CIJIJO 40
Tingaitisa Kudini Kuti Tive Vakacena Pameso pa Mwari?
Rangariranyi ndi mai vari kunasirira mwana wavo kuti aende kushikora. Ivona vanoda kuvona mwana wavo kuti wapera kugeza, nguvo jake jakacena no kurongeka. Izvi zvakanaka ku uhomi hwo mwana no kukhombija kuti iyena ano vabari vanomutaja ushoni. Inga vabari vanoda kuti vana vavo vave vakacena, Jehovha, Baba wedu, vanodavo kuti tive vakacena munjira yo kunyama, mu murangariro, mu mavereketero no zviito. Kuva takacena kunobeserazve itusu nokupa rukujo Jehovha.
1. Tingaitisa kudini kuti tive vakacena kudivi ro kunyama?
Jehovha anotivhunja kuti: “Ivanyi vakacena.” (1 Pedhru 1:16) Kuti tive vakacena, tinodikana kuva vakacena mu murangariro, mu mavereketero, zviito no kunyama. Tinodikana kuva vakacena kunyama ngo kugeza mukuvo wese, kupaja nguvo jedu, kucenesa pamuzi pedu, kusuka zvifambiso zvedu no kuva vakarongeka. Tingabeserazve pakucenesa Nyumba yedu yo Umambo. Patinova vandhu vakacena mu mativi ese, tinopekeja rukujo Jehovha.—2 Vakorinte 6:3, 4.
2. Zvirovejeso zvapi zvingatiita kuti tive vandhu vacizivi kucena?
Bhaibheri rinotivhunja kuti: “Ngatijicenese pa zviro zvese zvinosvipisa muviri no mujimu.” (2 Vakorinte 7:1) Izvi zvinoda kunanga kuti, tinodikana kuvangisira kuti titame kuita ciri cese cingakhuvaza muviri wedu no murangariro wedu. Tinoda kuti murangariro jedu jidakajise Jehovha. Ndiyo ndava tinoita zvese zvatinokwanisa kuti titame kuva no murangariro jakashata. (Nduyo 104:34) Tinodazve kuti zviro zvatinovereketa zvive zvakacena.—Verenganyi Vakorose 3:8.
Zviro zvapi zvimweni zvingasvipisa muviri wedu no murangariro wedu? Zviro zvimweni zvatingashandisa zvingakhuvaza muviri wedu. Ndiyo ndava kuti atibhemi, nee atishandisi mutombo jinodhakwisa. Ngo kuita zvondhozvo, tinova no uhomi hwaushoni no kukhombija kuti tinoreremeja cipo co upenyu. Tinodikana kuitenyi kuti tive no murangariro jakacena? Tinodikana kuvangisira kuti tinyise zvirovejeso zvakashata, zvakadari inga kuva no cinyamundundu no kuvona zvo umitu-mitu. (Nduyo 119:37; Vaefeso 5:5) Azvizivi kureruka kusiya zvirovejeso zvakashata, asi Jehovha angatibesera kuti tizvisiye.—Verenganyi Isaia 41:13.
NASANYI KUPSAKISISA
Vonanyi kuti tingakujisa kudini Jehovha patinova vakacena. Vonanyizve kuti tingasiisa kudini zvirovejeso zvicizivi kucena.
3. Kuva takacena kunyama zvingakuja Jehovha
Patinoverenga mutemo wa Jehovha waakapa Vaiziraeri, tinovona kuti zvinosisira maningi kwaari kuti vandhu vake vave vakacena. Verenganyi Exodo 19:10 na 30:17-19, perapo bhuisananyi ngo muvhunjo jinotevera:
-
Mavhesi aya anokhombijisa kudini mavonero a Jehovha ngo pamusoro po kuva vakacena kunyama?
-
Zvirovejeso zvapi zvingatibesera kuti tive vakacena kunyama?
Zvinotora nguva no simba kuti tive vakacena kudivi ro kunyama. Asi tingakwanisa kuita izvonazvo azvinenyi kuti takakhupuka kana kuti tiri varombo. Rijanyi VHIDHIYO, perapo bhuisananyi ngo muvhunjo unotevera.
-
Ngenyi kusiya zviro zvedu zvakacena zvingapekeja rukujo Jehovha mubasa rokucumaera?
4. Siyanyi zvirovejeso zvicizivi kucena
Jehovha angatibesera kunyisa mukhaindi wese wo zvirovejeso zvakashata
Kudari imwimwi mecibhema kana kushandisa mutombo jinodhakwisa, munozviziva kuti zvinonesa maningi kusiya zvirovejeso zvondhozvo. Ngozvapi zvingabesera? Rangariranyi ngo manera amunokhuvazwa ngo zvirovejeso izvi. Verenganyi Mateu 22:37-39, perapo bhuisananyi ngo muvhunjo jinotevera. Kubhema no kushandisa mutombo jinodhakwisa kungakhuvaza kudini . . .
-
ushamwari hwo mundhu na Jehovha.
-
mbhuri yo mundhu wondhowo no vamweni vaanogara navo.
Ivanyi no urongwa wokuti mungasiisa kudini cirovejeso cakashata. a Rijanyi VHIDHIYO.
Verenganyi Vafiripi 4:13, perapo bhuisananyi ngo muvhunjo unotevera:
-
Kuitisa kudini kuita cirovejeso cokuita mukumbiro, kujija Bhaibheri no kwenda kumusongano kungapekeja mundhu simba rokuti asiye zvirovejeso zvakashata?
5. Hwisananyi no murangariro no zvirovejeso zvakashata
Verenganyi Vakorose 3:5, perapo bhuisananyi ngo muvhunjo jinotevera:
-
Tinozvizivisa kudini kuti kuvona zvoumitu-mitu, kutumira mensajhi jinopseruja no cinyamundundu azvizivi kucena kuna Jehovha?
-
Imwimwi munorangarira kuti zvinokwanisika kuva vakacena inga zvinoda Jehovha? Ngenyi muri kunanga kudaro?
Vonanyi kuti mungaitisa kudini kuti muhwisane no murangariro jicizivi kucena. Rijanyi VHIDHIYO.
Jesu wakashandisa muezaniso waikhombija kuti tinodikana kuvangisira kuti tive takacena mu murangariro, mavereketero no zviito. Verenganyi Mateu 5:29, 30, perapo bhuisananyi ngo muvhunjo unotevera:
-
Jesu aazivi kuda kunanga kuti tinodikana kuzvikhuvaza, asi tinodikana kuita zviri zvese. Izviro zvo mushovonyi mundhu zvaangaita kuti atame kuva no murangariro icizivi kucena? b
Kudari mecihwisa kuti musiye murangariro icizivi kucena, Jehovha anoreremeja kuvangisira kwenyu. Verenganyi Nduyo 103:13, 14, perapo bhuisananyi ngo muvhunjo unotevera:
-
Kudari imwimwi meciwanana no zvineso kuti musiye cirovejeso cicizivi kucena, mavhesi aya angamuvangisa kudini kuti muenderere mberi mecihwa?
Mucadoremba!
Kudari mundhu akaita cishaishi, zvakareruka kwaari kurangarira kudari: ‘Inini ndiri mundhu acikasisiri. Zviri nane hazvo kutogara ndakadari.’ Amborangariranyi izvi basi: Mugogomi paanokhugunyika owa, izvo azvirevi kuti iyena waruza kugogoma kwake kana kuti anodikanazve kootanga ngapsa. Munjira yakaezana, kumbowa kwenyu, akurevi kuti imwimwi amuzokwanisi kusiya zvirovejeso zvakashata, nee azvirevi kuti imwimwi amuzokwanisi kuita zvakanaka. Cimweni azvinangi kuti zvamakamboitaya sure azvicashandi. Kumbowa kwenyu kunokhombija kuti muri kutohwisa. Mucadoremba! Ngo besero ra Jehovha, munozokwanisa kusiya zvirovejeso zvakashata.
VANDHU VAMWENI VANOTI: “Inini ndatoroveja. Andicakwanisi kuzvisiya izvi.”
-
Ibhuku rapi ro mu Bhaibheri ramaizoshandisa kuitira kukhombija kuti ngo besero ra Jehovha zvinokwanisika kusiya zvirovejeso zvakashata?
ZVOTAJIJA
Kudari tikagara muviri wedu wakacena, murangariro wedu no mufambiro wedu wakacena, tinodakajisa Jehovha.
Kuhwirijira
-
Ngenyi zvinosisira maningi kuva takacena mu mativi ese?
-
Tingaitisa kudini kuti tive takacena mu divi ro kunyama?
-
Mungaitisa kudini kuti muve makacena mu murangariro no mufambiro?
ZIVANYI ZVIMWENI
Ngozvapi zviro zvamungaita kuti murambe makacena pikija muno mare shoma?
Vonanyi mazano amungashandisa kuti musiye kubhema.
“Zvaungaita Kuti Urege Kusvuta” (Mukai!, Julho wo 2010, Cishona)
Vonanyi kuti kuvona zviro zvoumitu-mitu zvinomukhuvazisa kudini.
“Zvinonyadzisira —Hazvikuvadzi Here?” (Murindiri, No. 1 wa Agosto wo 2013, Cishona)
Vonanyi kuti mwanarume umweni wakasiisa kudini cirovejeso cakashata cokuvona zvoumitu-mitu.
“Kuti ndizokunda, ndakatombokundikana kakawanda” (Murindiri, No. 4 wo 2016, Cishona)
a Kuti muwane mazano anoshanda kuti musiye cirovejeso, verenganyi pa divi rinoti Zivanyi Zvimweni, pamusoro unoti “Zvaungaita Kuti Urege Kusvuta.”
b Kuti muvone manera amungaita kuti musiye cirovejeso co cinyamundundu, vonanyi pamusoro unoti “Ndingakurira Sei Tsika Yokuita Bonhora?” mubhuku rinozwi Mibvunzo Inobvunza Vechiduku—Mhinduro Dzinoshanda, Bhuku 1, cipauko 25.
