລື່ອງຄວາມສະອາດທາງດ້ານຮ່າງກາຍແນວໃດ?
-
ເພື່ອຈະຮັກສາຄວາມສະອາດທາງດ້ານຮ່າງກາຍ ເຮົາໜ້າຈະເຮັດຫຍັງແດ່?
ການຮັກສາຄວາມສະອາດຕ້ອງໃຊ້ເວລາແລະຄວາມພະຍາຍາມ. ແລະບໍ່ວ່າເຮົາຈະຢູ່ໃສຫຼືຖານະເປັນແນວໃດ ຈະລວຍຫຼືທຸກຍາກ ເຮົາກໍເປັນຄົນສະອາດໄດ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເມື່ອເຮົາໄປປະກາດແລະຄົນອື່ນເຫັນວ່າສິ່ງຂອງຕ່າງໆຂອງເຮົາສະອາດຮຽບຮ້ອຍ ເຂົາເຈົ້າຈະໃຫ້ກຽດພະເຢໂຫວາຫຼາຍຂຶ້ນບໍ? ຍ້ອນຫຍັງ?
4. ເຊົາເຮັດສິ່ງທີ່ບໍ່ດີ
ພະເຢໂຫວາຊ່ວຍເຮົາໃຫ້ເຊົາເຮັດສິ່ງທີ່ບໍ່ດີໄດ້
ຖ້າເຈົ້າສູບຢາຫຼືໃຊ້ຢາເສບຕິດ ເຈົ້າຄືຊິຮູ້ວ່າມັນເຊົາຍາກ. ແຕ່ອັນໃດຈະຊ່ວຍໄດ້? ຖ້າເຈົ້າຮູ້ວ່າການເຮັດແບບນັ້ນສົ່ງຜົນເສຍແນວໃດ ກໍຈະຊ່ວຍໃຫ້ເຈົ້າເຊົາໄດ້ງ່າຍຂຶ້ນ. ອ່ານມັດທາຍ 22:37-39 ແລ້ວລົມກັນວ່າການຕິດຢາສູບແລະຕິດຢາເສບຕິດສົ່ງຜົນເສຍແນວໃດຕໍ່ . . .
-
ຄວາມສຳພັນຂອງເຈົ້າກັບພະເຢໂຫວາ.
-
ຄອບຄົວແລະຄົນອ້ອມຂ້າງ.
ເຈົ້າຕ້ອງເຮັດຫຍັງແດ່ເພື່ອຈະເຊົາເຮັດສິ່ງທີ່ບໍ່ດີໄດ້ສຳເລັດ. a ເປີດວິດີໂອ.
ອ່ານຟີລິບປອຍ 4:13 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເປັນຫຍັງການອະທິດຖານເລື້ອຍໆ ອ່ານຄຳພີໄບເບິນເປັນປະຈຳ ແລະເຂົ້າຮ່ວມການປະຊຸມເປັນປະຈຳຈະຊ່ວຍໃຫ້ເຈົ້າມີກຳລັງເພື່ອຈະເຊົານິດໄສທີ່ບໍ່ດີ?
5. ສູ້ກັບຄວາມຄິດແລະການກະທຳທີ່ບໍ່ສະອາດ
ອ່ານໂກໂລຊາຍ 3:5 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເຮົາຮູ້ໄດ້ແນວໃດວ່າສື່ລາມົກ ເຊັກຕິງ b ແລະການສະໜອງຄວາມຕ້ອງທາງເພດດ້ວຍໂຕເອງເປັນເລື່ອງທີ່ພະເຢໂຫວາຖືວ່າບໍ່ສະອາດ?
-
ພະເຢໂຫວາຢາກໃຫ້ເຮົາເປັນຄົນສະອາດດ້ານສິນລະທຳ ເຈົ້າຄິດວ່າເຮົາເຮັດໄດ້ບໍ? ເປັນຫຍັງເຈົ້າຈຶ່ງຄິດແບບນັ້ນ?
ເຮົາຈະສູ້ກັບຄວາມຄິດທີ່ບໍ່ສະອາດໄດ້ແນວໃດ. ເປີດວິດີໂອ.
ພະເຢຊູເລົ່າຕົວຢ່າງປຽບທຽບໜຶ່ງທີ່ສະແດງໃຫ້ເຫັນວ່າເຮົາຕ້ອງເຮັດທຸກຢ່າງທີ່ເຮັດໄດ້ເພື່ອຈະເປັນຄົນສະອາດດ້ານສິນລະທຳ. ອ່ານມັດທາຍ 5:29, 30 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ພະເຢຊູບໍ່ໄດ້ບອກໃຫ້ເຮົາທຳຮ້າຍຮ່າງກາຍໂຕເອງ ແຕ່ແທ້ໆແລ້ວເພິ່ນກຳລັງບອກວ່າເຮົາຕ້ອງລົງມືເຮັດບາງຢ່າງ. ເຮົາຕ້ອງເຮັດຫຍັງແດ່ເພື່ອຈະຫຼີກລ່ຽງຄວາມຄິດທີ່ບໍ່ສະອາດ? c
ພະເຢໂຫວາເຫັນຄ່າທີ່ເຈົ້າພະຍາຍາມຕໍ່ສູ້ເພື່ອຈະເຊົາຄິດເລື່ອງທີ່ບໍ່ສະອາດ. ອ່ານຄຳເພງ 103:13, 14 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຖ້າເຈົ້າກຳລັງພະຍາຍາມເຊົາຄິດເລື່ອງທີ່ບໍ່ສະອາດ ຂໍ້ຄຳພີນີ້ໃຫ້ກຳລັງໃຈເຈົ້າແນວໃດເພື່ອຈະບໍ່ຍອມແພ້?
ຢ່າຍອມແພ້!
ເຈົ້າອາດຄິດວ່າ ‘ຂ້ອຍເຮັດຜິດອີກແລ້ວ ຍອມແພ້ດີກວ່າ.’ ຂໍໃຫ້ລອງຄິດເຖິງເລື່ອງນີ້: ສົມມຸດວ່ານັກແລ່ນຄົນໜຶ່ງສະດຸດລົ້ມ ນີ້ບໍ່ໄດ້ໝາຍຄວາມວ່າລາວແພ້ການແຂ່ງຂັນຫຼືຕ້ອງກັບໄປເລີ່ມແລ່ນໃໝ່ຕັ້ງແຕ່ຕົ້ນ. ຄ້າຍຄືກັນ ຖ້າເຈົ້າກັບໄປເຮັດບາງຢ່າງທີ່ບໍ່ດີ ນັ້ນບໍ່ໄດ້ໝາຍຄວາມວ່າເຈົ້າຈະເຊົາບໍ່ໄດ້. ຫຼືບໍ່ໄດ້ໝາຍຄວາມວ່າຄວາມພະຍາຍາມທັງໝົດທີ່ເຮັດມາບໍ່ມີປະໂຫຍດ. ຖ້າຕອນນີ້ເຈົ້າກຳລັງສູ້ຢູ່ ແຕ່ບາງເທື່ອກໍຍັງພາດ ຂໍຢ່າຍອມແພ້! ພະເຢໂຫວາຈະຊ່ວຍເຈົ້າໃຫ້ເຊົາເຮັດສິ່ງເຫຼົ່ານັ້ນໄດ້ແນ່ນອນ.
ບາງຄົນເວົ້າວ່າ: “ໂອຍ ແນວຄົນມັນຕິດແລ້ວ ເຊົາບໍ່ໄດ້ດອກ.”
-
ເຈົ້າຈະເປີດຂໍ້ຄຳພີໃດທີ່ສະແດງໃຫ້ເຫັນວ່າພະເຢໂຫວາຊ່ວຍໃຫ້ລາວເຊົາເຮັດສິ່ງທີ່ບໍ່ດີໄດ້?
ສະຫຼຸບ
ເຮົາເຮັດໃຫ້ພະເຢໂຫວາພໍໃຈໂດຍເປັນຄົນສະອາດທັງດ້ານຮ່າງກາຍ ຄວາມຄິດ ແລະການກະທຳຂອງເຮົາ.
ຄຳຖາມທົບທວນ
-
ເປັນຫຍັງການເປັນຄົນສະອາດຈຶ່ງສຳຄັນຫຼາຍ?
-
ເຈົ້າຈະເຮັດແນວໃດເພື່ອຈະເປັນຄົນສະອາດຮຽບຮ້ອຍ?
-
ເຈົ້າຈະເຮັດແນວໃດເພື່ອຈະມີຄວາມຄິດແລະການກະທຳທີ່ສະອາດ?
ເບິ່ງເພີ່ມເຕີມ
ມີເລື່ອງງ່າຍໆຫຍັງແດ່ທີ່ທຸກຄົນເຮັດໄດ້ເພື່ອຈະເປັນຄົນສະອາດ?
ຄຳແນະນຳທີ່ເປັນປະໂຫຍດເພື່ອຈະຊ່ວຍໃຫ້ເຊົາສູບຢາໄດ້.
ມາເບິ່ງຜົນເສຍຂອງການຕິດສື່ລາມົກ
“ສື່ລາມົກ—ບໍ່ມີພິດໄພຫຼືມີອັນຕະລາຍ?” (ຫໍສັງເກດການ 1 ສິງຫາ 2013)
ອັນໃດຊ່ວຍໃຫ້ຜູ້ຊາຍຄົນໜຶ່ງເຊົາຕິດສື່ລາມົກ?
“ຂ້ອຍລົ້ມເຫຼວຫຼາຍເທື່ອກ່ອນຈະປະສົບຄວາມສຳເລັດ” (ຫໍສັງເກດການ ສະບັບທີ 4 2016)
a “ວິທີເຊົາສູບຢາ” ໃຫ້ໃນສ່ວນເບິ່ງເພີ່ມເຕີມຂອງບົດນີ້ ມີຄຳແນະນຳທີ່ເປັນປະໂຫຍດເພື່ອຈະຊ່ວຍໃຫ້ເຊົາສູບຢາໄດ້.
b ເຊັກຕິງ ແມ່ນການສົ່ງຂໍ້ຄວາມລາມົກ ຮູບໂປ້ ຫຼືວິດີໂອໂປ້ຜ່ານທາງໂທລະສັບມືຖືຫຼືອຸປະກອນເອເລັກໂຕຣນິກອື່ນໆ.
c ເພື່ອຈະເຊົາສະໜອງຄວາມຕ້ອງການທາງເພດດ້ວຍໂຕເອງ ຂໍໃຫ້ເບິ່ງ “ຂ້ອຍຈະຊະນະການສະໜອງຄວາມຕ້ອງການທາງເພດດ້ວຍຕົວເອງໄດ້ແນວໃດ?” ໃນປຶ້ມຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມທີ 1 ບົດທີ 25.
ເລື່ອງທີ່ເຈົ້າອາດຈະມັກ
ຄຳຖາມທີ່ພົບເລື້ອຍໆ
ເລື່ອງທີ່ໜ້າຮູ້ກ່ຽວກັບການຮຽນຄຳພີໄບເບິນກັບພະຍານພະເຢໂຫວາ
ເມື່ອຮຽນຄຳພີໄບເບິນກັບພະຍານພະເຢໂຫວາ ເຈົ້າຢາກໃຊ້ຄຳພີໄບເບິນສະບັບໃດກໍໄດ້. ເຈົ້າຢາກຊວນຄອບຄົວຫຼືໝູ່ມາຮຽນນຳກໍໄດ້.
