Manamanatu ke he matua fifine fakaalofa hofihofi ne tauteute e tama taane tote haana ke fano he aoga. Eketaha a ia ke koukou e tama ti maopoopo mo e meā e tau mena tui he tama. He taute pihia, to tino malolō e tama mo e kitia he falu kua leveki fakamitaki he tau matua haana a ia. Pihia foki, ko e ha tautolu a Matua fakaalofa ko Iehova kua manako ke meā a tautolu​—ke he tino mo e tau gahua. Ka meā a tautolu, kua aoga ki a tautolu mo e fakaheke a Ia.

1. Maeke fēfē a tautolu ke meā e tau tino?

Tala mai a Iehova: “Kia tapu a mutolu.” (1 Peteru 1:16) Kua matutaki e tapuina ke he meā fakatino mo e mahani. Maeke a tautolu ke meā e tau tino he koukou tumau mo e maopoopo mo e meā e tau mena tui, kaina, mo e peleōafi. Maeke ke lagomatai foki ke fakameā e Fale he Kautu ha tautolu. He leveki e tau tino ke meā, kua fakaheke e tautolu a Iehova.​—2 Korinito 6:3, 4.

2. Ke meā, ko e heigoa e tau aga kua lata a tautolu ke kalo kehe mai?

Tomatoma he Tohi Tapu a tautolu ke “fakamea e tautolu a tautolu ke he tau mena oti ke kelea ai e tino katoa mo e agaga.” (2 Korinito 7:1) Ti eketaha a tautolu ke kalo kehe he ha mena ka takiva e tau tino po ke manamanatuaga ha tautolu. Lata e tau manatu ha tautolu ke fakafiafia a Iehova, ti fakamakamaka a tautolu ke tiaki e tau manatu kelea. (Salamo 104:34) Eketaha foki a tautolu ke meā e tau puhala vagahau.​—Totou Kolose 3:8.

Ko e heigoa foki ka takiva e tau tino po ke tau mahani ha tautolu? Fai mena foki ka hufia e tau tino ha tautolu. Ko e mena ia, kalo kehe a tautolu he tau mena tuga e tapaka, gau he betel nut po ke tau lau coca, mo e fakaaoga fakahanoa he tau tulaki kona. Ka kalo kehe he tau mena nei, to tino malolō a tautolu mo e fakalilifu e mena fakaalofa ko e moui. Eketaha foki a tautolu ke meā e tau mahani he totoko e tau aga kiva he mulumō mo e kitekite e tau fakatino telefua. (Salamo 119:37; Efeso 5:5) Liga uka ke tiaki e tau mahani nei, ka e maeke a Iehova ke lagomatai a tautolu ke kautū.​—Totou Isaia 41:13.

 KUMIKUMI FAKAHOKULO

3. Meā fakatino kua fakalilifu a Iehova

Iloa e tautolu e onoonoaga ha Iehova ke he mahani meā he totou e tau poakiaga haana ki Isaraela i tuai. Totou Esoto 19:10 mo e 30:17-19, ti tutala ke he tau hūhū nei:

• Ko e heigoa he tau kupu nei ne fakakite hagaao ke he onoonoaga ha Iehova ke he meā fakatino?

• Ko e heigoa e tau aga mitaki ka lagomatai a koe ke tumau e meā fakatino?

Ke meā fakatino kua lata ke foaki e magaaho mo e malolō. Ti maeke a tautolu ke taute pihia pete ne matakavi po ke tuaga fakatupe ha tautolu. Tā e VITIŌ, ti tutala ke he hūhū nā.

• Fakalilifu fēfē ke he gahua fakamatala ha tautolu ka maopoopo mo e meā tumau e tau koloa ha tautolu?

4. Tiaki e tau gahua ne takiva e tino

Ka ula tapaka a koe po ke fakaaoga fakahanoa e tau tulaki kona, liga iloa e koe e uka ke tiaki e tau mena ia. Ko e heigoa ka lagomatai? Manamanatu ke he puhala ne hufia a koe he tau mena ia. Totou Mataio 22:37-39, ti tutala ke he lauiaaga he tapaka po ke fakaaoga fakahehē he tau tulaki kona ke he . . .

• fakafetuiaga he tagata mo Iehova.

• magafaoa he tagata mo e falu ne ha ha mo ia.

Taute e fakaholoaga ke tiaki e aga kelea. a Tā e VITIŌ.

Totou 2 Korinito 4:7, ti tutala ke he hūhū nei:

• Lagomatai fēfē he fakaholoaga mitaki he liogi, fakaako Tohi Tapu, mo e fano he feleveiaaga e tagata ke moua e malolō ke tiaki e aga kelea?

 5. Totoko e tau manatu mo e tau gahua fakalialia

Totou Kolose 3:5, ti tutala ke he tau hūhū nei:

• Iloa fēfē e tautolu ko e tau fakatino telefua (pornography), fakafano he tau tala mo e tau ata, po ke tau vitiō he mahani feuaki (sexting), mo e mulumō kua kiva ki mua ha Iehova?

• Manamanatu nakai a koe kua tonu a Iehova ke amanaki ki a tautolu ke meā e tau mahani? Ko e ha?

Fakaako e puhala ke totoko e tau manatu kiva. Tā e VITIŌ.

Fakaaoga e Iesu e fakatai ke fakakite kua lata a tautolu ke eketaha ke fakatumau ke meā e mahani. Totou Mataio 5:29, 30, ti tutala ke he hūhū nei:

• Nakai talahau a Iesu ke fakamamahi e tau tino ha tautolu ka e fakakite e ia kua lata a tautolu ke taute e taha mena. Ko e heigoa e lakaaga pauaki ka taute he tagata ke tiaki e tau manatu nakai meā? b

Ka lali a koe ke totoko e tau manatu nakai meā, kua uho e tau laliaga haau ki a Iehova. Totou Salamo 103:13, 14, ti tutala ke he hūhū nei:

• Ka taufetului a koe mo e aga nakai meā, fakamalolō fēfē he kupu tohi nei a koe ke fakatumau e totoko?

 MANATU KATOA

Fakafiafia e tautolu a Iehova he eketaha ke meā e tau tino, manamanatuaga, mo e tau mahani ha tautolu.

Liu Fakamanatu

• Ko e ha kua aoga lahi ke mahani meā?

• Maeke fēfē a koe ke meā e tino?

• Maeke fēfē a koe ke meā tumau e tau manatu mo e mahani?