San xkonnemili tlenon kichiua se nantli ijkuak ikoneuj yauj onnomachtia escuela. Yejua kita tla ikoneuj yonalti niman tla chipauak itlaken. Niman pampa yejon nantli ijkon kichiua, yejon konetl xkualo niman oksekimej kitaj ika itajuan kitlasojtlaj. ToTajtsin Jehová, akin techtlasojtla, noijki kineki matichipaujkej ipan totlalnakayo niman ipan tonemilis. Ijkuak tichipaujkej, kuajli tinemij niman oksekimej kuajli tlajtouaj itech Jehová.

1. ¿Kenijki uelis tichipaujkej yeskej?

Jehová kijtoua: “Nemejuamej xchipajtiakan” (1 Pedro 1:16). ToTajtsin kineki matichipaujkej ipan totlalnakayo niman ipan tonemilis. Nochipa noneki taltiskej, tikitaskej ika totlaken machipauak, titlachipauaskej tochan, tikchipauaskej tocarro niman tikitaskej maka san matlaxixinto tochan. Noijki uelis titlapaleuiskej ijkuak nochipauas Kajli kampa tosentlaliaj. Tla tikchiuaj nochi yejuin, oksekimej uelis kiueyiteneuaskej Jehová (2 Corintios 6:3, 4).

2. ¿Tlenon xnoneki tikchiuaskej niman ijkon tichipaujkanemiskej?

Biblia techijlia: “Matochipauakan itech nochi tlen kijtlakoua totlalnakayo niman toespíritu” (2 Corintios 7:1, TNM). Ika yejon, noneki totlajpiyaskej maka tikchiuaskej itlaj tlen makijtlako totlalnakayo noso totlamachilis. Tejuamej tiknekij tikyolpaktiskej Jehová, yejua ika, tokojtiliaj xtiknemiliskej tlen xkuajli noso tlen tsokuiltik (Salmo 104:34). Noijki tokojtiliaj titlajtoskej ijkon ken kiyolpaktia Jehová (xkita Colosenses 3:8).

¿Tlenon más ueliskia kichiuas maka matichipaujkej? Onka seki tlemach tlen ueliskia kijtlakos totlalnakayo. Yejua ika, tejuamej xtikpokij tabaco nion xtikuakuajkuaj on xiujtli tlen itoka coca. Noijki xtikintolouaj noso xtikinmonij pajtin tlen tlapajtijkej xtechinmakaj tlen kanaj xok uelis tikinkajkauaskej niman tlen uelis techijtlakoskej, niman noijki xtikinkuij drogas. Ijkuak tokojtiliaj xtikchiuaskej yejuin, xsan no tejuamej tikchiuaj matikualokan niman tikteititiaj ika tikpatiojkaitaj tonemilis. Aman tej, tejuamej noijki tichipaujkej ipan totlamachilis, ika yejon, xtomajmatokaj, xtikitaj kampa nochiua auilnemilistli niman xtikchiuaj itlaj okse tlen tsokuiltik (Salmo 119:37, TNM; Efesios 5:5). Tla tiknemiliaj ika xkeman uelis tijkajkauaskej tlen tikchiuaj, matikilnamikikan ika Jehová kineki techpaleuis (xkita Isaías 41:13).

 OKSEKI XKASIKAMATI

3. Tikueyiteneuaj Jehová ijkuak tichipaujkej

Ijkuak tikimitaj tlanauatiltin tlen Jehová okinmakaka israelitas, tikasikamatij ika Jehová kineki matichipaujkej. Xkitakan Éxodo 19:10 niman 30:17-19, niman xtlajtokan itech yejuin:

• Ijkon ken kijtouaj yejuin textos, ¿kineki Jehová matichipaujkej? ¿Tlenon techititia ika kineki matichipaujkej?

• ¿Tlenon uelis tikchiuaskej niman ijkon nochipa tichipaujkej yeskej?

Maski nonekis tikxeloskej tiempo niman ijkon tichipaujkej yeskej, melak kuajli tla ijkon tikchiuaj. Tinochimej uelis tichipaujkej yeskej maski san kanon matichantikan, maski tla tikpiyaj tomin noso maski tla xtikpiyaj. Xkitakan VIDEO niman xtlajtokan itech yejuin:

• Tla akin tikinnojnotsaj kitaj ika tichipaujkej, ¿tiknemilia ika yejuin uelis kichiuas makiueyiteneuakan Jehová? ¿Tleka?

4. Matijkajkauakan tlen xkuajli

Tla tejua tipoki, noso tla tikinkui drogas noso tla tikintoloua niman tikinmoni pajtin tlen tlapajtijkej xmitsmakaj, kanaj tikmatstika ika yejuin xuelis nimantsin tijkajkauas. ¿Tlenon uelis mitspaleuis xkajkaua? Tla tejua tiknemilia kenijki mitsijtlakojtika. Xkitakan Mateo 22:37-39, niman xtlajtokan itech kenijki tabaco niman okseki tlemach uelis kichiuas maka kuajli xmouika iuan...

• ... Jehová.

• ... akin ken tikimita niman oksekimej.

Xkita tlenon uelis mitspaleuis xkajkaua itlaj tlen xkuelita Jehová. a Xkitakan VIDEO.

Xkitakan 2 Corintios 4:7 niman xtlajtokan itech yejuin:

• ¿Tiknemilia ika uelis mitspaleuis xkajkaua tlen xkuajli tla tiknotsa toTajtsin, tla timomachtia Biblia niman tla tiauj tlanechikoltin? ¿Tleka ijkon tiknemilia?

 5. Xmokojtili maka tikchiuas nion tiknemilis tlen Jehová xkuelita

Xkitakan Colosenses 3:5 niman xtlajtokan itech yejuin:

• Sekimej kichiuaj tlen tsokuiltik: kitaj kampa nesi kenijki auilnemilo, kichiuaj sexteo b niman nomajmatokaj. ¿Tleka kuajli tikmatstokej ika Jehová xkuelita nochi yejuin?

• ¿Tiknemilia ika kuajli pampa Jehová techtlajtlanilia matichipaujkanemikan? ¿Tleka?

Xkita tlenon uelis mitspaleuis maka xnemili tlen tsokuiltik. Xkitakan VIDEO.

Jesús okiteneuj itlaj tlen techasikamachiltia ika noneki nimantsin tikchiuaskej tlen noneki niman ijkon tichipaujkanemiskej. Xkitakan Mateo 5:29, 30 (TNM), niman xtlajtokan itech yejuin:

• Jesús xokijtosnek tla melauak noneki tokokoskej, yejua okijtosnek ika noneki itlaj tikchiuaskej niman ijkon xok tikchiuaskej tlen Jehová xkuelita. ¿Tlenon uelis tikchiuaskej niman ijkon xtiknemiliskej tlen tsokuiltik? c

Tla timokojtilijtika xtiknemilis tlen Jehová xkuelita, kuajli xmatsto ika yejua kipatiojkaita nochi tlen tikchiujtika. Xkitakan Salmo 103:13, 14 niman xtlajtokan itech yejuin:

• Tla timokojtilijtika xok tikchiuas tlen Jehová xkuelita, ¿tiknemilia ika yejuin textos ueliskej mitspaleuiskej maka xmosiaujkaua? ¿Tleka?

 TLEN OTIUEL

Tikyolpaktiaj Jehová ijkuak tichipaujkej ipan totlalnakayo, ipan totlamachilis niman ipan nochi tlen tikchiuaj.

¿Kenon titlanankiliskia?

• ¿Tleka melak noneki matichipaujkej?

• ¿Tlenon uelis tikchiuaskej niman ijkon tichipaujkej yeskej?

• ¿Tlenon uelis tikchiuaskej niman ijkon tichipaujkej yeskej ipan totlamachilis niman ipan nochi tlen tikchiuaj?