Mazinn enn mama ki bien kontan so ti garson ek ki pe prepar li pou al lekol. Li pou fer sir ki li’nn fini bengne ek ki so linz prop ek an-ord. Sa permet so ti garson ena enn bon lasante ek sa montre lezot ki so bann paran pe bien okip li. Dan mem fason, nou Papa Zeova ki bien kontan nou, anvi ki nou prop fizikman ek moralman. Noumem nou gagn bann bienfe kan nou prop ek sa donn Zeova loner.

1. Kouma nou kapav prop fizikman?

Zeova dir nou: “Zot bizin sin.” (1 Pier 1:16) Pou ki enn dimounn sin, li bizin prop fizikman ek moralman. Pou ki nou prop fizikman, nou bizin ben­gne souvan ek gard nou linz, nou lakaz, nou transpor prop ek an-ord. Nou kapav osi ede pou netway lasal kot nou fer renion. Kan nou kontign fer zefor pou ki nou prop, sa donn Zeova loner.​—2 Korintien 6:3, 4.

2. Pou ki nou prop, ki bann labitid nou bizin rezete?

Labib ankouraz nou pou “separ nou avek tou seki kapav sali nou lekor ek nou [“lespri,” NW].” (2 Korintien 7:1) Alor, nou pou fer bann gran zefor pou rezet ninport ki kitsoz ki kapav ena enn move lefe lor nou lekor ek nou lespri. Nou bann panse bizin fer Zeova kontan, alor nou pou fer nou maximum pou rezet bann move panse. (Psom 104:34) Nou pou osi fer zefor pou ki nou servi enn langaz ki prop.​—Lir Kolosien 3:8.

Ki bann lezot kitsoz ki kapav anpes nou pou res prop fizikman ek moralman? Ena sertin kitsoz ki kapav ena enn move lefe lor nou lekor. Alor, nou bizin rezet bann kitsoz kouma sigaret, mas fey betel ouswa lagrin betel, ek pran ladrog. Kan nou rezet sa bann kitsoz-la, nou pou ena enn pli bon lasante, ek nou pou montre respe pou lavi ki enn zoli kado. Nou osi fer zefor pou res prop moralman kan nou rezet bann labitid ki pa prop, kouma mastirbasion ek get pornografi. (Psom 119:37; Efezien 5:5) Li kapav difisil pou aret sa bann labitid-la, me Zeova kapav ed nou pou fer sa.​—Lir Izai 41:13.

 ANOU GET INPE PLIS

3. Kan nou prop fizikman sa donn Zeova loner

Kan nou lir bann lalwa ki Zeova ti donn nasion Izrael, nou aprann ki kantite sa ti inportan pou Li ki so pep prop. Lir Exod 19:10 ek 30:17-19, ek apre sa, get sa bann kestion-la ansam:

• Kouma sa bann verse-la ed nou pou konpran fason panse Zeova lor linportans pou res prop fizikman?

• Ki bann bon labitid pou ed ou pou ki ou prop fizikman?

Sa demann boukou zefor ek letan pou res prop fizikman. Me nou kapav fer li ninport kotsa nou reste, mem si nou ris ouswa pov. Zwe VIDEO-la, ek apre sa, get sa kestion-la ansam:

• Si nou bann kitsoz prop ek an-ord, ki lefe sa pou ena lor nou predikasion?

4. Aret bann move labitid

Si ou fime ouswa pran ladrog, kitfwa ou kone ki kantite li difisil pou aret sa bann move labitid-la. Ki kitsoz kapav ed ou? Reflesi ki lefe sa bann move labitid-la ena lor ou lavi. Lir Matie 22:37-39, ek apre sa, gete kouma sigaret ouswa ladrog ena enn lefe lor . . .

• enn dimounn so lamitie avek Zeova.

• enn dimounn so fami ek bann dimounn otour li.

Reflesi ki kitsoz ou kapav fer pou aret sa move labitid-la. a Zwe VIDEO-la.

Lir Filipien 4:13, NW, ek apre sa, get sa kestion-la ansam:

• Kan enn dimounn priye, etidie Labib, ek asiste bann renion regilierman, kouma sa donn li lafors ki li bizin pou aret bann move labitid?

 5. Rezet bann panse ek bann labitid ki pa prop

Lir Kolosien 3:5, ek apre sa, get sa bann kestion-la ansam:

• Kouma nou kone ki pornografi, sexting, b ek mastirbasion, se bann kitsoz ki pa prop pou Zeova?

• Eski ou panse ki li rezonab ki Zeova atann ki nou prop moralman? Kifer?

Pou kone kouma nou kapav rezet bann panse ki pa prop, zwe VIDEO-la.

Zezi ti servi enn lexanp pou montre ki nou bizin determine pou fer seki bizin pou ki nou prop moralman. Lir Matie 5:29, 30, NW, ek apre sa, get sa kestion-la ansam:

• Zezi pa ti pe rod dir ki nou bizin bles nou fizikman. Li ti pe rod dir ki nou bizin azir. Ki bann kitsoz enn dimounn bizin pa tarde pou fer pou ki li kapav rezet bann panse ki pa prop? c

Si ou pe fer bann zefor pou lit kont bann panse ki pa prop, ou bann zefor ena boukou valer pou Zeova. Lir Psom 103:13, 14, ek apre sa, get sa kestion-la ansam:

• Si ou pe gagn difikilte pou rezet bann labitid ki pa prop, kouma sa verse-la kapav ankouraz ou pou kontign lite?

 SEKI NOU’NN APRANN

Nou fer plezir Zeova kan nou veye ki nou lekor, nou lespri, ek nou kondwit prop.

Eski Ou Rapel?

• Kifer li inportan ki nou prop?

• Kouma ou kapav prop fizikman?

• Kouma ou kapav fer an-sort ki ou bann panse ek ou kondwit prop?