Nwuupuwele athiyana yammwarihaka ikuwo mwanaya mwankaani wiira arwee ucikolani. Ayo anammweha mwaamwanayooyo wakhala wiira khananaracile ni wakhala wiira ikuwo cawe ciri cookatthiya ni cooreera. Iyo itthu yomaana, kontha inankavihera ukhalana ukumi womaana ni inaathoonyihera wiira haana asithumwaane ni anantafiti saana. Khampa ayari ampheelaaya wiira asaanaaya akhale woohinanaraca, Apaapeehu Yehova, ciicammo ampheela wiira nikhale woohinanaraca mwiirutthuni wihu ni mmoopoweleloni wihu. Wiirattela unaaniphwanyiha ifayita hiiva ni unanttitthimiha Yehova.

1. Manannani cinlamuliyeehu uthoonyihera ukhala atthu owiirattela mwiirutthuni wihu?

Yehova noniirela wiira ‘nikhale owaarya.’ (1 Peturu 1:16) Wiira nikhale owaarya, nihaana nihinanaracaka mwiirutthuni wihu ni mmoopuweleloni wihu. Hi pooti wankhaleehu atthu oohinanaraca mwiirutthuni wihu narapaka khula nihuku, ukattha ikuwo cihu, urattela ikaarweehu ni wapuwani wihu. Ciicammo pooti wankavihereehu ukwecakweca Usalau yo Umwene. Niirattelaka mwiirutthuni wihu ninanttitthimiha Yehova.—2 Akorintu 6:3, 4.

2. Wiira nikhale atthu oohinanaraca ilemani cinlamuliyeehu unyema?

Ibiiblya inniirela ‘niirapihe cootakhala cotheene nrutthuni wihu ni nnepeehu.’ (2 Akorintu 7:1) Iyo maanaaya wiira nihaana niikurumicaka unyema khula itthu yaahala unanariha irutthweehu ni moopuwelelweehu. Hi nimpheela wiira nintteelihe nrima Yehova. Phimaana, ninawiikurumica unyema moopuwelelo oohinamaana. (Isaalimu 104:34) Hi ciicammo nimpheela wiira moolumacerweehu akhale omaana.—Nsome Akolosu 3:8.

Citthuni-tho caahala unanariha irutthwiihu ni mmoopuwelelweehu? Cihaavo mirette coohapala atthunaka caahala uhonona irutthwiihu. Phimaana, hi khaninonlya soone awula sikaro ni khaninlya citthu coohapala. Nlattu woopanka iyo, ukumiihu unkhala womaana ni ninaathoonyihera wiira ninaahisima iyo itthuvo ivahiyeehu ni Nlukwiiyo. Vano manannani ninlamuliyeehu ukhala oohinanaraca mmoopuweleloni wihu? Ninhala ukhitiri iyo, neekurumicaka unyema citthu coohirya, toko wiikeha ni woona ipornografiya. a (Moone niwehero; Isaalimu 119:37; Efesu 5:5) Pooti ukhala itthu yoorika uhiya nnyo citthunnyo, masi Yehova naahala unikavihera.—Nsome Isaiya 41:13.

 MUNCERERE WIITTHUCA WINYU

3. Wiirattela mwiirutthuni wihu unanttitthimiha Yehova

Nasomaka malamulo Yehova yaavahilyaawe apoovu o Isarayeli, ninawiitthuca wiira Yehova nopheela wiira apoovwaawe yiirattele. Nsome Nkwaha 19:10 ni 30:17-19. Mwamalihaka usoma, moopele mwaha ala makohwaala:

• Nnya iveerusunnya cinoonihera cani wiira Yehova nopheela wiira niirattele mwiirutthuni wihu?

• Ilemani comaana cinhala wuukaviherani ukhala ntthu owiirattela mwiirutthuni winyu?

Wiira ntthu eerattele mwiirutthuni wawe haana avirihaka ukati ni wiikurumica. Masi hi pooti wampankeehu iyo itthwiiyo, hataa nikhalaka ilaponi ni hataa nikhalaka mathaciri awula atthu amasikhini. Moone IVIDIYU, ni mwamalihaka woona, moopele mwaha nna nikohonna:

• Kontha isiyani urattela citthu cihu pooti unttitthimiha Yehova nakhalaka wuulalyeerani?

4. Nhiye ilema coohiirya

Wakhala wiira nyuuva nnanlya soone awula nnaalya citthu coohapala, nnaacuwela wiira unaarika uhiya ilema coohinamaana. Isiyani inhala wuukaviherani uhiya? Muupuwele inanna iyo ilemeeyo cinoopankaayani pusya. Nsome Matewus 22:37-39, ni mwamalihaka usoma, moopele mwaha ala makohwaala: Manannani unlya soone ni citthu coohapala unhononaaya . . .

• upatthani ntthuuyo urinaawe ni Yehova?

• ukumi waamucyaawe ntthuuyo ni waatthu anaathukanaawe?

Mpanke ipalaanu wiira nkhitiri uhiya ilema coohinamaana. b (Moone niwehero.) Moone IVIDIYU.

Nsome Afilipo 4:13, ni mwamalihaka usoma, moopele mwaha nna nikohonna:

• Manannani wiilemaleliha ulompa, usoma Ibiiblya ni urwaa umikutthaanoni unonkaviheraaya ntthu ukhalana ikuru wiira akhitiri uhiya ilema yoohiloka?

 5. Mwiikurumice uhiya moopuwelelo ni ilema coohiloka

Nsome Akolosu 3:5, ni mwamalihaka usoma, moopele mwaha ala makohwaala:

• Nincuwela cani wiira ipornografiya, ile ineehaniya sexting ni wiikeha cikhanle citthu cinonhiirya Yehova? c

• Woonela winyu, wanaakhitirya ukhalana moopuwelelo omaana, khampa Yehova cimpheelaawe? Kontha isiyani?

Moone mananna nyuuva cinlamuliyeenyu wiikurumica uhiya moopuwelelo oohiloka. Moone IVIDIYU.

Yesu ahopanka ntakihero wiira athoonyere nlattuni ninlamuliyeehu wiikurumica ukhalana moopuwelelo omaana. Nsome Matewus 5:29, 30, ni mwamalihaka usoma, moopele mwaha nna nikohonna:

• Yesu kahi eera wiira nihaana niirakalihaka masi aapheela uhimya wiira nihaana nipankaka itthu wiira nihiye ilema yoohiloka irineehu. Citthuni cinlamuliyaaya upanka atthu wiira anyeme moopuwelelo oohiloka? d

Wakhala wiira ninawiikurumica uhiya ukhalana moopuwelelo oohinamaana, Yehova naavaha ifayita wiikurumica wihu. Nsome Isaalimu 103:13, 14, ni mwamalihaka usoma, moopele mwaha nna nikohonna:

• Wakhala wiira unawuurikarikani uhiya ilema yoohiloka, manannani nnya iveerusunnya cinhalaaya wuukaviherani uhihiyerera wiikurumica?

 UTHIKILELA

Neerattelaka mwiirutthuni wihu, mmoopuweleloni wihu ni mananna oopanka citthu cihu, ninantteeliha nrima Yehova.

Wuupuwela

• Kontha isiyani ikhanlyaaya itthu yofayita wiirattela nhina wo citthu cotheene?

• Manannani nyuuva cinlamuliyeenyu ukhala ntthu owiirattela mwiirutthuni winyu?

• Nnohala ukhitiri cani ukhala owiirattela nhina citthu cimpankeenyu ni cinoopuweleenyu?