Luki kaiks yapti kum ba ai tuktika ra ridi daukisa skul ra waia dukiara. Yaptika ba want sa ai tuktika ba aihtaban kabia, ai kwalka klin bara pain diman kabia. Baha ba tuktika ra yamni munisa siknis takbia apia dukiara, baku sin upla wala mawanra marikisa ai yaptika bara ai aisika ba tuktika ra main kaiki ba. Sim baku Jehova wan Aisika latwankira ba want sa yawan klin kabia, wan wîna tara bara wan iwanka tânka ra, wan lukanka ba, wan turi aisanka bara wan daukanka ba sin. Yawan klin lâka ra iwaia ba yamni wan munisa, bara Gâd ra kulkanka yabisa.

1. ¿Wan wîna tara bara wan dukia nani ba yawan nahki sip sa klin briaia?

Jehova wan wisa: “Man nani holikira bas” (1 Pita 1:16). Holi uplika kaia tânka sa wan lukanka, wan turi aisanka, wan daukanka bara wan wîna tara ba sin klin briaia. Upla klin kaia dukiara yawan nit sa aihtabaia yu bani, wan kwalka ba klin briaia, wan watla bara wan trukka ba sin tâski âpu kaia sa, bara wan dukia nani ba ai pliska kat mangki swiaia sa. Baku sin, Asla Aidrubanka Watla ba yawan klin munisa. Yawan upla klin sa piua ra, Jehova ra mayunra lâka ba yabisa (2 Korint 6:3, 4).

2. ¿Upla klin kaia dukiara yawan dîa daukaia apia sa?

Baibil ba wan wisa “wan wîna bara wan spiritka sut ba tâski âpu klin bri” kaia sa (2 Korint 7:1). Baha mita diara sut wan wîna tara bara wan sinska sauhki ba yawan daukaia apia sa. Yawan want sa wan lukanka nani ba Jehova yamni kaikbia, baha mita lukanka tâski nani ba lulki swiaia sa (Lawana Nani 104:34). Baku sin yawan trai munisa turi tâski bara kas aisaia apia (Kolosi 3:8 aisi kaikma).

¿Dîa dukia nani ba sip sa wan wîna tara, wan lukanka, wan aisanka bara wan daukanka nani ba tâski daukaia? Diara kum kum bâra sa wan wîna ra tâski muni ba. Baha mita yawan twaku diras, druga aubras, koka dusa wahia ba samras, bara nuez de betel ba sin apia. Baku sin, daktar mita wan wiras kaka lilia kaia wisi yawan sîka yus munras. Baku daukbia kaka, wan wîna tara main kaikisa, bara wan rayaka ba sin yawan kulkisa. Baku sin, masturbación (upla ai wîna sirpika wal mihta pulaia) ba daukaia apia sa, bara pornografía (rug lâka lilkika nani ba) sin yawan kaikaia apia sa klin bara sunu kaia dukiara (Lawana Nani 119:37; Epesus 5:5). Baha daukanka saura lulki swiaia ban kra isi apia sa, ban sakuna Jehova sip sa hilp wan munaia baha pura luaia (Aiseya 41:13 aisi kaikma).

 KAU LAN TAKS

3. Yawan klin sa taim, Jehova ra prana yabaia sip sa

Jehova lâ nani Israel uplika nani ra yaban ba yawan aisi kaikisa taim, klin lâka smalkanka nani ba yawan tânka brisa. Impakan Sturka 19:10 bara 30:17-19 aisi kaikma, bara naha dukiara aisi banhma:

• ¿Naha borska nani na nahki wan marikisa klin lâka dukiara Jehova lukanka ba?

• ¿Dîa ba hilp mai munaia sip sa piua bani klin kaia?

Yawan klin kaia ba isi apia sa, karna trai munaia sa bara wan taimka sakaia nit sa. Ban sakuna upla umpira, apia kaka lalahkira kabia sin yawan sut sip sa klin kaia, ani anira iwbia sin. LILKA ba kaikma, bara naha dukiara aisi banhma:

• Yawan upla nani ra smalkisa piua ra wan dukia nani klin brisa kaka, ¿nahki witin nani ba kau rispik munbia Jehova warkka ba?

4. Diara saura daukisma ba lulki swis

Man ba druga aubisma, apia kaka sigarit disma kaka nu sma kaia sa baha daukanka saura swiaia ba isi apia sa. Diara kum hilp mai munaia sip sa, kupiam ra luks saura daukisma ba nahki mai sauhki ba. Matiu 22:37-39 aisi kaikma, bara aisi banhma nahki twaku bara druga yus munaia ba wan sauhkaia sip sa . . .

• yawan Jehova wal pâna lâka bri ba.

• wan pamali uplika nani ra bara upla wala nani ra sin.

Laki kaiks man nahki sip sma baha daukanka saura lulki swiaia. a LILKA ba kaikma.

Pilipai 4:13 aisi kaikma, bara naha dukiara aisi banhma:

• ¿Yu bani wan pura sunaia, Baibil stadi munaia bara asla aidrubanka ra dimaia ba hilp wan munaia sip sa daukanka tâski kum swiaia?

 5. Daukanka saura bara lukanka tâski mapara aiklabi bas

Kolosi 3:5 aisi kaikma, bara naha dukiara aisi banhma:

• ¿Yawan nahki nu sa pornografía, sexteo b bara masturbación daukanka ba Jehova mapara diara tâski bara saura sa?

• ¿Yawan diara sut mapara klin kaia Jehova wan makabi ba, daukaia sip sa lukisma? ¿Dîa muni?

Laki kaiks nahki sip sma lukanka tâski nani mapara aiklabaia. LILKA ba kaikma.

Jisas ba maprika lilka kum aisi tânka marikan yawan dîa daukaia nit sa sunu kaia dukiara. Matiu 5:29, 30 aisi kaikma, bara naha dukiara aisi banhma:

• Jisas tânka wiras kan wan wîna tara ba insauhkaia, kau ni witin win yawan diara daukaia nit sa wan rayaka sunu briaia dukiara. ¿Lukanka tâski nani ba lulki swiaia wisi yawan dîa daukaia nit sa? c

Lukanka tâski mapara man aiklabisma kaka, Jehova tara kulkisa nahki trai munisma ba. Lawana Nani 103:13, 14 aisi kaikma, bara naha dukiara aisi banhma:

• Daukanka saura kum mapara aiklabisma kaka, ¿man lukisma naha borska nani na hilp mai munaia sip sa baha saura ba pura luaia? ¿Dîa muni?

 DÎA LAN TAKRAM

Wan wîna tara, wan lukanka bara wan daukanka nani ba yawan klin brisa piua ra Jehova yamni wan kaikisa.

Wan kupia krawaia

• ¿Dîa muni tânka tara sa yawan klin kaia ba?

• ¿Wan wîna aiska klin kabia dukiara yawan dîa daukaia nit sa?

• ¿Yawan piua bani wan daukanka nani bara dîa luki ba nahki klin briaia sip sa?