Mams-y y yamẽ wa pag sẽn na n maneg a biig sõma, t’a na n kẽng lekolle. A maneg n soo biigã koom, n yelg-a fut sẽn yaa sõma la yɩlma. Woto na n sõngame tɩ biigã tar yĩns laafɩ, tɩ nebã me neẽ t’a roagdbã geta a yell sõma. Tõnd Ba a Zeova sẽn nong tõndã me ratame tɩ d modg tɩ d yĩngã la d teedã fãa yaa yɩlma, la d modg me n yɩ yɩlem d yel-manesmã la d tagsa wã pʋgẽ. D sã n yaa yɩlma, nafda tõndo, la kɩtdẽ me t’a Zeova yʋʋrã paamd waoogre.

1. Yɩ yɩlemd rat n yeelame tɩ bõe?

A Zeova yeta tõnd yaa: “Yãmb segd n yɩɩ sõamyã.” (1 Pɩyɛɛr 1:16) Yɩ sõamyã rat n yeelame tɩ d segd n modgdame n yɩ yɩlem d yel-manesmã la d tagsa wã pʋgẽ, la d modg me tɩ d yĩnsã la d teedã fãa yaa yɩlma. D segd n sooda koom wakat fãa, la d modgdẽ tɩ d futã, d zakã, la d bõn-zombdsã yaa yɩlma. Sẽn paase, d tõe n sõngd n yẽesda d Rĩungã roogo. D sã n kell n modg tɩ d yĩnsã, la d teedã fãa yaa yɩlma, kɩtdame t’a Zeova yʋʋrã paamd waoogre.​—2 Korẽnt rãmbã 6:3, 4.

2. Sẽn na yɩl n yɩ yɩlma, d segd n zãaga d mens ne minim-bʋse?

Biiblã pʋgẽ, b sagenda tõnd tɩ d “yɩlg d mens n yiis rẽgd buud fãa sẽn yaa yĩngã rẽnd la sɩɩgã rẽnda.” (2 Korẽnt rãmbã 7:1) Woto rat n yeelame tɩ d segd n modgame n zãag d meng ne bũmb nins fãa sẽn na n sãam d yĩngã, wall n kɩt tɩ d wa tar tags-yoodo. D tagsa wã segd n tata a Zeova yam. Rẽ n so tɩ d maand d sẽn tõe fãa n zãagd d mens ne tags-yoodo. (Yɩɩn-sõamyã 104:34) D leb n modgda sẽn na yɩl tɩ d no-goamã yɩ sõma.​—Karm-y Kolos rãmb 3:8.

Bõe me n tõe n wa kɩt tɩ d pa kell n yɩ yɩlma? Bũmb kẽer n tõe n sãam d yĩnsã. Rẽ n so tɩ d zãagd d mens ne bõn-kãense, wala makre, sɩgaarã, tabã, la dorgã. D sã n zãagd d mens ne bõn-kãensã, d paamda yĩns keelem sõma, d wilgdame me tɩ d nanda vɩɩmã sẽn yaa Wẽnnaam kũunã. Sẽn paase, yɩ yɩlemd d yel-manesmã la d tagsa wã pʋgẽ wã baoodame tɩ d zãagd d meng ne raoolmã bɩ poglmã salengo, la yoobã yɛl gesg sẽn yaa tʋʋm-dẽgdã. (Yɩɩn-sõamyã 119:37; Efɛɛz rãmbã 5:5) Tõe n yɩɩ toog tɩ d tõog n bas minim-wẽns a woto, la a Zeova tõe n sõng-d lame tɩ d tõoge.​—Karm-y Ezayi 41:13.

 D BAO N BÃNG N PAASE

3. D yĩnsã la d teedã sã n yaa yɩlma, kɩtdame t’a Zeova paamd waoogre

D sã n karem noy nins a Zeova sẽn kõ pĩnd wẽndẽ Israyɛll nebã, d bãngda a tagsg sẽn yaa a soab yɩlemdã wɛɛngẽ. Karm-y Yikr 19:10 la 30:17-19, tɩ rẽ poor bɩ y leok sogsgã:

• Bõe la vɛrse-kãensã wilgd tõndo, a Zeova tagsg sẽn yaa a soab d yĩnsã la d teedã yɩlemdã wɛɛngẽ wã?

• Minim-sõma-bʋs n na n sõng-y tɩ y kell n modg tɩ y yĩngã la y teedã yaa yɩlem wakat fãa?

Modg tɩ d yĩngã la d teedã yɩ yɩlmã rɩkda sẽka, la baood modgr me. La d fãa tõe n maana rẽ, tɩ pa be ne d sẽn vɩẽ wã, pa rẽ bɩ d sã n yaa ra-kãagr bɩ naong soab ye. Ges-y VIDEO wã, tɩ rẽ poor bɩ y leok sokrã.

• D teedã sã n yaa yɩlma, bõe yĩng tɩ na n kɩt tɩ neb nins d sẽn taasd koɛɛgã maneg n waoog a Zeova?

4. Bas-y y minim-wẽnsã

Yãmb sã n yũuda sɩgaar bɩ dorge, tõe tɩ y mii rẽ basg sẽn yaa toog to-to wã. Bõe n tõe n sõng-yã? D gom minim-wẽngã sẽn wat ne zu-loees ninsã yelle. Karm-y Matiye 22:37-39, tɩ rẽ poor bɩ y leok sokrã. Ned sã n yũud sɩgaar bɩ dorge, pa rẽ bɩ n dɩt taba, wãn to la rẽ tõe n wa ne yelle, . . .

• yẽ ne a Zeova zoodã zugu?

• a zakã rãmba, la neb a taabã zugu?

Yãk-y y sẽn na n maane, n tõog n bas minim-wẽnga. a Ges-y VIDEO wã.

Karm-y Filip rãmb 4:13, tɩ rẽ poor bɩ y leok sokrã:

• Wãn to la pʋʋsgã, Biiblã zãmsgã, la tigissã kẽndã tõe n sõng ned t’a paam pãnga, n tõog n bas minim-wẽnga?

 5. Modg-y n bas-y tags-yood la tʋʋm-yoodo

Karm-y Kolos rãmb 3:5, tɩ rẽ poor bɩ y leok sogsgã:

• Bõe n kɩt tɩ d miẽ tɩ pornogarfi wã gesgo, tool mesaaz bɩ fot-rãmb wall video-rãmb sẽn nekd pag ne rao lageng tʋlsmã, la raoolmã bɩ poglmã saleng yaa rẽgd a Zeova nifẽ?

• Yãmb tagsdame t’a Zeova sẽn dat tɩ d yɩ yɩlem d yel-manesmã la d tagsa wã pʋgẽ wã zemsame bɩ? Bõe yĩnga?

D ges y sẽn tõe n maan to-to n tõog n bas tags-yoodo. Ges-y VIDEO wã.

A Zeezi rɩka makre, n wilg d sẽn segd n maanega, n tõog n kell n yɩ yɩlemd d yel-manesmã, la d tagsa wã pʋgẽ. Karm-y Matiye 5:29, 30, tɩ rẽ poor bɩ y leok sokrã:

• Baa ne a Zeezi goamã sẽn pa rat n yeel tɩ d segd n pogla d yĩngã, wilgdame tɩ bũmb la d segd n maane. Wala makre, bõe la ned tõe n maan tao-tao, n zãag a meng ne tags-yoodo? b

Y sã n maoodame n na n bas tags-yoodo, bɩ y bãng t’a Zeova nanda y modgrã. Karm-y Yɩɩn-sõamyã 103:13, 14, tɩ rẽ poor bɩ y leok sokrã:

• Y sã n maoodame n na n bas minim-wẽnga, wãn to la vɛrse-kãensã kengd yãmb daood sẽn na yɩl tɩ y ket n modgdẽ?

 KƲMSGO

D sã n kell n modg tɩ d yĩngã, d tagsa wã, la d yel-manesmã yaa yɩlma, d tata a Zeova yam.

Lebg-n-gese

• Bõe yĩng tɩ tar yõod wʋsg tɩ d yɩ yɩlem a Zeova nifẽ?

• Wãn to la y tõe n modg tɩ y yĩngã la y teedã yaa yɩlma?

• Wãn to la y tõe n maan n kell n yɩ yɩlemd y yel-manesmã la y tagsa wã pʋgẽ?