Chakapaaj chi riij jenaj tutbʼees kʼahchiʼ rutiqʼaam i ruhalakʼuun reh ojik pan tijinbʼal. Noq xubʼan chik ritiin i ruhalakʼuun saq wach i rusoʼ irukoj reh. Reʼ wilih irubʼan chi maʼ xa reʼyuʼ ta ne inyowabʼjik eh reʼ taqeh kʼachareel ne inkikoj rehtaal chi reʼ taqeh ajabʼees inkaaj wach i kihalakʼuun. Reʼ Qajaaw Jehová iraaj woʼ qawach eh iraaj chi saq wach i qakapebʼaal eh i qatibʼkaal. Mi laʼ saq qawach atoobʼ chi qeh, eh reʼ taqeh kʼachareel holohik ne kiqʼorik chi riij i Dios.

1. ¿Nikʼwach ne inqakʼuhtaaj chi saq qawach?

Reʼ Jehová iruqʼor: «Wih-oq taq asantohiil» (1 Pedro 1:​16). Reh chi wilik qasahtohiil ko ruman chi saq wach i qatibʼkaal eh i qakapebʼaal. Inqakʼuhtaaj chi saq qawach noq inqabʼan qitiin iqal iqal, noq saq wach i qasoʼ, saq wach i qapaat i qacarro eh chi tuslik wach chuʼnchel i wilik qeh. Qojtoobʼinik woʼ, reh rumesariik wach i qayeʼaabʼ reh moloj iibʼ. Mi saq qawach, chuʼnchel i kʼachareel reʼ kiʼilwik qeh ne inkiyeew ruloqʼil i Jehová (2 Corintios 6:3, 4).

2. ¿Ahaʼ wilik taqeh naʼojbʼal eh i bʼanooj maʼ na ta qabʼanam reh chi saq qawach?

Reʼ Santo Laj Huuj iruqʼor: Inchol taq akanaam chuʼnchel i yiibʼ wach naʼojbʼal inchʼuwaʼrisanik wach i tiʼjolal jumpaʼliik, inchʼuwaʼrisanik wach i ánima (2 Corintios 7:1). Ruum aj reʼ inqabʼan chuʼnchel i wilik pan qaqʼabʼ reh chi maʼ ne ta inqabʼan xa chajariik reʼ ne irujotʼ i qatibʼkaal eh i qakapebʼaal. Eh ruum chi inqaaj chi reʼ Jehová suq rukʼux ruuk taqeh inqakapaaj inqachop qakʼux reh chi maʼ ne ta kiʼokik taqeh kapebʼal chʼuwaʼ wach quukʼ (Salmo 104:​34). Eh inqabʼan woʼ chuʼnchel i wilik pan qaqʼabʼ reh chi chuʼnchel i ne inqaqʼor saq oq wach (chawil Colosenses 3:8).

¿Chajariik chik i ne ruchʼuwaʼrisaj wach i qatibʼkaal eh i qakapebʼaal? Juʼjun taqeh iqʼoom irubʼan chi ne inqajotʼ i qatibʼkaal. Ruum aj reʼ, maʼ inqabʼan ta i siikʼ, maʼ inqakʼux ta i xaq marihuana ni xa ta inqajiqʼej tíner, pegamento eh ni xa ta inqakoj taqeh droga. Noq qojelik chuwach taqeh wilih inqakʼax i qakʼachariik eh inqakʼuhtaaj chi inqayeew ruloqʼil i kʼacharik. Reh chi saq wach i qatibʼkaal eh i qakʼapebʼaal inqachop qakʼux chi maʼ ne ta inqabʼan taqeh bʼanooj chʼuwaʼ kiwach jeʼ rukabʼ noq jenoʼ kʼachareel i rukʼoneej eh i rutzʼaʼaj i rukʼachaabʼ (masturbarse) oon rilariik taqeh ehtalil reh kʼachareel tʼuslikeebʼ (pornografía) (Salmo 119:​37; Efesios 5:5). Mareh ne inqakʼaxkileej rukanabʼjiik taqeh bʼanooj wilih xa reʼ laʼ reʼ Jehová ne qojrutobʼeej (chawil Isaías 41:​13).

 CHATZʼIR RIIJ I KʼAHCHIʼ ATIJEM

3. Ruum chi saq wach i qakʼachariik iruyeew ruloqʼil i Jehová

Noq inqil taqeh kʼuhbʼaal xuyeew i Jehová reh i najtir Israel, inqareq chi riij chi reʼ reh iraaj chi saq qawach. Chawil taq i Éxodo 19:​10 eh 30:​17-​19, eh tiqʼoroq taq chi riij:

• Ruum chi reʼ Jehová iraaj chi saq qawach, ¿chajariik irukʼuhtaaj qeh taqeh texto wilih?

• ¿Chajariik tirutobʼeej i hat reh chi saq awach?

Ko ruman chi ne inqisaj qaqʼiij eh ne inqachop qakʼux reh chi saq qawach. Ne irubʼan chi saq qawach atoobʼ ta hoj nebʼaaʼ oon hoj bʼehoom oon xa ahaʼ paʼ qojpatinik. Chawil taq i VIDEO eh tiqʼoroq taq chi riij:

• Wilaʼ reʼ taqeh kʼachareel reʼ inqaqʼor keh i kʼuhbʼaal inkil chi saq wach i qasoʼ eh chuʼnchel i wilik qeh, ¿ruukʼ inkil ne na irubʼan chi ne inkiyeew ruloqʼil i Jehová? ¿Chaaj woʼ reet jeʼ reʼ inakapaaj?

4. Chakanaaʼ taqeh i maʼ holohik ta laj bʼanooj

Mi reʼ hat inabʼan i siikʼ, inajiqʼej tíner, pegamento oon inakʼux droga mareh awehtʼal chi kʼaxik rukanabʼjiik taqeh reʼ. Jenaj chik reʼ ne tirutobʼeej, reʼ chi ne inakapaaj chi riij taqeh kʼaxkilal ne irukʼam cho pan akʼachariik taqeh wilih. Chawil taq i Mateo 22:​37-​39, eh tiqʼoroq taq chi riij nikʼwach ne tirujotʼ rubʼanariik i siikʼ, rujiqʼariik tíner, pegamento, rukʼuxariik droga eh ne woʼ irujotʼ...

• ... awamigohiil ruukʼ i Jehová.

• ... afamilia eh taqeh tokoom.

Chakapaaj chi riij i ne tirutobʼeej reh rukanabʼjiik taqeh maʼ holohik ta laj bʼanooj. a Chawil taq i VIDEO.

Chawil taq i Filipenses 4:​13 eh tiqʼoroq taq chi riij:

• Mi jenoʼ kʼachareel okrinaq chi rubʼanariik rutiij, chi tijinik chi riij i Santo Laj Huuj eh ojik chupaam taqeh moloj iibʼ, ¿inakapaaj na chi reʼ taqeh wilih ne inyeʼwik ransil reh rukanabʼjiik taqeh maʼ holohik ta laj bʼanooj? ¿Chaaj woʼ reet jeʼ reʼ inakapaaj?

 5. Chakansaj taqeh i maʼ holohik ta laj bʼanooj eh taqeh kapebʼinik chʼuwaʼ wach

Chawil taq i Colosenses 3:5 eh tiqʼoroq taq chi riij:

• ¿Nikʼwach qehtʼal chi reʼ rilariik taqeh ehtalil reh kʼachareel tʼuslikeebʼ, qʼorik chi riij i kʼoyomal pan mensaje, eh jeʼ woʼ noq jenoʼ kʼachareel i rukʼoneej eh i rutzʼaʼaj i rukʼachaabʼ, chʼuwaʼ kiwach chuwach i Jehová?

• ¿Inaqʼor na chi holohik irupahqaaj qeh i Jehová chi saq qawach? ¿Chaaj woʼ reet?

Chanabʼeej nikʼwach ne nakansaj taqeh kapebʼinik chʼuwaʼ wach. Chawil taq i VIDEO.

Reʼ Jesús xukoj jenaj ehtalil reh rukʼuhtjiik chajariik naqabʼanam reh chi saq wach i qakʼachariik. Chawil taq i Mateo 5:​29, 30 eh tiqʼoroq taq chi riij:

• Reʼ Jesús maʼ kʼahchiʼ ta naq ruqʼorom chi naqabʼanam i tiʼ qeh, xuqʼor laʼ chi wilik i naqabʼanam reh ruqʼilariik qiibʼ. ¿Chajariik naqabʼanam reh chi maʼ ne ta inqakapaaj taqeh chʼuwaʼ kiwach? b

Wilaʼ reʼ hat kʼahchiʼ chik akanaam taqeh kapebʼinik chʼuwaʼ wach, reʼ Jehová kʼahchiʼ rilom eh looqʼ chi reh chi kʼahchiʼ akojom akʼux reh rukanabʼjiik. Chawil taq i Salmo 103:​13, 14 eh tiqʼoroq taq chi riij:

• Wilaʼ kʼahchiʼ akʼaxkileem rukanabʼjiik i chʼuwaʼ wach bʼanooj, ¿inakapaaj na chi reʼ taqeh versículo wilih ne iruyeew awansil reh rukanabʼjiik? ¿Chaaj woʼ reet inaqʼor?

 KʼOLOQ PAN AKʼUX

Inqasuqbʼisaj rukʼux i Jehová mi saq wach i qakapebʼaal, i qatibʼkaal eh i qabʼanooj.

Reʼ xkahnik pan akʼux

• ¿Chaaj woʼ reet xti ko ruman chi saq qawach?

• ¿Chajariik naqabʼanam reh chi saq wach i qatibʼkaal?

• ¿Chajariik naqabʼanam reh chi saq wach i qabʼanooj eh taqeh qakapebʼaal?