YACHANA PARTI 40
Jehovahua ñaupacpi limpio angahua imatata rana anchi
Shuc mama paiba llullucu huahuata cuiraushcata yuyai. Mamaga caran punzha, huahuata armachisha, ali tacsashca llachapahuata churachin. Casna cuirasha huiñachiushca huahua sumac ricurin. Runagunaga, mama paihua huahuata llaquisha huiñachiushcata ricungauna. Chasnallata, Jehova, ñucanchita llaquic Yaya ashcamanda, ñucanchi aicha, ñucanchi llachapa churarina, limpio charinauchun munan. Ñucanchi alita yuyasha, alita rimasha, mana uchata rasha causanatas munan. Casna rasha causana, ñucanchiraicu ali man. Runaguna ñucanchita ricusha, Jehovamanda alita yuyangauna.
1. Imashinata limpio ana anchi
Jehova nitucunchi: “Santo aichi” nisha (1 Pedro 1:16, TNM). Santo angahua, ñucanchi aicha, ñucanchi llachapa, huin ñucanchi charishcaguna limpio ana man. Chasnallata, alita rasha causana manchi. Chiraicu, caran punzha armanchi, tacsanchi, huasita pichanchi, canuata, aututahuas alichisha maillanchi. Chasnallata, tandarina huasita pichasha alichisha yanapanchi. Ñucanchi limpio ashcata ricusha, runaguna Jehovata balichingauna imami (2 Corintios 6:3, 4).
2. Jehovahua ñaupacpi alita ricuringahua, ima mana aligunamandata anchurina anchi
Bibliaga nin: “Ñucanchi aicha, ñucanchi shunguhuas, mana uchayuc tucungahua, tucui mana ali ashcamanda anchurina manchi” (2 Corintios 7:1). Chiraicu, ñucanchi aichata, ñucanchi yuyaita huaglichiccunamanda caruyana anchi. Ali yuyaita charisha, Jehovata cushiyachinata munanchi. Chiraicu, irus yuyaigunata anchuchingahua imatas ranchi (Salmo 104:34). Chasnallata, mana iridsata rimasha, sumaglla cuintanchi (Colosenses 3:8ta leipai).
Imata ñucanchi aichata, ñucanchi yuyaita huaglichinata ushan. Ñucanchi aichata huaglichiccunamanda caruyanchi. Chiraicu, tabacota mana chupanchichu, adivinangahua ayahuascata, huanductahuas mana upinchichu. Chimandas, drogata mana chupanchichu. Caigunata mana rasha, ñucanchi aichata cuirashun. Chasnallata, Jehova cushca causaita balichinchi. Jehovahua ñaupacpi alita ricuringahua, mana iridsata rasha causana chanchi. Chiraicu, mana masturbarinchichu. a Chasnallata, pornografiata b mana ricunchichu (Salmo 119:37, Efesios 5:5). Cai mana ali ranagunata saquingahua sinzhi acpihuas, Jehova yanapaihuan saquinata ushashun (Isaias 41:13ta leipai).
CAIMANDA MASTA YACHAI
Ñucanchi aichata, ñucanchi llachapata, ñucanchi charishca cosascunata limpiota charisha, Jehovata balichishcata yachangaraunchi. Chasnallata, mana ali ranagunata imashina saquinata ricungaraunchi.
3. Limpio ashaga Jehovata balichishun
Israel runagunata Jehova mandashca leygunaga, limpio ana balishca ashcata ricuchira. Exodo 19:10 y 30:17-19ta leichi, huasha cai tapuigunamanda cuintanacuichi:
-
Cai versiculoguna nishca shina, limpio anamanda Jehova imatata yuyan.
-
Limpio angahua, imatata rana angui.
Ñucanchi aichata, llachapata, charishca cosascunata limpiota charingahua, tucuita rana anchi. Maibi causashahuas, cullquiyuc o pugri ashahuas, limpio ana manchi. VIDEOTA ricuichi, huasha cai tapuimanda cuintanacuichi:
-
Ñucanchi cosascunata limpio charishcata ricusha, ñucanchi predicashca runaguna Jehovata balichingaunachu. Imahua.
4. Mana ali ranagunata saqui
Jehovaga ima viciogunata saquingahua yanapan.
Can tabacota o drogata chupac ashaga, caita saquingahua sinzhi ashcata yachangui. Cai viciota saquingahua, imashina camba causaita huaglichiushcata yuyari. Mateo 22:37-39ta leichi, huasha cai tapuigunamanda cuintanacuichi:
-
Can tabacota o drogata chupacpi, Jehovahua amigo tucungahua yanapanzhu. Imahuata casna yuyangui.
-
Can tabacota o drogata chupacpi, camba ailluta, shuccunata huaglichingachu. Imahuata casna yuyangui.
Viciota saquingahua, imata ranata yuyai. c VIDEOTA ricuichi.
1 Corintios 10:13ta leichi, huasha cai tapuimanda cuintanacuichi:
-
Diosta mañana, Bibliata estudiana, tandarinama rina, shuc runata viciota saquingahua yanapangachu. Imahuata casna yuyangui.
5. Iridsata rana yuyaigunata saqui
Colosenses 3:5ta leichi, huasha cai tapuigunamanda cuintanacuichi:
-
Pornografiata ricuna, sexteo, d masturbarina imashinata Jehovaraicu mana ali ashcata yachanchi.
-
Iridsata rana yuyaita saqui Jehova nishcaga, cambaraicu ali chan. Imahuata casna yuyangui.
Iridsata rana yuyaita saquingahua imata rana ashcata yachai. VIDEOTA ricuichi.
Jesusca, shuc ejemplohuan, mana ali ranagunata saquingahua imatas rana anguichi nira. Mateo 5:29, 30ta (TNM) leichi, e huasha cai tapuimanda cuintanacuichi:
-
Jesusca maquita, ñahui muyuta surcurina manguichi nisha, mana intindichiurachu. Randi, uchata rana yuyaigunata saquingahua imatas rana manguichi intindichira. Uchata rana yuyaiguna shamucpi dsaslla anchuringahua imatata rana angui. f
Can uchata rana yuyaita saquingahua sinzhita rasha ursaricpiga, Jehova cushiyangami. Salmo 103:13, 14ta leichi, huasha cai tapuimanda cuintanacuichi:
-
Can shuc viciota binsingahua imatas racpiga, cai versiculogunaibi yachachishca ñaupagma catingahua yanapangachu. Imahua.
Ama sambayaichu. Urmashahuas atarina ushangui
Casna imachari yuyangui: “Cutillata uchaibi urmashcani, ña mana mas ushanichu”. Pero caibi yuyari. Shuc callpac runa urmashahuas, callpanata mana saquinzhu. Urmashahuas, callpangahua huashama cutillata mana bulltianzhu. Chasnallata, can uchaibi urmashahuas, viciota binsinata ushangui. Urmashahuas, can tucuita alita rashcata mana saquishcanguichu. Alita ranata munashahuas, imasaibi urmanchi, pero cutillata atarinchi. Sinzhi acpihuas, caran punzha mas alita rasha catingui. Chiraicu, ama sambayaichu. Jehovahua yanapaihuan, mana ali yuyaigunata, mana ali ranagunata saquina ushangui.
MAICANGUNAGA CASNAMI NINAUN: “Cai viciota mana saquina ushanichu”.
-
Bibliamanda ima textohuanda chi runata yachachingui, Jehovahua yanapaihuan ima viciota saquina ushashcata.
IMATA YACHASHCANGUI
Jehovata cushiyachingahua, ñucanchi aichata, ñucanchi yuyaita limpiota charina anchi. Chasnallata, tucuita alita rasha causana anchi.
Yachashcata cuintai
-
Limpio anaga imahuata yapa balin.
-
Ñucanchi aichata, ñucanchi llachapata, ñucanchi charishca cosascunata limpiota charingahua imatata rana anchi.
-
Alita rasha causangahua, uchata rana yuyaita saquingahua, imatata rana anchi.
CANLLATA MASTA YACHAI
Pugri ashahuas limpio angahua, imatata rana anchi.
Tabacota chupanata saquingahua, imata rana ushashcata leipai.
“Tabacota chupanata imashina saquina” (¡Despertad!, mayo de 2010)
Pornografiaga mana ali ashcata yachai.
“Pornografiaga: ali chan o manachu ali an” (La Atalaya, 1 de agosto de 2013)
Shuc runa pornografiata saquingahua imata rashcata yachai.
“Pornografiata ricunata saquiranimi” (La Atalaya, num. 4 2016)
a Masturbacion nishcaga, sapalla ausha, cariga pai charishcata maquihuan cacurisha, huarmihuan aushina sintirina man. Maican huarmigunaga chasnallata ranaun.
b Pornografia nishcaga, carihuan huarmihuan ranacuuccunata ricuna videoguna, fotoguna, uyanaguna o quillcashcaguna manaun. Maican runaguna caigunata ricusha, uyasha o leisha, chasnallata cai irus ranata munarinaun.
c “Canllata masta yachai” nishca cai yachana partibi, “Tabacota chupanata imashina saquina” nishca temaga, tucui sami viciogunata saquingahua yanapanga.
d Sexteo nishcaga, pinganaita fotota o videota lluchulla surcurisha, pariumanda celularhuan o computadorahuan cachanacuna man.
e Mateo 5:29, 30 (TNM): “Chiraicu, camba ali ñahui muyu canda uchaibi urmachicpi, chi ñahuita surcusha caruma ichui. Camba intiru aichata chingachina randiga, shuc ñahui muyullahuan saquirina mas ali an. Chasnallata, camba ali maqui canda uchaibi urmachicpi, chi maquita pullu pitirisha caruma ichui. Camba intiru aichata chingachina randiga, shuc maquillahuan saquirina mas ali an”.
f Masturbacion nishca viciota binsingahua, Lo que los jóvenes preguntan. Respuestas prácticas (volumen 1) nishca librota capitulo 25ta ricui, “¿Podré vencer el hábito de la masturbación?” nishca tema man.
