Nagana ka mma yo a ratago ngwana wa gagwe yo a mo lokišetšago go ya sekolong. O netefatša gore ngwana yo o hlapile e bile diaparo tša gagwe di hlwekile. Se se dira gore ngwana wa gagwe a phele gabotse mmeleng, e bile batho ba bangwe ba bone gore batswadi ba gagwe ba mo hlokometše. Ka mo go swanago, Tatago rena yo a re ratago kudu e lego Jehofa, o nyaka gore re dule re hlwekile mmeleng le boitshwarong. Ge re dula re hlwekile, go holega rena e bile re dira gore batho ba rete Jehofa.

1. Re ka bontšha bjang gore re hlwekile mmeleng?

Jehofa o re botša gore: “Ebang ba bakgethwa.” (1 Petro 1:​16) Go ba ba bakgethwa go ra gore re swanetše go hlweka mmeleng, dilong tšeo re di naganago, re di bolelago le tšeo re di dirago. Re ka bontšha gore re hlwekile mmeleng ka go dula re hlapa, re hlatswa diaparo tša rena, re hlwekiša magae a rena, e bile re hlatswa dikoloi tša rena. Le gona re swanetše go thuša ge go hlwekišwa Holo ya Mmušo. Ge re dula re hlwekile mmeleng, re tlo dira gore batho ba rete Jehofa.​—2 Bakorinthe 6:​3, 4.

2. Ke mekgwa efe yeo re sa swanelago go e dira e le gore re dule re hlwekile?

Beibele e re eletša gore ‘re itlhwekiše ditšhileng tšohle tša nama le tša moya.’ (2 Bakorinthe 7:1) Se se ra gore re swanetše go dira sohle seo re ka se kgonago gore re se dire dilo tšeo di ka senyago mebele ya rena le menagano ya rena. Dilo tšeo re di naganago di swanetše go thabiša Jehofa. Ka gona, re swanetše go šoma ka thata gore re se nagane dilo tša go se hlweke. (Psalme 104:​34) Le gona, re swanetše go šoma ka thata gore re se ke ra bolela dilo tša go tšwa tseleng.​—Bala Bakolose 3:8.

Ke dilo dife tše dingwe tšeo di ka dirago gore re se ke ra hlweka mmeleng goba boitshwarong? Ga se ra swanela go dira dilo tšeo di ka senyago mebele ya rena. Dilo tša go swana le go tsuba, go tsenya seneifi ka ganong, le go diriša dihlaretagi gampe. Ge re sa dire dilo tše, re tlo phela gabotse mmeleng, ra bontšha le gore re hlompha mpho e botse yeo Modimo a re filego yona ya bophelo. Le gona re leka ka thata gore re se dire mekgwa ya go se hlweke e bjalo ka go fogohla goba go swaraswara ditho tša bong ka morero wa go ikgotsofatša ka tša thobalano (masturbation), le go bogela diswantšho le dibidio tša batho bao ba sa aparago (pornography). (Psalme 119:​37; Baefeso 5:5) Ke nnete gore go ka ba thata go tlogela mekgwa ye, eupša Jehofa a ka re thuša go e tlogela.​—Bala Jesaya 41:​13.

 ITHUTE KA MO GO TSENELETŠEGO

3. Ge re dula re hlwekile mmeleng batho ba tlo reta Jehofa

Ge re bala melao yeo Jehofa a ilego a e fa Baisiraele, re ithuta gore o nyaka gore batho ba gagwe ba hlweke. Balang Ekisodo 19:​10 le 30:17-19, gomme le boledišaneng ka dipotšišo tše di latelago:

• Ditemana tše di re bontšha bjang gore Jehofa o nyaka gore batho ba gagwe ba hlweke mmeleng?

• O ka dira’ng gore o dule o hlwekile mmeleng?

Go nyakega gore re šome ka thata gore re dule re hlwekile mmeleng. Eupša re ka kgona go dula re hlwekile mmeleng go sa šetšwe gore re dula kae, re na le tšhelete goba ga re na yona. Bapalang BIDIO ye, gomme le boledišaneng ka potšišo e latelago:

• Ge re dula re hlwekile mmeleng e bile re hlwekiša le dilo tša rena, seo se tlo dira gore batho bao re ba botšago ditaba tše dibotse ba ikwe bjang ka Jehofa?

4. Šoma ka thata gore o tlogele mekgwa e mebe

Ge e ba o kgoga goba o diriša dihlaretagi gampe (di-drugs) mohlomongwe o ka ba o tseba gore go thata go tlogela mokgwa woo. Bjale o ka thušwa ke’ng gore o o tlogele? Balang Mateo 22:​37-39, gomme le boledišaneng ka taba ya gore ge motho a kgoga goba a diriša dihlaretagi gampe, seo se ka ama bjang . . .

• segwera sa gagwe le Jehofa

• batho ba gabo le batho bao a phelago le bona

Ipotše gore o nyaka go tlogela mokgwa o mobe. a Bapalang BIDIO ye.

Balang Bafilipi 4:​13, gomme le boledišaneng ka potšišo e latelago:

• Go rapela ka mehla, go bala Beibele le go ba gona dibokeng ka mehla go ka re thuša bjang gore re tlogele mekgwa e mebe?

 5. Leka ka thata go tlogela mekgwa e mebe le go nagana dilo tša go tšwa tseleng

Balang Bakolose 3:​5, gomme le boledišaneng ka dipotšišo tše di latelago:

• Re tseba bjang gore Jehofa ga a nyake gore re bogele diswantšho goba dibidio tša batho bao ba sa aparago, go romelana melaetša ya thobalano (sexting), le go fogohla goba go swaraswara ditho tša bong ka morero wa go ikgotsofatša ka tša thobalano?

• O nagana gore Jehofa o a re gatelela ge a re re se ke ra dira dilo tše? Go re’ng o re’alo?

Ekwa gore o ka dira eng gore o tlogele go nagana dilo tša go se hlweke. Bapalang BIDIO ye.

Jesu o boletše papišo yeo e bontšhago seo re swanetšego go se dira gore re dule re hlwekile boitshwarong. Balang Mateo 5:​29, 30, gomme le boledišaneng ka potšišo e latelago:

• Ke nnete gore Jesu o be a sa re gore re ikgobatše mmeleng, eupša o be a e ra gore re swanetše go dira se sengwe gore re dule re hlwekile boitshwarong. Bjale motho a ka dira’ng gore a tlogele go nagana dilo tše di sa hlwekago? b

Ge e ba o leka ka thata go tlogela dilo tše di sa hlwekago, tseba gore Jehofa o ikgantšha ka wena. Balang Psalme 103:​13, 14, gomme le boledišaneng ka potšišo e latelago:

• Ge e ba o thatafalelwa ke go tlogela mokgwa o mobe, lengwalo le le ka go thuša bjang gore o tšwele pele o elwa?

 O ITHUTILE ENG?

Re thabiša Jehofa ge re dula re hlwekile mmeleng, monaganong le boitshwarong.

Dipotšišo

• Ke ka baka la’ng go le bohlokwa gore re dule re hlwekile?

• O ka dira’ng gore o dule o hlwekile mmeleng?

• O ka dira’ng gore boitshwaro bja gago le dilo tšeo o di naganago di dule di hlwekile?