IREN MEHN KASUKUHL 40
Ia Duwen Atail Kak Mwakelekel Mwohn Silangin Koht?
Medewehla nohno limpoak men me kaukaunop nah kisin pwutako ong sukuhl. E tehk mwahu me pwutako duhdu oh eh likou ko soandi mwahu oh mwakelekel. Met kin sewese pwutako en ahneki roson mwahu oh kin kasalehiong meteikan me eh pahpa nohno kin apwalih ih mwahu. Duwehte met, Samatail limpoako, Siohwa, ketin kupwurki kitail en mwakelekel ni paliwar oh pil ni madamadau, koasoi oh wiewia. E kin wia kamwahupatail ni atail kin mwakelekel oh e kin wahdo kaping ong Siohwa.
1. Ia duwen atail kak mwakelekel ni paliwar?
Siohwa ketin mahsanihong kitail: “Kumwail anahne sarawihla.” (1 Piter 1:16) En sarawi kin wehwehki en mwakelekel ni paliwar, madamadau, koasoi oh wiewia. Kitail kak mwakelekel ni paliwar ni atail kin kalapw duhdu oh sang ni atail kin wiahiong atail likou, imwatail oh waratail sidohsa en soandi oh mwakelekel. Kitail pil kak sewese kamwakele Wasahn Kaudok. Kitail kin wahdo kaping ong Siohwa sang ni atail kin mwakelekel ni paliwar.—2 Korint 6:3, 4.
2. Pwe kitail en mwakelekel, wiewia dah kan me kitail anahne soikala?
Paipel kin kangoange kitail en “kamwakeleikitailsang mehkoaros me kin kasaminehla paliwar oh elen madamadau.” (2 Korint 7:1) Kahrehda, kitail kin nantihong soikala mehkoaros me kak kauwehla paliwaratail de atail madamadau. Atail madamadau anahne kaperenda Siohwa, eri kitail en wia uwen atail kak en kesehla madamadau sohte konehng kan. (Melkahka 19:14) Kitail pil kin nantihong soikala lokaia samin kan.—Wadek Kolose 3:8.
Dahme pil kak kasaminehla paliwaratail de atail madamadau, koasoi oh wiewia? Ekei soahng kan kak kasaminehla paliwaratail. Kahrehda, kitail kin soikala soahng kan me duwehte sika, kang pwuh de tehn coca, oh doadoahngki wini en kasahliel kan. Ni atail kin soikala mepwukat, kitail kin ahneki roson mwahu oh kitail kin kasalehda atail wauneki kisakis en mour. Kitail pil kin nantihong mwakelekel ni atail kin peiong wiewia samin en mwadongki dipwisoun kaparapar oh kilang kilel de kasdo suwed. (Melkahka 119:37; Episos 5:5) E kak apwal en powehdi wiewia pwukat ahpw Siohwa kak ketin sewese kitail powehdi mepwukat.—Wadek Aiseia 41:13.
KALAUDEHLA OMW ESE MET
Sukuhlki dahme kahrehda kitail kin kawauwih Siohwa ni atail kin mwakelekel oh kilang ia duwen atail kak powehdi wiewia samin kan.
3. Mwakelekel ni paliwar kin kawauwih Siohwa
Ni atail kin wadek sapwellimen Siohwa kosonned kan ong wehin Israel, kitail kin sukuhlki uwen eh ketin kesempwalki sapwellime aramas akan en kin mwakelekel. Wadek Eksodus 19:10 oh 30:17-19, oh mwuri koasoiapene peidek pwukat:
-
Dahme ire pwukat kasalehda duwen sapwellimen Siohwa madamadau ong mwakelekel ni paliwar?
-
Dahme ke kak kaukaule wia pwe ken kin mwakelekel ni paliwar?
En mwakelekel ni paliwar kin anahne ahnsou oh nanti laud. Ahpw kitail kak wia met sohte lipilipil ia wasa kitail kin mi ie de ma kitail kepwehpwe de semwehmwe. Kilang KISIN KASDO, oh mwuri koasoiapene peidek wet.
-
Ia duwen atail kin soandi mwahu oh mwakelekel eh kin kawauwih atail doadoahk en kalohk?
4. Kesehla wiewia samin kan
Siohwa kak ketin sewese kitail en powehdi wiewia suwed koaros
Ma ke kin sumwoak de doadoahngki wini en kasahliel kan, mwein ke ese uwen apwal en kesehla wiewia pwukat. Dahme kak sawas? Medewe ia uwen wiewia pwukat eh kin suwed ong uhk. Wadek Madiu 22:37-39, oh mwuri koasoiapene dahme sika de doadoahngki wini en kasahliel kak wiahiong . . .
-
en aramas emen nanpwungmwahu rehn Siohwa.
-
en aramas emen peneinei oh meteikan me mi limwah.
Koasoanehdi en kesehla wiewia suwed ehu. a Kilang KISIN KASDO.
Wadek Pilipai 4:13, oh mwuri koasoiapene peidek wet:
-
Ia duwen kaukaule kapakap, onop Paipel oh iang towehda mihting eh kak kakehlaka aramas emen en powehdi wiewia suwed ehu?
5. Peiong madamadau oh wiewia samin kan
Wadek Kolose 3:5, oh mwuri koasoiapene peidek pwukat:
-
Ia duwen atail ese me kilang kilel de kasdo suwed, sexting b oh mwadongki dipwisoun kaparapar eh samin mwohn silangin Siohwa?
-
Ke leme e pwung Siohwa en ketin kupwurki kitail en mwakelekel ni madamadau oh wiewia? Dahme kahrehda?
Kilang ia duwen omw kak peiong madamadau samin kan. Kilang KISIN KASDO.
Sises ketin doadoahngki karasaras ehu pwehn kasalehda me kitail anahne koasoanehdi teng en kolokolete atail mwakelekel. Wadek Madiu 5:29, 30, oh mwuri koasoiapene peidek wet:
-
Mendahki Sises sohte mahsanih kitail en kamedekihala pein kitail, ahpw dahme e mahsanih kin wehwehki kitail anahne wia mehkot. Dahme aramas emen kak wia pwehn soikala madamadau samin kan? c
Ma ke kin nantihong powehdi omw madamadau samin kan, Siohwa kin ketin kesempwalki omw kin nannanti. Wadek Melkahka 103:13, 14, oh mwuri koasoiapene peidek wet:
-
Ma ke kin nantihong uhdihsang wiewia samin ehu, ia duwen ire wet eh kangoangeiuk en pousehlahte nannanti?
Pwupwudi sohte kin wehwehki lohdier!
E mengei en medewe, ‘I solahr kak, eri I pahn uhdi.’ Ahpw medewehla met: Duwehte sountangatang men me dipekelekel oh pwupwudi, met sohte wehwehki me e luhs nan weiro, de e pil anahne pwurehng tepida. Duwehte met, ni omw pwupwudi met sohte kin wehwehki me ke luhs ni omw nannanti en powehdi wiewia suwed ehu, de pil omw nanti koaros sohla katepe. Pwupwudi kin wiawi, met kisehn omw kin nannanti. Eri, dehr uhdi! Sang ni sapwellimen Siohwa sawas, ke kak powehdi wiewia suwed.
EKEI ARAMAS KIN NDA: “I ahnlahr, I sohte kak uhdi.”
-
Mehnia iren Paipel me ke kak kasalehiong ih, me sang ni sapwellimen Siohwa sawas, e kak uhdihsang wiewia samin ehu?
DAHME KE SUKUHLKIER
Kitail kin kaperenda kupwuren Siohwa ni atail kin wiahiong paliwaratail, atail madamadau oh wiewia kan en kin mwakelekel.
Kousapahl
-
Dahme kahrehda e uhdahn kesempwal en kin mwakelekel?
-
Ia duwen omw kak mwakelekel ni paliwar?
-
Ia duwen omw kak wiahiong omw madamadau oh wiewia kan en kin mwakelekel?
PIL TEHK
Soahng mengei dah kan me ke kak wia mehnda ma ke semwehmwe?
Kilang dahme ke kak wia pwe ken uhdihsang sumwoak.
Tehk kasuwedpen kilang kilel de kasdo suwed.
“Kilel oh Kasdo Suwed —Keper de Sohte Keper?” (Kahn Iroir, August 1, 2013)
Wadek ia duwen emen ohl eh uhdihsang kilang kilel de kasdo suwed.
“I Pwupwudi Pak Tohto Mwohn Ei Pweida” (Kahn Iroir No. 4 2016)
a Oaralap “How to Quit Smoking,” me mi nan Pil Tehk nan iren mehn kasukuhl wet, kawehwehda kahk kan me emen kak wia pwehn kesehla tiahk wet me tengala reh.
b Sexting kin wehwehki doadoahngki cell phone en kadar lokaia, kilel de kasdo samin kan.
c Pwehn sewese powehdi tiahk en mwadongki dipwisou en kaparapar, kilang “How Can I Conquer the Habit of Masturbation?” nan pwuhk en Questions Young People Ask—Answers That Work, Volume 1, irelaud 25.
