EISHOMO 40
Nitubaasa Kuba Tuta Abeecumi nk’Oku Ruhanga Arikwenda?
Teera akashushani omuzaire arikutebeekanisa omutabani kuza aha ishomero. Naahamya ngu yaanaaba kandi yaajwara ebijwaro ebicumire gye. Eki nikihwera omwana kuguma aine amagara marungi, kandi nikyoreka abandi ngu abazaire be nibamufaho. Na Yehova Tataitwe ow’omu iguru, naayenda ngu tube abeecumi omu by’omubiri n’omu micwe. Obwecumi bwaitu nibutugasira, kandi nibuhaisa na Yehova ekitiinisa.
1. Nitubaasa kuba tuta abeecumi omu by’omubiri?
Yehova naagira ngu twine kuba “abarikwera.” (1 Petero 1:16) Okwera kwine akakwate n’obwecumi bw’aha mubiri n’omu micwe. Nitubaasa kuba abeecumi aha mubiri turikwoga butoosha, turikuboneza emyenda yaitu, amaka gaitu, n’ebiiruka byaitu. Nitubaasa n’okuhwera omu kuboneza Ekyombeko kyaitu ky’Obukama. Twaguma turi abeecumi aha mubiri, nituhaisa Yehova ekitiinisa.—2 Abakorinso 6:3, 4.
2. Kubaasa kuba abeecumi, twine kwetantara mize ki?
Baibuli neetwehanangiriza, ‘kweyozyaho oburofa bwona obw’aha mubiri n’obw’omwoyo.’ (2 Abakorinso 7:1) N’ahabw’ekyo, nituteeraho kwetantara ekintu kyona ekirikubaasa kushiisha omubiri gwaitu nari ebiteekateeko byaitu. Twine kushemeza Yehova omu biteekateeko byaitu, n’ahabw’ekyo nitwetantara kuteekateeka aha bintu bibi. (Zaaburi 104:34) Kandi nitwetantara emigambire mibi.—Shoma Abakolosai 3:8.
Ni bintu ki ebindi ebirikubaasa kuturofahaza omu by’omubiri n’emicwe? Ebintu ebimwe nibibaasa kurofahaza emibiri yaitu. N’ahabw’ekyo, nitwetantara ebintu nk’etaabe, okurya amairungi, okureetsa enjaayi, n’endiijo mibazi y’ekitokooza bwongo. Twayetantara ebintu ebi, nitugira amagara marungi, kandi nitworeka ngu nitugaha ekitiinisa. Kandi nituteeraho kugira emicwe eshemeire turikurwanisa emize mibi nk’okwemarisa, n’okureeba ebirikwitsa enshoni. (Zaaburi 119:37; Abaefeso 5:5) Nikibaasa kutooroba kucwa emize egi, kwonka Yehova naabaasa kutuhwera kugicwa.—Shoma Isaaya 41:13.
SHWIJUMA GYE
Yetegyereze ahabw’enki omuntu yaaba omwecumi omu by’omubiri naahimbisisa Yehova, kandi manya n’oku arikubaasa kusingura emize mibi.
3. Obwecumi omu by’omubiri nibuhaisa Yehova ekitiinisa
Nitubaasa kumanya oku Yehova arikutwara obwecumi turikushwijuma ebiragiro ebi yaahaire Abaisraeli ira. Shoma Okuruga 19:10 na 30:17-19, kubaasa kugarukamu ebibuuzo ebi:
-
Ebyahandiikirwe ebi nibyoreka ngu Yehova naatwara ata okwecuma aha mubiri?
-
Noobaasa kukora ki kuguma ori omwecumi aha mubiri?
Okuba omwecumi aha mubiri nikitwara obwire n’amaani. Kwonka nitubaasa kuba abeecumi hoona ahu turikutuura, yaaba turi abagaiga nari abooro. Zaana VIDIYO, kubaasa kugarukamu ekibuuzo ekirikukurataho.
-
Ebintu byaitu byaguma nibireebeka gye kandi bicumire gye, nituhimbisisa tuta omurimo gwaitu gw’okubuurira?
4. Singura emize mibi
Yehova naabaasa kukuhwera kucwa omuze gwona omubi
Ku oraabe nooreetsa nari otwire nookoresa emibazi y’ekitokooza bwongo, noobaasa kuba noomanya gye oku kigumire kucwa omuze. Niki ekirikubaasa kukuhwera? Teekateeka aha ku omuze gurikukukwataho. Shoma Matayo 22:37-39, kubaasa kwetegyereza oku okukoresa kubi etaabe nari endiijo mibazi kirikushiisha . . .
-
omukago gw’omuntu na Yehova
-
eka y’omuntu n’abantu abandi
Gira eki waakora kucwa omuze mubi. a Zaana VIDIYO.
Shoma 2 Abakorinso 4:7, kubaasa kugarukamu ekibuuzo eki:
-
Okushaba obutoosha, okwega Baibuli, n’okuza omu nteerane, nibibaasa kuhwera bita omuntu kugira amaani g’okusingura omuze mubi?
5. Rwanisa ebiteekateeko n’ebikorwa ebitashemeire
Shoma Abakolosai 3:5, kubaasa kugarukamu ebibuuzo ebi:
-
Nitumanya tuta ngu Yehova naayangira kimwe ebirikwitsa enshoni, okwohererezana obutumwa oburikukwata aha kuteerana, n’okwemarisa?
-
Ahabw’enki nooteekateeka ngu Yehova naayenda ngu tugire emicwe eshemeire?
Yetegyereze oku orikubaasa kusingura ebiteekateeko ebitashemeire. Zaana VIDIYO.
Yesu akakoresa eky’okureeberaho kworeka oku twine kumariirira kuguma turi abashemeire omu micwe. Shoma Matayo 5:29, 30, kubaasa kugarukamu ekibuuzo eki:
-
N’obu Yesu araabe yaabaire atarikumanyisa ngu twine kwereetaho obusaasi aha mubiri, kwonka akooreka ngu twine kugira eki twakora. Omuntu naabaasa kukora ki kwetantara ebiteekateeko bibi? b
Waaba nooteeraho kusingura ebiteekateeko bibi, Yehova naasiima okuteeraho kwawe. Shoma Zaaburi 103:13, 14, kubaasa kugarukamu ekibuuzo eki:
-
Ku oraabe nooteganisibwa omuze mubi, ekyahandiikirwe eki nikibaasa kukuhiga kita kugumizamu noogurwanisa?
Okugaruka enyima tikirikumanyisa ngu oremirwe!
Kyorobi kuteekateeka oti: ‘Ndemirwe, n’ahabw’ekyo nimbaasa n’okubirugaho.’ Kwonka teekateeka ahari eki: Omwiruki yaateera entsibo akagwa, tikirikumanyisa ngu yaaruga omu mpaka, nari ngu aine kutandika busya empaka. Nikyo kimwe, okugaruka enyima tikirikumanyisa ngu omuze mubi gwakusingura. Kandi tikirikwihaho okutunguuka oku waakozire. Nikikira kubaho, kandi nikyoreka ngu oriyo noosingura omuze. Otahanika! Ahabw’obuhwezi bwa Yehova, noobaasa kusingura omuze mubi.
ABAMWE NIBAGIRA NGU: “Omuze gundemeireho. Tindikubaasa kugucwa.”
-
Noobaasa kukoresa kyahandiikirwe ki kuhamiza omuntu ngu ahabw’obuhwezi bwa Yehova naabaasa kucwa omuze mubi?
OMU BUGUFU
Nitushemeza Yehova twaguma tushemeire omu mibiri yaitu, emitwarize yaitu, n’ebiteekateeko byaitu.
Okweijutsya
-
Ahabw’enki ni kikuru kuba abeecumi?
-
Noobaasa kuba ota omwecumi aha mubiri?
-
Noobaasa kuguma ota oshemeire omu biteekateeko byawe n’emitwarize yaawe?
JUMBURA EBINDI
Ni bintu ki ebyorobi ebi orikubaasa kukora kuba omwecumi omu by’omubiri n’obu waakuba ori omworo?
Yetegyereze ebi orikubaasa kukora kucwa okureetsa.
Yetegyereze akabi akari omu kwemarisa.
“Ebirikwitsa Enshoni Mbwenu shi Tiby’akabi?” (Omunaara gw’Omurinzi, Agusto 1, 2013)
Manya oku omushaija omwe yaasingwire omuze gw’okureeba ebirikwitsa enshoni.
“Nkasingura Bwanyima y’Okugwa Emirundi Mingi” (Omunaara gw’Omurinzi Na. 4 2016)
a Ekicweka “Oku Orikubaasa Kucwa Okureetsa,” ekiri omuri Jumbura Ebindi omu ishomo eri, nikyoreka ebi omuntu arikubaasa kukora kucwa emize egumire eicwa.
b Kubaasa kutunga obuhwezi bw’okusingura omuze gw’okwemarisa, reeba ekicweka “Nimbaasa Kusingura Nta Omuze gw’Okwemarisa?” omu katabo Eminyeeto Nibabuuza—Eby’okugarukamu Ebirikukora, aka 1, eshuura 25.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
