Caipi yuyashun. Shuj mamaca cꞌuyaihuanmi paipaj huahuataca escuelaman richun allichicun. Paica paipaj huahua alli cachun, armashca cachun, paipaj ropa limpio cachunmi ricun. Chaita rurashcamantami paipaj huahuaca alli saludta charin. Shujtajcunapish chai mama paipaj huahuamanta preocuparishcatami ricun. Ima shinami yaya mamacunaca paipaj huahuacuna limpio cachun munan. Chashnallatajmi Yaya Jehová Diosca ñucanchij cuerpopi, yuyaipi, ima rurashcacunapi, ima parlashcapi limpio cachun munan. Ñucanchij limpio cashpaca allimi sintirishun. Jehová Diostapishmi jatunyachishun.

1. ¿Imacunallapitaj limpio cana canchij?

Jehová Diosca: “Cancunapish ima jucha illajlla caichij” ninmi (1 Pedro 1:16). Ñucanchijca jucha illaj cangapajmi cuerpopi, yuyaipi, ruraicunapipish limpio cana canchij. Chaimantami siempre armana canchij. Ñucanchij ropatapish, huasitapish, carrotapishmi limpio, ordenadota charina canchij. Chaita rurashpaca limpio cashcatami ricuchishun. Shinallataj Tandanacuna Huasicunata limpiashpami ayudana canchij. Ñucanchijcuna limpio cashcata ricushpaca shujtaj gentecunapishmi Jehová Diosta alabasha ningacuna (2 Corintios 6:3, 4).

2. ¿Ima mapa ruraicunatataj saquina canchij?

Bibliapica: ‘Ñucanchij aichatapish, yuyaitapish mapayachicujtaca tucuita anchuchishunchij’ ninmi (2 Corintios 7:1). Chaimantami ñucanchij cuerpota, ñucanchij yuyaita ama ima dañachun cuidarinchij. Ñucanchij yuyaihuanpish Jehová Diosta cushichisha nishpami, mapa yuyaicunata ama charingapaj esforzarinchij (Salmo 19:14). Shinallataj chuya shimicunahuanmi parlanchij (Colosenses 3:8-ta liyipai).

¿Imacunallataj ñucanchij cuerpota, yuyaitapish mapayachi tucun? Huaquin sustanciacunaca ñucanchij cuerpotami mapayachi tucun. Chaimantami tabacota mana fumanchij, hoja de coca o nuez de areca nishcacunatapish mana cashtunchij. Jambicunatapish mana yangamanta ubyanchijchu. Tucui caicunamanta caruyashpaca ñucanchij saludtami cuidanchij. Ñucanchij causaita respetashcatapishmi ricuchinchij. Shinallataj yuyaipi limpio cangapajca ñucanchij charishcacunata japirishpa mapa cosascunata ama rurangapaj, pornografiata ama ricungapajpishmi esforzarinchij (Salmo 119:37; Efesios 5:5). Cai viciocunata saquina sinchi cajpipish Jehová Diosmi ayudanga (Isaías 41:13-ta liyipai).

 ASHTAHUAN YACHAI

3. Limpio cashpaca Jehová Diostami jatunyachinchij

Israelitacunaman cushca leycunata liyishpami Jehová Diospajca limpio cana importante cashcata intindinchij. Éxodo 19:10 y 30:17-19-ta liyipai. Qꞌuipaca cai catij tapuicunatami yachashun:

• ¿Jehová Diosca limpio canamantaca imatataj yuyan? ¿Cai versocunapica limpio canamantaca imatataj nin?

• ¿Siempre limpio cangapajca imatataj rurana canchij?

Limpios cangapajca tiempo, esfuerzomi minishtirin. Pero maipi causashpapish, charij cashpapish o pobre cashpapishmi limpios cai tucunchij. VIDEOTA ricui. Qꞌuipaca cai catij tapuicunatami yachashun.

• Predicajpi ñucanchij cosascuna limpio cajta ricushpaca, ¿manachu gentecunaca Jehová Diostaca ashtahuan alabangacuna? ¿Imamantataj chashna yuyangui?

4. Mapa ruraicunata saqui

Tabacota fumaj cashpa o drogarij cashpaca cai viciocunata saquina sinchi cashcatachari intindingui. Pero cai viciocunata saquingapajca caicuna canta ima shina llaquichishcatami yuyana cangui. Mateo 22:37-39-ta liyipai. Qꞌuipaca cai catij tapuicunatami yachashun:

• ¿Fumana, drogarinaca Diospaj amigo canamantaca ima shinataj caruyachin?

• ¿Fumana, drogarinaca ima shinataj familiata, shujtaj gentecunatapish llaquichin?

Viciocunata ima shina saquina cashcata yuyai. a VIDEOTA ricui.

Filipenses 4:13-ta liyipai, NWT. Qꞌuipaca cai catij tapuitami yachashun:

• Diosta mañana, Bibliata estudiana, tandanacuicunaman rinaca, ¿ima shinataj viciocunata saquichun ayudan?

 5. Mapa ruraicunata, mapa yuyaicunata saquingapaj esforzari

Colosenses 3:5-ta liyipai. Qꞌuipaca cai catij tapuicunatami yachashun:

• ¿Pornografía, sexteo, quiquin charishcacunata japishpa mapata ruranaca Jehová Diospaj mapa cashcataca ima shinataj yachanchij?

• ¿Jehová Diosca ñucanchij yuyaipi, ñucanchij ruraicunapipish limpio cachunca imamantataj munan?

Mapa yuyaicunata ima shina saquinata yachangapajca VIDEOTA ricui.

Jesusca shuj ejemplohuanmi yuyaipi, ruraicunapipish limpio cangapaj ima rurana cashcata yachachirca. Mateo 5:29, 30-ta liyipai, NWT. Qꞌuipaca cai catij tapuitami yachashun:

• Jesusca ñucanchijllataj dañota rurarichunca mana nicurcachu. Ashtahuanpish mapa yuyaicunamanta anchurina cashcatami nicurca. ¿Mapa yuyaicunata ama charingapajca imatataj rurana canchij? b

Mapa yuyaicunata saquingapaj ña esforzaricujpica, chai esfuerzota ricushpaca Jehová Diosca cushillami sintirin. Salmo 103:13, 14-ta liyipai. Qꞌuipaca cai catij tapuitami yachashun:

• ¿Mapa ruraicunata saquingapaj esforzaricujpica ima shinataj cai versocunaca ayudanga?

 YUYARISHUNCHIJ

Ñucanchij cuerpopi, yuyaipi, ruraicunapi limpio cashpaca Jehová Diostami cushichinchij.

Yuyaringapaj tapuicuna

• ¿Imamantataj limpio cana canchij?

• ¿Limpio cangapajca imatataj rurana canchij?

• ¿Ñucanchij yuyaipish, ñucanchij ruraicunapish limpio cachunca imatataj rurana canchij?