Mmwaanyiherye maayi yoowo onamurehererya mwanawe wi aye osikola. Owo onnaroromela wi oorapa nave wi yoowara awe yooreheryeya phaama. Eyo ennooniherya wi owo onnathokororya ekumi ya mwanawe nave wi onnampwacha. Moolikana, Tiithi ahu oosivela, Yehova, onachuna wi nikhale aweela, omwiilini ni mmeeceloni. Vaavaa nnakhalaahu eesipanti, ninnaphura mukhatiihu ni omuruuhela ncicimiho yene.

1. Nni niwerye hai okhala awela mmukhalelo woomwiilini?

Yehova onaloca wi “mukhale awela.” (1 Pedro 1:16, BNM) Wi nikhale awela, nnaphwanela okhala eesipanti mukhalelo woomwiilini ni mmeecelo. Nnanwerya okhala eesipanti mmukhalelo woomwiilini moorweela wa orapaka, ocapaka soowara, orehererya empa, ecika, ekaaro ni ichu ikina. Nave tho nnanwerya okhaviherya orehererya Empa ahu ya Omwene. Vaava nnatitelelaahu okhala eesipanti omwiilini, ninnamvaha ncicimiho Yehova.—2 Korinto 6:3, 4.

2. Sookhovelela taani saahaala oneeriha okhala ooriipiheya?

Piipiliya onaloca wi ‘niivase wa soothanyeya soothene sa mwiili ni sa munepa.’ (2 Korinto 7:1) Ela enataphulela wi, hiyaano ninniilipiserya wi nsepe echu eri yoothene yaahala onanariha mwiili ahu ni muupuwelo ahu. Nnachuna wi muupuwelo ahu omuhakalaliheke Yehova. Ti nthowa nene nnapakaahu owetha wahu wi nikhooce muupuwelo woonanara. (Salumu 104:34) Hiyaano nnachuna wi masu ahu ekhaleke aweela ni oophwanelela.—Mwaalakhanye Kolosi 3:8.

Ichu taani ikina saahaala oneeriha okhala ooriipiheya omwiilini ni mmeecelo? Ichu ikina inanwerya onanariha mwiili ahu. Ti nthowa nene nihinamulyahu soona, ni olya mirece mikina. Moorweela wa weerano yeeyo, ninnakhalano okumi waphaama nave ninnooniherya ncicimiho ntakhara yamahala ya okumi. Moorweela wa owaniha sookhovelela sooriipiheya ntoko oceha ni woona epwitikiri. (Salumu 119:37; Éfeso 5:5) Ikwaha ikina tahi wookhweya ovootha sookhovelela seiya, nyenya Yehova onanwerya onikhaviherya weerano yeeyo.—Mwaalakhanye Isaiya 41:13.

 OHUSERYA MWAWIISEELA

3. Esipanti yoomwiilini ennavaha ncicimiho wa Yehova

Vaavaa nnaalakhanyaahu malamulo a Yehova vooloca sa nloko na Aisarayeli, ninnahuserya mukhalelo oryaaya woochuneya wa yene wi nloko nawe nikhale na esipanti. Mwaalakhanye Mukwaha 19:10 ni 30:17-19, nave voocharela muthokororye makoho ala:

• Tiheeni soorepa iha inooniheryaaya vooloca sa moonelo wa Yehova vooloca sa esipanti yoomwiilini?

• Sookhovelela taani sinahala wookhaviheryaani nyuwaano okhala eesipanti omwiilini?

Ti woochuneya waavya elukuluku ni opaka wiilipixerya wahu wi nikhale eesipanti omwiilini. Nnanwerya opaka yeela, moohipwacha nipuro nnakhalaahuwo, moohipwacha naari achu ooreela naari oohaawa. Moone EXILEMA, nave voocharela muthokororye nikoho nla:

• Ti mwawihai nnamucicimihaahu Yehova mmuteko woolaleerya vaava nnakhalaahu eesipanti ni ichu sahu?

4. Mvoothe sookhovelela sooriipiheya

Wakhala wi munnalya mirece naari omulya soona, nyuwaano moosuwela mukhalelo oryaaya woovila ovootha yookhovelela yeela yoonanara. Tiheeni enahala okhaviherya? Muupuwele ti mwawiihai yookhovelela yeela enoohoxaayani. Mwaalakhanye Mateu 22:37-39, nave voocharela muthokororye ela: Ti mwawihai omulya soona ni mirece sikina sinapahulaaya . . .

• onthamwene wa muchu ni Yehova?

• emusi ya muchu naari achu onakhaleiyeno vamoha?

Mutikitherye yoolakelela wi nwerye ovootha yookhovelela yoonanara. a Moone EXILEMA.

Mwaalakhanye Filipi 4:13, nave voocharela muthokororye makoho ala:

• Ti mwawiihai ovekela, omuhuserya Piipiliya ni othukumana sineeraaya simukhaviherye muchu ovootha yookhovelela yoonanara?

 5. Nwanihe ni muupuwelo ni sookhovelela soonanara

Mwaalakhanye Kolosi 3:5, nave voocharela muthokororye makoho ala:

• Nnasuwela hai wi woona epwitikiri nari omvonyerya muchu mukina, vamoha ni oceha, iri sookhovelela sooriipiheya vamiithoni va Yehova?

• Nyuwaano munoona wi ti wooweryeya okhala awela mmuupuweloni hiiha ntoko Yehova onaweheryeiye wi nikhale? Ntakhara heeni?

Moone mukhalelo munahalanyu owaniha ni muupuwelo woonanara. Moone EXILEMA.

Yesu aapharihela niphwanaphwaniho wi ooniherye wi nnaphwanela olakelela okhala awela mmeecelo ahu. Mwaalakhanye Mateu 5:29, 30, NN. Nave voocharela muthokororye nikoho nla:

• Yesu haachuna oloca wi nnaphwanela wiiphoreiha mmukhalelo wawooneya, moohiyana nnaphwanela weeravo echu. Ichu taani muchu onaphwaneleiye opaka wi asepe muupuwelo wooriipiheya? b

Waakhanle wi munnawaniha wi mvoothe muupuwelo woonanara, Yehova onnavaha esisapo wiilipiserya wanyu. Mwaalakhanye Salumu 103:13, 14, nave voocharela muthokororye nikoho nla:

• Waakhanle wi mookhalano nikacamiho wi mvoothe yookhovelela yooripiheya, ti mwawihai yoorepa ela enahaalaaya wooceenyeryaani otitelela owaniha?

 MUKWASU

Vaavaa nniilipixeryaahu wi mwiili ahu, muupuwelo ahu ni mukhalelo ahu okhale waweela, ninnamuhakalaliha Yehova.

Makoho awuuluulela

• Ntakhara heeni oryaaya woochuneya okhala awela?

• Muni nwerye hai okhala aweela omwiilini?

• Ti mwawihai muneeraanyu mukhapelele saweera sanyu ni muupuwelo anyu wi sikhale saweela?