Shuj juyaj mama paibu huahuada escuelamun cachangabu arreglajushcada yuyai. Huahuada armachish limpio ropada churachishmi cachan, shinami sano sintirin y cutishujguna paibu taitamamaguna paimunda preocuparishcada rricullun ayudan. Shinalladimi, juyaj Taita Jehová Diosga, ñucunchi cuerpobi y yuyaigunabish limpios gallun munan. Limpios ganaga ñucunchilladi alli sintirillun y Jehová Diosda jatunyachingabumi ayudan.

1. ¿Imashinadi jucha illaj o limpio gana ganchi?

Jehová Diosga: “Jucha illajmi gana ganguichi” nin (1 Pedro 1:16). Jucha illaj gangabuga, ñucunchi cuerpodash y yuyaigunadashmi limpio charina ganchi. Ñucunchi causaibi limpios gangabuga armana y limpio ropada churarina ganchi, shinalladi huasida y carrodabish limpio y ordenado charina ganchi. Salón del Reinodash limpianami ganchi. Limpios gajpimi cutishujgunash Jehová Diosda jatunyachinga (2 Corintios 6:3, 4).

2. ¿Limpios gangabuga ima mapa cosasgunamundadi caruyana ganchi?

Bibliaga cashnami aconsejan: “Ñucunchi cuerpoda y ñucunchi yuyaigunada mapayachi cosasgunamundaga limpiarina ganchi” ninmi (2 Corintios 7:1). Chaimundami, ñucunchi cuerpoda o yuyaida mapayachi cosasgunamunda caruyana ganchi. Jehová Diosda contentachingabumi, ñucunchi pensamiento limpio gallun mapa yuyaigunamunda caruyangabu esforzarinchi (Salmo 104:34). Shinalladi, ñucunchi shimiun alli cosasgunada parrlangabumi esforzarinchi (Colosenses 3:8-da liyi).

¿Ima cosasgunadi ñucunchi yuyaigunada y cuerpoda mapayachin? Huaquin cosasgunami ñucunchi cuerpoda mapayachi pudin. Por ejemplo, tabacoda chupana, hojas de coca nishcada cashtuna, pastillagunada yangamunda ubiana, drogagunadabish fumana. Cai cosasgunamunda caruyashmi, ñucunchi saludta cuidanchi y causaidabish respetashcada rricuchinchi. Shinalladi, ñucunchi yuyaigunada limpio charingabuga, masturbación nishcamunda y pornografiamunda caruyana ganchi (Salmo 119:37; Efesios 5:5). Cai viciogunada vincinaga shinchimi rricurin, pero Jehovami ayudanga (Isaías 41:13-da liyi).

 CAI TEMAMUNDA MÁS YACHASHUNCHI

3. Limpios gashmi Jehová Diosda jatunyachinchi

Jehová Dios israelitagunamun cushca leygunada liyishmi, limpio causana importante gashcada intindinchi. Éxodo 19:10 y 30:17-19-da liyish, chaimunda parrlaichi:

• ¿Cai versiculogunaga Jehová Dios limpio causallun mandashcamundaga, imadadi yachachin?

• ¿Siempre limpio causangabuga, ima costumbregunadadi charina ganchi?

Charij, pobre o maibi causashash, siempre limpios causangabumi esforzarina ganchi. VIDEODA rricush caimunda parrlaichi:

• Predicacionbi genteguna ñucunchi cosasgunada limpio gashcada rricushaga, ¿Jehová Diosmunda imadadi yuyanga? ¿Imamunda?

4. Viciogunada saqui

Tabaco chupanada, pastillagunada yangamunda ubianada, o drogada fumanada yachashaga, cai viciogunada saquina difícil gashcadaga allimi yachangui. Cai vicioguna canbu saludta dañajushcada yuyanami caida saquillun ayudanga. Mateo 22:37-39-da liyi, jipaga cai tapuigunada contestai:

• ¿Tabaco o drogada chupanaga Jehová Diosmunda caruyachinllu?

• ¿Tabaco o drogada chupanaga familiagunaun o cutishujgunaun alli causallun ayudanllu?

Viciogunada saquingabuga, imada rrurrana gashcada yuyai. a VIDEODA rricui.

Filipenses 4:13-da liyish, chaimunda parrlaichi:

• ¿Diosda mañana, Bibliada estudiana y tandanajuigunamun rrinaga, cai viciogunada vincillun ayudangallu? ¿Imamundadi shina yuyangui?

 5. Na alli yuyaigunada y malo rrurraigunada saquingabu esforzari

Colosenses 3:5-da liyish, chaimunda parrlaichi:

• Pornografiada rricuna, masturbarina, y sexomunda fotogunada o malo mensajegunada cachana, ¿Jehová Diosbu na alli gashcadaga, imashinadi yachanchi?

• ¿Jehová Dios ñucunchi yuyaiguna limpio gallun nish mandashcaga allillu ganga? ¿Imamunda?

Mapa yuyaigunada saquingabu imada rrurrana gashcada yachangabuga, cai VIDEODA rricui.

Jesusga shuj ejemplounmi ñucunchi yuyaigunada cambiangabu esforzarina gashcada yachachirca. Mateo 5:29, 30-da liyish, chaimunda parrlaichi:

• Jesusga viciogunada saquish ñucunchilladi tsugririnada na nircallu, chaibu rrandiga cuidarillunmi mandarca. ¿Mapa yuyaigunamunda jarcaringabuga imadadi rrurrana ganchi? b

Jehová Diosga mapa yuyaigunada saquingabu esforzarijta rricushaga ashcadami valoran. Salmo 103:13, 14-da liyish, chaimunda parrlaichi:

• Mapa yuyaigunada saquingabu esforzarijujpiga, ¿imashinadi cai versiculogunaga ayudai pudin? ¿Imamunda?

 RESUMEN

Ñucunchi comportamiento, cuerpoda y yuyaigunada limpioda charishmi Jehová Diosda contentachinchi.

Repaso

• ¿Limpios ganaga imamundadi importante gan?

• ¿Ñucunchi cuerpoda limpio charingabuga imadadi rrurrana ganchi?

• ¿Ñucunchi yuyaiguna y comportamiento siempre limpios gallunga, imadadi rrurrana ganchi?