LES 40
Con Nos Por Ta Limpi den Bista di Dios?
Imagina bo un mama amoroso preparando su yiu homber pa bay scol. E ta haci sigur cu su yiu a baña y cu su paña ta limpi y nechi. Esaki ta yuda su yiu keda bon di salud y ta mustra otro hende cu su mayornan ta percura bon p’e. Mescos cu un mayor kier pa su yiu ta limpi, nos Tata, Jehova, kier pa nos ta fisicamente y moralmente limpi, esta, limpi den nos manera di pensa, papia y di haci cos. Ora nos ta limpi, nos mes ta beneficia y nos ta duna un bon impresion di Jehova.
1. Con nos por ta fisicamente limpi?
Jehova ta bisa nos: “Boso mester ta santo.” (1 Pedro 1:16) Pa nos por ta santo, nos mester ta fisicamente y moralmente limpi. Nos por ta fisicamente limpi ora nos ta baña regularmente y ora nos ta tene nos paña, cas y vehiculo limpi y nechi. Ademas, nos por yuda tene nos Salon di Reino limpi. Ora nos ta mantene nos mes fisicamente limpi, otro hende lo papia bon di Jehova.—2 Corintionan 6:3, 4.
2. Pa nos ta limpi, ki mal custumber of bicio nos mester evita?
Bijbel ta conseha nos pa “limpia nos mes di tur impureza di carni y di spirito.” (2 Corintionan 7:1) Pues, nos mester evita cualkier cos cu por ta malo pa nos curpa y mente. Nos pensamentonan mester agrada Jehova. Pesey, nos ta haci esfuerso pa rechasa cualkier pensamento inapropia. (Salmo 104:34) Ademas, nos ta haci esfuerso pa no papia palabra malo ni bisa cos ofensivo.—Lesa Colosensenan 3:8.
Kico mas por stroba nos di ta fisicamente y moralmente limpi? Algun substancia por haci nos curpa daño. Pesey, nos no ta uza tabaco, ni droga, ni nos no ta kauw betelnoot (un noot popular na Asia) of blachi di coca, ni nos no ta haci mal uzo di remedi. Ora nos evita e tipo di cosnan aki, nos lo tin un mihor salud y nos lo mustra cu nos ta respeta bida. Ademas, pa nos ta moralmente limpi, nos ta evita practica impuro manera masturbacion y wakmento di pornografia. (Salmo 119:37; Efesionan 5:5) Aunke por ta dificil pa vence e adiccionnan aki, nos por logra cu Jehova su yudansa.—Lesa Isaias 41:13.
KICO MAS NOS POR SIÑA?
Wak con nos por honra Jehova ora nos ta fisicamente limpi y con pa stop cu practica impuro.
3. Ora nos ta fisicamente limpi, nos ta honra Jehova
Ora nos lesa e leynan cu Jehova a duna e nacion di Israel den tempo di Bijbel, nos ta mira cu pa Jehova ta masha importante pa su pueblo ta limpi. Lesa Exodo 19:10 y 30:17-19. Despues, analisa e siguiente preguntanan:
-
Segun e versiculonan aki, kico ta Jehova su punto di bista tocante limpieza fisico?
-
Kico bo por haci regularmente pa keda fisicamente limpi?
Nos mester dedica tempo y energia pa nos por ta fisicamente limpi. Pero nos por haci esey sin importa unda nos ta biba of sin importa si nos ta rico of pober. Pasa e VIDEO. Despues, analisa e siguiente pregunta:
-
Dicon hende cu nos ta predica na dje lo respeta Jehova mas ora nan mira cu nos cosnan ta limpi y nechi?
4. Stop cu bicio
Jehova por yuda nos vence cualkier adiccion
Si bo ta huma of uza droga, kisas bo sa con dificil ta pa stop cu un di e bicionan ey. Kico por yuda bo? Pensa con e bicio ey por afecta bo bida. Lesa Mateo 22:37-39. Despues, analisa con uzo di tabaco of droga ta afecta ...
-
un persona su amistad cu Jehova.
-
un persona su famia y otro hende.
Pensa kico bo por haci pa vence un adiccion. a Pasa e VIDEO.
Lesa Filipensenan 4:13. Despues, analisa e siguiente pregunta:
-
Con oracion, lesamento di Bijbel y asistencia na reunion por duna un persona forsa pa vence adiccion?
5. Lucha contra pensamento y practica impuro
Lesa Colosensenan 3:5. Despues, analisa e siguiente preguntanan:
-
Con nos por sa cu pornografia, sexting b y masturbacion ta impuro den bista di Jehova?
-
Bo ta kere ta rasonabel cu Jehova ta pidi nos pa ta moralmente limpi? Dicon bo ta pensa esey?
Haya sa con bo por lucha contra pensamento impuro. Pasa e VIDEO.
Hesus a uza un ilustracion pa mustra cu nos mester ta determina pa haci tur loke ta necesario pa keda moralmente limpi. Lesa Mateo 5:29, 30. Despues, analisa e siguiente pregunta:
-
Hesus no tabata kiermen cu nos mester haci nos mes daño, sino cu nos mester tuma accion. Kico un persona mester ta determina pa haci pa evita pensamento impuro? c
Si bo ta lucha pa vence pensamento impuro, Jehova ta aprecia bo esfuerso. Lesa Salmo 103:13, 14. Despues, analisa e siguiente pregunta:
-
Si bo ta luchando pa vence un mal custumber, con e texto aki ta anima bo pa sigui lucha?
No entrega! Un recaida no kiermen cu bo a perde e bataya
Ta facil pa pensa: M’a faya atrobe, pues mihor mi entrega. Pero pensa riba esaki: Djis pasobra un coredor a trompica y cay no kiermen cu el a perde e careda, ni cu e mester cuminsa di nobo. Di mes manera, un recaida no kiermen cu bo a perde e bataya pa vence un adiccion. Esaki no kiermen tampoco cu tur e progreso cu bo a haci caba tabata pornada. Ta normal pa haya recaida; esey ta parti di e bataya. Pues, no entrega! Cu yudansa di Jehova, bo por vence bo adiccion.
LOKE HENDE SA BISA: “E ta un adiccion. Mi no por stop.”
-
Ki texto bo por uza pa mustra e persona cu Jehova por yud’e stop cu un adiccion?
RESUMEN
Nos ta agrada Jehova ora nos ta mantene nos curpa y mente limpi y ora nos ta evita practica impuro.
Repaso
-
Dicon ta asina importante pa nos ta limpi?
-
Con bo por ta fisicamente limpi?
-
Kico nos mester haci pa por evita pensamento y practica impuro?
MAS INFORMACION INTERESANTE
Kico ta algun cos simpel cu bo por haci pa ta fisicamente limpi hasta si bo ta pober?
Wak algun sugerencia practico cu por yuda bo stop di huma.
Wak con pornografia ta afecta bo.
“Pornografia Ta Inofensivo of Perhudicial?” (E Toren di Vigilansia di 1 di augustus 2013)
Wak con un homber a logra stop di wak pornografia.
“Mi A Faya Hopi Biaha Prome Cu Mi A Logra” (E Toren di Vigilancia Num. 4 2016)
a Pa haya algun bon sugerencia tocante con pa vence adiccion, bay na “Con Bo Por Stop di Huma?” den e seccion Mas Informacion Interesante di e les aki.
b Sexting ta mandamento di mensahe, potret of video sexual via telefon, tablet of computer.
c Pa haya yudansa pa vence e mal custumber di masturba, wak e topico “Masturbacion—Con Mi Por Resisti Contra e Impulso?” den e buki Loke Hóben Sa Puntra—Kontesta Práktiko, capitulo 26.
You May Also Like
PREGUNTA CU HOPI HENDE SA HACI
Con un Curso di Bijbel cu Testigonan di Jehova Ta Bay?
Pa sigui un curso di Bijbel interactivo gratis cu testigonan di Jehova, bo por uza cualkier traduccion di Bijbel cu bo ta prefera. Sinti bo liber pa invita henter bo famia of amigonan pa join bo.
