Naa kɛɛrɛ nu akiiloo ziī ka a gaa kpɛ̄naloo ye gbagbara nwiīnɛɛdam lokwa a kii tɔkpa. A wee muɛ kɔ ye nwiī biramaā sa yaa bɛloo a le ɛɛ. Lo ama wee doo kɔ lo nwiī a le bu nwanaloo, sa pya nɛɛ wee muɛ kɔ ye tɛ le ka aa ye kuūdɛɛ̄loo leere. Bu aba lo sīdee, i wereloo Tɛ Jɛhova gbī kɔ i le ɛɛ bu namloo, bu i ekɛɛrɛ, le bu dogo. Sɔ̄ i le ɛɛ, a dɔbiī i nɛ, e a su ka nua loo Jɛhova.

1. Mɛ sīdee na i dap le ɛɛ bu namloo a?

Jɛhova kɔ i nɛ kɔ: “bɔɔlo ele kaɛ.” (1 Pita 1:16) Lo elu pya nɛɛ a le ɛɛ, i ɛrɛ e’ɛɛ bu namloo, bu ekɛɛrɛ, le bu i dogo. I dap le ɛɛ bu namloo tɛ̄maloo ewee biramaā, log i bɛloo, kwaloo i be, le log loo i fah doo kɔ a ɛɛ. I dapnage sere i Tɔ Nɔnu Buɛ̄-mɛnɛ ɛɛrɛ. Sɔ̄ i bia ɛɛ bu namloo, i su ka nua loo Jɛhova.—2 Pya Kɔrint 6:3, 4.

2. Lo ele ɛɛ, amunu elap na i kiī a?

Baibol yere i mɛm loo kɔ i “loga ilii loo aaloo dɛ̄dɛɛ̄ nu a gbee ekpaloo le edɔɔ̄.” (2 Pya Kɔrint 7:1) Nyɔɔwo, i piiga kaāna lo ekpooraloo aaloo ɛrɛgeba nu egbee i ekpaloo ale i ekɛɛrɛ. Nu i kɛɛrɛ alu lo a nia Jɛhova, nyɔɔwo, i lɛa pɔrɔ pɔrɔ ekɛɛrɛ a naa ɛɛ bu i. (Le-yɔɔ 104:34) I piiganage lo edoo kɔ nu i kɔ alu lo a ɛɛ.—Buū Pya Kɔlɔsi 3:8.

Dɔɔ̄na ena edoo kɔ i aa le ɛɛ bu namloo ale bu i ekɛɛrɛ ani? Ɛrɛ pio nu a dap gbee i ekpaloo. Nyɔɔwo, ii le e’ɔ̄ keekee bee sɔɔ̄, taa bɛtɛl nut ale epānya coca, e ii le esu pya pie a naa bɔloo ale pɔrɔ eyuu pie daānu. Sɔ̄ i kpooraloo lɛɛloo pya nu ama, i ɛrɛ kaāna nwanaloo sa tɔgɛ enwadɛɛ̄ loo dɔɔ̄nu dum Bari i nɛ. Dɔɔ̄na sīdee i piiga lo etɔɔ̄ ɛɛ na kiī pya elap a le doodoo yaɛbaloo aba ii, le ɛp foto ekotɛ̄ nɛɛ. (Le-yɔɔ 119:37; Pya Ɛfɛsɔs 5:5) Dap aga ebe eebah pya pɔrɔ elap ama, mɛ Jɛhova dap i yerebah nɛ.—Buū Aisaia 41:13.

 NƆ YERELOO

3. Tɔɔ̄ ɛɛ bu namloo nɛ ka Jɛhova

Sɔ̄ i buū lok Jɛhova bee nɛ edonyɔɔ Izrɛl, i muɛ kɛ̄ a ye kuī loo doo kɔ pya ye nɛɛ a le ɛɛ. Buū A’aa 19:10 le 30:17-19, lɛɛ o agara pya ebip ama:

• Ena pya dɔ kpa kaɛ ama tɔgɛ akiiloo le ɛɛ bu namloo a?

• Ena edap a yerebah nɛ kɔ o kiisī lo ele ɛɛ a?

Le ɛɛ bu namloo su sɔ̄ le epiaga. Mɛ i dap le ɛɛ kaɛlɛɛ kɛ̄ i tɔɔ̄, kere i lu kporo ale i lu mɛnɛ. Bira lo VIDIO, lɛɛ o agara ebip a nyɔɔnɛ ama.

• Bu mɛ sīdee na sɔ̄ i doo kɔ nu i ɛrɛ a le ɛɛ nɛ ka i tam zue ue a?

4. Ɔbɛ pɔrɔ elap

Lo o wee ɔ̄ sigah ale sɔɔ̄ lo e’ɛā ekpeloo, o dap muɛ kɛ̄ a aga doo lo e’ɔbɛ. Ena edap a yerebah nɛ a? Kɛɛrɛ kɛ̄ ɔ̄’ɔ̄ a ɛrɛ pah nyɔɔ doo. Buū Matiu 22:37-39, lɛɛ o kɔ kɛ̄ ɔ̄ keekee bee sɔɔ̄ ale su pɔrɔ esuu pie daānu ɛrɛ pah nyɔɔ . . .

• gbānialoo nɛɛ ɛrɛ loo Jɛhova.

• ye butɔ le pya dɔɔ̄na a ye tɔɔ̄ waɛloo.

Nɔɔ nu o doo lo ebe eebah pɔrɔ elap. a Bira lo VIDIO.

Buū Pya Filipai 4:13, lɛɛ o agara ebip ama:

• Bu mɛ sīdee na yere kara, nɔ Baibol, le si enɔānu eree sɔ̄ loo dap yerebah nɛ nɛɛ lo ebe eebah pɔrɔ elap a?

 5. Bebeloo pɔrɔ ekɛɛrɛ le pya dogo a naa ɛɛ

Buū Pya Kɔlɔsi 3:5, lɛɛ o agara pya ebip ama:

• Ena anua i suā kɔ ɛp foto ekotɛ̄ nɛɛ, ɛm yereue akiiloo maniakɛ̄, le sɔ̄ nɛɛ dagi baloo aba ɛɛ bee piya kɛ̄dɛɛ̄ Jɛhova a?

• O kɛɛrɛ kɔ a luge nu suānu le loo sɔ̄ Jɛhova i ɛmadɛɛ̄ aābah kɔ i le ɛɛ bu i ekɛɛrɛ ni? Ena anua o kɛɛrɛ doo wo a?

Muɛ kɛ̄ ebe eebah pɔrɔ ekɛɛrɛ doo. Bira lo VIDIO.

Jizɔs bee su edoba kɔā ue lo etɔgɛ kɔ i ɛrɛ edoo dogo bu nwaanwaabah lo ele ɛɛ bu i ekɛɛrɛ. Buū Matiu 5:29, 30, lɛɛ o agara ebip ama:

• Naale nu Jizɔs aa kɔ bu ue ama na bee i yaa muū loo, mɛ aa kɔ alu ebɛɛ̄ kɔ i doo dogo. Ena nɛɛ dap doo bu nwaanwaabah lo ebebeloo pɔrɔ ekɛɛrɛ a? b

Lo o waa bebe lo elɛa pɔrɔ ekɛɛrɛ bu, Jɛhova tɔgɛ nia loo o epiaga. Buū Le-yɔɔ 103:13, 14, lɛɛ o agara ebip ama:

• Lo o gaa bebeloo pɔrɔ elap, bu mɛ sīdee na dɔ kpa kaɛ ama a yere mɛm loo kɔ o kiisī a?

 TƐƐ̄NYƆƆ

I doo kɔ bu Jɛhova a ɛɛ sɔ̄ i sere i ekpaloo, i ekɛɛrɛ, le i dogo ɛɛrɛ.

Ebip Tɛ̄ma Nyɔɔ

• Ena anua alu ebɛɛ̄ lo ele ɛɛ a?

• Bu mɛ sīdee na o dap le ɛɛ bu namloo a?

• Bu mɛ sīdee na o dap doo kɔ o ekɛɛrɛ le o dogo a le ɛɛ a?