ƐZUKOALƐDEƐ 40
Kɛ Ɔkɛyɛ Na Yɛ Nwo Ade Wɔ Nyamenle Anye Zo Ɛ?
Dwenle mame mɔɔ lɛ ɛlɔlɛ mɔɔ ɛlɛsiezie ɔ ra kakula nrenyia anwo yeamaa yeahɔ sukulu la anwo nea. Ɔnea kɛ kakula ne ɛbia yɛɛ ye adɛladeɛ nye te na bɛle bɔkɔbɔkɔ. Ɛhye maa kakula ne te kpɔkɛ na ɔmaa awie mɔ nwu kɛ ye awovolɛ ɛlɛnea ye kpalɛ. Zɔhane ala a yɛ ɛlɔlɛ Selɛ Gyihova kulo kɛ yɛ nwo te wɔ nwonane nu nee ɛbɛlabɔlɛ nu a. Saa yɛ nwo te a ɔboa yɛ na ɔwula ye anyunlunyia.
1. Kɛ ɔkɛyɛ na yɛali yɛ nwo eni ɛ?
Gyihova se: “[Yɛyɛ] nwuanzanwuanza.” (1 Pita 1:16) Saa yɛbayɛ nwuanzanwuanza a ɔwɔ kɛ yɛdi yɛ nwo eni na yɛ ɛbɛlabɔlɛ nwo te. Amaa yɛahile kɛ yɛdi yɛ nwo eni la, ɔwɔ kɛ yɛbia dahuu na yɛkɔ zo yɛmaa yɛ adɛladeɛ, yɛ sua nu nee yɛ kale nwo yɛ bɔkɔbɔkɔ. Eza yɛbahola yɛaboa yɛamaa bɛaziezie yɛ Belemgbunlililɛ Asalo ɛkɛ. Saa yɛkɔ zo yɛdi yɛ nwo eni a ɔwula Gyihova anyunlunyia.—2 Kɔlentema 6:3, 4.
2. Subane boni mɔ a ɔwɔ kɛ yɛtwe yɛ nwo yɛfi nwo amaa yɛ nwo ade a?
Baebolo ne tu yɛ folɛ kɛ “yɛwowo yɛ nwo wɔ nwonane nu nee sunsum nu evinli biala anwo.” (2 Kɔlentema 7:1) Ɛhye ati, ɔwɔ kɛ yɛtwe yɛ nwo yɛfi debie biala mɔɔ bazɛkye yɛ sonlabaka ne anzɛɛ yɛ adwenle la anwo. Ɔwɔ kɛ yɛ nzuzulɛ sɔ Gyihova anye, ɔti yɛbɔ mɔdenle kɛ yɛbakpo nzuzulɛ ɛtane. (Edwɛne 104:34) Eza yɛbɔ mɔdenle kɛ yɛbamaa yɛ ɛdendɛlɛ nwo ade.—Kenga Kɔlɔsaema 3:8.
Duzu debie bieko a bahola agua yɛ sonlabaka ne anzɛɛ yɛ ɛbɛlabɔlɛ nwo evinli a? Ninyɛne bie mɔ bahola agua yɛ sonlabaka ne anwo evinli. Ɛhye ati, yɛnno sigalɛte, nyiletane yɛɛ yɛnno nyile yɛnva yɛnlielie yɛ nye. Saa yɛtwe yɛ nwo yɛfi ninyɛne ɛhye mɔ anwo a, ɔmaa yɛte kpɔkɛ na ɔmaa ɔda ali kɛ yɛbu ngoane ahyɛlɛdeɛ ne. Eza yɛbɔ mɔdenle yɛko yɛtia subane ɛtane le kɛ bɛnwobɔlɛ nee nlanwonvoninli ɛnleanlɛ amaa yɛ ɛbɛlabɔlɛ nwo ade. (Edwɛne 119:37; Ɛfɛsɛsema 5:5) Ɔnla aze kɛ yɛbagyakyi subane ɛhye mɔ, noko Gyihova bahola aboa yɛ yeamaa yɛagyakyi.—Kenga Ayezaya 41:13.
SUKOA DƆƆNWO
Nea kɛzi yɛ nwo te a ɔwula Gyihova anyunlunyia la, na nea kɛzi yɛbahola yɛaho yɛatia subane ɛtane la.
3. Yɛ nwo te a ɔwula Gyihova anyunlunyia
Saa yɛnea mɛla mɔɔ Gyihova vale maanle tete Yizilayɛma la a, ɔmaa yɛnwu kɛzi ɔbu bɔkɔbɔkɔyɛlɛ la. Kenga Ɛzɛdɔso 19:10 yɛɛ 30:17-19, na akee bɛzuzu kpuya ɛhye mɔ anwo:
-
Duzu a tɛkese ɛhye mɔ maa yɛnwu ye wɔ kɛzi Gyihova bu bɔkɔbɔkɔyɛlɛ la anwo a?
-
Duzu a ɛbahola wɔayɛ ye dahuu amaa ɛ nwo ayɛ bɔkɔbɔkɔ a?
Ɔhyia mekɛ nee mɔdenlebɔlɛ na awie anwo ayɛ bɔkɔbɔkɔ. Noko ɔnva nwo ɛleka mɔɔ yɛde anzɛɛ kɛzi yɛ ezukoa gyinlabelɛ de biala la yɛbahola yɛali yɛ nwo eni. Ye VIDIO ne, na akee bɛzuzu kpuya ɛhye anwo.
-
Kɛzi yɛmaa yɛ ninyɛne nwo yɛ bɔkɔbɔkɔ a ɔmaa bɛkanvo yɛ edwɛkɛhanlɛ gyima ne ɛ?
4. Gyakyi subane ɛtane
Gyihova bahola aboa yɛ yeamaa yɛagyakyi subane ɛtane biala
Saa ɛno sigalɛte anzɛɛ ɛno nyiletane ɛfa ɛdielie ɛ nye a, ɛze kɛzi ɔnla aze kɛ ɛbagyakyi subane zɔhane la. Duzu a baboa wɔ a? Dwenle kɛzi mɔɔ ɛyɛ la ka wɔ la anwo. Kenga Mateyu 22:37-39, na akee bɛzuzu kɛzi sigalɛte anzɛɛ nyiletane ɛnlonlɛ ka ɛhye mɔ la anwo:
-
agɔnwolɛvalɛ mɔɔ awie nee Gyihova lɛ la.
-
awie abusua nee menli mɔɔ bikye ye la.
Yɛ ngyehyɛleɛ ko tia subane ɛtane bie. a Ye VIDIO ne.
Kenga Felepaema 4:13, na akee bɛzuzu kpuya ɛhye anwo:
-
Kɛzi awie kɔ zo yɛ asɔne, ɔsukoa Baebolo, na ɔkɔ debiezukoalɛ dahuu a ɔbanyia anwosesebɛ yeava yeagyakyi subane ɛtane bie ɛ?
5. Ko tia nzuzulɛ nee nyɛleɛ ɛtane
Kenga Kɔlɔsaema 3:5, na akee bɛzuzu kpuya ɛhye mɔ anwo:
-
Kɛzi yɛkola yɛnwu kɛ nlanwonvoninli, nla nwo edwɛkɛ mɔɔ bɛfa bɛsɛnde awie wɔ fonu zo yɛɛ bɛnwobɔlɛ le nyɛleɛ mɔɔ anwo ɛnde wɔ Gyihova anye zo ɛ?
-
Ɛnea a ndelebɛbo wɔ nu kɛ Gyihova banlea kɛ yɛ ɛbɛlabɔlɛ nwo bade ɔ? Kɛmɔti ɛ?
Nea kɛzi bɛko bɛtia nzuzulɛ ɛtane la. Ye VIDIO ne.
Gyisɛse yɛle ndonwo vale hilele kɛ ɔwɔ kɛ yɛbɔ mɔdenle amaa yɛ ɛbɛlabɔlɛ nwo ade. Kenga Mateyu 5:29, 30, na akee bɛzuzu kpuya ɛhye anwo:
-
Gyisɛse anga kɛ yɛboda yɛ nwo ɛdeɛ, noko ɛnee ɔlɛkile kɛ ɔwɔ kɛ yɛbɔ nwolɛ mɔdenle. Mɔdenle boni a ɔwɔ kɛ awie bɔ amaa yeahwe ɔ nwo yeavi nzuzulɛ ɛtane nwo a? b
Saa ɛlɛko wɔatia nzuzulɛ ɛtane bie a, nwu ye kɛ Gyihova anye die wɔ mɔdenlebɔlɛ ne anwo. Kenga Edwɛne 103:13, 14, na akee bɛzuzu kpuya ɛhye anwo:
-
Saa ɛlɛko wɔatia nyɛleɛ ɛtane bie a, kɛzi tɛkese ɛhye maa wɔ anwosesebɛ kɛ ɛdoa zo ɛ?
Ɛsia ɛyɛ bieko a mmamaa ɛ sa nu to!
Ɔnyɛ se kɛ ɛbanyia adwenle kɛ, ‘Meangola, ɔti me sa nu ɛdo.’ Noko dwenle ɛhye anwo nea: Saa awie ɛlɛsu ɛnriandilɛ na ɔtɔ aze a, ɔngile kɛ yewe, yɛɛ ɔnle kɛ ɔbɔ ɛnriandilɛ ne abo bieko. Zɔhane ala a ɛsia ɛyɛ debie mɔɔ ɛlɛko wɔatia la bieko a ɔngile kɛ wɔangola nyɛleɛ ɛtane ne gyakyi a. Yɛɛ ɔngile kɛ anyuhɔlɛ mɔɔ wɔnyia ye dɛba la amuala ɛyɛ mgbane. Ɔbahola yeara ye kɛ yɛbayɛ debie mɔɔ yɛlɛko yɛatia la bieko. Mmamaa ɛ sa nu to! Ɔlua Gyihova moalɛ zo, ɛbahola wɔagyakyi nyɛleɛ ɛtane ne.
BIE MƆ KA KƐ: “Yeha me nwo. Mengola ye gyakyi.”
-
Ngɛlɛlera boni a ɛbava wɔaboa ahenle wɔamaa yeanwu kɛ ɔlua Gyihova moalɛ zo ɔbahola yeagyakyi subane ɛtane bie a?
EDWƐKƐ TITILI
Saa yɛkɔ zo yɛmaa yɛ sonlabaka ne, yɛ adwenle nee yɛ ɛbɛlabɔlɛ nwo te a ɔmaa Gyihova anye die.
Ndinu
-
Duzu ati a ɔhyia kɛ yɛmaa yɛ nwo te a?
-
Kɛ ɔkɛyɛ na yɛali yɛ nwo eni ɛ?
-
Kɛ ɔkɛyɛ na wɔ nzuzulɛ nee wɔ ɛbɛlabɔlɛ nwo ade ɛ?
KPONDƐ DƆƆNWO
Saa ɛnlɛ bie bɔbɔ a ninyɛne ngyikyi boni mɔ a ɛbahola wɔayɛ wɔava wɔali ɛ nwo eni a?
Nea ninyɛne mɔɔ ɛyɛ a ɔbamaa wɔagyakyi sigalɛtenlonlɛ la.
Nea mɔɔ nlanwonvoninli ɛnleanlɛ fa ba la.
“Nlanwonvoninli—Ɔboda Anzɛɛ Ɔmboda?” (Ɛzinzalɛ Arane, August 1, 2013)
Nea kɛzi nrenyia bie holale gyakyile nlanwonvoninli ɛnleanlɛ mɔɔ ɛha ɔ nwo la.
“Memkpole Aze Fane Dɔɔnwo Na Yeayɛ Boɛ” (Ɛzinzalɛ Arane No. 4 2016)
a Edwɛkɛ mɔɔ se “Kɛzi Bɛgyakyi Sigalɛtenlonlɛ,” mɔɔ wɔ ɛzukoalɛdeɛ ɛhye Kpondɛ Dɔɔnwo foa ne la kilehile ninyɛne mɔɔ awie bahola ayɛ amaa saa subane ɛhye bie ɛha ɔ nwo a yeahola yeagyakyi la anu.
b Amaa wɔanyia debie mɔɔ baboa wɔ yeamaa wɔagyakyi bɛnwobɔlɛ la, nea “Kɛ Ɔkɛyɛ Na Meali Bɛnwobɔlɛ Zo Konim Ɛ?” mɔɔ wɔ buluku ne mɔɔ se Mgbavolɛ Nee Mbɛlɛra Biza Kɛ—Mualɛ Mɔɔ Boa, Foa 1, tile 25 la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
