40 CAJ YACHACUY
Lapan cawayninchicho limpio cananchitami Dios munan
Juc cuyacoj mamaga wamranta escuelaman mandananpäga armachinraj, ropanta tacshapanraj; micuyninta yanupaptinpis imaycata maylapacurir-raj ruran. Chaynopa amatar cuyacoj cashgan ricacämunmi. Taytalanchi Jehovapis cuyapämashpanchi lapan cawayninchicho limpio cananchita munan. Imaycacho limpio runa carga waquincunapis alitami Jehovapita parlapäcunga.
1. ¿Imacunata rurartaj limpio runa caycanchi?
Jehová Dios cayno nin: “Santu capäcuy” (1 Pedro 1:16). Santo runaga canchi ganra cajcunata mana yarparmi y lapan charashganchicunapis limpio captinmi. Chaymi armacunanchi; wasinchitapis, carrunchitapis limpio charänanchi. Diospa Wasinta pichapacuptinchipis, limpio cashganchita waquincuna ricapäcuptenga Jehovatami alabapäcunga (2 Corintios 6:3, 4).
2. ¿Imacunatataj rurashunchu limpio cayta munarga?
Biblia cayno nin: “Juchata rurarga cuerpunchitapis espïritunchitapis ganratanchimi” (2 Corintios 7:1). Chaymi cuerpunchipis yarpayninchipis limpio cananpäga calpachacunanchirämi. Diosninchi cushishgala cananpäga ni ichiclatapis mana cajcunataga yarpashwanchu (Salmo 104:34). Mana cajcunata parlashwanchu (leiriy Colosenses 3:8).
Cuerpunchicho y yarpayninchicho limpio cayta munarmi cigarrutapis mucanchichu, cucatapis chajchanchichu. Imayca pastillacunatapis munashganchi hora upuylaga upunchichu. Chaycunata mana rurarga saludninchipis ali ricacunga y Jehová cawayta goycalämashganchitapis respetaycäshunmi. ¿Ima mastaj caycan mana ruranapaj? Masturbación a y pornografía b nishgancuna (Salmo 119:37; Efesios 5:5). Chaycunata jaguinapaj sasa captinpis Diosninchega yanapaycalämäshunmi (leiriy Isaías 41:13).
SHUMAJ YACHACURCUNAPAJ
Yachacushun imanotaj Jehová ricacun lapan charashganchicuna limpio captin y imanotaj guepaman jaguishwan ima viciucunatapis.
3. Imanchipis limpio captenga Jehovatami cushichishun
Unay Israel marcanta leycunata Jehová goshganta ricarmi cuentata gocunchi imanirtaj Payga limpio cananchita munan. Leipäcuy Éxodo 19:10 y 30:17-19 y caycunapita parlapacäriy:
-
¿Imatataj Jehovapita yachachimanchi chay mandätucuna?
-
¿Imacunata rurartaj yachacäshun cawayninchicho limpio canapaj?
Imaycacho limpio canapäga calpachacunanchirämi. Rico runa carpis o pobrila carpis, maycho cawacurpis, limpio caytaga puedinchimi. VIDEUTA ricapäcuy y caypita parlapacäriy:
-
Predicashganchi hora imanchipis limpio captenga, ¿manachuraj runacunaga Jehovata masraj reguiyta munanga? ¿Imanir?
4. Lapan mana ali cajcunata jaguiriy
Imayca mana alicunata jaguinapäga Jehovami yanapämäshun.
Cigarrutapis drogatapis jaguinayquipaj sasa captenga, y ima pastillatapis upuyla upuptiquega, shumaj yarpachacuy; cawayniquipäga pasaypa mana alimi chaycunaga. Leipäcuy Mateo 22:37-39 y parlapacäriy imanotaj cigarro mucay o cuca chajchaypis...
-
... Jehovapa amistäninta ograchishunquiman.
-
... familiayquiwan o waquincunawanpis mana ali goyächishunquiman.
Yarpachacuy imacunataj yanapäshunquiman ima viciucunatapis jaguinayquipaj. c VIDEUTA ricapäcuy.
Leipäcuy Filipenses 4:13 y caypita parlapacäriy:
-
Diosta mañacushgan, Bibliata estudiashgan y reuniunman aywashganpis, ¿yanapanmanchuraj viciuncunata pipis jaguinanpaj? ¿Imanirtaj chayta ninqui?
5. Ganra ruraycunapitapis, mana ali yarpaycunapitapis cuidacuy
Leipäcuy Colosenses 3:5 y caycunapita parlapacäriy:
-
¿Imanirtaj ninchi pornografía, masturbación y sexteo d nishgancunaga Jehovapa ricayninpa pasaypa mana ali cashganta?
-
Rurashganchicuna y yarpashganchicuna limpio cananpaj Jehová nimashganchega, ¿alichuraj caycan? ¿Imanir?
Yachacuy melanaypaj yarpaycunapita imano cuidacunayquipaj. VIDEUTA ricapäcuy.
Jesusga tantiachicurganmi mana ali ruraycunata o yarpaycunata jucla ilgächinapaj. Leipäcuy Mateo 5:29, 30 y caypita parlapacäriy:
-
Jesusga manami niycarganchu nawinchita jorgurinapaj o maquinchita cuchucunapaj, payga tantiachicuycargan mana ali ruraycunata ruranapaj yarpaylapis mana yarpänapaj. ¿Imanoraj chayta rurashwan? e
Ganra ruraycunaman mana yarparänayquipaj calpachacuycarga, Jehovaga yanapayculäshunquimi. Leipäcuy Salmo 103:13, 14 y caypita parlapacäriy:
-
Mana ali ruraycunata cacharinayquipaj waran waran calpachacuycarga, ¿leishgayqui versiculucunapis calpata goshunquimanchuraj? ¿Imanir?
¡Guepaman cutiychu! Ishquirpis sharcunquimanmi
Öraga pipis ninman “viciücunata jaguinapäga sasami”. Mä cayman yarparcushun: carreracho correj runaga ishquirirpis sharcunmi ¿au?; manachi guepaman cutingachu yapay carrerata galaycunanpäga. Chay japuyla, gampis ima juchalamanpis ishquishga carga puedinquimi ali cajcunata rurar yapay galaycuyta; aumi, puedinquimi ima viciucunapitapis yarguyta. Juchasaparaj caycarga, öraga pipis ishquinmanmi, pero chayga manami ninanchu guepaman cuticunanpaj. Jehovaga ima ganra ruraycunatapis jaguirinayquipaj yanapäshunquimi.
WAQUINCUNA NIPÄCUN: “Chay viciuläwanchi wanucushäpis”.
-
Chayno parlajcunata Jehovaga yanapanmanmi, ¿Bibliapita maygan textutaraj leipanquiman chayta tantiachinayquipaj?
ICHIC YACHACUY
Cuerpunchipis, yarpayninchipis y ima rurayninchipis limpio captenga, Taytalanchi Jehovaga cushicungami.
Yarpänapaj
-
¿Imanirtaj ali caycan imaycacho limpio carga?
-
¿Imatataj rurashwan lapan charashganchicuna limpio cananpaj?
-
¿Imatataj rurashwan yarpayninchipis y ima rurayninchicunapis imaypis mana ganratacänanpaj?
MASLATA YACHACUNAYQUIPAJ
Imaycayoj mana caycarpis, ¿imacunatataj rurashwan limpio canapaj?
Leiriy imataj yanapäshunquiman cigarro mucayta jaguirinayquipaj.
“¿Imanotaj pipis cigarro mucayta jaguinman?” (¡Ricchayna!, mayo 2010)
Pornografiaga, ¿imamanraj chayachishunquiman?
“Pornografía: ¿alichuraj o mana alichuraj?” (Wilacamoj, 1 agosto quilla, 2013)
Ricäriy imatataj juc runa rurargan pornografiapita libracunanpaj.
“Facil-laga carganchu jaguirinäpaj” (Wilacamoj, núm. 4 2016)
a Chayga olgu cajpis o warmi cajpis, quiquincuna partincunata cutin cutin cupacuptin piwanpis oglanacuycashganno ali ricacunalanpämi.
b Chayga videucunacho o revistacunacho, ganracunata ruraycar galapächula oglanacuycar yargamoj cajcunami caycan.
c “Maslata yachacunayquipaj” cajcho ricäriy “¿Imanotaj pipis cigarro mucayta jaguinman?” nishganta, chayga yanapacun imano ima viciucunatapis jaguinapaj.
d Chayga pipis ganra ruraycunapita mensajicunata o videucunata apachinacäriptinmi.
e Masturbación nishganwan yachacashga carga y chayta jaguiriyta munarga, cay libro Mozo-jipashcuna tapucärin. Shumaj yachachicuycuna, juc caj, nishganpa 25 caj capitulunta ricäriy, titulunga niycan “¿Jaguiyta puedëmanchuraj masturbación ruraycunata?”.
