WANGƆ 40
Se mɛ e du vuruni ka lɛ Nzapa
Ngoi mɛ ta nyingambi ndo lɛkɛ nyi lo ya lo gwe kalasi, lo ndo kpo lo wa lo ndo yu nga lo na bɔngɔ mɛ vuruni. Lo hĩnga ya ni lengbi ti batangɔ sãte tɛ lo. Se nyingambi du vuruni ko, ni fa ya awa dungɔ lo ndo bata lo nzɔ̃ni. Kwɛ kɔi Yehova mɛ to e ti songo ndo ye ya e du vuruni na tɛrɛ e nga na bingangɔ li tɛ e. Se e du vuruni ko, na zangɔ e na ya lo gba wa ni nga na hɛ̃ngɔ Yehova gonda.
1. E du vuruni na tɛrɛ e ngasia?
Yehova tɛnɛ hɛ̃ e ya: “Ale [e] du asanto.” (1 Pɛtro 1:16) Ti nɛngɔ ya e du asãto ko, ayɔ ya e du vuruni na tɛrɛ e nga na bingangɔ li tɛ e. Ti nɛngɔ ya e du vuruni ko, ayɔ ya e gbɔ̃ ngu bi zu, bɔngɔ tɛ e, da tɛ e, nga na kamiɔ̃ tɛ e adu vuruni. Elengbi nga ti hɛ̃ngɔ ti e na ya kwa ti batangɔ Da ti bombi ya adu vuruni. Se e du vuruni ko, e na hɛ̃ngɔ Yehova gonda.—2 Kɔrinto 6:3, 4.
2. Aseliye mɛ elengbi ti kɛ̃ngɔ ti nɛngɔ ya e du vuruni nɛ?
Ngbangɔ tɛnɛ ya “E hã ye zu mɛ lengbi ti lingɔ ya e ti na bí na ya mi nga ya nyingɔ e zi.” (2 Kɔrinto 7:1, NWT) Ni fa ya elengbi ti kɛ̃ngɔ ye zu mɛ lengbi ti gbɛ̃ngɔ tɛrɛ e nvɛ̃ni nga na bingangɔ li tɛ e. Ayɔ ya bingangɔ li tɛ e hɛ̃ Yehova dɛngɔ bɛ, ni la elengbi ti lingɔ zu ti nɛngɔ ya e kɛ̃ bingangɔ li ti siɔni. (Nzembo 104:34) Elengbi nga ti lingɔ kpengbani ya e tɛnɛ nzɔ̃ tɛnɛ.—Di Kɔlɔsɛ 3:8.
Ye mɛndɛ̃ mɛ lengbi ti lingɔ ya ta e du vuruni na tɛrɛ e nga na bingangɔ li tɛ e ma nɛ? Aye mɛndɛ̃ lengbi ti gbɛ̃ngɔ sãte tɛ e. Ni la e kɛ̃ nyɔngɔ manga na adrɔgɛ. Zo ko la ta ndo nyɔ manga na drɔgɛ ma ko, lo ndo du na sãte ti nzɔ̃ni wa lo ndo hũ ya dungɔ lɛ ngɛ̃́ du ngbondoni. E ndo li zu ti nɛngɔ ya e bata bingangɔ li tɛ e vuruni na ndenge mɛ e ndo kɛ̃ lɛngɔ wele na tɛrɛ e ti kɔli bere ti wali nga na ndenge mɛ e ndo kɛ̃ bangɔ pɔrnografi. (Nzembo 119:37; Efɛsɛ 5:5) Ta ndo du woni ziangɔ seliye niko ma, kanda Yehova na zangɔ mɔ.—Di Yisaya 41:13.
GI HĨNGANGƆ LO MƐNDƐ̃
Gi hĩngangɔ nda mɛ dungɔ vuruni ndo hɛ̃ Yehova gonda nga na se mɛ mɔ lengbi ti ziangɔ na aseliye ti bí.
3. Dungɔ vuruni ndo hɛ̃ Yehova gonda
Se e di ndia mɛndó Yehova hɛ̃ aya Izraɛlɛ ko, e na hĩngangɔ nda mɛ Yehova ndo ye ya awakwa tɛ lo du vuruni. Di Kobima 19:10 nga na 30:17-19, wa na pɛni hɛ̃ gbinya ti ahũnda olo mɛ:
-
Wangɔ mɛ e lua na ndo avɛrsɛ olo na bangɔ se mɛ Yehova ndo ba na dungɔ vuruni nɛ?
-
Aye mɛ mɔ lengbi ti lingɔ bí zu ti nɛngɔ ya mɔ du vuruni nɛ?
Ando yɔ ngoi nga na ge ge ge ti nɛngɔ ya zo du vuruni. Kanda elengbi ti dungɔ vuruni abɛse du ya e ndo du kawa, e na faranga gba bere e du awa yɛlɛ. Ba VIDEO, wa na pɛni hɛ̃ gbinya ti hũnda olo mɛ.
-
Se e du vuruni, ni lengbi ti lingɔ nɛ ka mbage tɛ azi mɛ e ndo fa tɛnɛ hɛ̃ la nɛ?
4. Zia aliye ti siɔni
Yehova lengbi ti zangɔ e ya e zia aseliye zu ti siɔni
Se du ya mɔ ndo nyɔ manga bere drɔgɛ ko, mɔ lengbi ti hũngɔ ya ta ziangɔ ni du woni ma. Wa ye mɛ lengbi ti zangɔ mɔ nɛ? Gi hĩngangɔ ye mɛ nyɔngɔ manga na drɔgɛ alengbi ti singɔ na ni na ya dungɔ lɛ ngɛ̃́ tɛ mɔ. Di Matie 22:37-39, wa na pɛni kambisa se mɛ nyɔngɔ manga bere drɔgɛ alengbi ti lingɔ . . .
-
na ndo mangbi mɛ zo na ni na Yehova.
-
na ndo mangbi mɛ zo na ni na azi ti ndasewa tɛ lo nga na azi mɛndɛ̃.
Li zu ti nɛngɔ ya mɔ zia aseliye ti siɔni. a Ba VIDEO.
Di Filipɛ 4:13, wa na pɛni hɛ̃ gbinya ti hũnda olo mɛ:
-
Ngasia la lingɔ sambela ngoi zu, mandangɔ Ngbangɔ nga na gwengɔ bombi alengbi ti zangɔ mɔ ti nɛngɔ ya mɔ zia seliye ti siɔni nɛ?
5. Li kpengbani ya mɔ zia dangɔ bɛ nga na liye ti siɔni
Di Kɔlɔsɛ 3:5, wa na pɛni hɛ̃ gbinya ti ahũnda olo mɛ:
-
Nda mɛ elengbi ti tɛnɛngɔ ya bangɔ pɔrnografi, tongɔ mɛsajɛ mɛ ba bombingɔ tɛrɛ tɛ kɔli na wali bere lɛngɔ wele na tɛrɛ ti kɔli bere ti wali adu siɔni ka lɛ Yehova nɛ?
-
Mɔ da bɛ ya Yehova li nzɔ̃ni na ndenge mɛ lo yɔ ge ti e ya e du na bingangɔ li ti vuruni? Na lo nɛ?
Ba se mɛ mɔ lengbi ti lingɔ kpengbani ti nɛngɔ ya mɔ kɛ̃ bingangɔ li ti siɔni. Ba VIDEO.
Yezo hɛ̃ndó ndakisa kɔi mɛ ndo fa ya elengbi ti lingɔ kpengbani ti nɛngɔ ya e du na bingangɔ li ti vuruni. Di Matie 5:29, 30, wa na pɛni hɛ̃ gbinya ti hũnda olo mɛ:
-
Ta Yezo yendó tɛnɛngɔ ya e li tɛrɛ e siɔni ma, kanda lo yendó tɛnɛngɔ ya ayɔ ya e li ye kɔi. Ye mɛ zo li ti nɛngɔ ya lo kɛ̃ dangɔ bɛ ti siɔni nɛ? b
Na ngoi mɛ mɔ ndo li kpengbani ti ziangɔ bingangɔ li ti siɔni ko, hĩnga ya Yehova ndo sepala na ge ge ge tɛ mɔ. Di Nzembo 103:13, 14, wa na pɛni hɛ̃ gbinya ti hũnda olo mɛ:
-
Ngoi mɛ mɔ ndo li kpengbani ti ziangɔ seliye kɔi ti siɔni, ngasia la vɛrsɛ mɛ sa ngunu bɛ mɔ ya ta mɔ nzɛ̃ ma nɛ?
Ta mɔ nzɛ̃ ma!
Ngoi mɛndɛ̃ mɔ lengbi ti tɛnɛngɔ ya, na lo mɛ ya mbi ndo li bo ni ngoi zu ko, ta mbi na kokangɔ ziangɔ ni ma! Kanda ta bɛ mɔ li na lo olo mɛ ma: Se du ya zo kɔi mɛ ndo lɛ wele ti kpɛngɔ kpɛ a ta ligɛrɛ lo ti ko, ta ni fa ya lo ti ndani ma, wa ta lo na diringɔ gesi ti nɛngɔ ya lo di banda kpɛ fãni mɛndɛ̃ ma. Kwɛ kɔi se du ya ta mɔ ndo koka ziangɔ seliye kɔi ti siɔni ma ko, ta ni fa ya mɔ ha ziangɔ ni gba ma. Mɔ lengbi ti dungɔ na dengɔ bɛ na lo ti ge ge ge mɛ mɔ ndo li. Na ngoi mɛ mɔ ndo li kpengbani ti ziangɔ seliye kɔi ti siɔni la ta mɔ ndo koka ma ko, ta mɔ nzɛ̃ ma. Ni fa ya mɔ ndo li kpengbani ya mɔ gwe uzu. Ta mɔ nzɛ̃ ma! Yehova na zangɔ mɔ ya mɔ zia seliye ti siɔni.
AZI MƐNDƐ̃ NDO TƐNƐ YA: “Mbi mɛsɛnɛ tɛ mbi na ni, mbi ha ziangɔ ni gba.”
-
Vɛrsɛ mɛ mɔ lengbi ti fangɔ na lo ya Yehova lengbi ti zangɔ lo ya lo zia seliye ti siɔni nɛ?
NA NDUNU NI
E ndo hɛ̃ Yehova gonda na ngoi mɛ e du vuruni na tɛrɛ e, bingangɔ li tɛ e nga na seliye tɛ e.
Bozongeli
-
Nda mɛ dungɔ vuruni du ngbondoni nɛ?
-
Ngasia la mɔ lengbi ti dungɔ vuruni nɛ?
-
Ye mɛ mɔ li ti nɛngɔ ya mɔ bata bingangɔ li nga na seliye tɛ mɔ vuruni nɛ?
AYE MƐNDƐ̃ MƐ MƆ LI
Ye mɛ mɔ lengbi ti lingɔ ti nɛngɔ ya mɔ du vuruni abɛse du ya ta mɔ na faranga gba ma nɛ?
Gi hĩngangɔ ye mɛ mɔ li ti nɛngɔ ya mɔ zia nyɔngɔ manga.
“Ndenge ya kotika likaya” (Lamuká! ti 07/2010)
Gi hĩngangɔ siɔ lo mɛ bangɔ pɔrnografi ndo si na ni.
“Pɔrnografi—Ezali lisano mpamba to pwazɔ?” (Linɔngi ti Sinzili ti 01/08/ 2013)
Ba se mɛndó kɔli kɔi zia seliye tɛ lo ti bangɔ pɔrnografi.
“Ezalaki mpasi natika bomoi na ngai ya kala” (Linɔngi ti Sinzili No. 4 2016)
a Ba bɛli tɛnɛ mɛ “Ndenge ya kotika likaya,” ti eteni aye mɛndɛ̃ mɛ mɔ li mɛ so ya wangɔ mɛ, ti nɛngɔ ya mɔ hĩnga ye mɛ mɔ li wa mɔ zia nyɔngɔ manga.
b Ti nɛngɔ ya zo zia seliye ti lɛngɔ wele na tɛrɛ lo, ti kɔli bere wali ko, ba bɛ li tɛnɛ mɛ “Ndenge ya kotika kosakana na binama ya kobotela.” mɛ kaya buku Mituna oyo Bilenge batunaka—Biyano oyo ebongi, Volumɛ 1, shapitrɛ 25.
