Teeçx njĩꞌjaꞌ luuçxkweꞌsx wala peeykãhçxa. Ew nweꞌwena txaꞌwẽy ew pheuꞌjuna. Txãꞌw yũute, txãa luuçxkweyuꞌ ãçaꞌmeena. Açyu vxiteweꞌsx uyuuyã txãa njĩꞌjaꞌ wala ewsatewa. Luuçxkweꞌsx wala peeykãhane jĩn weꞌwneꞌta. Jeuwayuꞌ kwesxꞌtxiꞌs wẽdxçxa çehkne fxiꞌze thãasuꞌ, txãa njĩꞌjaꞌ maꞌwne wẽdxi txaꞌwẽy. Dxus çehksate vxitewa ewneꞌta weꞌwe.

1. ¿Maꞌw yũuçxa kweꞌsx kwekwe çehk yũukx?

Jeuwayuꞌ naꞌjĩꞌk: “Iꞌkweꞌsxaꞌ kĩh pkal yuhwa jiꞌphmeesa myuuwe” (1 Pedro 1:16). Kweꞌsxyuꞌ çehk yũu wẽeçxa yat nawa çehk jiꞌphunaꞌw, athnisa jxuka jiꞌphçxawa çehkçxaçxaa. Kĩh jiꞌphçxawa jxuka çehk jiꞌphuwaꞌjna, Jeuwayuꞌ çehksana. Txaꞌwẽy kweꞌsx yatte pkahkhenisaꞌswa khũkhyaꞌ puꞌçxhithaꞌw vxiteꞌ thegçxa Jeuwaꞌs weçxakahn (2 Korintios 6:3, 4).

2. ¿Çehksa yũu wẽeçxa, kĩh yũuwaꞌj jiꞌphkxthaꞌw?

Dxus eçaꞌ naꞌwku yuꞌkxpeheꞌk: “wala jxpaꞌyakx fxiꞌzewaꞌj jiꞌpthaꞌw, kweꞌsx kakwe maꞌk yuu meeçxaꞌ kweꞌsx ũus maꞌk yuu nawa suwwaꞌjsa yuꞌsaꞌ kaꞌgaꞌjwaꞌj jiꞌphmeethaꞌw” (2 Korintios 7:1). Jeuwaꞌs kaaweçxa wẽeçxa, kweꞌsxyuꞌ kazx yahkxnisaꞌs jxukate yahkxna fxiꞌzewaꞌj jiꞌphmeenetkhaꞌw. Wejx yuhwa çxhãçxha yujuçxa ewmee yahkxnisas ahçewaꞌj jiꞌphnetkhaꞌw (Salmo 104:34). Kĩh weꞌw wẽeçxawa ew çehksaçxan weꞌwna (lẽeywe Kolosenses 3:8).

Kweꞌsx kakwejũ kĩh khũuçxhiꞌjitx wẽjxna ẽsxna çxazxanisa. Yuꞌçeꞌjsa jxkaahmeete yuꞌçe tuudxmeen, txãꞌw yũuçxa kweꞌsx kakweꞌs nweꞌwena ãçaꞌyãmee. Txãꞌw yũute ĩtxi fxiꞌzewaꞌjaꞌs wala respetaynaꞌw. Txaꞌwẽy kazx yũunisas thegwaꞌj jiꞌphmeenetkhaꞌw, txãa kazx yũunisasyuꞌ masturbación vxiteꞌ pornografiana (Salmo 119:37; Efxesios 5:5). Txãꞌw kazxsa jiꞌphuni nvxitwaꞌj wala thẽyna, nawa Jeuwayuꞌ puꞌçxhina nvxihtwaꞌj (lẽeywe Isaías 41:13).

 WEJXKWEÇXA PIYAN UꞌJWEKA

3. Jxuka çehkte Jeuwayuꞌ ewne theguꞌ

Jeuwa israelitasweꞌsxaꞌs kũh jxkaahnisaꞌs nvxihtne çehk ũswaꞌj. Dxus dxiꞌpte wala jxthuhthesa yũuna, çehk yũute. Lẽeywe Éxodo 19:10 vxiteꞌ 30:17-19, txajuꞌ naa paapẽynisatxis paswe:

• ¿Jeuwa kĩh kik yahkx çehksateweꞌsxtxiꞌs?

• Naa versiculotxiꞌs, ¿kĩhka kaapiyaꞌja?, ¿kĩh puꞌçxhiꞌk çehk ũs wẽeçxa?

Vxu jiꞌphsawa vxiteꞌ vxu jiꞌphmeesawa çehk yũuyaꞌ ewuuyã. Txãa VIDEUꞌS thegwe, txajuꞌ naa paapẽynisatxis paswe:

• Çehk ũsçxa vxite nasaweꞌsx uyuuyã. Txãꞌw uꞌjute, ¿maꞌw puꞌçxhiꞌk Jeuwaꞌs jiyukahn?

4. Ewmeesaꞌs nvxihtwe

Juꞌnasaꞌs çxazxayaꞌ piyate wala thẽyna nvxihtwaꞌj. Nawa, ¿kĩh puꞌçxhiꞌk? Yahkxwaꞌj jiꞌphneꞌga, ¿kĩh ewmeesa jxũun paꞌjakx? Txãa ewmeesaꞌs çxazxana ũste. Lẽeywe Mateo 22:37-39, weꞌwyaꞌ ãjaneꞌga wẽjx vxiteꞌ çxazxasa maꞌw suwuukx...

• Jeuwa yakh namiku yũuyaꞌ suwuuna

• yatteweꞌsxaꞌ txaꞌwẽy

Txãa thẽysaꞌs nvxiht wẽeçxa yahkxwaꞌj jiꞌphneꞌga, ¿kĩh yũuyã ãjaguigk? a Txãa VIDEUꞌS thegwe.

Lẽeywe Fxilipenses 4:13, txajuꞌ naa paapẽynisatxis paswe:

• Dxus yakh puutx weꞌwçxa, Dxus yuweꞌs lẽeyna vxiteꞌ yaꞌkhthẽꞌjweꞌsx yakh pkhakhete, ¿maꞌw puꞌçxhiꞌk çxazxasaꞌs nvxiht wẽeçxa?, ¿kĩh yũuçxaga txãꞌw yaatxi?

 5. Ewmee yahkxnisaꞌs vxiteꞌ ewmee vxitnisaꞌs wala puiiwaꞌj jiꞌphneꞌga

Lẽeywe Kolosenses 3:5, txajuꞌ naa paapẽynisatxis paswe:

• Tũpxçxa imagen jxkaahte, pornografía, masturbación, Jeuwa dxiꞌpte wala kazxsana. ¿Txãꞌw maꞌw jiyukxthaꞌw?

• Jeuwayuꞌ idxaꞌs çehkne ũs jxthãasu, ¿idxaꞌ maajĩguigk?, ¿kĩh yũuçxa?

Ayte wejxkwe jiyuyaꞌ ãjaneꞌga, ¿maꞌw kazx yahkxnisaꞌs nvxihtyaꞌ ãjaguigk? Txãa VIDEUꞌS thegwe.

Jesusyuꞌ kaapiyaꞌjne kweꞌsx maꞌw yũuçxa çehk yũuwatewa. Lẽeywe Mateo 5:29, 30, txajuꞌ naa paapẽynisatxis paswe:

• Jesusyuꞌ yaꞌsuwuuꞌj kaahaçmeeneꞌ wejx yuhwa kazx yũunisaꞌsyuꞌ ewte nvxihtwe jĩne. b

Ewmee yahkxnisa yakh puiin ũsga kũh yahkxnu, Jeuwayuꞌ idxaꞌs wala puꞌçxhina. Lẽeywe Salmo 103:13, 14, txajuꞌ naa paapẽynisatxis paswe:

• Naa versiculotxiꞌs, ¿idxaꞌs maꞌw puꞌçxhiꞌk ewmeesaꞌs nvxiht wẽeçxa?, ¿kĩh yũuçxa?

 ¿AYTE PAꞌJ KĨHKXTHAꞌW PIYA?

Kweꞌsx yahkxni kweꞌsx kakwe jxuka çehk ũste, Jeuwayuꞌ weçxane.

¿Kĩh pasuguigk?

• ¿Çehk yũuwaꞌj, kĩh yũuçxa wala jxthuhthekx?

• Çehk ũs wẽeçxa, ¿kĩh yũuwaꞌj jiꞌphkxthaꞌw?

• Kweꞌsx yahkxnisaꞌs vxiteꞌ kĩh yũun ũstewa çehk ũs wẽeçxa, ¿kĩh yũuwaꞌj jiꞌphkxthaꞌw?