Elenganyini pali nyina aakupekanya ka mwanakwe kalumendo kuti kaye ku sukulu. Wasininkizya ukuti ka mwana kafulala ningo nupya kazwala ivyakuzwala ivisuma. Cii calenga ukuti ka mwana kaye nu umi usuma nu kuleka yauze yalola ukuti avyazi yakakasunga ningo. Vikwene avino na Tata witu, Yeova, akalonda twaloleka ningo nu kuya ausaka muli vino tukaelenganya, vino tukavwanga, na vino tukacita. Nga tuli nu usaka ivintu vikatuzipila, nupya tukalenga ululumbi ukuya kuli Yeova.

1. Tungacita uli pakuti twaya nu usaka muli vino tukacita cila wanda?

Yeova watunena ukuti: “Mulinzile ukuya amuzilo.” (1 Petulo 1:16) Pakuti tuye amuzilo tulinzile ukuya ni miyele isuma nu kuya ausaka muli vino tukacita cila wanda. Tungaya ausaka muli vino tukacita cila wanda ndi cakuti tukufulala lyonsi nu kufula ivyakuzwala, ukuzifya umu ng’anda na motoka. Tungazwilizyako nu kuzifya Ing’anda ya Wene. Ndi cakuti tuli nu usaka muli vino tukucita, tukalenga ululumbi ukuya kuli Yeova.—2 Kolinto 6:3, 4.

2. Pakuti tuye asanguluke, i miyele ci ino tutalinzile ukuya nayo?

Baibo ikatukomelezya kuti tulinzile ukuisangulula “kuli vyonsi ivikakowezya umwili nu mupasi.” (2 Kolinto 7:1) Cii cikupiliula ukuti tulinzile ukutaluka uku cili consi icingonona imili itu ni myelenganyizizye itu. Imyelenganyizizye itu ilinzile ukuzanzya Yeova, fwandi tulinzile ukukana imyelenganyizizye iipe. (Masamu 104:34) Nupya tukaezya ukulanda mazwi asuma.—Belengini Kolose 3:8.

I vyani vyuze ivingalenga tuye aakowele muli vino tukacita? Ivintu vimwi vingalenga imili itu ukukowela. Fwandi tukataluka uku kupeepa fwaka, insunko, alino ni milembo yuze ikavulunganya uwongo. Nga tukucita vii, tukaya nu umi usuma nupya tukalanga ukuti twacindika umi. Nupya tukaezya na maka ukuya asanguluke lino tukutaluka uku viyelezyo iviipe wakwe ukucinya ivya nzwalo nu kutamba ivya uzelele. (Masamu 119:37; Efeso 5:5) Cingatala sana ukuta imiyele yii, nomba Yeova angatwazwa ukucita vivyo.—Ezaya 41:13.

 LONDELEZYINI NA VYUZE

3. Ukuya ausaka kukalenga Yeova ukucindikwa

Nga twabelenga masunde yano Yeova wapeezile aina Izlaeli, tungamanya vino cacindama kuli aliwe ndi cakuti antu yakwe yali ausaka. Belengini Kufuma 19:10; 30:17-19, alino mulanzyanye mauzyo yaa:

• Uzye ivikomo vii vikutulangilila uli vino Yeova akalola usaka?

• I vyani vino mulinzile ukulacita lyonsi pakuti mutwalilile ukuya ausaka?

Pakuti tuye ausaka cikalondekwa insita na maka. Nomba tungacita vivyo asi mulandu na kuno tukaikala nanti sweswe yakankala nanti apiina. Tambini VIDYO, alino mulanzyanye iuzyo ilyatililondelelapo.

• U mulandu ci uno antu yano tukasimikilako yangacindikila sana Yeova ndi cakuti yakulola ivintu vitu i vya usaka?

4. Tiini ukucita iviipe

Ndi cakuti insita zimwi mukapeepa nanti ukuomvya imilembo ikavulunganya uwongo, mufwile mwamanya vino catala ukuta ukucita vivyo. I vyani ivingamwavwa? Lolini iviipe ivingafumamo umu kucita vivyo. Belengini Mateo 22:37-39, alino mulanzyanye vino ukupeepa nu ukuomvya imilembo iikavulunganya uwongo vingalenga . . .

• ucuza wa muntu na Yeova ukononeka.

• ucuza wakwe nu lupwa alino na antu yauze ukononeka.

Tantikini vino mungacita pakuti mute ukuya ni miyele iipe. a Tambini VIDYO.

Belengini Filipi 4:13, alino mulanzyanye iuzyo lii:

• Uzye ukupepa lyonsi, ukuisambilizya Baibo nu kuzanwa umu kulongana kungazwa uli umuntu ukucimvya imiyele iipe?

 5. Mwacimvya melenganyo ni vicitwa iviipe

Belengini Kolose 3:5, alino mulanzyanye mauzyo yaa:

• Uzye twamanya uli ukuti Yeova wapata ukutamba ivikope vya uzelele, ukutumizyanya mameseji ni vikope vya uzelele, nu kucinya ivya nzwalo?

• Uzye mukwelenganya ukuti caya sile ningo vino Yeova watunena ukuti tulinzile ukuya ausaka? U mulandu ci?

Manyini vino mungacimvya imyelenganyizizye iipe. Tambini VIDYO.

Yesu waomvizye icilangililo pa kutulangilila vino tulinzile ukwezya na maka pakuti tutwalilile ukuya asanguluke.Belengini Mateo 5:29, 30, alino mulanzyanye iuzyo lii:

• Nanti cakuti Yesu atalozyanga mukuti tulinzile ukonona ivilundwa vitu, walozizye mukuti tulinzile ukucitapo vimwi. I vyani vino tulinzile ukucita pakuti tute ukuya na melenganyo aipe? b

Ndi cakuti mukwezya na maka ukuta ukuya na melenganyo aipe, Yeova akauvwa ningo pali vino mukaezya na maka. Belengini Masamu 103:13, 14, alino mulanzyanye iuzyo lii:

• Uzye ilembo lii lingamwazwa uli lino mukulwisyanya ni miyele iipe?

 VINO TWASAMBILILA

Tukazanzya Yeova ndi cakuti tukusunga imili itu iya usaka, ukukanaya ni myelenganyizizye iipe alino nu kuya ni miyele isanguluke.

I vyani vino mwasambilila?

• U mulandu ci uno cacindamila ukuya ausaka?

• Mungacita uli pakuti muye ausaka?

• Mungacita uli pakuti mutaelenganya iviipe nu kuya ni miyele isuma?