Juk kuyakoq mamäqa wamran imëpis limpiu kanantam munan, tsëmi escuëlaman ëwanampaq bañatsin y limpiu röpata röpatsin. Tsënö limpiutaqa katsin sänu kananta munar y pëpaq yarpachakurmi. Teytantsik Jehoväpis sirweqninkuna llapanchö limpiu kayänantam munan. Y limpiu kanqantsikta rikarmi jukkunapis Jehoväta alabayanqa, y noqantsikpis kushishqam kawakushun.

1 KAQ: ¿Imakunachötan limpiu kanantsik?

Jehovämi kënö nimantsik: “Qamkunaqa llapanchö[mi] limpiu kayänëki” (1 Pëdru 1:16). Jehovä munanqannö limpiu nuna kanapaqqa röpantsikta, wayintsikta y kaptinqa cärruntsiktapis limpiutam katsinantsik, y kikintsikpis limpium kanantsik. Diosta adorana wayitapis limpiutam katsinantsik. Llapanchö limpiu kashqaqa Jehovätam alabayanqa (2 Corintius 6:3, 4).

2 KAQ: ¿Imakunapitataq cuidakunantsik Jehovä munanqannö limpiu kanapaqqa?

Bibliachömi kënö nin: “Cuerpuntsikta y imanö pensanqantsikta mana limpiu tikratseqkunapita limpiakushun” (2 Corintius 7:1). Tsëmi Teytantsik Jehoväta kushitsinapaqqa cuerpuntsikta mana alli rurëkunapita cuidanantsik, y alli kaqkunata pensanapaqmi kallpachakunantsik (Salmus 104:34). Manam lluta parlanantsiktsu, ni mana allikunata parlanantsiktsu (leyi Colosensis 3:8).

Jehovä munanqannö cuerpuntsik limpiu kanampaqqa manam kukata chaqchanantsiktsu, cigärruta fumanantsiktsu ni drögakunantsiktsu. Tsë mana allikunapita cuidakurqa manam qeshyashuntsu y vïdantsiktam alläpa valorashun. Alläpam cuidakunantsik melanëpaqkunata ruraq o oqllanakur kakuyanqan pornografïa rikëpita y piwampis këta munar partintsikkunata yatapar kakuypita (Salmus 119:37; Efesius 5:5). Kë mana alli rurëkunata dejë mana fäcil kaptimpis, dejanapaq kallpachakushqaqa Jehovämi yanapamäshun (leyi Isaïas 41:13).

 MASLLA YACHAKUSHUN

3 KAQ: Imëkachöpis limpiu kanqantsikqa Jehovätam alaban

Israelïtakunata mandanqankunata leyirmi musyantsik Jehoväqa limpiu kanantsikta munanqanta. Leyiyë Exodu 19:10 y 30:17-19 ima ninqanta y këkunapaq parlayë:

• Kë versïculukunachö ninqannöpis, ¿imanö kanantsiktataq Jehoväqa munan?

• ¿Imatataq ruranantsik limpiu kanapaq?

Llapan kapamanqantsikta limpiu katsinapaqqa tiemputam necesitantsik. Më markapita karpis, rïcu o pobri karpis limpiu kanapaqqa kallpachakunantsikmi. VIDEUTA rikäyë y këpaq parlayë:

• Cösasnintsikkunata limpiu katsinqantsikqa, ¿yanapakunmantsuraq nunakuna Jehoväpaq allita parlayänampaq? ¿Imanir?

4 KAQ: Mana alli rurëkunata dejë

Cigärruta fumë o alcoholta upyë alläpa gustashuptikiqa, capazchi tsëkuna dejanan fäciltsu kanman. Peru tsëkuna mana alli kanqanman pensanqëkim yanapashunki llapanta dejanëkipaq. Leyiyë Mateu 22:37-39 ima ninqanta, y parlayë cigärruta fumë o alcoholta alläpa upyë...

• ... Jehoväwan amïgu kanapaq mana yanapakunqanta.

• ... familiantsikwan y jukkunawan alli kawanapaq mana yanapakunqanta.

Mana alli rurëkunata dejanëkipaq ima yanapashunëkipaq kaqman pensë. a VIDEUTA rikäyë.

Leyiyë Filipensis 4:13 ima ninqanta y këpaq parlayë:

• Mana alli rurëkunata dejanampaq, ¿imanötan juk nunata yanaparqan Jehoväman mañakunqan, Bibliata estudianqan y reunionkunaman ëwanqan?

 5 KAQ: Jehovä melananqan rurëkunapita y pensëkunapita cuidakuy

Leyiyë Colosensis 3:5 ima ninqanta y këkunapaq parlayë:

• ¿Imanötan musyantsik ollquwan warmi oqllanakur këkaqta imachöpis rikäyanqan, qalapächu tomakuykur fötuta pimampis apatsiyanqan y warmiwan o ollquwan këta munar partinkunata yatapäyanqanqa Jehoväpaq melanëpaq kanqanta?

• Melanëpaq rurëkunata mana ruranapaq Jehovä mandakunqanqa, ¿yanapamashwantsuraq? ¿Imanir?

Imaraq yanapashunkiman Jehovä melananqan rurëkunata mana rikänëkipaq. VIDEUTA rikäyë.

Jesusqa clärum entienditsikurqan mana alli rurëkunata dejëta munarqa, imata ruranapaq kaqta. Leyiyë Mateu 5:29, 30 ima ninqanta y këpaq parlayë:

• Jesusqa manam nawintsikta o rikrantsikta rasumpa jipiskir jitarinapaqtsu nirqan, sinöqa mana alli rurëkunata chipyëpa dejanapaqmi. Tsëqa, ¿imatataq ruranantsik Jehovä melananqan rurëkunaman mana pensanapaq? b

Jehovä melananqan rurëkunaman manana pensanëkipaq kallpachakunqëkitaqa Teytantsik Jehovä alläpam valoran. Leyiyë Salmus 103:13, 14 ima ninqanta y këpaq parlayë:

• Capazchi imatapis mana alli rurëta dejanëkipaq kallpachakuykanki. Tsëqa, kë versïculukunachö leyinqantsik, ¿yanapashunkiku kallpachakur sïguinëkipaq? ¿Imanir?

 KËTAM YACHAKURQUNKI

Cuerpuntsik, pensanqantsik y llapan ruranqantsikkuna limpiu kanampaq kallpachakurqa Teytantsik Jehovätam kushitsintsik.

¿Yarpankiku?

• ¿Imanirtan llapanchöpis limpiu kanapaq kallpachakunantsik?

• ¿Imatataq ruranantsik llapanchöpis limpiu kanapaq?

• ¿Imatataq ruranantsik pensanqantsik y llapan ruranqantsikkuna limpiu kanampaq?