KATAK 40
Ewi Wãween Jemaroñ Erreo Im̦aan Mejãn Anij?
Pijaikl̦o̦k juon jinen ajri ej kõpooje l̦adik eo nejin ñan an etal im jikuul̦. Ej lale bwe en tutu im bwe nuknuk ko an ren karbõb im erreo. Men in ej kõm̦m̦an bwe en em̦m̦an ãjmour eo an im ej kwal̦o̦k ñan ro jet bwe em̦m̦an an ro jemãn im jinen lale e. Ejja ãindeinl̦o̦k wõt, eo Jemãdwõj me el̦ap yokwe ippãn, Jeova, ekõn̦aan bwe jen erreo—ilo ãnbwin ak men ko m̦weied im ilo wãween ad l̦õmn̦ak, kõm̦m̦an, im kõnono. Ñe jej erreo, jej bõk tokjãn im jej bõktok nõbar ñane.
1. Ewi wãween jemaroñ erreo ilo ãnbwin im men ko m̦weied?
Jeova ej ba ñan kõj: “Kom̦ij aikuj kwõjarjar.” (1 Piter 1:16) Kwõjarjar ej ekkejell̦o̦k ñan ad erreo ilo ãnbwin ak men ko m̦weied im wãween ad l̦õmn̦ak, kõm̦m̦an, im kõnono. Jemaroñ erreo ilo ãnbwin im ilo men ko m̦weied ikijjeen ad ekkeini ad tutu, kõm̦m̦an bwe en erreo nuknuk ko ad, m̦õko im̦õd, im wa ko waad. Jemaroñ bar jipañ karreoiki Im̦õn Kweilo̦k eo ad. Ñe jej kõm̦m̦an bwe jen erreo ilo wãween kein, jej bõktok nõbar ñan Jeova.—2 Korint 6:3, 4.
2. Bwe jen erreo, ta imminene ko jej aikuj in jum̦aiki?
Baibõl̦ eo ej rõjañ kõj ñan “karreoik kõj jãn men otemjej rej kattoon ãnbwinnid im l̦õmn̦ak ko ad.” (2 Korint 7:1) Kõn men in, jej kate kõj ñan jum̦ae jabdewõt men me enaaj ko̦kkure ãnbwinnid ak l̦õmn̦ak ko ad. L̦õmn̦ak ko ad rej aikuj kabuñbũruon Jeova, innem jej aikuj in kate kõj joñan wõt ad maroñ ñan jum̦ae im julo̦ki l̦õmn̦ak ko renana ak rejekkar. (Sam 104:34) Jej bar kajjioñ kate kõj kõnono ilo juon wãween erreo.—Riit Kolosse 3:8.
Ta ko jet remaroñ kõm̦m̦an bwe jen jab erreo ilo ãnbwin im ilo l̦õmn̦ak im kõm̦m̦an ko ad? Ewõr jet men ko remaroñ kattoon im ko̦kkure ãnbwinnid. Kõn men in, jej jum̦aik men ko ãinwõt, tobacco, betel nut ak coca leaves, im drug ak men ko rekajoor. Ilo ad jum̦aik men kein, enaaj em̦m̦anl̦o̦k ãjmour ko ad im jej kwal̦o̦k ad kautiej menin letok eo kõn mour. Jej bareinwõt lukkuun kate kõj bwe l̦õmn̦ak im kõm̦m̦an ko ad ren erreo ikijjeen ad tarin̦aeik imminene ko rettoon ãinwõt ad iukkure kõn m̦õttan ko ilo ãnbwinnid im alwõje pijain keelwaan ko. (Sam 119:37; Epesõs 5:5) Emaroñ pen ñan anjo̦ ioon imminene kein, ak Jeova emaroñ jipañ kõj lo tõprak.—Riit Aiseia 41:13.
KAM̦WILAL̦L̦O̦K AM̦ MEL̦EL̦E
Lale etke jej nõbar Jeova ñe jej erreo, im lale wãween eo jemaroñ anjo̦ ioon imminene ko rettoon.
3. Ad erreo ilo ãnbwin im men ko m̦weied ej nõbar Jeova
Jemaroñ bõk l̦õmn̦ak eo an Jeova ikijjeen erreo ilo ad etali kien ko an ñan ri-Israel ro ilo etto. Riit Exodus 19:10 im 30:17-19, innem bwebwenato kake kajjitõk kein:
-
Ta eo eoon kein rej kaalikkar kõn l̦õmn̦ak eo an Jeova kõn ad erreo ilo ãnbwin im men ko m̦weied?
-
Ta imminene ko rem̦m̦an renaaj jipañ eok bwe kwõn erreo wõt?
Bwe jen erreo ilo ãnbwin im men ko m̦weied, ej juon men me enaaj bõk iien im kate ko ad. Bõtab ej juon men jemaroñ kõm̦m̦ane jekdo̦o̦n ia eo jej jokwe ie ak joñan jããn ko ippãd. Kõjo̦e PIJAIN ALWÕJ eo, innem bwebwenato kake kajjitõk in:
-
Etke enaaj l̦apl̦o̦k an armej ro jej kwal̦o̦k naan ñan er kautiej Jeova ñe rej lo bwe erreo men ko m̦weied?
4. Anjo̦ ioon imminene ko renana
Jeova emaroñ jipañ kõj anjo̦ ioon jabdewõt imminene enana
El̦aññe kwõj kõbaatat ak kõjerbali uno ak men ko rekajoor, kwõmaroñ jel̦ã ewi joñan an pen ñan jol̦o̦ke imminene in. Ta eo emaroñ jipañ? Lale ewi wãween an imminene in jelõt eok. Riit Matu 22:37-39, innem bwebwenato kõn ewi wãween an tobacco ak kõjerbali men ko rekajoor jelõte . . .
-
kõtaan eo an juon armej ippãn Jeova.
-
baam̦le eo an juon armej im ro jet ipel̦aakin.
Kõm̦m̦an juon bũl̦ããn kõn wãween am̦ naaj anjo̦ ioon juon imminene enana. a Kõjo̦e PIJAIN ALWÕJ eo.
Riit Pilippai 4:13, innem bwebwenato kake kajjitõk in:
-
Ñe juon ej niknik ilo jar, katak Baibõl̦, im pãd ilo kweilo̦k ko, ewi wãween an men kein lel̦o̦k ñane kajoor eo ñan anjo̦ ioon m̦anit ko renana?
5. Tarin̦aeik l̦õmn̦ak im m̦anit ko rettoon
Riit Kolosse 3:5, innem bwebwenato kake kajjitõk kein:
-
Ewi wãween ad jel̦ã bwe pijain keelwaan ko, jilkinl̦o̦k text kõn pija ko ak pijain alwõj ko rettoon ñan ro jet, im an juon iukkure kõn m̦õttan ko ilo ãnbwinnin rejjab erreo im̦aan mejãn Jeova?
-
Kwõl̦ak lale, ekkar im jim̦we ke bwe Jeova en kõtmãne bwe jen erreo ilo wãween ad l̦õmn̦ak, kõm̦m̦an, im kõnono? Etke kwõj ba men in?
Katak kilen jum̦ae l̦õmn̦ak ko rettoon. Kõjo̦e PIJAIN ALWÕJ eo.
Jesus ear kõjerbale juon waanjoñak ñan kwal̦o̦k bwe jej aikuj em̦m̦akũt ilo m̦õkaj ñan kõjparok wõt ad erreo. Riit Matu 5:29, 30, innem bwebwenato kake kajjitõk in:
-
Ejjab mel̦el̦ein bwe Jesus ekõn̦aan bwe jen ko̦kkure ãnbwinnid, ak ear kwal̦o̦k bwe jej aikuj in em̦m̦akũt. Ta ko juon ej aikuj em̦m̦akũt im kõm̦m̦ani bwe en maroñ jum̦ae l̦õmn̦ak ko rettoon? b
El̦aññe kwõj kate eok tarin̦aeik l̦õmn̦ak ko rettoon, Jeova ej kaorõk kate ko am̦. Riit Sam 103:13, 14, innem bwebwenato kake kajjitõk in:
-
El̦aññe kwõj kate wõt eok ñan jol̦o̦ke juon imminene ettoon, ewi wãween an eoon in rõjañ eok ñan wõnm̦aanl̦o̦k wõt im tarin̦aeiki imminene in?
Kwõn jab ebbweer!
Emaroñ pidodo ñan bõk l̦õmn̦ak eo im ba: ‘Iar buñ ak l̦orak ilo m̦õjn̦o̦ eo aõ, bõlen em̦m̦anl̦o̦k in bõjrak jãn aõ kate eõ.’ Bõtab l̦õmn̦ak kõn men in: Meñe juon ri-ettõr ej tũbbo̦k im okjak, ejjab mel̦el̦ein bwe ear luuji iãekwõj eo, im ejjab mel̦el̦ein bwe ej aikuj jino jãn jinoin. Ejja ãindeinl̦o̦k wõt, meñe kwõmaroñ bar buñ ak l̦orak ilo m̦õjn̦o̦ eo am̦ ak ejjab mel̦el̦ein bwe kwaar luuji tarin̦ae eo am̦ n̦ae imminene in enana. Im ejjab kajejtokjãn aolep tõprak im wõnm̦aanl̦o̦k ko em̦õj am̦ kõm̦m̦ani. Am̦ buñ im l̦orak ilo m̦õjn̦o̦ eo am̦ ej m̦õttan men ko jej iiooni ñe jej kajjioñ anjo̦ ioon juon men. Jab ebbweer! Ikijjeen jipañ eo jãn Jeova kwõmaroñ anjo̦ ioon imminene eo ettoon.
JET ARMEJ REJ BA: “El̦ap wõt aõ kõn̦aan kõm̦m̦ane imminene in. Iñak bõjrak.”
-
Eoon ta eo kwõmaroñ kõjerbale ñan kwal̦o̦k ñan armej eo bwe ikijjeen jipañ eo an Jeova emaroñ bõjrak jãn imminene eo enana?
TARLEP IN KATAK EO ILO TUKADU
Jej kabuñbũruon Jeova ilo ad kõm̦m̦an bwe ãnbwinnid, l̦õmn̦ak ko ad, im kõm̦m̦an ko ad ren erreo.
Ãlij
-
Etke elukkuun aorõk bwe jen erreo?
-
Ewi wãween kwõmaroñ erreo ilo ãnbwin im men ko m̦weiõm̦?
-
Ewi wãween kwõmaroñ kõm̦m̦an bwe l̦õmn̦ak im kõm̦m̦an ko am̦ ren erreo?
KAL̦APL̦O̦K AM̦ MEL̦EL̦E
Ta men ko repidodo kwõmaroñ kõm̦m̦ani bwe kwõn erreo meñe ejjab lukkuun lõñ men ko ippam̦?
Lale buñtõn ne ta ko kwõmaroñ kõm̦m̦ani bwe kwõn bõjrak jãn am̦ kõbaatat.
Lale ta ko rej wal̦o̦k itok jãn an juon alwõje pijain keelwaan ko.
“Pija Nana Ko—Rekauwõtata Ke?” (Naan in Keeañ, O̦kwõj 1, 2013)
Lale ewi wãween an juon em̦m̦aan kar bõk anjo̦ im bõjrak jãn an alwõje pijain keelwaan ko.
a Katak eo etan “How to Quit Smoking” ium̦win m̦õttan eo Kal̦apl̦o̦k Am̦ Mel̦el̦e ilo katak in, ej kõmel̦el̦eik buñtõn ne ko kwõmaroñ kõm̦m̦ani ñan anjo̦ ioon imminene ko renana.
b Ñan bõk jipañ ñan anjo̦ ioon m̦anit eo kõn iukkure kõn m̦õttan ko ilo ãnbwinnũm̦, lale “How Can I Conquer the Habit of Masturbation?” ilo bok eo etan Questions Young People Ask—Answers That Work, Volume 1, chapter 25.
