Kuyakuq mamaqa warmachan escuelaman rinanpaqmi sumaqta bañachin hinaspapas limpio pachawanmi churan, mamanqa munan warman sano kanantam. Chaynallataqmi taytanchik Diospas munan cuerponchik hinaspa pachanchik limpio kananta. Munantaqmi piensayninchik hinaspa rimayninchikpas allin kananta. Chayna kayqa allinninchikpaqmi hinaspapas taytanchik Jehova Diostam hatunchan.

1. ¿Imanasqam pachanchik hinaspa cuerponchikpas limpio kanan?

Jehova Diosmi niwanchik: “Chuyam kanaykichik”, nispa (1 Pedro 1:16). Chuya kananchikpaqqa mana allinkunataqa manam piensananchikchu nitaq rimananchikchu. Chaymantapas pachanchikpas, cuerponchikpas limpiom kanan, chaymi sumaqta bañakunanchik, pachanchikta taqsakunanchik, wasinchikta pichakunanchik, carronchik kaptinpas sumaqta limpiananchik. Chaynallataqmi huñunakunanchik wasipipas pichaypi yanapakunanchik. Limpio kaptinchikqa taytanchik Jehova Diostam runakuna hatunchanqaku (2 Corintios 6:3, 4).

2. ¿Imakunatam saqinanchik Dios kuyawananchikpaq?

Bibliapim niwanchik: “Chuyanchakusunyá aychanchikpi hinaspa espiritunchikpi”, nispa (2 Corintios 7:1). Chayraykum mana allin kaqkunamantaqa karunchakunchik, hinaspapas Dioswan kuyachikuyta munasqanchikraykum mana allinkunataqa mana piensananchikchu (Salmos 104:34). Chaymantapas qachakunataqa manam rimananchikchu (leey Colosenses 3:8).

Jehova Diosqa sano kananchikta munasqanraykum niwanchik cigarrota mana pitanapaq, cocata mana akunapaq, mana sinkakunapaq hinaspa mana drogakunapaq. Limpio kanapaqqa manataqmi millakuypaq qalalla kaqkunataqa qawananchikchu nitaq qari kayninchikwan utaq warmi kayninchikwan millakuypaq kaqtaqa ruwananchikchu (Salmos 119:37; Efesios 5:5). Wakiqninchikqa ichaya sasachakuchkanchik chaykuna saqiyta, ichaqa Diospa yanapakuyninwanqa saqisunmi (leey Isaias 41:13).

 ASTAWAN YACHAYKUSUN

3. Limpio kananchiktam Diosqa munan

Ñawpaq tiempopi serviqninkunatam Dios kamachirqa limpio kanankupaq. Kunanpas Diosqa hinallam munan limpio kananchikta. Leeychik Exodo 19:10 hinaspa 30:17-19, chaymantañataq qatiqninmanta rimariychik:

• ¿Imaynatam yachanchik Diosqa serviqninkuna limpio kananchikta munasqanta?

• ¿Imakunaman costumbrasqa kaytaq yanapawachwan cuerponchikpi limpio kanapaq?

Pichakunapaqqa hinaspa mayllakunapaqqa tiempochakunanchikmi. Maypiña yachaspapas hinaspa wakchaña kaspapas limpiom kananchik. VIDEOTA qawaykuychik hinaspa qatiqninmanta rimariychik:

• Diosmanta willakuq rispa ima apasqanchikpas limpio kaptinqa, ¿allintachu Diosninchikmanta rimanqaku? ¿Imanasqa?

4. Saqinanchikmi ima viciotapas

Ichapas unayña cocata akusqaykirayku, cigarrota pitasqaykirayku utaq tragota tomasqaykirayku chaykuna saqiytaqa sasachakuchkanki. Ichaqa chaykunata mana saqispaykiqa unquruwaqmi hinaspapas wañuymanmi chayaruwaq. Leeychik Mateo 22:37-39, hinaspa qatiqninmanta rimariychik.

• ¿Vicioyuq kayqa Diosmanta karuncharuwachwanchu? ¿Imanasqa?

• ¿Ayllunchikmanta hinaspa huk runakunamantapas karuncharuwachwanchu?

¿Imataq yanapasunkiman ima viciotapas saqinaykipaq? a VIDEOTA qawaykuychik.

Leeychik Filipenses 4:13 hinaspa qatiqninmanta rimariychik:

• Biblia leey, mañakuy, hinaspa huñunakuykunaman riyqa ¿yanapawachwanchu ima viciotapas saqinapaq? ¿Imanasqam chaynata ninki?

 5. Millakuypaq kaqkunataqa ama piensasunchu nitaq ruwasunchu

Leeychik Colosenses 3:5 hinaspa qatiqninmanta rimariychik:

• ¿Imaynatam yachanchik millakuypaq qalalla kaqkunata qawayqa, celularwan chaykunata apachinakuyqa hinaspa qari kayninchikwan utaq warmi kayninchikwan millakuypaq kaqkunata ruwayqa mana allin kasqanta?

• ¿Piensasqanchikpipas limpio kanapaq Diospa niwasqanchikqa allinninchikpaqchu? ¿Imanasqa?

¿Imam yanapawachwan millakuypaq kaqkunapi mana piensanapaq? VIDEOTA qawaykuychik.

Señorninchik Jesucristom sumaqta yachachirqa mana allinkunata saqinapaqqa ima yanapawananchikmanta. Leeychik Mateo 5:29, 30 hinaspa qatiqninmanta rimariychik:

• Jesusqa manam nichkarqachu ciertonpi makinchikta utaq ñawinchikta hurqukurunapaqchu, aswanqa nichkarqa mana allin ruwasqanchikta saqinapaqmi. Chaynaqa, ¿imakunataq yanapawachwan mana allinkunapi manaña piensanapaq? b

Diosqa kusikunmi mana allin ruwaykunata saqinaykipaq kallpanchakusqaykiwan. Leeychik Salmos 103:13, 14 hinaspa qatiqninmanta rimariychik:

• ¿Leesqanchik yanapasunkimanchu mana allin ruwaykunata saqinaykipaq? ¿Imanasqa?

 YUYARIYKUSUN

Diosqa cuerponchikpipas, pachanchikpipas limpio kananchiktam munan. Payqa manataqmi munanchu mana allinkunata piensananchiktaqa nitaq chaykunamanta rimananchiktaqa.

¿Ima niwaqtaq?

• ¿Imanasqataq limpio kananchik?

• ¿Imakunatam sapa punchaw ruwananchik wasinchikpi hinaspa kikinchikpas limpio kanapaq?

• ¿Imakunataq yanapawachwan millakuypaq kaqkunapi mana piensanapaq hinaspa chaykunaman mana wichiykunapaq?