ISAMBILILO 40
Vino Tungawa Awasanguluke mu Minso ya kwe Leza
Yelenganya pa mukwasi wacanaci uwalukundo wino akawikako sana amano pano akupekanizizya umwana wakwe ivyakulya. Akasinincizya ukuti vyonsinye vikuloleka ivya wusaka, ivya kulya, imbale, impoto, na pano wakulilanye. Ukucita wo-o kukalenga umwana wakwe ukuwa nu wumi uwuzima. Ica kuti na wanji wakalola ukuti awakwasi wakwe wakamusayila. Ne Yehova nye, Umukwasi witu uwa lukundo, akalonda twawa nu wusaka mwe vyonsinye. Co-o cisanzizyemo imiwele yitu na vyo tukayisakamala. Nga tuli nu wusaka, ivintu vikatuzipila swinya tukacindika ne Yehova.
1. Uzye tungawa wuli swe wasanguluke lwa ku muwili?
E Yehova akatunena ukuti: “mule muwe mwewatele.” (1 Peter 1:16) Pa kuti tuwe swe watele, tuzipizile ukuwa awasanguluke mu miwele yitu na vino tukasunga imiwili yitu. Tungawa swe wasanguluke lwa kumuwili nga tukusamba lyonsinye, tukucapa ivizwalo, tukuzifya pa ma ng’anda yitu na wa motoka witu. Cinji acakuti tuzipizile twazifyako na pa Ng’anda ya Wufumu. Nga tuli nu wusaka lyonsinye tukacindika Yehova.—2 Wakorinte 6:3, 4.
2. Amisango ci yino tutazipizile ukuwa nayo nga tukulonda ukuwa awasanguluke?
E Baibolo ikatunena ukuti “tuyiswefye kwe vyonsi vino vikakombezya umuwili nu muzimu.” (2 Wakorinte 7:1) Acino tusicita icili consinye cino cingonona umuwili nanti amelenganyo yitu. Vino tukakwelenganya vizipizile vyasecelesya Yehova. Fwandi tukawombesya na maka ukukana amelenganyo mawipe. (Amalumbo 19:14) Swinya tusiwomvya amazwi amakombele lelo tukawomvya amazwi amazima.—Wazya Wakolose 3:8.
Avyani vinji vino vingalenga tuwe swe wakombele? Ivintu vimwi vingakombezya imiwili yitu. Awuli umulandu wuno tusipepela fwaka, ukufwenela fwaka nanti ukumwa imilembo ku musamwe. Nga tusakucita vyo-o tukawa nu wumi uwuzima swinya tukalanjizya nu kuti twawucindika. Cinji aca kuti tukafuntuka ku vintu ndi vino ukucuuka (ukuyilema lema ku wonsi nanti ku wanaci) nu kutamba ivya misiku. (Amalumbo 119:37; Waefeso 5:5) Kweni citapepuka ukuleka yo-o imisango, lelo e Yehova weni angatwavwa swinya tungavileka.—Wazya Ayizeya 41:13.
SAMBILILA IVICILE PA-A
Sambilila vino tungacindika e Yehova nga twawa swe wasanguluke, lola na vino ungacimvya imisango miwipe.
3. Ukuwa nu wusaka kukacindika Yehova
Nga twawazya amasundo yano Yehova wapile awina Israeli, tukalola vino akalola uwusaka. Wazyani Ukufuma 19:10, ne 30:17-19 nu kulanzyanya ya-a amawuzyo:
-
Avyani vino ya-a amawaliko yakatwavwa ukumanya pe vino Yehova akalola uwusaka?
-
Avyani vino ungacita cila wanda pa kuti utwalilile ukuwa nu wusaka?
Cikapinda impindi nu kuwombesya pa kutwalilila ukuwa nu wusaka. Lelo swensinye tungawa swe wasaka asa mulandu na kuno twikala na vyo twawa, nampo nga swe wapina nanti swe wakankala.Tambani e VIDYO, nu kulanzyanya lyo-o iwuzyo.
-
Amulandu ci wuno awantu wano tukawizizya wakacindicila sana Yehova nga walola vyonsinye vyo twakwata vikuloleka ivya wusaka?
4. Uzipizile ukulecelela imisango miwipe
Kusi cimwi cino Yehova angapotwa ukutwavwa ukuleka
Nga cakuti ukapepa fwaka nanti ukawomvya imilembo yino walesya, ufwile wamanya vino catala pakuleka. Nomba acani cino cingakwavwa? Cino cingakwavwa akwelenganya vino ukucita wo-o kukakuma uwumi wako. Wazyani Mateyu 22:37-39, nga mulanzyanye vino wino akapepa fwaka nanti akawomvya imiti yino walesya kukakuma . . .
-
wuciwuza wakwe ne Yehova.
-
walupwa lwakwe na wantu wanji.
Tantika vino wandi ucite pa kuleka cino cakuteka uwuzya. a Tambani e VIDYO.
Wazyani 2 Wakorinte 4:7, nu kulanzyanya lyo-o iwuzyo:
-
Uzye ukuwazya Baibolo cila wanda, ipepo nu kuzanwa mukulongana kungavwa wuli wumwi ukuleka imisango imiwipe?
5. Uwalwisya amelenganyo ni misango miwipe
Wazyani Wakolose 3:5, nu kulanzyanya ya-a amawuzyo:
-
Twamanya wuli ukuti ukutamba nanti ukutumizyanya ivya misiku nu kuyilema lema ku wonsi nanti ku wanaci pa kumala inyengwa kwawipa mu minso ya kwe Yehova?
-
Uzye ukwelenganya ukuti tungakumanisya ukuwa ni miwele mizima ndi vino Yehova akalonda tuwe? Amulandu ci?
Lola vino ungacita pa kulwisya amelenganyo mawipe. Tambani e VIDYO.
E Yesu wawomvizye icilanjililo pakutwavwa ukumanya ukuti tuzipizile ukutwalilila ukucita vino vikalondekwa pa kuti tutwalilile awasanguluke. Wazyani Mateyu 5:29, 30, nu kulanzyanya lyo-o iwuzyo:
-
E Yesu walozyanga mukuti tufwile ukucitapo cimwi, atalandanga pa kuyicisa. Avyani vino wumwi angacita pakuti atakwelenganya pa viwipe? b
Nga cakuti ukalwisya amelenganyo mawipe, uwakwizuka ukuti e Yehova akasalifya nkaninye pe vino ukakwelezya na maka. Wazyani Amalumbo 103:13, 14, nu kulanzyanya lyo-o iwuzyo:
-
Uzye lyo-o iwaliko lingakwavwa wuli ukutwalilila ukulwisya nga cakuti kuli imisango yimwi yino ukalonda ukuleka?
Utanenuka!
Cingapepuka ukutalika ukwelenganya ukuti, ‘Napotwa kandeke vye.’ Nomba teyelenganya pe co-o: Wino akusamala nga wapona, cisisula ukuti lyo casila walala waluza, nanti ukuti azipizile ukunyocela kuno tetalicizile pakuti atalike ukusamala na swinya. Wonye avino cawa na kwe wino akulwisya ici musango iciwipe, nga wanyocezyapo lyo cisakusula ukuti atalitela acimvye. Swinya cisisula nu kuti lyo ukuwombesya kwakwe konsinye kwinjila vye mu minzi. Uwakwizuka ukuti ivya musango wo-o vingacitika. Acino utanenuka! Amuno e Yehova angakwavwa ukucimvya icimusango ciwipe.
WAMWI WAKATI: “Napotwa ukuleka.”
-
Aliwaliko ci lino ungawomvya pa kumwavwa ukumanya ukuti e Yehova angamwavwa ukuleka icimusango ciwipe?
IVISINKA VIKULU
Tukasecelesya nkaninye Yehova nga tukusunga imiwili, amelenganyo ni miwele yitu uwusaka.
Avyani Vino Wasambilila?
-
Amulandu ci wuno cacindamila ukuwa nu wusaka?
-
Ungayisunga wuli uwawusaka?
-
Ungatwalilila wuli ukuwa uwa wusaka mu miwele na mu melenganyo?
MANYILAPO NA VINJI
Avintu ci ivipepuke vino uwili wensinye angacita pa kuyisunga uwa wusaka asa mulandu na vino wikala?
Lola vimwi vino ungacita pa kuleka ukupepa fwaka.
“Vino Ungaleka Ukupepa Fwaka” (Loleni!, May 2010)
Lola vino vikafumamo mukutamba ivya misiku.
“Uzye Ukutamba Ivya Misiku Kwawa Icetenye Nanti Kwawipa?” (Ulupungu lwa kwa Kalinda, August 1, 2013)
Lola vino umonsi wumwi wacisile pa kuleka ukutamba ivya misiku.
“Cansyufile pa Kuleka” (Ulupungu lwa kwa Kalinda Na. 4 2016)
a Icipande cakuti “Vino Ungacita pa Kuleka Ukupepa Fwaka” cino cili pano pakuti Manyilapo na Vinji cikulondolola vino wumwi angacita pakuleka vino vyamuteka uwuzya.
b Pakumanya vino ungacita pakuleka icimusango cakuyilema lema ku wonsi nanti ku wanaci, lola pano patili “Ningacita Wuli nga Nkulonda Ukuleka Ukuyilema Lema ku Wonsi Nanti ku Wanaci?” (Mwi buku lya mu Ciwemba ilya kuti Amawuzyo Yano Awacitici Wakawuzya—Ivyasuko Vino Vingawavwa, Ibuku 1, icipandwa 25.)
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
